သတင်းနှင့် လှုပ်ရှားမှုများ

     စားသုံးသူရေးရာဦးစီးဌာန၊ မကွေး၊ ချောက်ခရိုင်အတွင်းရှိ ဝန်ထမ်းများသည် “ထုတ်ကုန်လုံခြုံ စိတ်ချရမှုအစ ကုန်အညွှန်းအမှတ်အသားက” ဆိုသည့်အတိုင်း စျေးကွက်အတွင်းရှိ ကုန်စည်များတွင် စားသုံးသူကာကွယ်ရေးဥပဒေ ၂၀၁၉ အခန်း(၁၈)ကုန်အညွှန်းအမှတ်အသားဖော်ပြရာတွင် ပြည့်စုံစွာ ပါဝင်ရမည့် အချက်အလက်များ၊ ပြည့်စုံမှန်ကန်စွာဖော်ပြထားခြင်းရှိ/မရှိနှင့် အစားအသောက်နှင့် ဆေးဝါးကွပ်ကဲ‌ရေးဦးစီးဌာနက စားသုံးရန်မသင့် တားမြစ်ထားသော ကုန်စည်များ ရောင်းချမှုရှိ/မရှိတို့အား မိတ်ဖက်ဌာနများနှင့် ပူးပေါင်းပြီး လစဉ်ဆောင်ရွက်လျက်ရှိပါသည်။

    မကွေး၊ ချောက်ခရိုင်အတွင်းရှိ မြို့နယ်များမှ ၂၀၂၄-ခုနှစ်၊ ဇူလိုင်လအတွင်း စျေးကွက်စောင့်ကြည့်စစ်ဆေးခြင်းများကို (၁၉)ကြိမ်ဆောင်ရွက်နိုင်ခဲ့ပြီး မြို့နယ်အလိုက်ဆောင်ရွက်မှုမှာ  မကွေးမြို့နယ် (၅)ကြိမ်၊ တောင်တွင်းကြီးမြို့နယ် (၂)ကြိမ်၊ မြို့သစ်မြို့နယ် (၃)ကြိမ်၊ နတ်မောက်မြို့နယ် (၂) ကြိမ်၊ ချောက်မြို့နယ် (၄)ကြိမ်၊ ရေနံချောင်းမြို့နယ် (၃)ကြိမ်၊ စုစုပေါင်း(၁၉)ကြိမ် ဆောင်ရွက်ခဲ့ကြောင်း သိရှိရပါသည်။

DOCA(မကွေး)

  ပြည်သူတို့၏နေ့စဉ်လူမှုဘဝ၌ အရေးပါလှသော ကျန်းမာသောကိုယ်ခန္ဓာတို့အတွက် အထောက်အကူပြုကာ မရှိမဖြစ်လိုအပ်သောအိမ်သုံးဆေးဝါးများကို ဈေးနှုန်းသက်သာစွာ အလွယ်တကူဝယ်ယူရရှိနိုင်ရေးအတွက် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၏လမ်းညွှန်မှုဖြင့် မြန်မာနိုင်ငံဆေးနှင့်ဆေးပစ္စည်းလုပ်ငန်းရှင်များအသင်းဦးဆောင်ကာ တိုင်းဒေသကြီးအစိုးရအဖွဲ့၏ စီစဉ်ကြီးကြပ်မှုဖြင့် ပဲခူးတိုင်းဒေသကြီး၊ ပဲခူးမြို့၊ ရန်ကုန်_မန္တလေး လမ်းမကြီးဘေး၊ သီရိဥဿာဈေးအပေါ်ထပ်တွင် ဆေးဝါးတိုက်ရိုက်ရောင်းချပွဲကျင်းပပြုလုပ်လျက်ရှိပြီး ဆေးဝါးတင်သွင်းလာသည့် ကုမ္ပဏီများမှ တိုက်ရိုက်လာ‌ရောက်ကာ ရောင်းချပေးလျက်ရှိပါသည်။

        ဆေးဝါးတိုက်ရိုက်ရောင်းချပွဲအား ဇူလိုင်လ ၂၉ရက်နေ့မှစတင်ရောင်းချကာ သြဂုတ်လ ၃ရက်နေ့အထိ (၆)ရက်ဆက်တိုက် နံနက် (၀၉:၀၀)နာရီအချိန်မှ ညနေ (၁၆:၀၀)နာရီအချိန်ထိ ရောင်းချပေးခဲ့ကြောင်းသိရှိရပါသည်။ အဆိုပါဆေးဝါးတိုက်ရိုက်ရောင်းချပွဲတွင် အနယ်အနယ်အရပ်ရပ်မှ ဆေးဝါးတင်သွင်းသည့်ကုမ္ပဏီ ၂၇ခုမှလာရောက်၍ ဆေးအမျိုးအစား ၄၅၉မျိုးတို့အား ကုမ္ပဏီမှရောင်းချသော သက်သာသည့်ဈေးနှုန်းများဖြင့် တိုက်ရိုက်ရောင်းချမှုပြုလုပ်ခဲ့‌ကြောင်း သတင်းရရှိပါသည်။

DOCA(ပဲခူး)

        စားသုံးသူရေးရာဦးစီးဌာန၊ သာယာဝတီခရိုင်ဦးစီးမှူးရုံးရှိ စားသုံးသူရေးရာဌာနခွဲတာဝန်ခံ၊ ထုတ်ကုန်လုံခြုံစိတ်ချရမှုဌာနခွဲတာဝန်ခံနှင့် တာဝန်ရှိသူတို့သည်  ၂၀၂၄ခုနှစ်၊ ဇူလိုင်လ ၃၀ရက် နေ့၊ နေ့လယ်(၁၃:၀၀)နာရီအချိန်တွင် နတ်တလင်းမြို့အတွင်းရှိ စားအုန်းဆီ လက်လီ/လက်ကားရောင်းချနေသောကုန်စုံဆိုင်များသို့ သွားရောက်ကွင်းဆင်းစစ်ဆေးခြင်းပြုလုပ်ဆောင်ရွက်ခဲ့ပါ သည်။

     ထိုသို့ကွင်းဆင်းဆောင်ရွက်ရာတွင် စားအုန်းဆီခွဲတမ်းများကို သတ်မှတ်စည်းမျဉ်းစည်းကမ်းများနှင့်အညီ စနစ်တကျဖြန့်ဖြူးရောင်းချကြရန်၊ ခွဲတမ်းရရှိသည့်ဆိုင်များအနေဖြင့် ဈေးနှုန်းကို အများမြင်သာသောနေရာများတွင် မြင်သာသောစာလုံးအရွယ်အစားများဖြင့် Vinyl ချိတ်ဆွဲထားရှိရန်၊ စားအုန်းဆီ လက်လီ/ လက်ကားရောင်းချလျက်ရှိသော လုပ်ငန်းရှင်များအနေဖြင့် သက်ဆိုင်ရာဌာနများက ထုတ်ပြန်ထားသည့် အမိန့်၊ ညွှန်ကြားချက်များနှင့်အညီ ရောင်းချဖြန့်ဖြူးကြရန်တို့ကို ရှင်းလင်းပြောကြားခဲ့ကြောင်းသိရှိရပါသည်။

DOCA(ပဲခူး)

     စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာနအနေဖြင့် စားသုံးသူများဘေးအန္တရာယ်ကင်းရှင်းစေရေး၊ ထုတ်ကုန်များလုံခြုံစိတ်ချရမှုရှိစေရေး၊ ဘေးအန္တရာယ်ရှိသော ကုန်စည်များ ဈေးကွက်အတွင်းမှ ပပျောက်သွားစေရေးနှင့် စားသုံးသူကာကွယ်ရေး ဥပဒေပြဌာန်းချက်ပါ ကုန်စည်များတွင် မြန်မာဘာသာဖြင့် ကုန်အညွှန်းအမှတ်အသားပြည့်စုံစွာဖော်ပြထားမှု အခြေအနေတို့နှင့်စပ်လျဉ်း၍   လုပ်ငန်းရှင်များနှင့်တွေ့ဆုံဆွေးနွေး အသိပညာ‌ပေးခြင်းလုပ်ငန်းများအား တိုင်းဒေသကြီးအတွင်းရှိ ခရိုင်၊ မြို့နယ်များတွင် လစဉ်ဆောင်ရွက်လျက်ရှိကြောင်း သိရှိရပါသည်။

     ထိုသို့ လုပ်ငန်းရှင်များနှင့်တွေ့ဆုံဆွေးနွေး အသိပညာပေးရာတွင် စားသုံးသူကာကွယ်ရေး ဥပဒေပါ စီးပွားလုပ်ငန်းရှင်များ လိုက်နာရမည့်တာဝန်များ၊  ကုန်စည်ပေါ်တွင် ကပ်နှိပ်မည့် ကုန်အညွှန်းအမှတ်အသားဆိုင်ရာပြဌာန်းချက်များနှင့်စပ်လျဉ်း၍ ရှင်းလင်းဆွေးနွေးအသိပညာ‌ပေးပြောကြားခြင်း၊ ကုန်အညွှန်းအမှတ်အသားဖော်ပြထားမှုအပေါ် စားသုံးသူကာကွယ်ရေးဥပဒေနှင့် ကိုက်ညီမှု ရှိ/မရှိ စိစစ်ပြန်ကြားပေးစေလိုပါက သက်ဆိုင်ရာ မြို့နယ်၊ ခရိုင်၊ တိုင်း စားသုံးသူရေးရာဦးစီးဌာနများမှ တစ်ဆင့်တင်ပြ လျှောက်ထားနိုင်ပါကြောင်း၊ ကုန်အညွှန်းအမှတ်အသား တင်ပြလျှောက်ထားမှုနှင့် စပ်လျဉ်း၍ ဌာနမှ မည်သည့်စာရွက် စာတမ်းကြေး၊ ဝန်ဆောင်ခ၊ စစ်ဆေးအတည်ပြုခမျှ ကုန်ကျစရိတ် ကောက်ခံခြင်းမရှိဘဲ ဆောင်ရွက်ပေးနေကြောင်းအသိပညာပေး‌ဆွေးနွေးခြင်းတို့ ဆောင်ရွက်ခဲ့ကြောင်း သတင်းရရှိပါသည်။

   စားသုံးသူများ ဘေးအန္တရာယ်ကင်းရှင်းရေး၊ ထုတ်ကုန်များ လုံခြုံစိတ်ချရမှုရှိစေရေးတို့အတွက် ဈေးကွက်မရောက်မီကုန်စည်များအား သွားရောက်စစ်ဆေးခြင်းနှင့် လုပ်ငန်းရှင်များအား အသိပညာပေးခြင်းများဆောင်ရွက်ရာတွင် ၂၀၂၄ ခုနှစ်၊ ဇူလိုင်လတွင် ပဲကြော်လုပ်ငန်းရှင်၊ သောက်ရေသန့် လုပ်ငန်းရှင်၊ ဆန်ရောင်းဝယ်ရေးလုပ်ငန်းရှင်၊ ရက်ကန်းလုပ်ငန်းရှင်၊ ပေါင်မုန့်လုပ်ငန်းရှင်၊ အာလူးကြော်လုပ်ငန်းရှင်၊ ဂစ်တာလုပ်ငန်းရှင်၊ ကိတ်ခြောက်လုပ်ငန်းရှင်၊ စားသုံးဆီအ‌ရောင်းဆိုင် လုပ်ငန်းရှင်၊ စလေဘီလုပ်ငန်းရှင်၊ ဆပ်ပြာလုပ်ငန်းရှင်၊ ကုန်မျိုးစုံရောင်းဝယ်ရေးလုပ်ငန်းရှင်၊ ဆီစက်လုပ်ငန်းရှင်၊ ဆန်စက်လုပ်ငန်းရှင်၊ ဆီလုပ်ငန်းရှင်၊ ကွမ်းယာပစ္စည်းနှင့်ကုန်မျိုးစုံရောင်းဝယ်ရေးလုပ်ငန်းရှင်များနှင့် တွေ့ဆုံဆွေးနွေး အသိပညာပေးခြင်း (၂၆)ကြိမ်  ဆောင်ရွက်နိုင်ခဲ့ကြောင်း သိရှိရပါသည်။

DOCA(စစ်ကိုင်း)

      ပဲခူးတိုင်းဒေသကြီး၊ သာယာဝတီခရိုင်၊ သာယာဝတီမြို့နယ် မြို့နယ်တာဝန်ခံနှင့် ဝန်ထမ်းများသည် ၂၉-၇-၂၀၂၄ရက်နေ့၊ နေ့လယ် (၁၄:၀၀) နာရီအချိန်တွင် သာယာဝတီမြို့နယ်အတွင်း စိုက်ပျိုးရေးသုံးဆေးနှင့် ဓာတ်မြေဩဇာအရောင်းဆိုင်များသို့သွားရောက်၍ စိုက်ပျိုးရေးသုံးဆေးဝါးများပြတ်လပ်မှုရှိ/မရှိ ကွင်းဆင်းစစ်ဆေးခဲ့ကြပါသည်။

     ယခုရာသီကာလသည် သာယာဝတီမြို့နယ်အတွင်း၌ မိုးသီးနှံနှင့် ဟင်းသီးဟင်းရွက်စိုက်ပျိုးသော အချိန်ကာလဖြစ်သဖြင့် တောင်သူများ၏ သွင်းအားစုဆေးဝါးများဈေးနှုန်းမှန်ကန်တည်ငြိမ်ရေးနှင့် စားသုံးသူရေးရာဥပဒေ အခန်း (၁၈)ပါ ကုန်အညွှန်းအမှတ်အသားများပြည့်စုံမှုရှိစေရေး ရှင်းလင်းပြောကြားခဲ့ပါသည်။

         ထို့နောက် စိုက်ပျိုးရေးအရောင်းဆိုင်များအား စီးပွားရေးလုပ်ငန်းရှင်၏တာဝန်နှင့်ပြစ်ဒဏ်များအား ရှင်းလင်းပြောကြားခဲ့ကြောင်းသိရှိရပါသည်။

DOCA(ပဲခူး)