ပြည်တွင်းကုန်သွယ်မှုသတင်း

    မန္တလေးတိုင်းဒေသကြီး၊ ပြင်ဦးလွင်ခရိုင်အတွင်းရှိ ပန်းစိုက်တောင်သူများသည် မေမြို့ပန်း အမျိုးအစားများစွာကို ရာသီမရွေးစိုက်ပျိုးကြသည့်အနက် ယခုဒီဇင်ဘာလအတွင်း  မေမြို့ပန်း အမျိုးအစားဖြစ်သော နှစ်ထပ်ဒေလီယာပန်းသည် ဝယ်လိုအားများသောကြောင့် ဈေးကောင်းရရှိလျက်ရှိပါသည်။

   နှစ်ထပ်ဒေလီယာပန်းစိုက်ပျိုးမှု တစ်ဧကကုန်ကျစရိတ်အနေဖြင့် မျိုးစေ့၊ နွားချေး၊ ဓာတ်မြေဩဇာ၊ နိုက်ထရိုဂျင်နှင့် လုပ်အားခများအပါအဝင် တစ်ဧကလျှင် ကျပ်သိန်းငါးဆယ်ခန့်ကုန်ကျပြီး အထွက်နှုန်းမှာ တစ်ဧကလျှင် ပျမ်းမျှအစီးရေ(၄၀၀၀)ခန့်ထွက်ရှိကြောင်း၊ ဈေးကွက်အနေဖြင့် ပန်းပွဲရုံများသို့ တင်ပို့ရောင်းချကြပြီး ယခုလဈေးကွက်ပေါက်ဈေးအနေဖြင့် တစ်စီးလျှင်ကျပ်(၁၂၀၀၀/-)ဝန်းကျင်ခန့် ရရှိကြောင်း သိရှိရပါသည်။ယခင်မိုးတွင်းကာလထက် ယခုဆောင်းတွင်းကာလတွင် ဈေးကောင်း ပိုမိုရရှိ၍ အကျိုးအမြတ်ရရှိကြောင်း ဒေသခံပန်းစိုက်တောင်သူတစ်ဦးထံမှ သိရှိရပါသည်။

DOCA(မန္တလေး)

မကွေးတိုင်းဒေသကြီး၊ အောင်လံမြို့၊ အောင်လံကုန်စည်ဒိုင်တွင် အောင်လံမြို့နှင့် သရက်မြို့ တို့မှထွက်ရှိသည့်နှမ်းသီးနှံများနေ့စဉ် အရောင်းအဝယ် ဖြစ်လျက်ရှိပါသည်။

နှမ်းနက်(စမုံ)

၂၀၂၄ခုနှစ်၊ ဒီဇင်ဘာလ (ပထမပတ်)တွင် (၁)တင်းလျှင် ကျပ်(၂၀၃၃၀၀ မှ၂၁၃၃၀၀)၊ ဒီဇင်ဘာလ(ဒုတိယပတ်)တွင် (၁)တင်းလျှင် ကျပ်(၂၀၆၆၀၀ မှ၂၁၆၆၀၀) ရှိခဲ့၍ ယခု ဒီဇင်ဘာလ ဒုတိယပတ်တွင် ယခင်ဒီဇင်ဘာလ ပထမပတ်ထက် (၁)တင်းလျှင် ကျပ်(၃၃၀၀)ဈေးနှုန်းမြင့် တက်ခဲ့ပြီး အရောင်းအဝယ်ပမာဏအနေဖြင့် ဒီဇင်ဘာလ (ဒုတိယပတ်)တွင် တင်းရေ(၂၈၅၀)တင်း တန်အနေဖြင့် (၆၉.၈)တန်ခန့် အရောင်းအဝယ်ရှိခဲ့ကြောင်း သိရသည်။

နှမ်းနီ

နှမ်းနီသီးနှံမှာ (ပထမပတ်)တွင် (၁)တင်းလျှင် ကျပ်(၁၁၀၀၀၀)ရှိခဲ့ရာမှ (ဒုတိယပတ်)တွင် ကျပ်(၁၁၁၅၀၀)ရှိခဲ့၍ ယခင်အပတ်နှင့် နှိုင်းယှဉ်ပါက ယခုအပတ်တွင် (၁)တင်းလျှင် ကျပ်(၁၁၅၀၀) ဈေးနှုန်းအမြင့်ဖြင့် တင်းရေ(၇၂၀)တင်း၊ တန်အနေဖြင့် (၁၇.၆၄)တန်ခန့် အရောင်းအဝယ် ရှိခဲ့ကြောင်း သိရသည်။

နှမ်းဖြူ

နှမ်းဖြူမှာ (ဒုတိယပတ်)တွင် (၁)တင်းလျှင် ကျပ်(၁၁၈၃၀၀မှ ၁၂၁၆၀၀)ဈေးနှုန်းရှိခဲ့၍ ဈေးနှုန်းမှာ ပြောင်းလဲမှုမရှိ တည်ငြိမ်လျက်ရှိပြီး အရောင်းအဝယ်အနေဖြင့် (ဒုတိယပတ်)အတွင်း တင်းရေ (၅၁၀)တင်း၊  တန် အနေဖြင့်(၁၂.၅)တန်ခန့်အရောင်းအဝယ်ရှိခဲ့ကြောင်း သိရသည်။

အောင်လံကုန်စည်ဒိုင်အနေဖြင့် နှမ်းသီးနှံကို (ဒုတိယပတ်)တွင် တင်းရေစုစုပေါင်း (၄၀၈၀) တင်း၊ တန်အနေဖြင့်(၉၉.၉၄)တန်ခန့် အရောင်းအဝယ်ရှိခဲ့ပြီး နှမ်းသီးနှံများကို ရန်ကုန်နှင့် မန္တလေး မြို့ များသို့ တင်ပို့ရောင်းချခြင်းဖြစ်ကြောင်း၊ နှမ်းနီနှင့်နှမ်းဖြူ အချို့တဝက်အနည်းငယ်ကို အောင်လံ မြို့ရှိ ဆီကြိတ်ခွဲရောင်းချသည့် လုပ်ငန်းရှင်များနှင့် ပဲကြော်လုပ်ငန်းရှင်များသို့ တင်ပို့ရောင်းချရခြင်း ဖြစ်ကြောင်း အောင်လံကုန်စည်ဒိုင်မှ သိရှိခဲ့ရပါသည်။

DOCA(မကွေး)

         ပဲမြစ်သည်နွယ်ပင်တစ်မျိုးဖြစ်ပြီး ပဲစောင်းလျားသီးပင်၏ အမြစ်ဖြစ်သည်။ ပဲမြစ်ကို နေရာ ဒေသအနှံ့အပြားတွင် စိုက်ပျိုးကြပါသည်။ ကရင်ပြည်နယ်ဒေသထွက်ပဲမြစ်ကို ဘားအံမြို့ အနီးတဝိုက်  ကျေးရွားများနှင့်ကြာအင်းဆိပ်ကြီးမြို့နယ်များရှိ တောင်သူများက တနိုင်တပိုင်စိုက်ပျိုးကြသည်။

ပဲမြစ်ကို ဩဂုတ်လတွင်စတင်စိုက်ပျိုးကြပြီး ဒီဇင်ဘာလနှင့်ဖေဖော်ဝါရီလများတွင် တူးဖော် ရောင်းချကြောင်းသိရသည်။ ပဲမြစ်ကိုပြုတ်ပြီ ဆီ၊ ဆားတို့နှင့်တို့စားပါက အရသာချိုစိမ့်ပြီး အလွန် စားကောင်းလှပါသည်။ပဲမြစ်တွင် ကယ်စီယမ်ဓာတ်၊ ပရိုတိန်းဓာတ်များစွာပါဝင်သာကြောင့် လူသားတို့အတွက် ကျန်းမာရေးကိုလည်း အထောက်အကူပြုစေပါသည်။

၂၀၂၄ ခုနှစ်၊ ဒီဇင်ဘာ ဆောင်းကာ ကရင်ပြည်နယ်ဒေသထွက် ပေါ်ဦးပေါ်ဖျားသဘာဝ ပဲမြစ်များ၏ဈေးနှုန်းမှာ  ဘားအံမြို့ ရေပေါ်စံပြဈေးတွင် ပဲမြစ်တစ်ပိဿာလျှင် (၈၀၀၀)ကျပ်နှုန်း တို့ဖြင့် အရောင်းအဝယ်ဖြစ်လျက်ရှိကြောင်း သိရသည်။

DOCA(ကရင်)

    ဒေသအသီးသီးမှဝင်ရောက်လာသော သစ်သီးများကို ကုန်သည်များက ဈေးချို၊ ၂၉လမ်းx ၃၁လမ်းကြား၊ ၈၄လမ်းx ၈၅လမ်းကြားရှိ မန္တလေးသစ်သီးပွဲရုံများသို့ ရောင်းချကြကြောင်း သတင်းရရှိပါတယ်။  သစ်သီးဈေးသူအချို့သည် ဈေးချိုသစ်သီးပွဲရုံများမှ လက်ကားဝယ်ယူပြီး မန္တလေးမြို့ပေါ်ရှိ ဈေးများသို့ ပြန်လည်ရောင်းချကြောင်း သတင်းရရှိပါတယ်။

    မန္တလေးမြို့၊ မနော်ရမ္မံဈေးရှိ သစ်သီးဆိုင်များတွင် လိမ္မော်သီး(အပွ) အလုံးကြီး လက်လီ(၁) ပိဿာလျှင် (၂၀၀၀ဝိ)၊ ပန်းသီး (အကျွတ်) အလုံးကြီး လက်လီ(၁)ပိဿာလျှင် (၂၀၀၀ဝိ)၊ ဆန်းကစ်သီး (၁)လုံး (၂၅၀ဝိ/-)၊ မော်လမြိုင်ဒေသထွက် ရှောက်ပန်းသီး(ကျွဲကောသီး)လက်ကား  (၁)လုံး (၄၀၀ဝိ/-) လက်လီ (၄၅၀ဝိ/-)၊ စတော်ဘယ်ရီ အသင့်ထုပ်ပိုးထားသော ပလတ်စတစ်ဗူး (၁)ဗူးလျှင် (၄၅၀ဝိ/-) တောင်ကြီးမှဝင်သော ထောပတ်သီး(Hass)များကို ၂၅ ကျပ်သားလျှင် (၂၅၀ဝိ/-)မှ(၃၀၀ဝိ/-)ထိ ရောင်းချပြီး စားသုံးသူများကြိုက်နှစ်သက်၍ အရောင်းအဝယ်ဖြစ်ကြောင်း သစ်သီးရောင်းချသူတစ်ဦးထံမှ သိရှိရပါသည်။

DOCA(မန္တလေး)

        ယခုတစ်ပတ် ပြောင်းသီးနှံမှာ တစ်ပိဿာလျှင် ၁၄၀၀-၁၄၅၀ကျပ် ဈေးပေါက်နေပြီး ကုန်အဝင်များပြည်ပအဝယ်ရှိသဖြင့် စီးဆင်းမှုအားကောင်းသော်လည်းဈေးနှုန်းအငြိမ်ဖြင့် အရောင်း အဝယ်ဖြစ်လျှက်ရှိကာနေပါသည်။ ကြက်သွန်ဖြူသီးနှံမှာ တစ်ပိဿာလျှင် ထူး ၁-၁၁၅၀၀ကျပ်၊ ထူး ၂-၁၂၅၀၀ကျပ်၊ ထူး ၃-၁၃၅၀၀ကျပ်၊ ထူး ၄-၁၄၅၀၀ကျပ်၊ ထူး ၅-၁၅၅၀၀ကျပ်၊ ထူးလွန်-၁၆၀၀၀ကျပ် နှင့် ဥတစ်လုံးဆိုဒ်မှာ ၂၅၀၀၀ကျပ်ဖြင့် ဈေးနှုန်းထူးခြားစွာပြောင်းလဲမှုမရှိဘဲ လက်ကျန်ပါးသော်လည်း လှောင်လက်ငယ် များထံမှ ဈေးကွက်အဝင်ရှိသဖြင့် စီးဆင်းမှုမှာ ပုံမှန်ဖြစ်နေပါသည်။

        ချင်းသီးနှံမှာ တစ်ပိဿာလျှင် ချင်းအခက်ကြီးမှာ (၃၀၀၀)ကျပ် နှင့် ချင်းဥမမြေနီအလတ်စမှာ (၂၀၀၀-၂၅၀၀)ကျပ်ဖြင့် ပြည်ပအဝယ်မရှိခြင်းကြောင့် ဈေးနှုန်းမှာကျဆင်းနေပြီး ပြည်တွင်းသုံးသာရှိ ၍ ပုံမှန်သာစီးဆင်းနေပါသည်။

        အာလူးသီးနှံမှာ တစ်ပိဿာလျှင် မားကီး S2-၇၅၀၀ကျပ်၊ S1-၇၀၀၀ကျပ်၊ မျက်နီ S1-၆၀၀၀ ကျပ်၊ OK-၅၅၀၀ကျပ်၊ A1-၄၅၀၀ကျပ်၊ ဆွဲသီး-၃၅၀၀ကျပ် နှင့် ဂေါ်လီဆိုဒ်မှာ ၂၅၀၀ကျပ်ဈေးရှိနေကြ ပြီး အဝင်များကာ ဝယ်လိုအားကောင်းသောကြောင့် ဈေးအနည်းငယ်တက်လာသော်လည်း သယ်ယူ ပို့ဆောင်မှုအခက်အခဲများရှိသဖြင့် စီးဆင်းမှုမှာ အနည်းငယ်လျော့နည်းခဲ့ပါသည်။

       ကုန်စိမ်းသီးနှံများတွင် ဂေါ်ဖီ ၁၅၀၀-၁၇၀၀ကျပ်၊ ပန်းမုံလာ ၁၅၀၀-၁၇၀၀ကျပ်၊ ရွှေပဲ ၅၀၀၀-၅၅၀၀ကျပ်၊ မုန်ညှင်း ၁၅၀၀-၂၀၀၀ကျပ်၊ ဖရုံသီး ၁၆၀၀-၁၈၀၀ကျပ်၊ ခရမ်းသီး ၂၀၀၀-၂၅၀၀ကျပ်၊ ခရမ်းချဉ်ဂွတ်ရှယ်သီး ၅၀၀၀ကျပ်၊ ငြုပ်ပွ ၄၀၀၀-၄၅၀၀ကျပ်၊ မုန်လာဥနီ ၂၅၀၀-၃၀၀၀ နှင့် ဘိုစား ၃၀၀၀-၃၅၀၀ကျပ် အသီးသီးဈေးရှိနေကြပြီး အဝယ်များသဖြင့် ကုန်စိမ်းသီးနှံများမှာ ဈေးအနည်းငယ် တက်လာသော်လည်း ပြောင်းဆံသယ်ယူပို့ဆောင်သည့်ကားများ များလာသဖြင့် ယာဉ်ကြောအနည်း ငယ်ပိတ်ဆို့မှုများကြောင့် ကုန်စိမ်းသီးနှံများမှာ အထားမခံ၍ စီးဆင်းမှုမှာ အနည်းငယ်လျော့နည်းခဲ့ပါ ကြောင်း လေ့လာသိရှိရပါသည်။

DOCA(ရှမ်း)