စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စစ်ကိုင်းတိုင်းဒေသကြီး၊ စားသုံးသူရေးရာဦးစီး ဌာန၊ ကန့်ဘလူခရိုင်ဦးစီးမှူးရုံး၊ ကျွန်းလှမြို့နယ်တာဝန်ခံ ဒေါ်ဝေဝေအောင်သည် ၂၀၂၃ ခုနှစ် ၊ နိုဝင်ဘာလ(၄)ရက်နေ့ နေ့လယ်(၁၃:၀၀)နာရီအချိန်တွင် စစ်ကိုင်းတိုင်းဒေသကြီး၊ ကန့်ဘလူခရိုင် ၊ ကျွန်းလှမြို့၊ ရှမ်းစုကျေးရွာအတွင်းရှိ ”ရှမ်းစုအိုး” လုပ်ငန်းရှင်များနှင့် နှင့် သွားရောက် တွေ့ဆုံဆွေးနွေး အသိပညာ ပေးခြင်းဆောင်ရွက်ခဲ့ပါသည်။
ထိုသို့တွေ့ဆုံဆွေးနွေးရာတွင်စားသုံးသူရေးရာဦးစီးဌာန၊ကျွန်းလှမြို့နယ်တာဝန်ခံဒေါ်ဝေဝေအောင်မှ အိုးလုပ်ငန်းနှင့် ပတ်သက်၍ သိရှိလိုသည်များ မေးမြန်းခဲ့ရာ အိုးလုပ်ငန်းလုပ်ကိုင်မှုသည် နှစ်ပေါင်း (၁၀၀)ကျော်တိုင်ခဲ့ပြီဖြစ်ကြောင်း၊ သူမ၏ ဘိုးဘွား/ဘီဘင် လက်ထက်မှ စတင်လုပ်ကိုင်ခဲ့ပြီး ယခု သူမလုပ် ကိုင်နေသည်မှာ အနှစ်(၆၀)ကျော်ကြာမြင့်ခဲ့ပြီဖြစ်ကြောင်း သိရှိရပါသည်။
အဆိုပါ အိုးလုပ်ပုံ အဆင့်ဆင့်ဆက်လက်မေးမြန်းခဲ့ရာ အိုးလုပ်ငန်းသည် မြေအမျိုးအစား ရွေးလုပ်ရကြောင်း၊ တနယ်မြေစေးအမျိုးအစားမှသာ လုပ်ကိုင်လို့ရပါကြောင်း၊ ပုဇဉ်းကောင်း ကားတစ်စီး လျှင် မြေကို (၅၀၀၀၀)ကျပ်၊ သဲကို (၄၅၀၀၀)ကျပ်၊ ထင်းတစ်စီးလျှင် (၂၅၀၀၀)ကျပ်၊ ကောက်ရိုးတစ်စီးလျှင်(၂၀၀၀၀)ကျပ်ပေးရပါကြောင်းနှင့် တစ်ရက်လျှင် အိုး အလုံးရေ(၃၇/၃၈)လုံးစာ ကုန်ကြမ်းမြေ ကို (၂/၃)ရက်ကြာအောင် နေပူလှမ်းရပါကြောင်း၊ နေပူလှမ်းထားသောမြေကို အင်တုံများဖြင့် (၁)ညစိမ်ထားရပြီး စိမ်၍ရလာသောမြေများကို သဲနှင့်ရော၍နင်းရပါကြောင်း မြေနင်းတဲ့သူတစ်ယောက်ကို တစ်မနက်(၃၀၀၀)ပေးငှားရပြီး နင်းထားပြီသောမြေများကို မိမိကိုယ်တိုင် အိုးထွင်းရကြောင်း၊ အိုးထွင်းရာမှာလည်း လူတစ်ယောက်(၁၅၀၀)ကျပ်ပေး၍ ငှားရမ်း ရပါကြောင်း၊ အိုးထွင်းထားသောအိုးများကို အကြမ်းရိုက်ရန်အတွက် လူတစ်ယောက်(၃၀၀၀)ကျပ်နှင့် ငှားရိုက်ရပါကြောင်း ၊ ၎င်းအိုးကြမ်းကို အချောကိုင်ရန်အတွက် လူတစ်ယောက်(၃၀၀၀)ကျပ်နှင့် ဆက်လက်ငှားရမ်းရပြီး ရရှိလာသော အိုးကြမ်း ကို ပုံကျသောအနေအထားရောက်အောင် အလှဆင်သော အိုးရိုက်ရာတွင် မိမိကိုယ်တိုင်ရိုက်နှိပ်ရပါကြောင်း၊ အိုးတစ်လုံးဖြစ်ရန် (၄)ရက်အချိန်ကြာမြင့်ကြောင်းနှင့် မီးတစ်ခါ ဖုတ်လျှင် သောက်ရေအိုး အလုံး(၃၀၀)ဖုတ်ရပါကြောင်း တစ်ခါမီးဖုတ်လျှင် ထင်း (၂၅၀၀၀) ကျပ်ဖိုးကုန်ကျပြီး အချိန် (၃)နာရီကြာအောင်မီးဖုတ်ရပါကြောင်း သိရှိရပါသည်။
အိုးပြုလုပ်ရာတွင် သောက်ရေအိုးကိုသာ အဓိကထားလုပ်ကိုင်ကြောင်း၊ သောက်ရေအိုးအပြင် ဘုရား ပန်းအိုး၊ အလှပန်းအိုး၊ ပရိတ်ရေအိုး၊ နတ်အိုး၊ ပဲလှော်အိုးခင်း၊ ဆီမီးခွက်၊ မုန့်ပြားသလက်အိုးခင်း အဖုံး အမ၊ ဆေးလိပ်ခွက်၊ လက်ဖက်ရည်သောက်ပန်းကန် စသည်တို့ကို ပြုလုပ်ပါကြောင်း၊ သောက်ရေအိုး တစ်လုံးလျှင် (၂၀၀၀)ကျပ်ဖြင့် ရောင်းချရကြောင်း၊ ဖောက်သည်ဈေးဆိုပါက (၁၅၀၀)ကျပ် ဖြင့်သာ ရောင်းချရပြီး ယခင် နှစ် ၂၀၂၂-၂၀၂၃ တစ်နှစ်လုံး သောက်ရေအိုး အလုံးရေ(၈၀၀၀/၉၀၀၀)အထွက်ရှိကြောင်း၊ မိုးရာသီတွင် နားထားရကြောင်း၊ တန်ဆောင်မုန်းလမှ နယုန်လအထိ (၈)လကြာ အိုးများရောင်းကောင်းပါကြောင်း၊ တပိုတွဲ၊ တပေါင်း၊ တန်ခူးလများသည် ပူသည့်ရာသီဖြစ်သည့်အတွက် အရောင်းအသွက်ဆုံးလများဖြစ်၍ အိုးများကို ကျွန်းလှမြို့၊သိန်းသန်းသင်္ကန်းဆိုင်မှ ဒိုင်အဖြစ် အရင်းထုတ်ပေးပြီး အိုးများကို ၎င်းဆိုင်တွင်သာ ပြန်လည်ပေးသွင်းရပါကြောင်း၊ ရွှေမှော်၊ ရေနံမှော်များကိုလည်း ပို့ဆောင်ရောင်းချရကြောင်း၊ အိုးများကို ယခင်နှစ်များတွင် မြန်မာနိုင်ငံ အောက်ပိုင်းဒေသ အနေဖြင့် ကန့်ဘလူ၊ ဇီးကုန်း၊ ထန်းကုန်း၊ ရွှေဘိုနှင့် အထက်ပိုင်းဒေသဆိုလျှင် ကောလင်း၊ ဝန်းသို၊ ပင်လည်ဘူးမြို့များနှင့် ကချင်ပြည်နယ် နန့်စီးအောင်ရွာတို့အထိ ပို့ဆောင်ရောင်းချရပြီး ယခုနှစ်တွင် နယ်ဝေးများ မပို့ဆောင်နိုင်ပါကြောင်း အိုးလုပ်ငန်းလုပ်ကိုင်နေသူ ဦးတူး +ဒေါ်ချို ထံမှ သိရှိရပါသည်။
DOCA(စစ်ကိုင်း)