ရန်ကုန်တိုင်းဒေသကြီး၊ တွံတေးခရိုင်၊ ကော့မှူးမြို့နယ် စည်ပင်သာယာမြို့မဈေးအတွင်း/ အပြင်ရှိ အခြေခံစားသောက်ကုန်ပစ္စည်း အရောင်းဆိုင်များသို့  ဩဂုတ်လ(၅)ရက်နေ့၊ နေ့လည် (၁၁:၀၀)နာရီအချိန်တွင် အခြေခံစားသောက်ကုန်ပစ္စည်းများ၏ ဈေးနှုန်းပြောင်းလဲမှု အခြေအနေ အားကွင်းဆင်းစစ်ဆေးခဲ့ကြောင်း သိရသည်။

   ထိုသို့ ကွင်းဆင်းစစ်ဆေးခဲ့ရာတွင် မြို့နယ်စားသုံးသူရေးရာဦးစီးဌာနမှ မြို့နယ်တာဝန်ခံ ဦးတင်မင်းနှင့် မြို့နယ်စည်ပင်သာယာရေးအဖွဲ့မှ မြို့မဈေးတာဝန်ခံ ဦးအေးသွင်တို့သည် ကော့မှူးမြို့နယ်စည်ပင်သာယာမြို့မဈေးအတွင်း/အပြင်ရှိ စားသုံးသူပြည်သူများ နေ့စဉ် ဝယ်ယူသုံးစွဲလျက်ရှိသော အခြေခံစားသောက်ကုန်ပစ္စည်းများ ဖြန့်ဖြူးရောင်းချလျက်ရှိသော ဒေါ်မွှေးကြူ၊ မိဘရိတ်၊ ဒေါ်လုံးလုံး၊ ဦးချမ်းသာ၊ ဒေါ်မူဆန်ဆိုင်များ၊ ဒေါ်ချောစုလှိုင်၊ ဒေါ်ချိုချိုမြင့်၊ ဦးဌေးလှိုင်၊ ဦးတင်ဝင်း၊ ဦးတင့်ဆွေဦး ကုန်ခြောက်ဆိုင်များ၊ ဒေါ်နိုင်နိုင်မော်၊ ဒေါ်ပေါက် ကြက်သားဆိုင်၊ ဦးခင် မောင်ဝင်းဝက်သာဆိုင်၊ ဦးကုလား အမဲသားဆိုင်၊ ဦးဇော်ကြီး ဆိတ်သားဆိုင်၊ ဒေါ်သင်းသင်း ၊ ဒေါ်ချိုချိုဝင်း၊ ဒေါ်ဌေးကြည်၊ ဒေါ်စိုးကြည် ရေချိုရေငံ ငါးပုဇွန်အရောင်းဆိုင်၊ ဒေါ်ချို၊ ဒေါ်စုကြည် ကြက်ဥ၊ ဘဲဥ လက်လီလက်ကား အရောင်းဆိုင်၊ ဒေါ်သန်းသန်းစိုး ငါးပိ၊ ငါးခြောက်ဆိုင်နှင့် ဒေါ်စိန်မမ၊ ဦးဖိုးထောင်၊ ဦးကျောက်ခဲ ကုန်စိမ်းအရောင်းဆိုင်တို့တွင် ဩဂုတ်လအစတွင် ဖြစ်ပေါ် နေသည့် အခြေခံစားသောက်ကုန် ဈေးနှုန်းတို့၏ အခြေအနေမှာ သိသိသာသာ ကွာခြားမှုမရှိသော် လည်း စားအုန်းဆီဈေးနှုန်းမှာ အနည်းငယ်မြင့်တက်သွားသည်ကို ကွင်းဆင်းစစ်ဆေး တွေ့ရှိခဲ့ ကြောင်း သိရှိရပါသည်။

DOCA (ရန်ကုန်)

     ရန်ကုန်တိုင်းဒေသကြီး၊ တွံတေးခရိုင်၊ ကော့မှူးမြို့နယ် တောင်ပိုင်းရပ်ကွက်ရှိ အထွေထွေ အုပ်ချုပ်ရေးဦးစီးဌာန မြို့နယ်အုပ်ချုပ်ရေးမှူးရုံး အစည်းအဝေးခန်းမ၌ ဩဂုတ်လ(၄)ရက်နေ့၊ နေ့လည်(၁၃:၀၀)နာရီအချိန်တွင် စားအုန်းဆီဖြန့်ဖြူးရောင်းချခြင်းဆိုင်ရာ လုပ်ငန်းညှိနှိုင်း အစည်းအဝေးကို ကျင်းပပြုလုပ်ခဲ့ကြောင်း သိရသည်။

     အဆိုပါ လုပ်ငန်းညှိနှိုင်း အစည်းအဝေးတွင် ကော့မှူးမြို့နယ်စီမံ အုပ်ချုပ်ရေးအဖွဲ့ ဥက္ကဌ ဦးမျိုးမင်းက လူတစ်ဦး စားအုန်းဆီတစ်ရက်စားနှုန်း (၂.၂၅) ကျပ်သားဖြင့် ကော့မှူးမြို့နယ်ရှိ လူဦးရေစားအုန်းဆီ ခွဲတမ်းအား အီကိုဟာမိုနီကုမ္ပဏီနှင့် ဇဗ္မူကံထွန်းကုမ္ပဏီတို့မှ နေ့စဉ် စားအုန်းဆီခွဲတမ်းအား ထုတ်ယူလျက်ရှိပြီး ကုမ္ပဏီကိုယ်စားလှယ်များအနေဖြင့် စည်ပင်သာယာ မြို့မဈေးအတွင်း/အပြင်ရှိ ကုန်ခြောက်ဆိုင်များနှင့် ရပ်ကွက်/ကျေးရွာအုပ်စုများရှိ တဆင့်ခံ ကိုယ်စားလှယ် များထံ နေ့စဉ်ပြန်လည်ဖြန့်ဖြူးရောင်းချပေးလျက်ရှိကြောင်း သိရှိရပြီး တဆင့်ခံ ကိုယ်စားလှယ်များအနေဖြင့် မိမိတို့ထုတ်ယူရရှိသည့် စားအုန်းဆီခွဲတမ်းများအား ရပ်ကွက်/ ကျေးရွာအုပ်စုအတွင်းရှိ စားသုံးသူပြည်သူများထံသို့ သတ်မှတ်ရည်ညွှန်းဈေးအပေါ် သင့်တင့် မျှတသည့် အမြတ်နှုန်းထားဖြင့် လူတစ်ဦးလျှင် စားအုန်းဆီ တစ်ရက်စာနှုန်း (၂.၂၅) ကျပ်သား နှုန်းဖြင့် တွက်ချက်ပြီး အိမ်ထောင်စုအလိုက် စားအုန်းဆီထုတ်ယူခွင့် စာအုပ်ဖြင့် စနစ်တကျ ပြန်လည် ဖြန့်ဖြူးရောင်းချ ပေးကြရန်နှင့် မြို့နယ်ကျော် စားအုန်းဆီဖြန့်ဖြူး ရောင်းချခြင်းများ ဈေးကစားရန် ရည်ရွယ်ချက် ဖြင့် သိုလှောင်ထားခြင်း အပါအဝင် မသမာသည့် လုပ်ဆောင်မှုများ မပြုလုပ်ကြရန် ပြောကြားခဲ့ ကြောင်း သိရှိရပါသည်။

DOCA (ရန်ကုန်)

    စားသုံးသူရေးရာဦးစီးဌာန ၊ ရန်ကုန်အရှေ့ပိုင်းခရိုင်ဦးစီးမှူးရုံးမှ ဦးဇော်မင်းလတ် (ခရိုင်ဦး စီးမှူး)နှင့်ဝန်ထမ်းများ ၊  အထူးစုံစမ်းစစ်ဆေးရေးဦးစီးဌာန၊ အထွေထွေအုပ်ချုပ်ရေးဦးစီးဌာန၊ ဒဂုံမြို့သစ်ခရိုင် ၊ တောင်ဒဂုံမြို့နယ်စည်ပင်သာယာရေးကော်မတီမှ တာဝန်ရှိသူများနှင့်အတူ ပူးပေါင်းပြီး ဆန်ရောင်းချမှုအခြေအနေများကို ကွင်းဆင်းအသိပညာပေးမှုများ ဆောင်ရွက်လျှက် ရှိရာ (၅.၈.၂၀၂၅) ရက်နေ့၊ နံနက် (၁၀း၀၀)နာရီ အချိန်တွင်  ဒဂုံမြို့သစ်ခရိုင် ၊ တောင်ဒဂုံမြို့ နယ်အတွင်းရှိ ဆန်လက်လီရောင်းချနေသော (၅၆)ရပ်ကွက်၊ ပုဂံလမ်း၊ အမှတ်(၁၃၆၆)ရှိ ရွှေစည် ဆန်ရောင်းဝယ်ရေးအရောင်းဆိုင်သို့သွားရောက်၍ ဆန်ရောင်းချမှုကွင်းဆင်းအသိပညာပေးမှုများ ဆောင်ရွက်ခဲ့ကြကြောင်း သိရှိရပါသည်။

        ထိုသို့ ကွင်းဆင်းအသိပညာပေးရာတွင် ဆန်ဆိုင်များရှိ ရောင်းချနေသောဆန်များသည်      ရက်(၉၀)၊ ရွှေဘိုပေါ်ဆန်း၊ ဆင်းသွယ်၊ မနှောသုခ၊ ဧရာဝတီပေါ်ဆန်းစသည့်ဆန်များ ရောင်းချ လျက်ရှိပြီး သတ်မှတ်ရည်ညွှန်းဈေးအတိုင်းရောင်းချနေခြင်း ရှိ/မရှိ  တို့ကိုစစ်ဆေးခဲ့ပြီး ဆန်များ ကိုဈေးနှုန်းအဆမတန်ရောင်းချမှုမရှိစေရေးနှင့် ဈေးနှုန်းကြီးမြှင့်စွာရောင်းချခြင်းများကို စိစစ် တွေ့ရှိပါက အရေးကြီးကုန်စည်နှင့်ဝန်ဆောင်မှုဥပဒေအရအရေးယူခံရမှာဖြစ်ကြောင်း အသိပညာ ပေးဆောင်ရွက်ခဲ့ကြောင်း သတင်းရရှိပါသည်။

DOCA (ရန်ကုန်)

     (၅.၈.၂၀၂၅)ရက်နေ့ ၊နံနက်(၁၀:၀၀)အချိန်တွင် စားသုံးသူရေးရာဦးစီးဌာန၊ အရှေ့ပိုင်း ခရိုင်ဦးစီးမှူးရုံးမှ ဦးဇော်မင်းလတ် (လက်ထောက်ညွှန်ကြားရေးမှူး)နှင့်ဝန်ထမ်းများ၊ အထူးစုံစမ်း စစ်ဆေးရေးဦးစီးဌာန၊ အထွေထွေအုပ်ချုပ်ရေးဦးစီးဌာန၊ မြို့နယ်ဆီကုန်သည်များအသင်၊ ဈေးစည်ပင်သာယာရေးကော်မတီတို့နှင့်အတူ တောင်ဒဂုံမြို့နယ်၊ (၂)ဈေးအတွင်းနှင့် ဈေးပြင်ပရှိ စားအုန်းဆီလက်လီအရောင်းဆိုင်များသို့ ကွင်းဆင်းစစ်ဆေးခြင်းများ ဆောင်ရွက်ခဲ့ကြကြောင်း သိရှိရပါသည်။

      ထိုသို့ ဆောင်ရွက်ခဲ့ရာတွင် တောင်ဒဂုံမြို့နယ်၊ (၂)ဈေးအတွင်းရှိ ဆိုင်ခန်း(၃)ဆိုင်နှင့် ဈေးပြင်ပရှိ ဆိုင်ခန်း(၂)ဆိုင်တို့အား ဝင်ရောက်စစ်ဆေးခဲ့ရာ မိမိရရှိသော ခွဲတမ်းများကို ရပ်ကွက်နေ စားသုံးသူပြည်သူများလက်ဝယ်သို့ အမှန်တကယ်ရောက်ရှိစားသုံးနိုင်ရန် ရောင်းချပေးပါကြောင်း ၊အလေးချိန်လည်းမှန်ကန်စွာချိန်တွယ်ပေးပါကြောင်း လက်ကျန်များမထားရှိကြောင်း ကွင်းဆင်း စစ်ဆေးချက်အရ သိရှိရပါသည်။

DOCA (ရန်ကုန်)

      ပြည်ထောင်စုနယ်မြေ၊ နေပြည်တော်အတွင်းရှိ ဆီစက်ပိုင်ရှင်များ စုပေါင်း၍ နေပြည်တော်တိုင်း ဆီစက်ပိုင်ရှင်များအသင်း ဖွဲ့စည်းခြင်းကို ၃၀.၇.၂၀၂၅ ရက်တွင် စားသုံးသူရေးရာဦးစီးဌာန၊ နေပြည်တော်တိုင်းဦးစီးမှူးရုံးတွင် ကျင်းပပြုလုပ်ခဲ့ပါသည်။

      ဖွဲ့စည်းခြင်း အခမ်းအနားသို့ မြန်မာနိုင်ငံ ဆီစက်ပိုင်ရှင်များအသင်းမှ ဒုတိယဥက္ကဌ(၂) ဦးက ဦးဆောင်၍ အမှုဆောင်၊ အလုပ်အမှုဆောင်၊ စီမံခန့်ခွဲမှု‌ကော်မတီ အဆင့်ဆင့် ရွေးချယ် ပြီး ဥက္ကဋ္ဌ၊ ဒုဥက္ကဋ္ဌ၊ အတွင်းရေးမှူး၊ တွဲဖက်အတွင်းရေးမှူး၊ ဘဏ္ဍာ‌ရေးမှူးနှင့် စာရင်းစစ်တို့ကို ထပ်မံရွေးချယ်၍ ဖွဲ့စည်းခဲ့ရာ စက်မှုကြီးကြပ်ရေးနှင့်စစ်ဆေးရေးဦးစီးဌာန၊ အသေးစား စက်မှု လက်မှုဦးစီးဌာနနှင့် နေပြည်တော် စားသုံးသူရေးရာဦးစီးဌာနမှ တာဝန်ရှိသူများ တက်ရောက် အားပေးခဲ့ကြပါသည်။

      နေပြည်တော်တိုင်း ဆီစက်ပိုင်ရှင်များအသင်းတွင် ဥက္ကဌ ဦးမျိုးမင်းထိုက် အပါအဝင် EC (၂၈)ဦး၊ CEC (၁၅)ဦးတို့ဖြင့် ဖွဲ့စည်းဆောင်ခဲ့ကြပါသည်။

DOCA(ပြည်ထောင်စုနယ်မြေ)