သတင်းနှင့် လှုပ်ရှားမှုများ

         ( ၆.၈.၂၀၂၅ ) ရက်နေ့တွင် စစ်ကိုင်းတိုင်းဒေသကြီး၊ ကလေးခရိုင်အတွင်း ဟုမ္မလင်းမြို့ပေါ်ရှိ၊ စည်ပင်ဈေးအတွင်း ရောင်းချနေသည့် ဆန်နှင့် ဆန်ထွက်ပစ္စည်း အရောင်းဆိုင်သို့ စားသုံးသူရေးရာဦးစီးဌာနမှ ဦးဆောင်၍ ပူးပေါင်းအဖွဲ့ဖြင့် ကွင်းဆင်းဆောင်ရွက်ခဲ့ကြောင်း သိရှိရပါသည်။

              ထိုသို့ကွင်းဆင်းစစ်ဆေးရာတွင် မြို့နယ်အထွေထွေအုပ်ချုပ်ရေးဦးစီးဌာန၊ ကျန်းမာရေး ဦးစီးဌာန၊ စည်ပင်သာယာရေးကော်မတီနှင့် စားသုံးသူရေးရာဦးစီးဌာနတို့ ပူးပေါင်း၍ စည်ပင်ဈေး အတွင်းရောင်းချနေသည့် ဆန်နှင့် ဆန်ထွက်ပစ္စည်းများ ရောင်းချရာတွင် ဈေးကစားရန် ရည်ရွယ်ချက်ဖြင့် ဆန်များသိုလှောင်ထားခြင်း မပြုလုပ်ရန်၊ ဆန်များချင်တွယ်ရောင်းချရာတွင်လည်း အချင်အတွယ်များအား ပြည့်မှီစွာ ရောင်းချရန်နှင့် ဆန်များ သိုလှောင်ရောင်းချမည်ဆိုပါက My Ro စနစ်ဖြင့် မှတ်ပုံတင် ဆောင်ရွက်နိုင်ရေး ပြောကြားခဲ့ကြောင်း သိရှိရပါသည်။

DOCA (စစ်ကိုင်း)

      ပဲခူးတိုင်းဒေသကြီးဝန်ကြီးချုပ် ဦးမျိုးဆွေဝင်းသည် ဒေသထွက်ကုန်ကြမ်းပစ္စည်းများဖြင့် ကုန်ထုတ်လုပ်မှုမြင့်မားစေရေးအတွက် ဩဂုတ်လ ၆ ရက်နေ့ မွန်းလွဲပိုင်းက တောင်ငူခရိုင်၊ ရေတာရှည် မြို့နယ်အတွင်းရှိ ကုန်ထုတ်လုပ်ငန်းများသို့ကွင်းဆင်းပြီး ပေါင်းစပ်ညှိနှိုင်း ဆောင်ရွက်ပေးပါသည်။

      တိုင်းဒေသကြီးဝန်ကြီးချုပ်သည် ရေတာရှည်မြို့နယ် ရွှေပြည်အေးကျေးရွာရှိ တန် ၁၀၀ ကျ ပျော့ဖတ်စက်ရုံနှင့် စက္ကူအဖြူစက်ရုံ တည်ဆောက်နေမှုကို ကွင်းဆင်းကြည့်ရှု ပြီး ဝါး၊ ကောက်ရိုးပျော့ ဖတ်များဖြင့် စက္ကူထုတ်လုပ်နိုင်ရေးနှင့် ပြည်ပသွင်းကုန်အစားထိုး ဘက်စုံသုံး စက္ကူချောများ လျင်မြန်စွာ ထုတ်လုပ်နိုင်ရေးအတွက် စက်ရုံအမြန်ဆုံး လည်ပတ်နိုင်ရေးအတွက် တာဝန်ရှိသူများနှင့် ပေါင်းစပ်ဆောင်ရွက်ပေးခဲ့ပါသည်။

     ဆက်လက်၍ တိုင်းဒေသကြီးဝန်ကြီးချုပ်သည် ရေတာရှည်မြို့နယ် ကြံသနွယ်ကျေးရွာရှိ  ဟိန်းမုန့်ဖတ်ခြောက်လုပ်ငန်းသို့ သွားရောက်ကြည့်ရှုအားပေးခဲ့ပြီး ဒေသထွက်ကုန်ကြမ်းပစ္စည်းများဖြင့် ကုန်ထုတ်လုပ်မှုတိုးတက်မြင့်မားရေးနှင့် ထုပ်ပိုးစနစ်များ နိုင်ငံတကာအဆင့်မီရေး တာဝန်ရှိသူများနှင့် ပေါင်းစပ်ဆောင်ရွက်ပေးပါသည်။

    ဆက်လက်၍ တောင်နန်ချွန်ကျေးရွာရှိ ဥစားကြက်ကောင်ရေ ၂၀၀၀၀ မွေးမြူရေးနှင့်  အစာစပ်လုပ်ငန်းများသို့ သွားရောက်ကြည့်ရှုအားပေးခဲပြီး ဥစားသုံးမှုဖူလုံစေရေးအတွက် ဥစားကြက် တိုးချဲ့မွေးမြူရေးနှင့် ဒေသထွက်ကုန်ကြမ်းပစ္စည်းအခြေပြု တိရစ္ဆာန်အစာ ထုတ်လုပ်နိုင်ရန် ပေါင်းစပ် ညှိနှိုင်းဆောင်ရွက်ပေးပြီး ဇီဝလုံခြုံမှုကို အလေးထားဆောင်ရွက်ရန် မှာကြားခဲ့ကြောင်း သိရပါသည်။

DOCA(ပဲခူး)

     ညောင်လေးပင်မြို့နယ်သည် ပဲခူးတိုင်းဒေသကြီး အရှေ့ခြမ်း၊ ညောင်လေးပင်ခရိုင်အတွင်းတွင် တည်ရှိပြီး ပင်လယ်ရေမျက်နှာပြင်အထက် (၅၀)ပေအထက်တွင် တည်ရှိသော မြို့နယ်တစ်ခု ဖြစ်ပါသည်။ ညောင်လေးပင်မြို့နယ်၏ အရှေ့ဘက်တွင် ရွှေကျင်မြို့နယ်၊ တောင်ဘက်တွင် ဝေါမြို့ နယ်နှင့် ဒိုက်ဦးမြို့နယ်၊ အနောက်ဘက်တွင် ဒိုက်ဦးမြို့နယ်၊ ကျောက်တံခါးမြို့နယ်နှင့် မြောက်ဘက် တွင် ကျောက်တံခါးမြို့နယ်တို့နှင့် နယ်နိမိတ်ချင်း ထိစပ်လျက်ရှိပါသည်။ ညောင်လေးပင်မြို့နယ်တွင် မြစ်ချောင်းများ ပေါများပြီး ထင်ရှားသောြမစ်မှာ စစ်တောင်းမြစ်ဖြစ်ကာ နောက်ထပ်ထင်ရှားသော ချောင်းများမှာ ရဲနွယ်ချောင်းနှင့် ဘိုင်းဒါးချောင်းတို့ဖြစ်ပါသည်။

          ညောင်လေးပင်မြို့သည် ညောင်လေးပင်ခရိုင်ရုံးများ အခြေစိုက်ရာ မြို့တစ်မြို့ဖြစ်ပြီး ပဲခူးတိုင်းဒေသကြီးမြောက်ပိုင်း စပါးရောင်းဝယ်တင်ပို့ရာ ဗဟိုဌာနတစ်ခုဖြစ်၍ အတော်စည်ကားပြီး  အစိုးရရုံးများ၊ ဌာနဆိုင်ရာရုံးများလည်း တည်ရှိပါသည်။ ညောင်လေးပင်မြို့နယ်တွင် စပါးကို အဓိကထားစိုက်ပျိုးကြသောကြောင့် ဆန်စက်ကြီးများကို လက်ညိုးထိုးမလွဲ တွေ့ရှိနိုင်ပြီး ဆီစက်ကြီးများလည်း တည်ရှိပါသည်။ ညောင်လေးပင်အရှေ့မြို့နယ်များတွင် အများအားဖြင့် ဆန်စပါး ကိုသာ အဓိကစိုက်ပျိုးကြပြီး ညောင်လေးပင်အနောက်ရှိမြို့နယ်များသည် ကုန်းမြင့်ဒေသများ၊ တောင်တန်းဒေသများဖြစ်၍ လယ်ယာအနည်းငယ်သာ လုပ်ကိုင်ကြပါသည်။ ညောင်လေးပင်မြို့နယ် အတွင်းရှိ ရေအရင်းအမြစ်များသည် ရေချိုများဖြစ်သည့်အတွက် သောက်သုံးရေ၊ စိုက်ပျိုးရေတို့အတွက် လွန်စွာအသုံးဝင်ကြောင်း တွေ့ရှိရပါသည်။ ညောင်လေးပင်မြို့နယ်သည် အမှတ်(၁) ပြည်ထောင်စုအဝေးပြေးလမ်းမကြီး ဖြစ်သည့် ရန်ကုန် - တောင်ငူ - မန္တလေး အမြန်လမ်းမကြီးဘေးတွင် တည်ရှိသည့်အတွက် လမ်းပန်းဆက်သွယ်ရေးကောင်းမွန်ကာ စီးပွားရေးအချက်အချာကျသော မြို့နယ်တစ်ခုလည်း ဖြစ်ပါသည်။ ညောင်လေးပင်မြို့နယ်သည် ဆန်၊စပါးစိုက်ပျိုးရေးကို အဓိက စီးပွားရေးအဖြစ် လုပ်ကိုင်ကြသော်လည်း MSMEs လုပ်ငန်းများကိုလည်း လုပ်ကိုင်ကြပါသည်။ 

          ညောင်လေးပင်မြို့နယ်တွင် MSMEs စီးပွားရေးလုပ်ငန်းများစွာ ရှိသည့်အနက်မှ MSMEs လုပ်ငန်းတစ်ခုဖြစ်သည့် နိုင်ငံကျော် “ (ACT) ရှောက်ရည်သစ်သီး ကုန်ထုတ်လုပ်ငန်း ” အကြောင်းကို တင်ပြပါမည်။ “(ACT) ရှောက်ရည်သစ်သီး ကုန်ထုတ်လုပ်ငန်း” ကို ယခင်က ရွှေကျင်မြို့နယ် အတွင်း၌သာ လုပ်ကိုင်ဆောင်ရွက်ခဲ့သော်လည်း ရေကြီးနစ်မြုပ်မှုကြောင့် ညောင်လေးပင်မြို့သို့ ပြောင်းရွေ့ရောက်ရှိလာကြောင်း၊ ယခုအခါ၌ ညောင်လေးပင်မြို့တွင် အခြေကျလုပ်ကိုင်လျက်ရှိကြောင်း၊ ဤလုပ်ငန်းသည် သဘာဝသစ်သီးများဖြင့်သာ ဦးစားပေးလုပ်ကိုင်ဆောင်ရွက်ခြင်းဖြစ်သည့် အတွက်ကြောင့် စားသုံးသူများအတွက် ဘေးအန္တရာယ်မဖြစ်စေခြင်း၊ အနံ့အရသာလည်းကောင်းမွန် သည့်အတွက် လူကြိုက်များပြီး ဈေးကွက်အတွင်း နာမည်တစ်ခုရရှိလာခြင်းဖြစ်ကြောင်း သိရှိရပါသည်။  “(ACT) ရှောက်ရည်သစ်သီး ကုန်ထုတ်လုပ်ငန်း” သည် ညောင်လေးပင်မြို့နယ်၊ ဖအောင်း ကျေးရွာအတွင်းမှ ဖြန့်ချိသော ထုတ်ကုန်တစ်မျိုးဖြစ်ပြီး လူကြိုက်များလှပါသည်။ “ (ACT) ရှောက်ရည်သစ်သီး ကုန်ထုတ်လုပ်ငန်း ” တွင် ကုန်ကြမ်းအဖြစ် ရှောက်သီးကို အဓိကထားအသုံးပြုပြီး အဆိုပါကုန်ကြမ်းကို ရွှေကျင်မြို့နယ်၊ ဘီးလင်းမြို့၊ ကရင်ပြည်နယ် ကြာအင်းဆိပ်ကြီးတို့မှ တစ်ဆင့် ဝယ်ယူကြောင်း သိရှိရပါသည်။ ကုန်ကြမ်းဝယ်ယူရာတွင် ရှောက်သီးလှိုင်လှိုင်ပေါ်ချိန်ဖြစ်သော မိုးတွင်းကာလမှစ၍ ဆောင်းဦးပေါက်ကာလ (ဇူလိုင်လမှ ဒီဇင်ဘာလထိ) ဝယ်ယူစုဆောင်းပြီး အခြားပါဝင်ပစ္စည်းများအဖြစ် ပျားရည်၊ သကြား၊ ဆား၊ ဆေးသကြား စသည့်တို့ကို ဝယ်ယူစုဆောင်း ထားရကြောင်း၊ ရှောက်သီးများအနေဖြင့် မိုးသီးများကိုသာ အသုံးပြုကြောင်း၊ အဘယ်ကြောင့် ဆိုသော် မိုးသီးများသည် နွေသီးများထက် အလုံးပိုကြီးပြီး ရှောက်ရည်ပိုမိုရရှိသည့်အတွက်ဖြစ် ကြောင်း သိရှိရပါသည်။

          ထုတ်လုပ်ပုံအနေဖြင့် ပထမဦးစွာ ရှောက်သီးများကို ရေဖြင့်ပြောင်အောင် ဆေးကြောပြီး ဓားဖြင့်ထက်ခြမ်းခွဲကာ ရှောက်ရည်ညှစ်ထုတ်ရပါသည်။ ညှစ်ပြီးသော ရှောက်ရည်များကို ဇကာဖြင့် စစ်ယူပြီး ရှောက်ပြားရည်ထုတ်ယူနိုင်ရန်အတွက် (သကြား၊ ပျားရည်၊ ရှောက်ချဉ်ရည်) တို့ကို အချိုး အစားညီမျှစွာ ရောစပ်၍ အပူချိန် (၉၀) ဒီဂရီစင်တီဂရိတ်အတွင်း ကျိုချက်ရပါသည်။ ကျိုချက်ပြီးသော ရှောက်ပြားရည်များကို အအေးခံ၊ ပုလင်းသွင်း၊ အဖုံးပိတ်၊ တံဆိပ်ရိုက်နှိပ်ပြီးနောက် ဈေးကွက်အတွင်း ရောင်းချနိုင်ရန်အတွက် အဆင့်ဆင့်ပြုလုပ်ရပါသည်။ ရှောက်ပျားရည်ထုတ်လုပ်ရာတွင် ရှောက်ပျားရည်တစ်ပုလင်းအတွက် ရှောက်သီး (အနု၊ အရင့်၊ အကြီး၊ အသေး) အပေါ်မူတည် ၍ ရှောက်သီး (၇)လုံးမှ (၁၀)ခန့် ကုန်ကျကြောင်း သိရှိရပါသည်။ ထို့နောက် ရှောက်သီးဖတ်များအား ရှောက်သီးဆေးပြား ထုတ်လုပ်ရန်အတွက် (ပျားရည်၊ ဆား၊ ဆေးသကြား) တို့ဖြင့် သမအောင်ရော စပ်၍ ပေါင်းခံခြင်း၊ အခြောက်လှန်းခြင်းများ ပြုလုပ်ပြီး ပုံသဏ္ဍာန်အမျိုးမျိုးဖြစ်သည့် ပျားရည်ဖြင့် နှပ်ထားသော ရှောက်သီးဆေးပြားဘူး၊ ရှောက်ချိုမွှေး၊ ရှောက်ချိုပေါင်း၊ ရှောက်သီးဆေးပြားအမျှင် တို့ကို ထုတ်လုပ်ကြောင်း သိရှိရပါသည်။ လုပ်သားဦးရေအနေဖြင့် (၃၀)ဦးရှိကြောင်း သိရှိရပါသည်။

          ထုတ်လုပ်ပြီးသော ကုန်ချောပစ္စည်းများအား ရန်ကုန်၊ ပဲခူး၊ မန္တလေး၊ နေပြည်တော် စသည့် မြို့ကြီးများသို့ အဓိကတင်ပို့ရောင်းချပြီး လူမျိုးဘာသာမရွေး စားသုံးနိုင်ပါသည်။ (ACT) ရှောက်ရည် သစ်သီး ကုန်ထုတ်လုပ်ငန်းမှ ကုန်ပစ္စည်းများမှာ ၎င်းတို့ကိုယ်တိုင် တီထွင်ဆန်းသစ်၍ ထုတ်လုပ်ထားသော အိမ်တွင်းဖြစ်စက်မှုလုပ်ငန်းဖြစ်ပြီး၊ နှစ်ပေါင်းများစွာကတည်းက ယခုတိုင်လုပ်ကိုင်ဆောင်ရွက်လျက်ရှိပြီး ၊ ရှောက်ပျားရည်လုပ်ငန်းမှာ လေလွင့်မှု အတော်အတန်နည်းပါးပြီး အကျိုးအမြတ်အနေဖြင့်လည်း အတော်အသင့်ကောင်းမွန်ပါသောကြောင့် စီးပွားရေးလုပ်ငန်းတစ်ခုအဖြစ် လုပ်ကိုင်ဆောင်ရွက်နိုင်ခြင်းဖြစ်ကြောင်း သတင်းရရှိပါသည်။

DOCA(ပဲခူး)

     ( ၆.၈.၂၀၂၅ ) ရက်နေ့တွင် စစ်ကိုင်းတိုင်းဒေသကြီး၊ ကလေးခရိုင်အတွင်းရှိ ဖောင်းပြင်မြို့ပေါ်ရှိ၊ စည်ပင်ဈေးအတွင်း၊ ရောင်းချနေသည့် ဦးထွန်းသန်း ဆန်နှင့် ဆန်ထွက်ပစ္စည်း အရောင်းဆိုင်သို့ သွားရောက်၍ ဦးကျော်သန်းစိန် ( မြို့နယ်တာဝန်ခံ ) မှ ဦးဆောင်၍ ကွင်းဆင်းစစ်ဆေးခြင်းများ ဆောင်ရွက်ခဲ့သည်ဟု သိရှိရပါသည်။

              စားသုံးသူရေးရာဦးစီးဌာနမှ ဦးကျော်သန်းစိန် ( မြို့နယ်တာဝန်ခံ ) အနေဖြင့် မိမိတို့ ဆိုင်တွင် ဆန်များရောင်းချရာ၌ ဈေးကစားရန် ရည်ရွယ်ချက်ဖြင့် ဆန်များသိုလှောင်ထားခြင်း မပြုလုပ်ရန်၊ ဆန်များချင်တွယ်ရောင်းချရာတွင်လည်း      အချင်အတွယ်များအား ပြည့်မှီစွာ ရောင်းချရန်နှင့် ဆန်များ သိုလှောင်ရောင်းချမည်ဆိုပါက My Ro စနစ်ဖြင့် မှတ်ပုံတင် ဆောင်ရွက်နိုင်ရေး ပြောကြားခဲ့ကြောင်း သိရှိရပါသည်။

DOCA (စစ်ကိုင်း)

     စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ညောင်လေးပင် ခရိုင်ဦးစီးမှူးရုံးအနေဖြင့် ကုန်ဈေးနှုန်းတည်ငြိမ်ရေးလုပ်ငန်းများ၊ စားသုံးသူကာကွယ်ရေးလုပ်ငန်း များကို အားသွန်ခွန်စိုက် ဆောင်ရွက်လျက်ရှိရာ ၁၁.၈.၂၀၂၅ ရက်နေ့တွင် ညောင်လေးပင် ခရိုင်ဦးစီးမှူး ဦးရဲမင်းထွဋ်နှင့် ဒိုက်ဦးမြို့နယ်တာဝန်ခံ ဦးကျော်သက်မိုးတို့သည် ဒိုက်ဦးမြို့နယ်ရှိ အကြော်စုံ (စာကလေးခွေ) လုပ်ငန်းလုပ်ကိုင်သူ လုပ်ငန်းရှင်နှင့် လုပ်ငန်းအခြေအနေများအား တွေ့ဆုံမေးမြန်း ဆွေးနွေးခဲ့ကြောင်း သတင်းရရှိပါသည်။

          ခရိုင်ဦးစီးမှူးသည် အကြော်စုံ (စာကလေးခွေ) လုပ်ငန်းရှင် ဦးဆယ်တင်အား လုပ်ငန်းအခြေ အနေများ မေးမြန်းခဲ့ရာ ဦးဆယ်တင်က လုပ်ငန်းလုပ်ကိုင်ရာတွင် တွေ့ကြုံရသော အခက်အခဲများ နှင့် စိန်ခေါ်မှုများကို တင်ပြရာ ခရိုင်ဦးစီးနှင့် မြို့နယ်တာဝန်ခံက မှတ်တမ်းတင်ထားကာ တတ်နိုင်သမျှ ဖြေရှင်းဆောင်ရွက်ပေးမည်ဖြစ်ကြောင်း ပြောကြားခဲ့ပါသည်။ ထို့နောက် လုပ်ငန်းခွင်အား လိုက်လံကြည့်ရှုစစ်ဆေးပြီး လိုအပ်သည်များ မှာကြားခဲ့ကြောင်း သတင်းရရှိပါသည်။

DOCA(ပဲခူး)