အိန္ဒိယ၏ JSW Steel နှင့် Posco တို့သည် Odisha သံမဏိစက်ရုံတွင် ဒေါ်လာ ၇.၇ ဘီလီယံရင်းနှီးမြှုပ်နှံမည်ဟု သတင်းအရင်းမြစ်များကဆို

အိန္ဒိယ JSW Steel နှင့် Posco တို့သည် လာမည့်နှစ်များအတွင်း အိန္ဒိယနိုင်ငံရှိ ၎င်းတို့၏အဆိုပြုစက်ရုံတွင် ရူပီးဘီလီယံ ၆၅၀ (ဒေါ်လာ ၇.၇၃ ဘီလီယံ) ရင်းနှီးမြှုပ်နှံရန် စီစဉ်နေကြောင်း သတင်းအရင်းအမြစ်များကပြောကြားခဲ့သည်။ ပြီးခဲ့သည့်အပတ်က JSW Steel နှင့် Posco တို့သည် တစ်နှစ်လျှင် ကနဦး မတ်ထရစ်တန်ချိန် ၅သန်းထုတ်လုပ်နိုင်သည့် ပေါင်းဖက်သံမဏိစက်ရုံတည်ထောင်ရန်သဘောတူလက်မှတ်ရေးထိုးခဲ့သည်။ အဆိုပါစက်ရုံသည် သံသတ္ထုရိုင်းများအထွက်များသော အရှေ့ပိုင်း Odisha ပြည်နယ်တွင် တည်ရှိမည်ဖြစ်သည်။ သဘောတူညီချက်အရ ဘဏ္ဍာရေးအသေးစိတ်အချက်အလက်များကို ပြောကြားခြင်းမရှိသော်လည်း အဆိုပါစက်ရုံတွင် ကနဦးရင်းနှီးမြှုပ်နှံမှုအနေဖြင့် ရူပီးဘီလီယံ ၂၀၀ ရင်းနှီးမြှုပ်နှံမည်ဖြစ်ကြောင်း သတင်းအရင်းမြစ်တစ်ခု၏ ပြောကြားချက်အရသိရသည်။ ကုမ္ပဏီများသည် ထုတ်လုပ်မှုစွမ်းရည်ကို မတ်ထရစ်တန်ချိန် ၁၈သန်းအထိမြှင့်တင်ခြင်းဖြင့် သုံးနှစ်ကြာလည်ပတ်ပြီးနောက် စုစုပေါင်းရင်းနှီးမြှုပ်နှံမှု ကန်ဒေါ်လာ ၇.၇၃ ဘီလီယံအထိရှိလာမည်ဖြစ်ကြောင်း အဆိုပါသတင်းအရင်းမြစ်များကပြောကြားခဲ့သည်။ ကမ္ဘာ့ကော်ပိုရေးရှင်းတချို့သည် ၎င်းတို့၏ ထောက်ပံ့ရေးကွင်းဆက်များကိုကွဲပြားစေရန်အတွက် အိန္ဒိယသို့ဦးတည်လာပြီး ထုတ်လုပ်ရေးနှင့် ဆောက်လုပ်ရေးလုပ်ငန်းများအရှိန်မြင့်လာခဲ့သည်။ ကုမ္ပဏီများသည် စက်ရုံများနှင့် ဂိုဒေါင်အသစ်များထူထောင်နေချိန်တွင် အိန္ဒိယ၏သံမဏိဝယ်လိုအားမြင့်တက်လာခဲ့သည်။ အဆိုပြု ထားသော JSW Steel နှင့် Posco တို့၏ ဖက်စပ်စက်ရုံသည် သံမဏိပြားများနှင့် သွပ်ရည်စိမ်စတီးများထုတ်လုပ်မည်ဟု သတင်းအရင်းမြစ်များကဆိုသည်။
Source:Reuters
DOCA(ရန်ကုန်)