ပြည်တွင်းကုန်သွယ်မှုသတင်း

    မကွေးတိုင်းဒေသကြီးသည် မြန်မာနိုင်ငံ၏ ဆီအိုးကြီးဟု တင်စားလောက်အောင် ဆီထွက်သီးနှံများဖြစ်သည့် (နှမ်း/မြေပဲ) သီးနှံတို့အား အဓိကထားစိုက်ပျိုးလျက်ရှိပါသည်။ မကွေးမြို့နယ်အနေဖြင့် မိုးနှမ်း(၁၇၆၄၁၉)ဧကအား ၂၀၂၃-ခုနှစ်၊ မေလဆန်းပိုင်းက စတင်စိုက်ပျိုးခဲ့ပြီး ယခုအခါတွင် စတင်ရိတ်သိမ်းနေပြီဖြစ်ပါသည်။

     (၆.၈.၂၀၂၃)ရက်နေ့ နံနက် (၀၈:၀၀)နာရီတွင် မကွေးခရိုင်၊ မြို့နယ်လယ်ယာစီမံခန့်ခွဲရေးအဖွဲ့ များဖြစ်သည့် မကွေးတိုင်းဒေသကြီး လယ်ယာမြေစီမံခန့်ခွဲရေးနှင့်စာရင်းအင်းဦးစီးဌာန၊ တိုင်းဒေသ ကြီးဦးစီးမှူး ဦးကျော်ဝင်း၊ မကွေးခရိုင်စီမံအုပ်ချုပ်ရေးအဖွဲ့ဥက္ကဌ ဦးမောင်ထူးနှင့် အဖွဲ့ဝင်များ၊ ခရိုင်/မြို့နယ် လယ်ယာမြေစီမံခန့်ခွဲ့ရေးအဖွဲ့ဝင်များသည် ဒဟက်ကန်ကျေးရွာအုပ်စု၊ ကွင်းအမှတ် (၁၆၄၃)၊ ဦးပိုင်အမှတ် (၆၉)ရှိ တောင်သူဦးစိန်လှ၏ စံပြမိုးနှမ်းသီးနှံ (၃.၀၇)ဧကနှင့် ညောင်ပင်သာ ကျေးရွာအုပ်စု၊ ကွင်းအမှတ်(၁၆၈၃/၂၉၃၄)၊ ဦးပိုင်အမှတ်(၂၉)ရှိ တောင်သူ ဒေါ်လှဝင်း၏ စံပြမိုးနှမ်း သီးနှံ (၄.၅၈)ဧက ရိတ်သိမ်းနေမှုအား ကြည့်ရှုအားပေးခဲ့ကြောင်း သိရှိရပါသည်။

     တောင်သူ ဦးစိန်လှနှင့် ဒေါ်လှဝင်းအား တွေ့ဆုံမေးမြန်းခဲ့မှုအရ ယခင်နှစ်က မိုးနှမ်းသီးနှံ တစ်ဧကလျှင် စိုက်ပျိုးမှု ကုန်ကျစရိတ် ကျပ်(၂၆၂၀၀၀)ခန့်ရှိပြီး တစ်ဧကလျှင် နှမ်း(၆.၅)တင်းခန့် ရရှိခဲ့ ပါကြောင်း၊ နှမ်းတစ်တင်းလျှင် ကျပ်(၅၀၆၀၀)ရရှိ၍ အကျိုးအမြတ်အနေဖြင့် တစ်ဧကလျှင် ကျပ် (၆၆၉၀၀) ရရှိပါကြောင်းနှင့် ယခုနှစ်တွင် နှမ်းတစ်ဧက စိုက်ပျိုးမှု ကုန်ကျစရိတ်မှာ ကျပ်(၃၅၈၀၀၀) ခန့်ရှိပြီး လက်ရှိနှမ်းပင်များ၏ အခြေအနေအရ တစ်ဧကလျှင် (၇.၅)တင်း ထွက်ရှိနိုင်ပြီး လက်ရှိနှမ်းစျေးနှုန်းမှာ နှမ်းတစ်တင်းလျှင် ကျပ်(၇၆၀၀၀)ဖြစ်၍ တစ်ဧကလျှင် ကျပ်(၂၁၂၀၀၀)ခန့် အကျိုးအမြတ် ရရှိနိုင်ကြောင်း သိရှိခဲ့ရပါသည်။

DOCA(မကွေး)

   ၂၀၂၃ခုနှစ်၊ ဩဂုတ်လ (ပထမပတ်)တွင် မင်းဘူးမြို့မဈေးအတွင်း၌ ရောင်းချလျက်ရှိသော အခြေခံစားကုန်ဖြစ်သည့် ဧရာပဒေသာဆန် (၁)အိတ်လျှင် ကျပ်(၁၀၀၀၀၀-၁၂၀၀၀၀)၊ မနောသုခ ဆန်(၁)အိတ်လျှင် ကျပ်(၇၅၀၀၀-၈၀၀၀၀)ဖြစ်ပြီး (ဒုတိယပတ်)တွင် ဧရာပဒေသာဆန် (၁)အိတ်လျှင် ကျပ်(၁၁၀၀၀၀-၁၃၀၀၀၀)ဖြစ်၍ ယခုအပတ်တွင် ဈေးအနည်းငယ်တက်နေကြောင်း၊ မနောသုခဆန်မှာ ယခုအပတ်တွင် ဈေးငြိမ်နေကြောင်း ရောင်းချနေသောဆန်ဈေးသည်ထံမှ သိရှိရပါသည်။

   ကြက်သွန်နီ (၁)ပိဿာလျှင် ကျပ်(၂၂၀၀)ဖြစ်ပြီး ရေနံချောင်းမြို့နယ်၊ ပင်းချောင်း တစ်လျှောက်ရှိ ကျေးရွာများနှင့် ပွင့်ဖြူ(မဲဇလီ)၊ စလင်း၊ ဆင်ဖြူကျွန်းမြို့များမှ ထွက်ရှိသော ကြက်သွန်နီများကို ဝယ်ယူရောင်းချကြကြောင်းနှင့် စားဖိုဆောင်သီးနှံ ကြက်သွန်ဖြူ(ကြူကုတ်) (၁)ပိဿာလျှင် ကျပ်(၇၈၀၀)၊ ကြက်သွန်ဖြူ(ဗမာ) (၁)ပိဿာလျှင် ကျပ်(၈၀၀၀)၊ ငရုတ်ခြောက်ရှည် (၁)ပိဿာလျှင် ကျပ်(၁၅၀၀၀)၊ အာလူး  (၁)ပိဿာလျှင် ကျပ်(၃၂၀၀)၊ သကြား (၁)ပိဿာလျှင် ကျပ်(၃၄၀၀)၊ နနွင်းတက် (၁)ပိဿာလျှင် ကျပ်(၅၀၀၀)ဖြစ်၍ ယခင်အပတ်ထက် ဈေးအနည်းငယ် ငြိမ်နေကြောင်း ဈေးသည်တစ်ဦးထံမှ သိရှိရပါသည်။

    စားသုံးဆီများမှာ နှမ်းဆီ(၁)ပိဿာလျှင် ကျပ်(၁၃၀၀၀)၊ ပဲဆီ(၁)ပိဿာလျှင် ကျပ်(၁၃၀၀၀)၊ စားအုန်းဆီ(၁)ပိဿာလျှင် ကျပ်(၈၅၀၀)ဖြစ်၍ ယခင်အပတ်ဈေးအတိုင်း ဈေးငြိမ်နေကြောင်း ဆီရောင်းချနေသော ဈေးသည်တစ်ဦးထံမှ သိရှိရပါသည်။  

DOCA(မကွေး)

   စားသုံးသူရေးရာဦးစီးဌာန၊ ဧရာဝတီတိုင်းဒေသကြီး၊ မအူပင်ခရိုင်ဦးစီးမှူးရုံးသည် ခရိုင်ဆီကုန်သည်နှင့်ဆီလုပ်ငန်းရှင်များအသင်း၊ ဌာနဆိုင်ရာများဖြင့်နှင့်အတူ (၉-၈-၂၀၂၃) ရက်နေ့၊ နံနက်ပိုင်းတွင် မအူပင်အဝေးသင်တက္ကသိုလ်နှင့် နည်းပညာတက္ကသိုလ်၊ အစိုးရနည်းပညာအထက်တန်းကျောင်း၊ ကွန်ပြူတာတက္ကသိုလ်မှ ဝန်ထမ်းမိသားစုများနှင့် မအူပင်မြို့နယ်အတွင်း ရပ်ကွက်အသီးသီးရှိ ပြည်သူများအတွက် ဈေးကားဖြင့် စားသုံးဆီများကို သတ်မှတ်ရည်ညွှန်းဈေးနှုန်းအတိုင်း ရောင်းချနေမှုများအား စိစစ်ကြပ်မတ်ဆောင်ရွက်ခဲ့ပါသည်။

     အဆိုပါ စိစစ်ဆောင်ရွက်မှုတွင် ဆီကုန်သည်နှင့် ဆီလုပ်ငန်းရှင်များအသင်းအနေဖြင့် စားအုန်းဆီတင်သွင်းသည့်ကုမ္ပဏီများက လက်ကားကုန်သည်များထံသို့ ဖြန့်ဖြူးရောင်းချသည့်စားသုံးဆီများကို ရည်ညွှန်းလက်ကားဈေးအပေါ်တွင် သယ်ယူစရိတ်ထပ်ပေါင်းထည့်ကာ အမြတ် ၂ရာခိုင်နှုန်းထက်မပိုသောဈေးနှုန်းဖြင့် ရပ်ကွက်အသီးသီးသို့ ဈေးကားဖြင့် လှည့်လည်ရောင်းချ၍  လူးတစ်ဦးလျှင် တစ်ပိဿာနှုန်းစီရောင်းချပေးခဲ့ကြောင်း၊ စားသုံးသူရေးရာဦးစီးဌာနမှ တာဝန်ရှိသူများကလည်း သက်သာသောဈေးနှုန်းဖြင့် ပြည်သူများအဆင်ပြေချောမွေ့စွာ ဝယ်ယူရရှိနိုင်ရန်၊ အလေးချိန်ပြည့်ဝမှန်ကန်မှုရရှိစေရန်၊  စနစ်တကျအလှည်းကျတန်းစီစနစ်ဖြင့် ပြည်သူများဝယ်ယူရရှိနိုင်ရေး စိစစ်ကြပ်မတ်ဆောင်ရွက်ပေးခဲ့ကြောင်း သတင်းရရှိပါသည်။

DOCA(ဧရာဝတီ)

  ကရင်ပြည်နယ်တွင် မိုးများအဆက်မပြတ်ရွာသွန်းပြီး သံလွင်မြစ်ရေမြင့်တက်လာမှုကြောင့် မြို့ပေါ်ရပ်ကွက်များနှင့် ပတ်ဝန်းကျင်ကျေးရွာများရှိ ပြည်သူများဈေးရောင်း/ဈေးဝယ်များအဆင်ပြေလွယ်ကူစေရေးအတွက် အမှတ်(၁)၊ ရေပေါ်စံပြဈေးအား အမှတ်(၃)ရပ်ကွက်၊ ကမ်းနားလမ်းယာယီဈေးသို့ ပြောင်းရွှေ့ဖွင့်လှစ်ထားကြောင်းသိရသည်။

   အဆိုပါဈေးတွင် ငါးမျိုးစုံရောင်းချလျက်ရှိပြီး ၂၀၂၃ခုနှစ်၊ ဩဂုတ်လ၊ ဒုတိယအပတ်အတွင်းဖြစ်ပေါ်နေသော ငါးမျိုးစုံ၏ဈေးနှုန်းများမှာ ငါးကြင်းဖြူတစ်ပိဿာလျှင် ၁၄၇၀၀ကျပ်၊ ငါးမြစ်ချင်းတစ်ပိဿာလျှင် ၇၅၀၀ကျပ်၊ ငါးသလောက်တစ်ပိဿာလျှင် ၂၅၀၀၀ကျပ်၊ တီလားဗီးယားငါးတစ်ပိဿာလျှင် ၉၀၀၀ကျပ်၊ ငါးခုံးမကြီးတစ်ပိဿာလျှင် ၅၅၀၀ကျပ်၊ ငါးခုံးမသေးတစ်ပိဿာလျှင် ၄၅၀၀ကျပ်၊ ငါးမဲလုံးတစ်ပိဿာလျှင် ၆၀၀၀ကျပ်၊ ငါးမှုန့်တစ်ပိဿာလျှင် ၅၅၀၀ကျပ်၊ ငါးတန်တစ်ပိဿာလျှင် ၅၀၀၀ကျပ်၊ ပလာတူးတစ်ပိဿာလျှင် ၅၀၀၀ကျပ်၊ မွေးမြူရေးငါးခူတစ်ပိဿာလျှင် ၆၀၀၀ကျပ်၊ ရေချိုငါးခူတစ်ပိဿာလျှင် ၂၀၀၀၀ကျပ်၊  ငါးဖယ်တစ်ပိဿာလျှင် ၁၅၀၀၀ကျပ်၊ ငါးရံ့တစ်ပိဿာလျှင် ၂၀၀၀၀ကျပ်၊ ငါးနုသန်းတစ်ပိဿာလျှင် ၂၀၀၀၀ကျပ်၊ ငါးဘတ်တစ်ပိဿာလျှင် ၂၀၀၀၀ကျပ်၊ ငါးဖယ်ခြစ်တစ်ပိဿာလျှင် ၃၀၀၀၀ကျပ်၊ ရေချိုပုစွန်ထုပ်သေးတစ်ပိဿာလျှင် ၂၅၀၀၀ကျပ်၊ ရေချိုပုစွန်ထုပ်ကြီးတစ်ပိဿာလျှင် ၃၅၀၀၀ကျပ်၊ ဂျော့ပုစွန် တစ်ပိဿာလျှင် ၂၀၀၀၀ကျပ်ဖြင့် အရောင်းအဝယ်ဖြစ်ပေါ်လျက်ရှိပြီး ဩဂုတ်လ၊ ပထမအပတ်အတွင်း အရောင်းအဝယ်ဖြစ်ပေါ်ခဲ့သောဈေးနှုန်းထက် အနည်းငယ်မြင့်တက်လာခဲ့ကြောင်း ငါးအရောင်းဆိုင်များမှသိရှိရပါသည်။

DOCA(ကရင်)

      မုံရွာခရိုင်အတွင်းရှိ မြို့နယ်များ၌ ဩဂုတ်လ ပထမပတ်တွင် စပါးဈေးနှုန်းနှင့် ဆန်ဈေးနှုန်းများ မြင့်တက်လျက်ရှိပါကြောင်း သိရပါသည်။

     မုံရွာမြို့၏ ဩဂုတ်လ ပထမပတ်တွင် ဖြစ်ပေါ်နေသော စပါး/ဆန်း ဈေးနှုန်းများမှာ ဧရာမင်း စပါးတင် ၁၀၀ လျှင် ကျပ် ၃၀၀၀၀၀၀ မှ ၃၁၀၀၀၀၀၊ ဧရာမင်းဆန်  ၂၄ ပြည်ပါ တစ်အိတ်လလျှင် ၁၁၀၀၀၀ မှ ၁၁၅၀၀၀ ထိ၊ မနောသုခစပါးတင် ၁၀၀ လျှင် ကျပ် ၂၀၀၀၀၀၀၊ မနောသုခဆန် ၂၄ ပြည်ပါ တစ်အိတ်လျှင် ကျပ် ၉၀၀၀၀၊ ပေါ်ဆန်း စပါးတင် ၁၀၀ လျှင် ကျပ် ၃၂၀၀၀၀၀၊ ပေါ်ဆန်းဆန် ၂၄ ပြည်ပါတစ်အိတ်လျှင် ကျပ် ၁၁၀၀၀၀ မှ ၁၂၀၀၀၀ ထိတို့ဖြင့် အရောင်းအဝယ်ဖြစ်ကြောင်း သိပါသည်။

      ယခင်လ ပထမအပတ် စပါး/ဆန်ဈေးနှုန်းများနှင့် ယခုလ ပထမအပတ် ဈေးနှုန်းများ နှိုင်းယှဉ်လျှင် ဧရာမင်းစပါးတင် ၁၀၀ လျှင် ၅၀၀၀၀၀ ကျပ် ၊ ဧရာမင်းဆန်  ၂၄ ပြည်ပါ တစ်အိတ်လျှင် ၁၅၀၀၀ ကျပ် ၊ မနောသုခစပါးတင် ၁၀၀ လျှင် ၂၀၀၀၀၀ ကျပ် ၊ မနောသုခဆန် ၂၄ ပြည်ပါ တစ်အိတ်လျှင် ၁၅၀၀၀  ကျပ် ပေါ်ဆန်းစပါးတင် ၁၀၀ လျှင် ၃၅၀၀၀၀ ကျပ် ၊ ပေါ်ဆန်းဆန် ၂၄ ပြည်ပါ တစ်အိတ်လျှင် ၁၅၀၀၀၀  ကျပ် တို့ ဈေးနှုန်းမြင့်တက်ကြောင်း‌ မုံရွာမြို့နေ ဆန်စက်ပိုင်တစ်ဦးထံမှ သိရှိရပါသည်။

DOCA(စစ်ကိုင်း)