သတင်းနှင့် လှုပ်ရှားမှုများ

      ၂၀၂၄ ခုနှစ်၊ ဩဂုတ်လ ၁ ရက်နေ့၊ နံနက် (၁၁:၀၀) နာရီတွင် ရှမ်းပြည်နယ်(တောင်ပိုင်း) စားသုံးသူရေးရာဦးစီးဌာန၊ ပြည်နယ်ဦးစီးမှူးရုံးအစည်းအဝေးခန်းမ၍ ကျင်းပခဲ့ရာ ပြည်နယ်ဦးစီးမှူး ဦးရွှေဖြူက စားသုံးဆီဖြန့်ဖြူးရောင်းချနေမှုများနှင့်ပတ်သက်၍ ဈေးကွက်အတွင်း လက်လီ/ လက်ကားရောင်းချနေသော စားအုန်းဆီအရောင်းဆိုင်များအား ပြန်လည်ရောင်းချရာ၌ မှန်မှန်ကန်ကန် ရောင်းချစေရေး၊ လက်ကားရောင်းချနေသူများအနေဖြင့် ရောင်းဝယ်ဖောက်ကားရမည့် အခြေခံလက်ကားဈေးနှုန်းများကို အပါတ်စဉ် ထုတ်ပြန်ပေးခဲ့ပြီးဖြစ်ရာ ဒေသအရောက် ဈေးနှုန်းအပေါ် (၂)ရာခိုင်နှုန်း အမြတ်ထက်မပိုသော ဈေးနှုန်းဖြင့် ဈေးကွက်အတွင်းသို့ ပြန်လည်ဖြန့်ဖြူးရောင်းချ သွားရန်၊ လက်လီဈေးများအတွင်း၌လည်း ဖြစ်သင့်ဖြစ်ထိုက်သည့် ဈေးနှုန်းများဖြင့် ရောင်းချပေးစေရေး ၎င်းအပြင် စားအုန်းဆီများအား ဈေးကစားရန် ရည်ရွယ်ချက်ဖြင့် သိုလှောင်ထားရှိခြင်း၊ ဈေးနှုန်း အဆမတန်မြှင့်တင်ရောင်းချခြင်းများ မပြုလုပ်ကြရန်နှင့် စားအုန်းဆီကို စားသုံးသူပြည်သူလက်ဝယ် အမှန်တကယ်ရောက်ရှိအောင် ရောင်းချပေးရန်နှင့် ရောင်းချခြင်းမရှိသောဆိုင်များကို ဖြန့်ဖြူး ရောင်းချခွင့် ပယ်ဖျက်သွားမည်ဖြစ်ကြောင်း ဆွေးနွေးပြောကြားခဲ့ပြီး စားအုန်းဆီနှင့်ပတ်သက်၍ အရောင်းဆိုင်များအား ဈေးနှုန်းမြှင့်တင်ရောင်းချခြင်းနှင့် သိမ်းဆည်းသိုလှောင်ထားခြင်းရှိပါက အရေးကြီးကုန်စည်နှင့်ဝန်ဆောင်မှုဥပဒေအရအရေးယူဆောင်ရွက်သွားမည်ဖြစ်ကြောင်း အသိပညာပေး တွေ့ဆုံဆွေးနွေးခဲ့ကြောင်း သိရှိရပါသည်။

DOCA(ရှမ်း)

      ၂.၈.၂၀၂၄ ရက်နေ့တွင် စားသုံးသူရေးရာဦးစီးဌာန၊ သထုံခရိုင်ဦးစီးမှူးနှင့် ဝန်ထမ်းများသည် သထုံမြို့၊ ဘင်လှိုင်ရပ်ကွက်၊ သထုံ-ဘားအံလမ်းတွင် ဆန်/စပါး လုပ်ငန်းရှင်အသင်းနှင့် ဆန်စက်လုပ်ငန်းရှင်အသင်းတို့ ပူးပေါင်း၍ ပြည်သူများသို့ သက်သာသောဈေးနှုန်းဖြင့် ဆန်များရောင်းချရာတွင် စနစ်တကျရှိစေရေး စားသုံးသူပြည်သူများ လက်ဝယ်အမှန်တကယ်ရောက်ရှိရေး၊ သင့်တင့်မျှတသော ဈေးနှုန်းဖြစ်စေရေးအတွက် ကြီးကြပ် ဆောင်ရွက်ခဲ့သည်။

    အဆိုပါနေ့တွင် ဧည့်မထဆန် (၁၀) မှတ် တစ်ပြည်လျှင် (၃၀၀၀) ကျပ်၊ ပေါ်ဆန်းဆန် တစ်ပြည်လျှင် (၅၅၀၀) ကျပ်ဖြင့် လူတစ်ဦးလျှင် (၂) ပြည်နှုန်းဖြင့်ရောင်းချခဲ့ရာ ပြည်သူလူထု (၉၆၀) ဦးအား ရောင်းချပေးခဲ့ကြောင်း သိရှိရသည်။

   ထိုကဲ့သို့ ပြည်သူများသို့ သက်သာသော ဈေးနှုန်းဖြင့် ဆန်များရောင်းချခြင်းအား သထုံမြို့နယ်ရှိ မြို့ပေါ်ရပ်ကွက် (၅) ရပ်ကွက်တွင် တစ်ရက်ခြားစနစ်ဖြင့် ရောင်းချသွားမည်ဖြစ်ကြောင်း သိရှိရပါသည်။

DOCA(မွန်)

      စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ညောင်ဦးခရိုင်ဦးစီးမှူးရုံးအစည်းအဝေးခန်းမတွင် ( ၂၉-၇-၂၀၂၄)ရက်နေ့၊ နေ့လယ် (၁၆:၀၀) နာရီအချိန်၌ ခရိုင်ဦးစီးမှူးရုံးမှ ဦးသန်းစိုး(လက်ထောက်ညွှန်ကြားရေးမှူး)နှင့် ညောင်ဦးမြို့နယ်ရှိ MSMEs လုပ်ငန်းရှင်များတွေ့ဆုံ၍ MSMEs လုပ်ငန်းများဖွံ့ဖြိုးတိုးတက်စေရေး၊ စက်မှုလုပ်ငန်းသုံး စားအုန်းဆီများရောင်းချပေးမှုကို လုပ်ငန်းခွင်များ၌ အမှန်တကယ်အသုံးပြုမှုရှိစေရေး၊ တန်ဖိုးမြှင့်ထုတ်ကုန်များထုတ်လုပ်နိုင်ရေး၊ ထုတ်ကုန်များလုံခြုံစိတ်ချရမှုရှိစေရေးနှင့် ကုန်အညွှန်းအမှတ်အသားများပြည့်စုံစွာဖော်ပြပါရှိစေရေးတို့အတွက် တွေ့ဆုံဆွေးနွေးမှုများဆောင်ရွက်ခဲ့ပါသည်။

      စားသုံးသူရေးရာဦးစီးဌာန၊ ညောင်ဦးခရိုင်ဦးစီးမှူးရုံးမှ ဦးသန်းစိုး(လက်ထောက်ညွှန်ကြား ရေးမှူး)သည် လုပ်ငန်းရှင်များအား လုပ်ငန်းများလည်ပတ်လုပ်ကိုင်ဆောင်ရွက်ရာတွင် လိုအပ် လျက်ရှိသောလုပ်ငန်းသုံးစားသုံးဆီများကို နိုင်ငံတော်မှ သက်သာသောဈေးနှုန်းများဖြင့် ဖြည့်ဆည်းရောင်းချပေးလျက်ရှိရာ လုပ်ငန်းခွင်များတွင် မှန်မှန်ကန်ကန်အသုံးပြုရန်လိုအပ်ကြောင်း၊ မိမိတို့ထုတ်လုပ်သောထုတ်ကုန်များကိုလည်း ပြည်တွင်းဈေးကွက်တွင်သာမက ပြည်ပဈေးကွက်များသို့တိုင် ထိုးဖောက်ရောင်းချနိုင်ရန်အတွက် အရည်အသွေးကောင်းမွန်ပြီး တန်ဖိုးမြှင့်ထုတ်ကုန်များ ထုတ်လုပ်ကြရန်လိုအပ်ကြောင်း၊ လုပ်ငန်းခွင်များတွင် သန့်ရှင်းသပ်ရပ်စွာလုပ်ကိုင်ဆောင်ရွက်ကြရန်လိုအပ်ပြီး၊ အရည်အသွေးကောင်းမွန်ပြည့်ဝ၍ သန့်ရှင်းလတ်ဆတ်သော ကုန်ကြမ်းများကိုသာသုံးစွဲထုတ်လုပ်ကြရန်လိုအပ်ကြောင်း၊ စားသုံးသူအား စိတ်စေတနာအပြည့်အဝထား၍ စီးပွားရေးကျင့်ဝတ်စည်းကမ်းများနှင့်အညီ လုပ်ကိုင်ဆောင်ရွက်ကြရန်အရေးကြီးကြောင်း၊ စားသုံးသူကာကွယ်ရေးဥပဒေပါ ကုန်စည်နှင့်ဝန်ဆောင်မှုများနှင့်ပတ်သက်၍ စီးပွားရေးလုပ်ငန်းရှင်များ သိသင့်သိထိုက်သည့်အကြောင်းအရာများ၊ ကုန်အညွှန်းအမှတ်အသားဖော်ပြပါရှိရမည့်အချက်များအား ရှင်းလင်းဆွေးနွေးဟောပြောခဲ့ကြောင်းနှင့် ဟောပြောဆွေးနွေးပွဲသို့ ညောင်ဦးမြို့နယ်အတွင်းရှိ စားသောက်ဆိုင်လုပ်ငန်းရှင်များ၊ လက်ဖက်ရည်ဆိုင်လုပ်ငန်းရှင်များ၊ ပဲကြော်လုပ်ငန်းရှင်များ၊ အာလူးကြော်လုပ်ငန်းရှင်များ၊ ကိတ်မုန့်ပေါင်မုန့်လုပ်ငန်းရှင်များ၊ လက်ဖက်ပဲကြမ်းလုပ်ငန်းရှင်များ၊ စုစုပေါင်း( ၄၀ )ဦးတက်ရောက်ခဲ့ကြောင်းသိရှိရပါသည်။

DOCA(မန္တလေး)

      စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မကွေးတိုင်းဒေသကြီး၊ ပခုက္ကူခရိုင်ဦးစီးမှူးရုံးမှ ဒုတိယခရိုင်ဦးစီးမှူးနှင့်ဝန်ထမ်းများသည် တိုင်းဒေသကြီးဦးစီးမှူး၏လမ်းညွှန်မှု၊ ခရိုင်ဦးစီးမှူး၏ကြီးကြပ်မှုဖြင့် ထုတ်ကုန်များလုံခြုံစိတ်ချရမှုရှိစေရေး၊ ကုန်စည်များတွင် ကုန်အညွှန်းအမှတ်အသားများပြည့်စုံစွာထည့်သွင်းဖော်ပြထားခြင်းရှိ/မရှိ၊ စားသုံးသူများ နေ့စဉ်အသုံးပြုလျက်ရှိသော ကုန်စည်နှင့်ဝန်ဆောင်မှုများ ဘေးအန္တရာယ်ကင်းရှင်းပြီး လုံခြုံစိတ်ချရမှုရှိစေရေး၊ ကုန်စည်များကို သတ်မှတ်စံချိန်စံညွှန်းများ၊ ညွှန်ကြားချက်များနှင့်ကိုက်ညီမှုရှိ/မရှိ  ဈေးကွက်စောင့်ကြည့်စစ်ဆေးခြင်းများဆောင်ရွက်လျက်ရှိပါသည်။ ဈေးကွက်စောင့်ကြည့်စစ်ဆေးရာတွင် မိတ်ဖက်ဌာနဆိုင်ရာများနှင့်ပူးပေါင်း၍သော်လည်းကောင်း၊ စားသုံးသူကာကွယ်ရေးဥပဒေအရ ခန့်အပ်ထားသော စစ်ဆေးရေးအရာရှိများက ဦးဆောင်၍သော်လည်းကောင်း ဆောင်ရွက်လျက်ရှိပါသည်။

       ပခုက္ကူခရိုင်အနေဖြင့် ဇူလိုင်လအတွင်းတွင် ဒုတိယခရိုင်ဦးစီးမှူးဦးဆောင်၍ ပခုက္ကူမြို့နယ်တာဝန်ခံ၊ ထုတ်ကုန်လုံခြုံစိတ်ချရမှုဌာနခွဲတာဝန်ခံနှင့် ဝန်ထမ်းများသည် ပခုက္ကူမြို့၊ မြို့မဈေးရှိ FDAမှ သုံးစွဲရန်မသင့်ဟုထုတ်ပြန်ထားသော အလှကုန်ပစ္စည်းများအား ဈေးကွက်စောင့်ကြည့်(၁)ကြိမ်၊ မြို့မဈေးအတွင်းရှိ စားသုံးဆီအရောင်းဆိုင်(၃)ဆိုင်၊ ပခုက္ကူမြို့ပေါ်ရှိ FDA မှ တားမြစ်ဓာတုပစ္စည်းများပါဝင်မှုမရှိသော်လည်း အလှကုန်ပစ္စည်းမှတ်တမ်းတင်ထားခြင်းမရှိသော အလှကုန်ပစ္စည်း(၁၂) မျိုးကိုရောင်းချခြင်းရှိ/မရှိ အလှကုန်ပစ္စည်းအရောင်းဆိုင်(၅)ဆိုင်၊ ပခုက္ကူမြို့၊ အမှတ်(၁၁) ရပ်ကွက်ရှိ ကုန်စုံဆိုင်(၁)ဆိုင်နှင့် ဆိပ်ဖြူမြို့ အနောက်ပိုင်းရပ်ကွက်ရှိ ကုန်စုံဆိုင်(၁)ဆိုင်သို့ ကုန်အညွှန်းအမှတ်အသားပြည့်စုံခြင်းရှိ/မရှိအား ဈေးကွက်စောင့်ကြည့်စစ်ဆေးခြင်းများကို မိတ်ဖက်ဌာနများနှင့်ပူးပေါင်းဆောင်ရွက်ခဲ့ကြပြီး ဌာန၏ဥပဒေ၊ အမိန့်နှင့်ညွှန်ကြားချက်ပါ အကြောင်းအရာများကို အသိပညာပေးဆွေးနွေးခြင်းများဆောင်ရွက်ခဲ့ပြီး စုစုပေါင်း ဈေးကွက်စောင့်ကြည့်စစ်ဆေးခြင်း(၅)ကြိမ်ပြုလုပ်ဆောင်ရွက်နိုင်ခဲ့ကြောင်းသိရှိရပါသည်။

DOCA(မကွေး)

        မြိတ်ခရိုင် စားသုံးသူရေးရာဦးစီးဌာနအပါအဝင် ဗဟိုစာရင်းအင်းဦးစီးဌာန၊ အထူးစုံစမ်းစစ် ဆေးရေးဦးစီးဌာန၊ မြို့နယ်စည်ပင်သာယာရေးအဖွဲ့တို့မှ ၂၀၂၄ခုနှစ်၊ ဇူလိုင်လ(၃၁)ရက်တွင် မြိတ်မြို့၊ ဆိပ်ငယ်ရပ်၊ စည်ပင်သာယာစျေးကြီးရှိ  စားသုံးဆီများကို ကုန်အညွှန်းအမှတ်အသားပါရှိစေရေးနှင့် ရောနှောဆီများတွင် သတ်မှတ်ထား‌သော ကုန်အညွှန်းအမှတ်အသားဖြင့် ‌ဖော်ပြထားခြင်းရှိ/မရှိ ကွင်ဆင်းစစ်ဆေးခဲ့ကြပါသည်။

     ကွင်းဆင်းစစ်ဆေးရာတွင် ရောနှောစားအုန်းဆီများကို စားသုံးသူရေးရာဦးစီးဌာန၏ သတ်မှတ် ကုန်အညွှန်းအမှတ်အသားဖြင့် ဖော်ပြ၍ရောင်ချနေကြောင်းသိရှိရပြီး ကုန်စည်များတွင်ကုန်အညွှန်းအမှတ်အသားဖော်ပြပါရှိစေရေးနှင့် ဘေးအန္တရာယ်ကင်းသောကုန်စည်များ ရောင်းချမှုရှိစေရေး အသိပညာ ပေးပြောကြားခဲ့ကြောင်းသတင်းရရှိပါသည်။

DOCA(တနင်္သာရီ)