ပြည်ခရိုင်အတွင်းရှိ မြို့နယ်များတွင် ဖီးကြမ်းငှက်ပျောသီး၊ ရခိုင်ငှက်ပျောသီးများအား ဈေးကွက်များတွင် ဖြန့်ဖြူးရောင်းချရန် စီးပွားဖြစ်စိုက်ပျိုးကြသည့်အပြင် နေအိမ်များတွင် တစ်နိုင်တစ်ပိုင် စိုက်ပျိုးကြသည်ကို တွေ့ရပါသည်။
ဖီးကြမ်းငှက်ပျောသီးတွင် အစိမ်းနှင့် အပြာ ဟူ၍ နှစ်မျိုးရှိရာ ငှက်ပျောသီး(အပြာ)က ဆေးဖက်ဝင်သည်ဟုလည်းသိရပါသည်။ ဖီးကြမ်းငှက်ပျောသီးကို စားသုံးပေးခြင်းဖြင့် အာဟာရဓါတ်များစွာရရှိနိုင်သလို အစာအိမ်ရောဂါ၊ လေပူရောဂါ၊ လည်ချောင်းနာခြင်း၊ သွေးတိုးရောဂါ စသည့်ရောဂါများအတွက် ကျန်းမာရေး ဓါတ်စာအဖြစ်လည်း စားသုံးနိုင်ပါသည်။ ထိုအပြင် ဖီးကြမ်းငှက်ပျောသီးအစိမ်းကို ဟင်းချက်၍ လည်းကောင်း၊ ရခိုင်ငှက်ပျောသီး အစိမ်းနုလေးများကို အတို့အမြုပ် အဖြစ်လည်းကောင်း စားသုံးကြပါသည်။
ဖီးကြမ်းငှက်ပျောသီးအမှည့်ကို မီးဖုတ်၍ စားသုံးပေးခြင်းဖြင့် ပါးစပ်နှင့် အစာအိမ်နာများကို သက်သာစေပါသည်။ ဖီးကြမ်းငှက်ပျောသီးများကို ဈေးကွက်များအတွင်းတွင် အလုံးအရေအတွက် အဖီး အကြီး/အသေးပေါ်မူတည်၍ တစ်ဖီးလျှင် (၁၅၀၀)ကျပ်မှ (၂၅၀၀)ကျပ် အထိ ရောင်းချပြီး၊ ရခိုင်ငှက်ပျောသီးတစ်ဖီးလျှင် (၅၀၀)ကျပ်မှ (၇၀၀)ကျပ်အထိ ရောင်းချကြောင်း သိရပါသည်။ ငှက်ပျောသီးများကို ပြည်ဈေးကွက်မှ တစ်ဆင့် ရန်ကုန်ဈေးကွက်သို့ တင်ပို့ရောင်းချကြောင်းသိရပါသည်။
DOCA (ပဲခူး)