မကွေးမြို့၊ ကုန်စည်ဒိုင်ခန်းမ၌ တောင်သူများ သီးနှံရောင်းဝယ်ဖောက်ကားချိန်တွင် ကုန်သည်ပွဲစားများ၏ အလေးချိန်ဖြတ်တောက်မှု သင့်တင့်မျှတစွာဖြစ်စေရေး ညှိနှိုင်းပေါင်းစပ် အစည်းအဝေးကျင်းပ
မကွေးတိုင်းဒေသကြီးအစိုးရအဖွဲ့၊ ဝန်ကြီးချုပ်နှင့် အစိုးရအဖွဲ့ဝင် ဝန်ကြီးများ၏ ၂၀၂၅ ခုနှစ်၊ စက်တင်ဘာလ (၂၇)ရက်နေ့တွင် မကွေးခရိုင်၊ မြို့သစ်မြို့နယ်၊ ဝါးကြီးအိုင့်ကျေးရွာသို့ သွားရောက် ခဲ့သည့် ခရီးသွားမှတ်တမ်း(၃/၂၀၂၅)ညွှန်ကြားချက်အရ ၂၀၂၅ ခုနှစ်၊ အောက်တိုဘာလ (၂၁)ရက်၊ နံနက်(၁၀:၃၀)နာရီအချိန်တွင် မကွေးမြို့၊ ကုန်စည်ဒိုင်ခန်းမ၌ တောင်သူများ သီးနှံရောင်းဝယ် ဖောက်ကားချိန်တွင် ကုန်သည်ပွဲစားများ၏ အလေးချိန်ဖြတ်တောက်မှု သင့်တင့်မျှတစွာ ဖြစ်စေရေး ညှိနှိုင်းပေါင်းစပ် အစည်းအဝေးကို ကျင်းပခဲ့ကြောင်း သိရသည်။
အစည်းအဝေးတွင် ရှေးဦးစွာ မကွေးတိုင်းဒေသကြီး၊ စားသုံးသူရေးရာဦးစီးဌာန၊ တိုင်းဒေသကြီး ဦးစီးမှူး ဦးရဲမျိုးလွင်က မြန်မာနိုင်ငံသည် လယ်ယာထွက်ကုန် သီးနှံများကို အဓိက တင်ပို့ရောင်းချ နေသည့် နိုင်ငံဖြစ်သည့်အတွက် နိုင်ငံ၏ စီးပွားရေးဖွံ့ဖြိုး တိုးတက်မှုတွင် လယ်ယာထွက်ကုန် သီးနှံများ၏ စိုက်ပျိုးထုတ်လုပ်မှုသည် အဓိကကျသည့် အခန်းကဏ္ဍတွင် ပါဝင်ကြောင်း၊ တောင်သူများ၊ ကုန်သည်များအနေနှင့် စုပေါင်းရောင်းဝယ်မှုများ ပြုလုပ်ရာမှ ခေတ်ကာလများ ပြောင်းလဲလာသည့်အခါ ကုန်စည်ဒိုင်များ အဆင့်သို့ရောက်ရှိလာကြောင်း၊ ကုန်စည်ဒိုင်များတွင် စိုက်ပျိုး ထုတ်လုပ်သူ၊ ရောင်းဝယ်သူ၊ ပွဲစားကုန်သည်၊ ထုတ်လုပ်သူ၊ တင်ပို့/ တင်သွင်းဖြန့်ချီသူအစရှိသဖြင့် သီးနှံကုန်စည် အလိုက် တန်ဖိုး ကွင်းဆက်တစ်လျှောက်လုံးမှာ ပါဝင်သူများနှင့် ဖွဲ့စည်းထားတာကို တွေ့ရှိရပါကြောင်း၊ ကုန်စည်ဒိုင်များသည် ဈေးကွက်အတွင်း သီးနှံကုန်စည်များ၏ ဈေးနှုန်းသတ်မှတ်ရာတွင် အဓိက ကျသည့် အခန်းကဏ္ဍမှ ပါဝင်သောကြောင့် ကုန်စည်ဒိုင်များ ဖွံ့ဖြိုးတိုးတက်စေရေး၊ သီးနှံအလိုက် ကုန်စည်ဒိုင်များ ဖွဲ့စည်းနိုင်ရေးတို့သည် နိုင်ငံ့စီးပွားရေး တည်ငြိမ်ဖွံ့ဖြိုးရေးအတွက် အရေးပါလှ ကြောင်း၊ မကွေးတိုင်းဒေသကြီးအတွင်းရှိ ကုန်စည်ဒိုင်များတွင် လယ်ယာထွက်ကုန်သီးနှံများ၏ အရောင်းအဝယ်လုပ်ငန်းများ စနစ်တကျရှိရေးနှင့် တောင်သူများ ဈေးနှုန်းအမှန်ရရှိစေရေး၊ အချိန် အတွယ် မှန်ကန်စေရေး၊ ကုန်စည်အရည်အသွေး မှန်ကန် စေရေးနှင့် ဈေးကွက်မှန်ကန်စေရေး စသည့် မှန်(၄)မှန် ဖြစ်ပေါ်စေရေးအတွက် ဈေးကွက်ရှိသည့် မြို့ကြီးများတွင် သီးနှံကုန်စည်ဒိုင်များ ဖွဲ့စည်း ထူထောင်သွားကြရန် မူဝါဒများ အကောင်အထည် ဖော် ဆောင်ရွက်လျှက်ရှိပါကြောင်း၊ ကုန်စည်များ၏ တန်ဖိုးကွင်းဆက်တစ်လျှောက်(Supply Chain Value Chain) မှန်ကန်မျှတစွာ ဆောင်ရွက်ပြီး အခြေခံကုန်စည်များ အရောင်းအဝယ် ဖွံ့ဖြိုးတိုးတက်စေရေး၊ ကုန်စည်ဒိုင်များတွင် ICT အခြေခံသည့် ဈေးနှုန်း၊ ရောင်းဝယ်မှုသတင်းများ ထုတ်ပြန်ဆောင်ရွက်နိုင်ရေးနှင့် ကုန်စည်ဒိုင် အချင်းချင်း (Network) ချိတ်ဆက်ဆောင်ရွက်နိုင်ရေး၊ ရောင်းဝယ်သည့် လုပ်ငန်းစဉ် (Mechanism)များ မှန်ကန်စေရေး၊ ကုန်စည်ဒိုင်များ၏ သတင်းအချက်အလက်ကွန်ရက် တည်ဆောက် နိုင်ရေးစသည့် နိုင်ငံတော် မူဝါ ဒလုပ်ငန်းတာဝန်များကို ပူးပေါင်းအကောင်အထည်ဖော်ဆောင်ရွက်သွားရမှာဖြစ်ပါကြောင်း၊ ထို့အပြင် တိုင်းဒေသကြီးအတွင်း ဖွဲ့စည်းထားရှိပြီးသည့် ကုန်စည်ဒိုင်များကို ကုန်စည်ဒိုင် အင်္ဂါရပ်များဖြစ်သည့် ကုန်စည်ဒိုင်ဖွဲ့စည်းပုံ၊ ကုန်စည်ဒိုင်စည်းမျဉ်းစည်းကမ်းနှင့် လုပ်ထုံး လုပ်နည်း၊ ကုန်ပစ္စည်းအရည် အသွေး၊ အလေးတင်းတောင်း အခြင်အတွယ်၊ အရောင်းအဝယ်ပြုလုပ်ချိန်နှင့် အရောင်းအဝယ် နည်းစနစ်များ၊ အရောင်းအဝယ်သတင်းထုတ်ပြန်ခြင်းစသည့် ကုန်စည်ဒိုင် အင်္ဂါရပ်များနှင့် ပြည့်စုံစေရေး အတွက်လည်း လိုအပ်သည့် ပံ့ပိုးမှုများ ဆောင်ရွက်ပေးလျက်ရှိပါကြောင်း၊ ကုန်စည်ဒိုင်များ ဖွံ့ဖြိုးတိုး တက်ရေးအတွက် ဆောင်ရွက်ပေးနေသလို ကုန်စည်ဒိုင်သို့ လာရောက်ရောင်းချသည့် တောင်သူများ၏ သီးနှံများအပေါ်တွင်လည်း သီးနှံအရည်အသွေးပေါ် မူတည်၍ အလေးချိန်ဖြတ်တောက်ရာတွင်လည်း သင့်တင့်မျှတစွာရှိရန်နှင့် ပွင့်လင်းမြင်သာဖို့လည်း လိုအပ်ပါကြောင်း၊ စီးပွားရေးလုပ်ငန်းရှင်များ လိုက်နာ ရမည့် စီးပွားရေးကျင့်ဝတ်နှင့်အညီ ဆောင်ရွက်မှုမရှိလျှင် နစ်နာသူစားသုံးသူက တိုင်ကြားလာမည် ဆိုပါက စားသုံးသူရေးရာဦးစီးဌာန၊ တိုင်းဒေသကြီးဦးစီးမှူးရုံးအနေဖြင့် ပုဒ်မ (၅၂)အရ စီမံခန့်ခွဲရေး ပြစ်ဒဏ်များကို ချမှတ်နိုင်ပါကြောင်း၊ ထို့ကြောင့် သီးနှံ အရည်အသွေးပေါ်မူတည်ပြီး ဈေးနှုန်း/ အလေးချိန် ဖြတ်တောက်မည်ဆိုပါက တင့်သင့်မျှတစွာ အားလုံး တစ်ပြေးညီဖြစ်စေရန် မိမိအကျိုး စီးပွားတစ်ခုတည်းကိုသာ မကြည့်ဘဲ နှစ်ဦးနှစ်ဖက် မျှမျှတတဖြစ်စေရန် ကုန်သည်များ အသင်း ဘက်မှလည်း တစ်ပြေးညီသတ်မှတ်ပေးပြီး ပူးပေါင်း ဆောင်ရွက်ပေးကြပါဟု ဆွေးနွေးခဲ့ပါသည်။ အဆိုပါ ပေါင်းစပ်ညှိနှိုင်းအစည်းအဝေးသို့ ဌာနဆိုင်ရာမှ တာဝန်ရှိသူများ၊ ကုန်သည်၊ စက်ပိုင်၊ ပွဲစားများ၊ တိုင်းတောင်သူ ဖွံဖြိုးရေးအဖွဲ့မှ တာဝန်ရှိသူများ စုစုပေါင်း(၄၅)ဦး တက်ရောက်ခဲ့ကြပြီး တက်ရောက်လာသူများက ဝိုင်းဝန်းဆွေးနွေးကာ ပေါင်းစပ်ညှိနှိုင်းအစည်းအဝေးကို နံနက်(၁၁:၃၀) အချိန်တွင် အောင်မြင်စွာ ရုပ်သိမ်းနိုင်ခဲ့ကြောင်း သတင်းရရှိပါသည်။
DOCA(မကွေး)
