ပြည်တွင်းကုန်သွယ်မှုသတင်း

    ငရုတ်သီးခြောက်သည် စားဖိုချောင်သုံးသီးနှံထဲတွင် တစ်ခုအပါအဝင်ဖြစ်ပြီး ငရုတ်သီးခြောက်ကို အမှုန့်ပြုလုပ်၍ အရောင်တင်မှုန့်၊  အလှော်မှုန့်၊ အကြမ်းမှုန့်ဟူ၍ လူအများ နေ့စဉ် စားသုံးကြပါသည်။ ပြည်ခရိုင်အနေဖြင့် ငရုတ်သီးခြောက်စိုက်ဧကအနည်းငယ်ရှိသော်လည်း ဈေးကွက်တင်ရောင်းချနိုင်မှုနည်းကြောင်း သိရပါသည်။ ငရုတ်သီးအစိမ်းသာ စိုက်ဧကရှိပြီး အထွက်ရှိသဖြင့် ဈေးကွက်တွင် ရောင်းချကြပါသည်။ ပြည်ဒေသအတွင်း ငရုတ်ခြောက်စားသုံးမှုအနေဖြင့် ငရုတ်ခြောက်အပွနှင့် ဗီယက်နန်ခြောက်အပွကို ဆင်ဖြူကျွန်းနှင့် ရန်ကုန်ဘက်မှ မှာယူ၍စားသုံးရပါသည်။ ဟင်းချက်ရာတွင် အရောင်တင်မှုန့်ပြုလုပ်ကာ အသုံးပြုရသောငရုတ်သီးမှာ ငရုတ်စိမ်းပွဖြစ်ပြီး ဆင်ဖြူကျွန်းဘက်မှ မှာယူတင်သွင်းရသော ငရုတ်သီးဈေးမှာ (ရှယ်) တစ်ပိဿာလျှင် (၃၃၀၀၀) ကျပ်၊ အလတ်စနှင့် အနည်းငယ်ညံ့သောငရုတ်သီးဈေးမှာ တစ်ပိဿာလျှင် (၁၇၀၀၀) ကျပ်ဖြင့်ဝယ်ယူကြိတ်ခွဲကြောင်း သိရပါသည်။ ရန်ကုန်ဘက်မှ မှာယူတင်သွင်းသော ဗီယက်နန်ခြောက်မှာ တစ်ပိဿာလျှင် (၂၂၀၀၀) ကျပ်ခန့်ရှိပြီး အနည်းငယ်အစပ်ရှိသောကြောင့် ငရုတ်စိမ်းပွနှင့်ရော၍ကြိတ်ခွဲပြီး အရောင်တင်မှုန့်ပြုလုပ်ကာ ရောင်းချကြောင်း သိရပါသည်။ ယခုကဲ့သို့မိုးရာသီအချိန်တွင် အရောင်တင်မှုန့်ပြုလုပ်ရာ၌ စားသုံးသူများဘေးအန္တရာယ်ကင်းရှင်းပြီး မှိုပါဝင်မှုနည်းစေရန် အထူးဂရုစိုက်၍ပြုလုပ်ရကြောင်း  လုပ်ငန်းရှင်တစ်ဦးထံမှသိရှိရပါသည်။ ပြည်ဒေသထွက် ငရုတ်သီးစိမ်းမှာ ဒေသတွင်းစားသုံးမှုရှိသည့်အပြင် ရန်ကုန်နှင့် ရခိုင်ဘက်သို့လည်း တင်သွင်းရောင်းချကြောင်းနှင့် ဈေးနှုန်းမှာ ငရုတ်သီးစိမ်း (ကျောက်စိမ်းသီး) တစ်ပိဿာလျှင် (၇၀၀၀) ကျပ်၊ ပီနန်ငရုတ်သီးစိမ်းတစ်ပိဿာလျှင် (၂၃၀၀၀) ကျပ်တို့ဖြင့်ရောင်းချကြောင်း သိရပါသည်။

DOCA(ပဲခူး)

     ဈေးကွက်အတွင်း ဘဲဥဈေးနှုန်းများ ကောင်းလျက်ရှိသောကြောင့် ပဲခူးတိုင်းဒေသကြီး၊ သနပ္ပင်မြို့နယ်အတွင်း စီးပွားဖြစ် ဘဲမွေးမြူခြင်း၊ တစ်နိုင်တစ်ပိုင် ဘဲမွေးမြူခြင်း လုပ်ငန်းများ ပိုမို များပြားလာကြောင်း သိရှိရပါသည်။

      ဘဲသည် ကြက်ကဲ့သို့ မဟုတ်ဘဲ မွေးမြူရလွယ်ကူသည့်အပြင် မိုးရာသီဖြစ်သည့်အလျောက် ၎င်းတို့၏ သဘာဝအစားအစာဖြစ်သော ရေမှော်၊ ပိုးမွှားကောင်သေး၊  တီကောင် စသည်တို့ ပိုမိုပေါများသည့်အတွက် ကုန်ကျစရိတ်သက်သာကြောင်း သိရှိရသည်။

       သနပ္ပင်မြို့နယ်အတွင်း လွှတ်ကျောင်းများ ပေါသောကြောင့် တစ်နိုင်တစ်ပိုင် အကောင်ရေ ၃၀မှ ၅၀ မွေးမြူသူများ ရှိသကဲ့သို့ အကောင်ရေ ၅၀၀၊ ၁၀၀၀၊ ၂၀၀၀ စသည်ဖြင့် စီးပွားဖြစ် မွေးမြူသူ များလည်းရှိကြောင်း သိရှိရသည်။ ဥစားဘဲအနေဖြင့် အကောင်ပေါက် စတင်မွေးမြူသည်မှ ခြောက်လ ကျော်လျှင် ဥစတင်ဥကာ ဥသက်တမ်းမှ တစ်နှစ်၊ တစ်နှစ်ခွဲခန့်ရှိကြောင်း သိရှိရသည်။ ဘဲကောင်ရေ ၁၀၀၀ မွေးမြူလျှင် ထုတ်လုပ်မှု ကုန်ကျစရိတ် အစားအစာ၊ ဆေးဝါး၊ လုပ်သားခအပါအဝင် တစ်ရက်လျှင် ကျပ် ၇၅၀၀၀ခန့် ကုန်ကျကြောင်း သိရှိရသည်။

    ဘဲဥ ဥသည့် အချိန်ရောက်လျှင် အကောင် ၁၀၀၀လျှင် တစ်ရက်ပျှမ်းမျှ ၇၀၀ နှုန်းခန့် ဥကြောင်း သိရပြီး သက်တမ်းကုန် ဘဲများကိုလည်း အသားအဖြစ် ရောင်းချနိုင်သည့်အတွက် အသားတင် အကျိုး အမြတ်ရရှိကြောင်း သိရှိရသည်။ ဘဲဥတစ်လုံးလျှင် ယနေ့ခြံထွက်ဈေးမှာ ၂၈၀ ကျပ်ခန့်  ရှိသောကြောင့် တစ်ရက်လျှင် ၁၉၆၀၀၀ ကျပ် ခန့်ဝင်ငွေရရှိသဖြင့် ဘဲကောင်ရေ ၁၀၀၀ မွေးမြူလျှင် တစ်ရက် ၁၂၁၀၀၀ ကျပ်ခန့် အကျိုးအမြတ်ရရှိရာ ဘဲမွေးမြူသည့် စီးပွားရေးလုပ်ငန်းရှင်များအနေဖြင့် စီးပွားရေး တွက်ခြေကိုက်လျက်ရှိကြောင်း သိရှိရသည်။  

DOCA(ပဲခူး)

     ၂၀၂၃ခုနှစ် ဇူလိုင်လ နောက်ဆုံးပတ်အတွင်း ရွှေဘိုမြို့နယ်တွင် အခြေခံစားကုန်များ ဖြစ်သော ရွှေဘိုပေါ်ဆန်းဆန်တစ်ပြည် ၄၈၀၀ကျပ်၊ ဧရာမင်းဆန် တစ်ပြည် ၄၈၀၀ကျပ်ဖြင့် အရောင်းအဝယ် ဖြစ်လျက်ရှိသည်။ကြက်သွန်နီ(သစ်) လက်လီဈေးမှာ (ကြီး) တစ်ပိဿာ ၂၀၀၀ကျပ်၊ (လတ်) တစ်ပိဿာ ၁၈၀၀ကျပ်၊ (သေး)တစ်ပိဿာ ၁၅၀၀ကျပ်နှုန်းဖြင့် အရောင်းအဝယ် ဖြစ်လျက်ရှိသည်။ ကြက်သွန်ဖြူလက်လီဈေးမှာ (ဗမာ)တစ်ပိဿာလျင် ၈၀၀၀ကျပ်မှ ၉၀၀၀ကျပ်ထိ၊ ရှမ်း ကြက်သွန်ဖြူ တစ်ပိဿာ ၇၀၀၀ကျပ်မှ ၈၀၀၀ကျပ်ထိ ၊ (ကြူကုပ်) တစ်ပိဿာ ၇၀၀၀ကျပ်မှ ၈၀၀၀ကျပ်ထိ၊ ချင်း တစ်ပိဿာ ၈၀၀၀ကျပ်မှ ၁၀၀၀၀ကျပ်ထိ ၊ ငရုတ်သီးခြောက် အမျိုးအစားအလိုက် ၁၇၀၀၀ကျပ် မှ ၁၈၀၀၀ကျပ်ထိ အာလူး တစ်ပိဿာ ၂၈၀၀ကျပ်မှ ၃၆၀၀ကျပ်ထိ ၊ခရမ်းချဉ်သီး တစ်ပိဿာ ၂၀၀၀ကျပ်ဖြင့် အရောင်းအဝယ် ဖြစ်နေပါသည်။

      ကြက်ဥ လက်လီဈေးနှုန်းမှာ (ကြီး)တစ်လုံး ၃၀၀ကျပ်၊ (သေး) တစ်လုံး ၂၅၀ကျပ် ၊ ဘဲဥ (ကြီး) တစ်လုံး (၃၅၀)ကျပ်၊ (သေး)တစ်လုံး (၃၀၀)ကျပ်ရှိသည်။ ရွှေဘိုမြို့၏ အသား/ငါး ဈေးနှုန်းများမှာ ကြက်သား(CP)  တစ်ပိဿာ ၁၀၀၀၀ကျပ်မှ ၁၂၀၀၀ကျပ်ထိ၊ကြက်သား (ဗမာ)တစ်ပိဿာ ၁၃၀၀၀ ကျပ်မှ ၁၅၀၀၀ကျပ်ထိ၊  ဝက်သား တစ်ပိဿာ ၂၀၀၀၀ကျပ်မှ ၂၂၀၀၀ကျပ်ထိ၊ အမဲသားတစ်ပိဿာ ၁၄၀၀၀ကျပ်မှ ၁၆၀၀၀ကျပ်ထိ၊  ငါးမြစ်ချင်း တစ်ပိဿာ ၇၅၀၀ကျပ်၊ ငါးကြင်း တစ်ပိဿာ ၇၀၀၀ကျပ်ဖြင့် ရောင်းဝယ်နေကြောင်း သိရသည်။

     စားသုံးဆီ ဈေးနှုန်းများမှာ ပဲဆီသန့် တစ်ပိဿာလျှင် ၁၅၀၀၀ကျပ်၊  စားအုန်းဆီ တစ်ပိဿာလျှင် ၈၉၀၀ကျပ်နှင့် နှမ်းဆီ တစ်ပိဿာလျှင် ၁၅၀၀၀ကျပ်ဖြင့် အရောင်းအဝယ် ဖြစ်နေကြောင်း သိရသည်။

DOCA(စစ်ကိုင်း)

          ၂၀၂၃ ခုနှစ် ၊ ဇူလိုင်လ တတိယပတ်အတွင်း မိတ္ထီလာမြို့နယ်တွင် အခြေခံစားသောက်ကုန် များဖြစ်သော စိုက်ပျိုးရေးထွက်ကုန် ရွှေဘိုပေါ်ဆန်းအသစ် တစ်ပြည် ၄၅၀၀ ကျပ်နှင့်အဟောင်း တစ်ပြည်လျှင် ၅၀၀၀ ကျပ်၊ ဧမထ တစ်ပြည် ၃၂၀၀ နှင့် ငစိန်တစ်ပြည် ၂၅၀၀ ကျပ်ဖြင့် အရောင်း အဝယ်ဖြစ်လျက်ရှိပါသည်။ စားအုန်းဆီတစ်ပိဿာလျှင် ၇၈၀၀ကျပ်၊ မြေပဲဆီ တစ်ပိသာလျှင် ၁၄၀၀၀ ကျပ် ၊ နှမ်းဆီတစ်ပိဿာလျှင် ၁၄၀၀၀ကျပ်တို့ဖြင့် အရောင်းအဝယ် ဖြစ်လျက်ရှိသည်။ ကြက်သွန်နီ လက်လီတစ်ပိဿာ ၂၂၀၀ ကျပ် ၊ ကြက်သွန်ဖြူ တစ်ပိဿာလျှင် ၆၀၀၀ ကျပ်၊ ချင်းတက် တစ်ပိဿာ လျှင် ၅၀၀၀ကျပ် ၊ ငရုတ်သီး ခြောက်အမျိုးအစားအလိုက် ၁၆၀၀၀ ကျပ်မှ ၂၀၀၀၀ ကျပ်ထိ ၊ အာလူး တစ်ပိဿာလျှင် ၂၈၀၀ ကျပ် ၊ ခရမ်းချဉ်သီးတစ်ပိဿာလျှင် ၁၅၀၀ ကျပ် နှင့် ကန်စွန်းရွက်၊ ချဉ်ပေါင်ရွက်၊ မုန်ညှင်းရွက်၊ ဆလပ်ရွက်တစ်စီးလျှင် ၂၀၀ ကျပ်တို့ဖြင့် အရောင်းအဝယ်ဖြစ်လျက်ရှိပါသည်။

          မွေးမြူရေးထွက်ကုန်များဖြစ်သော ကြက်ဥလက်လီဈေးနှုန်းမှာ အကြီးတစ်လုံး ၂၈၀ ကျပ်၊ အသေးတစ်လုံး ၂၃၀၊ ဘဲဥကြီး တစ်လုံး ၃၅၀ ကျပ်၊အသေးတစ်လုံး ၃၀၀ ကျပ်ရှိသည်။ မိတ္ထီလာမြို့၏ သား/ငါးဈေးနှုန်းနှင့် ငါးခြောက်ဈေးနှုန်းများမှာ ကြက်သား (ဒေသကြက်)တစ်ပိဿာလျှင် ၁၈၀၀၀ ကျပ်၊ ကြက်သား (CP)တစ်ပိဿာလျှင် ၁၀၀၀၀ ကျပ်၊ ဝက်သား တစ်ပိဿာလျှင် ၂၀၀၀၀ ကျပ်  ၊ အမဲသား တစ်ပိဿာလျှင် ၂၀၀၀၀ ကျပ်ထိ ၊ ငါးကြင်းတစ်ပိဿာလျှင် ၁၂၀၀၀ ကျပ်၊ ငါးမြင်းတစ်ပိသာ ၁၆၀၀၀၊ ငါးမြစ်ချင်းတစ်ပိဿာလျှင် ၈၀၀၀ ကျပ်၊ ငါးတန်တစ်ပိဿာလျှင် ၁၀၀၀၀ ကျပ် ၊ ငါးခူတစ်ပိဿာလျှင် ၁၀၀၀၀ ကျပ်၊ ငါးရံ့တစ်ပိဿာလျှင် ၁၂၀၀၀ ကျပ်၊ ငါးဘတ်တစ်ပိဿာလျှင် ၁၂၀၀၀ ကျပ်၊ ငါးဖယ် တစ်ပိဿာလျှင် ၁၁၀၀၀ ကျပ်၊ ငါးခြောက်လက်လီဈေးနှုန်းမှာ အာပြဲခြောက် တစ်ပိဿာ ၂၃၀၀၀ ကျပ် ငါးရံ့ခြောက်တစ်ပိဿာ ၅၀၀၀၀ ကျပ်၊ ငါးတံခွန်ခြောက်တစ်ပိဿာ ၁၅၀၀၀ ကျပ်၊ ငါးနီတူခြောက် တစ်ပိဿာ ၁၂၀၀၀ကျပ်၊ ငါးရောင်ခြောက် တစ်ပိဿာ ၃၂၀၀၀ ကျပ်၊ ပုစွန်ခြောက် တစ်ပိဿာ ၄၃၀၀၀ ကျပ်တို့ဖြင့် အရောင်းအဝယ်ဖြစ်နေကြောင်း သိရှိရပါသည်။

DOCA(မန္တလေး)

    ၂၀၂၃ခုနှစ်၊ ဇူလိုင်လ၊ တတိယအပတ်အတွင်း ကန့်ဘလူ၊ ကျွန်းလှမြို့နယ်တွင် အခြေခံစားကုန်များဖြစ်သော ရွှေဘိုပေါ်ဆန်းတစ်ပြည်လျှင် (၄၀၀၀) ကျပ်၊ ဧရာမင်းတစ်ပြည်လျှင် (၄၂၀၀) ကျပ်ဖြစ်၍ ယခင်အပတ်အတိုင်းတည်ငြိမ်နေပြီး အရောင်းအဝယ်ဖြစ်လျက်ရှိကြောင်း၊ ကြက်သွန်နီ မြစ်သားအမျိုးအစား လက်လီဈေးမှာအကြီး/အသေးပါ်မူတည်၍ တစ်ပိဿာလျှင် (၂၀၀၀/၂၅၀၀) ကျပ်ဖြစ်၍ ယခင်အပတ်အတိုင်း တည်ငြိမ်နေပြီး အရောင်းအဝယ်ဖြစ်လျက်ရှိကြောင်း၊ ကြက်သွန်ဖြူလက်လီဈေးမှာ (ဗမာ) အလုံးကြီးတစ်ပိဿာလျှင် (၁၀၀၀၀) ကျပ်၊ ကြက်သွန်ဖြူလက်လီဈေးမှာ (ဗမာ) အလုံးသေးတစ်ပိဿာလျှင် (၈၀၀၀) ကျပ်၊ ကြူကုတ်တစ်ပိဿာလျှင် (၉၀၀၀) ကျပ်ဖြစ်၍ ယခင်အပတ်အတိုင်းတည်ငြိမ်လျက်ရှိပါကြောင်း၊ ချင်းတစ်ပိဿာလျှင် (၆၀၀၀/၇၀၀၀) ကျပ်ဖြစ်၍ ယခင်အပတ်များထက် အနည်းငယ်လျော့ကျလျက်ရှိပါကြောင်း၊ ငရုတ်သီးခြောက်တစ်ပိဿာလျှင် (၂၀၀၀၀) ကျပ်ဖြစ်၍ ယခင်အပတ်အတိုင်း တည်ငြိမ်လျက်ရှိကြောင်း၊ အာလူးအသေး/အကြီးတစ်ပိဿာလျှင် အမျိုးအစားအလိုက် (၂၈၀၀/၃၀၀၀) ကျပ်ဖြစ်၍ ယခင်အပတ်ထက် အနည်းငယ်လျော့ကျပြီး အရောင်းအဝယ်ဖြစ်လျက်ရှိကြောင်းသိရှိရပါသည်။

  ထို့ပြင် ငရုတ်သီးစိမ်းတစ်ပိဿာလျှင် (၂၅၀၀) ကျပ်ဖြစ်၍ ယခင်အပတ်ထက်အနည်းငယ်လျော့နည်းလျက်ရှိနေကြောင်း၊ ခရမ်းချဉ်သီးတစ်ပိဿာလျှင် (၂၀၀၀/၂၂၀၀) ကျပ်ဖြစ်၍ ယခင်အပတ်အတိုင်းတည်ငြိမ်နေပါသည်။ ခရမ်းသီးတစ်ပိဿာလျှင် (၁၈၀၀) ကျပ်ဖြစ်၍ ယခင်အပတ်ထက်အနည်းငယ်မြင့်တက်ကာ အရောင်းအဝယ်ဖြစ်လျက်ရှိကြောင်း၊ ပန်းဂေါ်ဖီတစ်ပွင့်လျှင်  (၁၈၀၀/၂၀၀၀) ကျပ်၊ ဂေါ်ဖီထုပ်တစ်ထုပ်လျှင် (၁၅၀၀/၁၈၀၀) ကျပ်ဖြစ်၍ ယခင်အပတ်ထက် အနည်းငယ်လျော့ကျလျက်ရှိကြောင်း၊ ခါကြက်ဥ (တရုတ်) တစ်ပိဿာလျှင် (၅၅၀၀) ကျပ်ဖြစ်၍ ယခင်အပတ်ထက် အနည်းငယ်လျော့ကျလျက်ရှိကြောင်း၊ ခါကြက်ဥ (ဗမာ) တစ်ပိဿာလျှင် (၄၀၀၀) ကျပ်ဖြစ်၍ ယခင်အပတ်အတိုင်းတည်ငြိမ်နေကြောင်း၊ သံပရာသီးတစ်လုံးလျှင် (၅၀) ကျပ်မှ (၁၀၀) ကျပ်၊ ကန်စွန်းရွက်တစ်စည်းလျှင် (၁၀၀) ကျပ်နှုန်းဖြင့်အရောင်းအဝယ်ဖြစ်နေပြီး  ကုန်ဈေးနှုန်းများအနည်းငယ်လျော့ကျလာကြောင်း ဈေးသည်တစ်ဦးထံမှသိရှိရပါသည်။

   ကြက်ဥလက်လီဈေးနှုန်းမှာ (အကြီး) တစ်လုံးလျှင် (၂၈၀) ကျပ်၊ (အသေး) တစ်လုံးလျှင် (၂၇၀) ကျပ်၊ ဘဲဥတစ်လုံးလျှင် (၂၈၀/၃၀၀) ကျပ်ရှိကြောင်း၊  ကန့်ဘလူ၊ ကျွန်းလှမြို့တို့၏ အသားငါးဈေးနှုန်းများမှာ ကြက်သား (cp) တစ်ပိဿာလျှင် (၁၄၀၀၀) ကျပ်မှ (၁၆၀၀၀) ကျပ်၊ ကြက်သား (ဗမာ) တစ်ပိဿာလျှင် (၁၈၀၀၀) ကျပ်မှ (၂၀၀၀၀) ကျပ်၊ ဝက်သားတစ်ပိဿာလျှင် (၁၈၀၀၀) ကျပ်မှ (၂၀၀၀၀) ကျပ်၊ အမဲသား တစ်ပိဿာလျှင် (၁၁၀၀၀) ကျပ်မှ (၁၄၀၀၀) ကျပ်ဖြစ်၍ ယခင်ဇွန်လ၊ နောက်ဆုံးအပတ်အတိုင်း ဝက်သား၊ ကြက်သား၊ အမဲသားဈေးများမှာ တည်ငြိမ်လျက်ရှိကြောင်း၊ ငါးကြင်းအကောင်လိုက်နှင့် ငါးကြင်းခုတ်သားဈေးမှာ တစ်ပိဿာလျှင် (၉၀၀၀) ကျပ်မှ (၁၄၀၀၀) ကျပ်၊ တီလားဗီးယားငါးအသေးတစ်ပိဿာလျှင် (၄၀၀၀) ကျပ်၊ အလတ်တစ်ပိဿာလျှင် (၅၀၀၀) ကျပ်၊ အကြီးတစ်ပိဿာလျှင် (၆၅၀၀)  ကျပ်ဖြစ်၍ ယခင်အပတ်အတိုင်းတည်ငြိမ်ပြီး အရောင်းအဝယ်ဖြစ်နေကြောင်းသိရပါသည်။

  စားသုံးဆီဈေးနှုန်းမှာ မြေပဲဆီသန့်တစ်ပိဿာလျှင် (၁၄၀၀၀) ကျပ်ဖြစ်၍ မြေပဲဆီဈေးနှုန်းမှာ ယခင်အပတ်များနှင့်အတူ ဈေးတည်ငြိမ်လျက်ရှိကြောင်း၊ စားအုံးဆီတစ်ပိဿာလျှင် (၈၄၀၀) ကျပ်၊ ဆယ်ပိဿာတစ်ပုံးလျှင် (၈၃၀၀၀) ကျပ်ဖြစ်၍  ယခင်အပတ်ထက် တစ်ပိဿာလျှင် (၁၀၀၀) ကျပ်မြင့်တက်ကာ အရောင်းအဝယ်ဖြစ်နေကြောင်း ဈေးသည်တစ်ဦးထံမှသိရှိရပါသည်။

DOCA(စစ်ကိုင်း)