ပြည်တွင်းကုန်သွယ်မှုသတင်း

        စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာန၊ မုံရွာခရိုင်ဦးစီးမှူးရုံးသည် စားသုံးသူကာကွယ်ရေးလုပ်ငန်းများကိုဆောင်ရွက်လျက်ရှိပြီး စားသုံးသူများ နေ့စဉ်ဝယ်ယူသုံးစွဲလျက်ရှိသည့် အခြေခံစားသောက်ကုန်များ၏ ဈေးနှုန်း၊ ဈေးကွက်အခြေအနေများကိုလေ့လာ၍ နေ့စဉ်၊ အပတ်စဉ်၊ လစဉ်အထက်အဆင့်ဆင့်သို့ တင်ပြဆောင်ရွက်လျက်ရှိကြောင်းသိရသည်။

          စားသုံးသူများ နေ့စဉ်ဝယ်ယူအသုံးပြုလျက်ရှိသည့် အာလူးသီးများကို ရှမ်းပြည်နယ်၊ အောင်ပန်းမြို့မှတစ်ဆင့် မုံရွာမြို့ရှိ လက္ကားကုန်သည်များမှတစ်ဆင့် မုံရွာခရိုင်အတွင်းရှိ လက်လီအရောင်းဆိုင်များသို့ ဖြန့်ဖြူးရောင်းချပေးလျက်ရှိသည်။

        ၂၀၂၄ခုနှစ်၊ နိုဝင်ဘာလ စတုတ္ထပတ်အတွင်း မုံရွာမြို့၊ ကန်သာယာဈေးရှိ အာလူးသီးဈေးနှုန်းများမှာ  အာလူးသီး (၁) ပိဿာလျှင်  ၇၀၀၀ကျပ်၊ ၉၀၀၀ကျပ်တို့ဖြင့်ရောင်းချကြောင်း၊ နိုဝင်ဘာလ တတိယပတ်ဈေးနှုန်းနှင့်နှိုင်းယှဉ်ကြည့်လျှင် အာလူးသီး(၁) ပိဿာလျှင် (၁၀၀၀) ကျပ် ဈေးနှုန်းမြင့်တက်လျက်ရှိပြီး ပုံမှန်အရောင်းအဝယ်ဖြစ်လျက်ရှိကြောင်းသိရပါသည်။

DOCA(စစ်ကိုင်း)

        ပြည်ဈေးကွက်သို့ ယခုနိုဝင်ဘာလ နောက်ဆုံးပတ်တွင် နေပြည်တော်နှင့် ရန်ကုန်ဘက်မှ အောင်သပြေပန်းများတစ်ခြင်းလျှင် အပင်ရေ (၂၅၀)ပင်ပါရှိသည့် ခြင်းပေါင်း (၁၀)ခြင်းခန့်အဝင်ရှိပြီး တစ်ပတ်လျှင် (၂)ကြိမ်ခန့်ဝင်ရောက်မှုရှိကြောင်းသိရပါသည်။ ခြင်းတစ်ခြင်းလျှင် အောင်သပြေပန်း အတုံးကြီး၊ လတ်၊ သေး သောင်းပြောင်းပါရှိသည့်အတွက် ပြန်လည်ရောင်းချရာတွင် အပင်သေးတစ်ပင် လျှင် (၁၅၀၀-၂၀၀၀)၊ အပင်အလတ်တစ်ပင်လျှင် (၂၅၀၀-၃၀၀၀)၊ အပင်အကြီးအချောတစ်ပင်လျှင် (၅၀၀၀-၆၀၀၀-၇၀၀၀)နှုန်းအထိ အသီးသီးရောင်းဝယ်မှုရှိနေသည်။ အရောင်းအဝယ်အနေဖြင့် တစ်ပတ်လျှင် (၂)ကြိမ်ဝင်ရောက်မှုရှိပေမဲ့ တစ်ပတ်အတွင်းဝင်ရောက်မှု၏ ထက်ဝက်ခန့်သာအရောင်းအဝယ်ဖြစ်သည့်အတွက် အကျိုးအမြတ်အားဖြင့် တစ်ပတ်လျှင် ပျမ်းမျှငွေ (၂၀၀၀၀၀)ကျပ်ခန့် အကျိုးအမြတ်ရှိကြောင်းသိရပါသည်။

DOCA(ပဲခူး)

        ယခုနိုဝင်ဘာလ နောက်ဆုံးပတ်တွင် ပြည်ဈေးကွက်သို့ ရှမ်းပြည် ပင်းတယ၊ ကလော၊ ပင်လောင်း စသည့်မြို့နယ်များမှ ဝင်ရောက်လာသည့် ဂေါ်ရခါးသီးများ အရောင်းအဝယ်များနေကြောင်းသိရှိရပါသည်။ ကုန်ပစ္စည်းဝင်ရောက်မှုမှာ များနေပြီး အရောင်းအဝယ်လည်းသွက်လျက်ရှိပါသည်။ ယခင်က ဂေါ်ရခါးသီးကို ဟင်းချက်ပြီး ကြော်စားသည့်အပြင် မုန့်နှစ်များဖြင့် ကြော်၍လည်းစားသုံးကြပါသည်။ ယခုအခါ ဂေါ်ရခါးသီးအရင့်ကို ပြုတ်၍စားသောက်ပါက အသီးမှာစေးပြီး လူကြိုက်များပါသည်။ ဂေါ်ရခါးသီးတစ်လုံးလျှင် ယခင်က (၅၀၀)ကျပ်ဖြင့်ရောင်းချခဲ့ပြီး ယခုနိုဝင်ဘာလ နောက်ဆုံးပတ်တွင် အလုံးချောတစ်လုံးလျှင် (၈၀၀)ကျပ်ဖြင့်ရောင်းချကြောင်းသိရှိရပါသည်။

DOCA(ပဲခူး)

         ပြည်ခရိုင်၊ ပြည်မြို့နယ် ပြည်ကုန်စည်ဒိုင်၏ ပဲမျိုးစုံ‌ရောင်းဝယ်လျက်ရှိရာ မတ်ပဲ၊ ပဲတီစိမ်း၊ ကုလားပဲ၊ ပဲကြီးသီးနှံများအရောင်းအဝယ်ဖြစ်လျက်ရှိပါသည်။

မတ်ပဲ

          နိုဝင်ဘာလ ပထမပတ်တွင်မတ်ပဲတစ်တင်းကို (၁၂၀၀၀၀-၁၂၀၅၀၀)ကျပ်ဖြင့် ရန်ကုန်အဝယ်တစ်ရက်လျှင် အိတ်(၁၅၀/၂၀၀)ခန့်အဝယ်ရှိနေပါသည်။ နိုဝင်ဘာလ ဒုတိယပတ်တွင် မတ်ပဲတစ်တင်းကို (၁၁၇၀၀၀)ကျပ်ဖြင့် တစ်ရက်လျှင် အိတ် (၂၀၀)ခန့်ရန်ကုန်အဝယ်ရှိပါသည်။ တတိယပတ်တွင် မတ်ပဲတစ်တင်းကို (၁၁၈၀၀၀ - ၁၁၉၀၀၀)ကျပ်၊ စတုတ္ထပတ်တွင် မတ်ပဲတစ်တင်းကို (၁၁၇၅၀၀/၁၁၈၀၀၀)ကျပ် ဖြင့်ရန်ကုန်အဝယ်တစ်ရက်လျှင် အိတ်(၁၅၀/၂၀၀)ခန့်ရှိပါသည်။

ပဲတီစိမ်း

         နိုဝင်ဘာလ ပထမပတ်တွင် ပဲတီစိမ်းအသစ်များပန်းတောင်း၊ ပေါက်ခေါင်း၊ ဝက်ထီးကန်ဘက်မှ တစ်ရက်လျှင် အိတ်(၃၀၀/၄၀၀)အဝင်ရှိပြီး ပဲတီစိမ်းတစ်တင်းကို (၉၀၀၀၀)ကျပ်ဖြင့် တစ်ရက်လျှင် အိတ်(၃၀၀-၄၀၀)ခန့်အရောင်းအဝယ်ရှိသည်ကိုတွေ့ရပါသည်။ နိုဝင်ဘာလ ဒုတိယပတ်တွင် ပဲတီစိမ်းတစ်တင်းကို (၉၃၀၀၀)ကျပ်ဖြင့် တစ်ရက်လျှင် အိတ်(၃၀၀)ခန့်ရန်ကုန်အဝယ်ရှိပါသည်။ တတိယပတ်တွင် ပဲတီစိမ်းတစ်တင်းကို (၉၆၀၀၀-၉၇၀၀၀)ကျပ်ဖြင့် တစ်ရက်လျှင် အိတ် (၄၀၀)ခန့်အရောင်းအဝယ်ဖြစ်လျက်ရှိပါသည်။ စတုတ္ထပတ်တွင် ပဲတီစိမ်းဈေးအေးနေပြီး တစ်တင်းကို (၉၆၀၀၀-၉၇၀၀၀)ကျပ်ဖြင့် တစ်ရက်လျှင် အိတ် (၇၀၀/၈၀၀)ခန့်အဝယ်ရှိနေပါသည်။

ကုလားပဲ

         ပြည်ကုန်စည်ဒိုင်၏ နိုဝင်ဘာလ ပထမပတ်တွင် ကုလားပဲ (HL)တစ်တင်းကို (၁၀၂၀၀၀)ကျပ်၊ မြကြေးမှုံတစ်တင်းကို (၁၂၂၀၀၀)ကျပ်ဖြင့် မြို့တွင်းခွဲဆက်သမားများနှင့် နယ်စုံအဝယ်တစ်ရက်လျှင် အိတ် (၁၅၀/၃၀၀)ခန့်အဝင်ရှိပါသည်။ နိုဝင်ဘာလ ဒုတိယပတ်တွင် ကုလားပဲ (HL)တစ်တင်းကို (၁၀၁၅၀၀-၁၀၂၀၀၀)ကျပ်၊ မြို့တွင်းခွဲစက်သမားများ တစ်ရက်လျှင် အိတ် (၂၅၀)ခန့်အဝယ်ရှိပါသည်။ နိုဝင်ဘာလ တတိယပတ်တွင် ကုလားပဲ(HL) တစ်တင်းကို (၁၀၂၀၀၀)ကျပ်ဖြင့် မြို့တွင်းအဝယ်တစ်ရက်လျှင် အိတ် (၃၀၀)ခန့်အဝယ်ရှိပါသည်။ စတုတ္ထပတ်တွင် ကုလားပဲ (HL) တစ်တင်းလျှင် (၁၀၂၀၀၀)ကျပ်ဖြင့် မြို့တွင်းခွဲစက်သမားများ တစ်ရက်ကို အိတ် (၃၀၀)ခန့်အဝယ်ရှိပါသည်။

ပဲကြီး

          နိုဝင်ဘာလ ပထမပတ်တွင် ပဲကြီး(ရွှေကျွန်း)တစ်တင်းကို (၉၂၀၀၀)ကျပ်၊ ပဲကြီး (ကုန်းပဲ) တစ်တင်းကို (၈၇၀၀၀)ကျပ်ဖြင့် မြို့တွင်းပဲကြော်သမားများနှင့် ရန်ကုန်အဝယ်တစ်ရက်လျှင် အိတ် (၂၅၀)ခန့်အဝယ်ရှိနေပါသည်။ ဒုတိယပတ်တွင် ပဲကြီး(‌ရွှေကျွန်း)တစ်တင်းကို (၉၀၀၀၀)ကျပ်၊ ပဲကြီး (ကုန်းပဲ) တစ်တင်းကို (၈၅၀၀၀)ကျပ်ဖြင့် မြို့တွင်းပဲကြော်သမားများအဝယ်ရှိပါသည်။ တတိယပတ်တွင် ပဲကြီး (ရွှေကျွန်း)တစ်တင်းကို (၉၀၀၀၀)ကျပ်၊ ပဲကြီး (ကုန်းပဲ)တစ်တင်းကို (၈၅၀၀၀)ကျပ်ဖြင့် ပဲကြော်သမားများအဝယ်တစ်ရက်လျှင် အိတ် (၂၅၀)ခန့်ရှိပါသည်။ စတုတ္ထပတ်တွင် ပဲကြီး(‌ရွှေကျွန်း) တစ်တင်းကို (၉၀၀၀၀)ကျပ်၊ ပဲကြီး (ကုန်းပဲ)တစ်တင်းကို (၈၅၀၀၀)ကျပ်ဖြင့် အရောင်းအဝယ်ဖြစ်လျက်ရှိနေပါသည်။

          ပြည်ကုန်စည်ဒိုင်တွင် ပဲလက်ကျန်နည်းနေပြီဖြစ်သောကြောင့် ပဲစင်းငုံ၊ ဘိုကိတ်ပဲများမှာ အ‌ရောင်းအဝယ်နည်းနေကြောင်းသိရှိရပါသည်။

DOCA(ပဲခူး)

        ပဲခူးတိုင်းဒေသကြီး၊ ပြည်ခရိုင်၊ ပြည်မြို့နယ်၊ တောင်ခွေးရဲကျေးရွာမှ တောင်သူဦးချင်း၏ လယ်ယာမြေ (၀.၂၅)ဧကတွင် သခွားသီးများကို တစ်နိုင်တစ်ပိုင်စိုက်ပျိုးရောင်းချခြင်းဖြင့် မိသားစုစားဝတ်နေရေးအတွက် ဝင်ငွေများတိုးပြီး စီးပွားရေးအဆင်ပြေလျက်ရှိကြောင်းသိရပါသည်။

         ဟင်းသီးဟင်းရွက်အုပ်စုဝင်ဖြစ်သော သခွားသီးများကို စားသုံးသူများက အများအပြားစားသုံးကြပါသည်။ သခွားမျိုးမှာ (၃၉၅)မျိုးကိုဝယ်ယူစိုက်ပျိုးပြီး မျိုးထုတ်တစ်ထုပ်လျှင် (၁၂၀၀၀)ကျပ်ပေးရကြောင်းသိရသည်။ စက်တင်ဘာလတွင် စတင်စိုက်ပျိုးခဲ့ပြီး ယခုနိုဝင်ဘာလတွင် ခူးဆွတ်ရောင်းချနေပြီဖြစ်ကြောင်းသိရသည်။ သခွားသီးများကို တစ်ရက်ချန်ခူး၍ရောင်းချပြီး တစ်ခါခူးလျှင် အလုံးရေ (၈၀၀ - ၁၀၀၀)လုံးခန့်ရရှိပါသည်။ ဈေးနှုန်းများမှာ တစ်လုံးလျှင် (၁၅၀-၂၀၀)ကျပ်ဖြင့်ရောင်းချကြောင်းသိရသည်။ သခွားသီးများကို ပြည်မြို့၊ ဈေးကြီးအပါအဝင် အခြားဈေးများတွင်လည်း ရောင်းချလျက်ရှိကြောင်းသိရသည်။

          သခွားသီးများရောင်းချရာတွင် ကျေးရွာအတွင်းမှ ဈေးသည်များက လာရောက်ဝယ်ယူကြပြီး ပြည်မြို့ပေါ်ရှိ ဈေးများသို့လည်း သွားရောက်ရောင်းချမှုများရှိပါသည်။ ယခုအချိန်သည် သခွားသီးများ စတင်ထွက်ပေါ်ချိန်ဖြစ်သောကြောင့် စိုက်ပျိုးသူတောင်သူများ ဈေးကောင်းရကာ  အရောင်းသွက်ကြောင်းသိရပါသည်။

DOCA(ပဲခူး)