သတင်းနှင့် လှုပ်ရှားမှုများ

        စားသုံးသူရေးရာဦးစီးဌာန၊ ဟင်္သာတမြို့နယ်ဦးစီးမှူးသည် (၁၃.၉.၂၀၂၄)ရက်နေ့၊ နေ့လည် (၁၄:၀၀)နာရီအချိန်တွင် ဟင်္သာတမြို့နယ်၊ လယ်တော်ကျေးရွာအုပ်စု၊ လယ်တော်အဝေးပြေးကားဝန်း ရှိ အသင်းရုံး၌ ကုန်မျိုးစုံဆိုင်လုပ်ငန်းရှင်များအား စားသုံးသူကာကွယ်ရေးဆိုင်ရာအသိပညာပေး ဟော ပြောခြင်း ဆောင်ရွက်ခဲ့ပါသည်။

       အဆိုပါဟောပြောပွဲတွင် မြို့နယ်ဦးစီးမှူး ဦးမိုးကျော်က  စားသုံးကာကွယ်ရေးဥပဒေပါ စီးပွား ရေးလုပ်ငန်းရှင်၏တာဝန်များအကြောင်း၊ ကုန်အညွှန်းအမှတ်အသား အဓိပ္ပာယ်ဖွင့်ဆိုချက်၊ ကုန်အညွှန်း အမှတ်အသားဖော်ပြခြင်းနှင့် စပ်လျဉ်း၍ မည်သည့်စီးပွားရေးလုပ်ငန်းရှင်မဆို ပုဒ်မ(၄၁) ပုဒ်မခွဲ(ခ) နှင့်(ဆ) တို့ပါ ကုန်အညွှန်းအမှတ်အသား ဖော်ပြရာတွင် မြန်မာဘာသာဖြင့်ဖြစ်စေ၊ မြန်မာ ဘာသာနှင့် အခြား ဘာသာတစ်ခု (သို့မဟုတ်) တစ်ခု ထက်ပို၍ တွဲလျက်ဖြစ်စေ ရေးသားဖော်ပြရမည့် အကြောင်း၊ ကုန်စည်(သို့မဟုတ်) ဝန်ဆောင်မှုကို ဝယ်ယူအသုံးပြုခြင်းကြောင့် ဖြစ်ပေါ်လာသည့် နစ်နာဆုံးရှုံးမှု များနှင့် စပ်လျဉ်း၍ ကုစားခွင့်ရရှိခြင်း များအကြောင်း၊ ပြစ်မှုနှင့်ပြစ်ဒဏ်များအကြောင်း၊ စားသုံးသူ မိဘပြည်သူများ အနေဖြင့်လည်း စားသုံးသူရေးရာဦးစီးဌာန၏ လုပ်ငန်းဆောင်ရွက်ချက်များ အကြောင်း သိရှိလိုပါက www.doca.gov.mm Websiteတွင် ဝင်ရောက်လေ့လာနိုင်ကြောင်း၊ စားသုံးသူ သတင်းပြန်ကြားရေး နှင့် တိုင်ကြားမှုလက်ခံ ဆောင်ရွက်ရေးစင်တာ (CICC) ရုံးခန်းများ ဖွင့်လှစ် ထားရှိမှု အခြေအနေတို့ကို လည်းကောင်း အသိပညာပေးဆွေးနွေးခဲ့ကြောင်းသိရှိရပါသည်။

DOCA(ဧရာဝတီ)

   ဧရာဝတီတိုင်းဒေသကြီး၊ စားသုံးသူရေးရာဦးစီးဌာန မြောင်းမြခရိုင် ဝါးခယ်မမြို့နယ် တာဝန်ခံဦးအောင်မိုးနှင့် ဝန်ထမ်းများသည် မြို့နယ်စည်ပင်သာယာရေးအဖွဲ့နှင့် ပူးပေါင်း၍ (၁၃.၉.၂၀၂၄)ရက်နေ့၊နံနက် (၈:၃၀)နာရီအချိန်တွင် ရေကျော်ရပ်ကွက်ရှိ ဒေါ်မာမာအေးဆန်ဆိုင်နှင့် ဝင်းဌေးဆန်ဆိုင်တွင် ရောင်းချနေသောဆန်များအား သတ်မှတ်ရည်ညွှန်းဈေးနှုန်းဖြင့်    ရောင်းချပေးနေခြင်း ရှိ/ မရှိ ကွင်းဆင်း စစ်ဆေးခဲ့ပါသည်။

    ထိုသို့ ကွင်းဆင်းစစ်ဆေးဆောင်ရွက်ရာတွင်  ဝါးခယ်မမြို့နယ်တာဝန်ခံမှ ရေကျော်ရပ်ကွက်ရှိ ဒေါ်မာမာအေးဆန်ဆိုင်တွင် ရောင်းချနေသော ပေါ်ဆန်းဆန် တစ်ပြည်လျှင် (၅၀၀၀)ကျပ်၊ ဧည့်မထဆန် တစ်ပြည်လျှင် (၃၀၀၀)ကျပ်နှင့် ဝင်းဌေးဆန်ဆိုင်တွင် ရောင်းချနေသော ပေါ်ဆန်းဆန်တစ်ပြည်လျှင် (၅၀၀၀)ကျပ်၊    ဧည့်မထဆန်တစ်ပြည်လျှင် (၃၀၀၀)ကျပ်ဖြင့် ရောင်းချနေမှုအပေါ်  သတ်မှတ်ရည်ညွှန်းဈေးဖြင့် ရောင်းချရန်၊ ဈေးနှုန်းမြှင့်တင်ရောင်းချမှုမရှိစေရန် ရှင်းလင်းပြောကြားခဲ့ပြီး  ဆန်ဆိုင်ပိုင်ရှင်များအား ဆန်ရောင်းချမှုအခြေအနေနှင့် လက်ရှိဖြစ်ပေါ်နေသော ဆန်ဈေးနှုန်းကြီးမြင့်နေမှုကို မိမိတို့ဆန်ရောင်းချနေသော ဆိုင်များအနေဖြင့် စားသုံးသူပြည်သူများအား ဈေးနှုန်းမြှင့်တင်ရောင်းချခြင်းမပြုရန်၊ သတ်မှတ်ဈေးနှုန်း ဖြင့်သာရောင်းချရန်၊ ဈေးနှုန်းမြှင့်တင်ရောင်းချခြင်း၊ ဈေးကစားရန်ရည်ရွယ်ချက်ဖြင့် သိုလှောင်ထားရှိခြင်းများ တွေ့ရှိပါက အရေးကြီးကုန်စည်နှင့်ဝန်ဆောင်မှု ဥပဒေအရ အရေးယူဆောင်ရွက်သွားမည်ဖြစ်ကြောင်း ဆန်ဆိုင်ပိုင်ရှင်များအား ရှင်းလင်းဆွေးနွေးပြောကြားခဲ့ကြောင်း သိရှိရပါသည်။

DOCA(ဧရာဝတီ)

   ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ မြောင်းမြခရိုင်၊ မြောင်းမြမြို့နယ်တာဝန်ခံ ဒု-ခရိုင်ဦးစီးမှုး ဦးလှထွဋ်ဦးနှင့်ဝန်ထမ်းများသည် (၁၆-၉-၂၀၂၄)ရက်နေ့၊ နံနက်(၁၀:၀၀) နာရီအချိန်တွင်   တော်ဝင်ဧကရာဇ်ကုမ္ပဏီမှ Managing Director ဦးဆောင်၍ ဧရာဝတီတိုင်းဒေသကြီး၊ တိုင်းဦးစီးမှူးနှင့် ခရိုင်ဦးစီးမှူးများ၊ မြို့နယ်တာဝန်ခံများပူးပေါင်း၍ Zoom Metting ဖြင့်လုပ်ဆောင်သော လုပ်ငန်းညှိနှိုင်းအစည်းအဝေးပွဲသို့  Online  Virtual  စနစ်ဖြင့်တက်ရောက်ခဲ့ပါသည်။

        အဆိုပါ အစည်းအဝေးတွင် စားသုံးဆီခွဲဝေဖြန့်ဖြူးရေးနှင့်ပတ်သက်၍ ဧရာဝတီတိုင်းဒေသကြီး၊ ပုသိမ်ခရိုင်နှင့်အခြားခရိုင်များသို့ နေ့စဉ်ဆီထုတ်ဖြန့်ဖြူးခြင်း၊ နေ့စဉ်ပို့နိုင်ရန်အတွက် အထူးကုန်စည်အဖြစ်သတ်မှတ်၍   တင်ပို့မည့်ကားများတွင်လည်း  CCTV နှင့် GPS များတပ်ဆင်သွားမည်ဖြစ်ကြောင်း၊ ပုသိမ် ခရိုင်သို့ စားအုန်းဆီတင်ပို့ရာတွင် တွဲကားဖြင့်လည်းကောင်း၊ မြောင်းမြခရိုင်သို့တင်ပို့ရာတွင် (၆)ဘီးကားဖြင့်လည်းကောင်း၊ ဟင်္သာတခရိုင်သို့တင်ပို့ရာတွင် (၁၂)ဘီးကားဖြင့်လည်းကောင်း ခရိုင်အသီးသီးသို့ အဆင်ပြေချောမွေ့စွာရောက်ရှိနိုင်ရေးအတွက် သွားလာနိုင်သောလမ်းခရီးများကိုလည်းတင်ပြ၍  ဆွေးနွေး ညှိနှိုင်းပြီး ဆီပေပါအမျိုးအစားကိုလည်း ဈေးကွက်အတွင်း စည်းပိတ်၍ရသော ပေပါအဝါ Original တစ်မျိုးတည်းကိုသာအသုံးပြုရန်လိုအပ်ကြောင်း၊ ကုမ္ပဏီဘက်မှလည်း ပေပါ(၂)ဆကို ကျခံပေးမည်ဖြစ်ကြောင်းကို ရှင်းလင်းဆွေးနွေးခဲ့ပါသည်။ ဆက်လက်၍ တိုင်းဦးစီးမှူးသည် ခရိုင်ဦးစီးမှူးများအား ဆီကားချရန်အတွက် လိုအပ်သော လိပ်စာ၊ ဖုန်းနံပါတ်များကို တိကျမှန်ကန်စွာပေးနိုင်ရေး၊ ခရိုင်မှူးများကလည်း မိမိတို့သက်ဆိုင်ရာမြို့နယ်များသို့ စနစ်တကျဖြန့်ဖြူးခွဲဝေပေးနိုင်ရေးအတွက် လိုအပ်သည်များကို ဖြည့်စွက်ဆွေးနွေးကာ အစည်းအဝေးအား နေ့လယ် (၁၂:၀၀)နာရီခန့်တွင် ရုပ်သိမ်းခဲ့ကြောင်းသိရှိရပါသည်။

DOCA(ဧရာဝတီ)

     ဧရာဝတီတိုင်းဒေသကြီး၊ စားသုံးသူရေးရာဦးစီးဌာန မြောင်းမြခရိုင်၊ အိမ်မဲမြို့နယ် တာဝန်ခံဒေါ်ဇင်မာသန်းနှင့် ဝန်ထမ်းများသည်  (၁၃.၉.၂၀၂၄) နေ့၊ နံနက်(၁၁:၀၀)နာရီအချိန်တွင် အိမ်မဲမြို့နယ်၊ဆီကုန်သည်နှင့် ဆီလုပ်ငန်းရှင်များအသင်း ဥက္ကဌဦးဝေဖြိုးနိုင်အား စားသုံးသူရေးရာဦးစီးဌာန၊ မြို့နယ်ဦးစီးမှူးရုံးသို့  ခေါ်ယူတွေဆုံ၍ ဆီရောင်းချနေမှုအခြေအနေအား တွေ့ဆုံဆွေးနွေးခဲ့ပါသည်။

    ထိုသို့ဆွေးနွေးဆောင်ရွက်ရာတွင် အိမ်မဲမြို့နယ်တာဝန်ခံမှ မြို့နယ်အတွက် ခွဲဝေရရှိသော စားအုန်းဆီများအား သတ်မှတ်ရည်ညွှန်းဈေးဖြင့်ရောင်းချရန်၊ သယ်ယူပို့ဆောင်စရိတ်ပေါင်းပြီး ၂%     ထက်မပိုသော  ဈေးနှုန်းဖြင့် ရောင်းချရန် (FDA) ထောက်ခံချက်မပါသော စားအုန်းဆီဗူးများကိုလည်း ဈေးကွက်အတွင်း ရောင်းချမှုမရှိစေရေး ဝယ်ယူစားသုံးသူများအဆင်ပြေ   ဝယ်ယူရရှိနိုင်ရေးအတွက် မြို့နယ်ဖွံ့ဖြို့တိုးတက်ရေးအဖွဲ့များနှင့်ပူးပေါင်း၍ ဆောင်ရွက်ပေးကြရန် စားသုံးဆီများအားဈေးကွက်အတွင်း  ဈေးနှုန်းမြှင့်တင်ရောင်းချခြင်းမပြုကြရန်၊ သတ်မှတ်ရည်ညွှန်းဈေးဖြင့်သာ ရောင်းချပေးနိုင်ရေး ဆွေးနွေးပြောကြားခဲ့ကြောင်း၊  ဈေးနှုန်းမြှင့်တင်ရောင်းချခြင်း၊ ဈေးကစားရန်ရည်ရွယ်ချက်ဖြင့် သိုလှောင်ထားခြင်းများ တွေ့ရှိပါက အရေးကြီးကုန်စည်နှင့်ဝန်ဆောင်မှု ဥပဒေအရ အရေးယူဆောင်ရွက်သွားမည်ဖြစ်ကြောင်း အသိပေးရှင်းလင်းပြောကြားခဲ့ပါသည်။

DOCA(ဧရာဝတီ)

       ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ မြောင်းမြခရိုင်၊ မြောင်းမြမြို့နယ်မှ ငွေစာရင်းတာဝန်ခံ ဒေါ်ချယ်ရီမြင့် (ဒု-ဦးစီးမှုး)နှင့်  ဒေါ်သင်းလဲ့ကြူ(အငယ်တန်းစာရေး)တို့သည် (၁၃-၉-၂၀၂၄)ရက်နေ့၊ နံနက် (၁၀:၀၀) နာရီအချိန်တွင် ငွေစာရင်းဌာနညွှန်ကြားရေးမှူးဦးဆောင်၍ တိုင်းဒေသကြီးနှင့် ပြည်နယ်များမှ ငွေစာရင်းဆိုင်ရာလုပ်ငန်းညှိနှိုင်းအစည်းအဝေး  Zoom Metting   ဖြင့်ပြုလုပ်သည့် အစည်းအဝေးပွဲသို့ Online   Virtual စနစ်ဖြင့် တက်ရောက်ခဲ့ကြပါသည်။

        လုပ်ငန်းညှိနှိုင်းအစည်းအဝေးတွင် ပထမဦးစွာ ညွှန်ကြားရေးမှူးက အဖွင့်အမှာစကားပြောကြားခဲ့ပြီး    ဧရာဝတီတိုင်းဒေသကြီးဦးစီးမှူးရုံးမှ ငွေစာရင်းကိစ္စနှင့်ပတ်သက်၍ ဆွေးနွေးတင်ပြပြီးနောက် ဧရာဝတီတိုင်းဒေသကြီးမှ ခရိုင်များ၊ ပဲခူးတိုင်းဒေသကြီးဦစီးမှူးရုံး၊ ရန်ကုန်တိုင်းဒေသကြီးဦးစီးမှူးရုံးနှင့်ခရိုင်များ၊ စစ်ကိုင်းတိုင်းဒေသကြီးဦးစီးမှူးရုံးနှင့်ခရိုင်များ၊ မန္တလေးတိုင်းဒေသကြီးဦးစီးမှူးရုံးနှင့်ခရိုင်များ၊ မကွေးတိုင်းဒေသကြီးဦးစီးမှူးရုံး၊ တနင်္သာရီတိုင်းဒေသကြီးဦးစီးမှူးရုံး၊ မွန်ပြည်နယ်ဦးစီးမှူးရုံး၊ သထုံခရိုင်ဦးစီးမှူးရုံး၊ ကရင်ပြည်နယ်ဦးစီးမှူးရုံး၊ CTQM ဦးစီးမှူးရုံး၊ နေပြည်တော်ဦးစီးမှူးရုံး စသည့် တိုင်းဒေသကြီးနှင့် ပြည်နယ်အသီးသီးမှ ဆွေးနွေးတင်ပြကြပြီး တက်ရောက်သူများကလည်း သီးခြားတင်ပြပါက တင်ပြနိုင်ပါကြောင်း ရှင်းလင်းပြောကြားခဲ့ပါသည်။ ဆက်လက်၍ ငွေစာရင်းဌာနခွဲညွှန်ကြားရေးမှူးက နိဂုံးချုပ်အမှာစကားပြောကြားခဲ့ပြီး စာရင်းစစ်ကန့်သတ်ချက်ခံရသော ခရိုင်များကိုနမူနာထား၍ နောင်မဖြစ်သင့်ကြောင်းပြောကြားခဲ့ပြီး  တိုင်းဒေသကြီးနှင့်ပြည်နယ်များအနေဖြင့် ပြင်ဆင်ဆောင်ရွက်နိုင်ရန် ရှင်းလင်းဆွေးနွေးခဲ့ပြီး အစည်းအဝေးအား နံနက်(၁၁:၀၀)နာရီအချိန်တွင် ရုပ်သိမ်းခဲ့ကြောင်းသိရှိရပါသည်။

DOCA(ဧရာဝတီ)