၂၀၂၃ ခုနှစ်၊ မေလ (စတုတ္ထအပတ်)တွင် ပြည်ဈေးကွက်သို့ ကြက်သွန်နီသီးနှံ ဝင်ရောက်မှုနည်းသွားကာ အောင်လံ၊ တောင်တွင်းဘက်မှသာအဝင်ရှိပြီး လမ်းပမ်းဆက်သွယ်ရေးအခက်အခဲများကြောင့် တစ်ပတ်လျှင် ရက်ခြား ပိဿာချိန် ၂၃၀၀၀ခန့်သာ အဝင်ရှိနေပါသည်။ အဝင်နည်းသလို အရောင်းအဝယ်မှာလည်း ပါးနေကြောင်း သိရပြီး ဈေးနှုန်းမှာလည်း လက်လီ/လက်ကား တစ်ပိဿာလျှင် ကျပ် ၂၂၀၀ - ၂၅၀၀ တို့ဖြင့် ရောင်းချလျက်ရှိသည်။
ပြည်ဈေးကွက်အတွင်း မကွေးတိုင်း၊ မန္တလေးတိုင်းတို့မှ ကြက်သွန်နီများအပြင် ပြည်ဒေသထွက် မှော်ဇာကြက်သွန်နီနှင့် ဆင်မြီးဆွဲ ကြက်သွန်နီများကို ဈေးများတွင် စိုက်ပျိုးသူ တောင်သူများမှ ကိုယ်တိုင်ရောင်းချသည့်အပြင် Onilne အပေါ်မှလည်း ရောင်းချကြပါသည်။ ပြည်ဒေသထွက် ကြက်သွန်နီများကို အထုံးတွဲလေးများဖြင့်ထုံးကာ ရောင်းချကြပြီး အမြစ်ဖြတ်မထားတဲ့အတွက် ကြာကြာအထားခံပြီး အစို့ မပေါက်သလို ပုပ်မှာတို့ အလေးချိန်လျော့မှာတို့ကိုလည်း စိုးရိမ်စရာ မလိုတော့ဘဲ စားသုံးသူများမှ စိတ်ချစွာဝယ်ယူ စားသုံးကြကြောင်း သိရသည်။
ပြည်ခရိုင်အတွင်း ကြက်သွန်နီစိုက်ဧက (၇၂၇)ဧက စိုက်ပျိုးပြီး တစ်ဧကလျှင် အထွက်နှုန်း ပိဿာချိန် (၄၂၀၀)ခန့် ထွက်ရှိကြောင်း သိရပြီး ကြက်သွန်နီ အထုံးတွဲ တစ်ပိဿာလျှင် ကျပ် (၂၆၀၀-၂၇၀၀) တို့ဖြင့် ရောင်းချလျက်ရှိကြောင်း သိရပါသည်။
DOCA (ပဲခူး)