ထိုင်းနိုင်ငံမှ တင်ပို့သော သကာရည်များအား အစားအစာဘေးကင်းလုံခြုံရေး အကြောင်း ပြချက်ဖြင့် တရုတ်နိုင်ငံက လက်ရှိအချိန်တွင် ပိတ်ပင်ထားခြင်းသည် ပြည်တွင်းရှိ သကြားထုတ် လုပ်သူများကို ထိခိုက်စေမည်မဟုတ်ဟု တာဝန်ရှိသူများအနေဖြင့် ယုံကြည်ထားကြောင်း ထိုင်း ကြံနှင့် သကြားဘုတ်အဖွဲ့ရုံး (OCSB) မှ တာဝန်ရှိသူများက ပြောကြားခဲ့ပါသည်။
တရုတ်အာဏာပိုင်များအနေဖြင့် တင်သွင်းမှုပိတ်ပင်ရခြင်း၏ အဓိကအကြောင်းရင်းအဖြစ် ထိုင်းစက်ရုံများတွင် ကျန်းမာသန့်ရှင်းမှုစံနှုန်းများနှင့် ပတ်သက်၍ စိုးရိမ်ပူပန်မှုများကို ကိုးကား ဖော်ပြခဲ့သော်လည်း အဆိုပါအကြောင်းပြချက်သည် ဆက်လက်တိုးမြင့်လာနေသော ထိုင်းနိုင်ငံမှ သကာရည်တင်ပို့မှုကို ဟန့်တားသည့် ကုန်သွယ်မှုအတားအဆီးတစ်ခုအဖြစ် ရှုမြင်လျက်ရှိကြ ကြောင်း သိရှိရသည်။
ထိုင်းသကြားထုတ်လုပ်သူများအနေဖြင့် ၎င်းတို့တွင် ကျယ်ပြန့်သောဖောက်သည်အခြေခံ ရှိပြီး သကြားများကို ကမ္ဘာတစ်ဝန်းရှိ နိုင်ငံအနှံ့အပြားသို့ တင်ပို့နေသည့်အတွက် ထိုင်းသကြား ထုတ်လုပ်သူများအပေါ် ပြင်းထန်သော သက်ရောက်မှုရှိလိမ့်မည်ဟု တာဝန်ရှိသူများအနေဖြင့် မျှော်လင့်ထားခြင်း မရှိကြောင်း၊ စက်မှုဝန်ကြီးဌာန၊ စီးပွားရေးနှင့် ကူးသန်းရောင်းဝယ်ရေး ဝန်ကြီး ဌာနနှင့် အကောက်ခွန်ဦးစီးဌာနတို့အနေဖြင့် တရုတ်နိုင်ငံဘက်မှ ထိုင်းသကာရည်များ တင်သွင်းမှု ပိတ်ပင်ခြင်းနှင့် ပတ်သက်၍ ဆွေးနွေးမှုများ ပြုလုပ်နေကြောင်း၊ တရုတ်-အာဆီယံ လွတ်လပ်သော ကုန်သွယ်မှု သဘောတူညီချက်အရ တရုတ်နိုင်ငံသို့ သကာရည်တင်ပို့မှုအပေါ် အခွန်အခများ လျှော့ပေါ့ပေးရမည်ဖြစ်ကြောင်း၊ သကာရည် တင်သွင်းမှုတိုးလာခြင်းသည် ၎င်းတို့၏ ပြည်တွင်း သကြားလုပ်ငန်းအပေါ် သက်ရောက်မှုရှိနိုင်သည်ကို တရုတ်နိုင်ငံအနေဖြင့် စိုးရိမ်ဖွယ်ရှိကြောင်း၊ OCSB မှ အထွေထွေအတွင်းရေးမှူး Bainoi Suwanchatreeက ပြောကြားခဲ့သည်။
သကြားတင်သွင်းမှု နှစ်စဉ်တိုးမြင့်လာမှုအပေါ် ပြည်တွင်းရှိ သကြားထုတ်လုပ်သူများနှင့် ကြံစိုက်တောင်သူများအား အကာအကွယ်ပေးရန်အတွက် တရုတ်နိုင်ငံသည် သွင်းကုန်ပမာဏ မြင့်တက်ခြင်းမှ ကာကွယ်ပေးမှု အစီအမံတစ်ရပ်ကို ချမှတ်ကျင့်သုံးဖွယ်ရှိကြောင်း၊ ထိုင်းနိုင်ငံအား ပို့ကုန်အခြေစိုက်စခန်းအဖြစ် အသုံးပြုလျက် အခွန်ရှောင်ရန် ကြိုးစားနေသော တရုတ်နိုင်ငံမှ သကာရည်ကုမ္ပဏီများအား ကိုင်တွယ်အရေးယူမှုကိုလည်း တရုတ်အစိုးရက လုပ်ဆောင်ဖွယ်ရှိ ကြောင်း Mr Bainoi က ပြောကြားခဲ့သည်။
တရုတ်နိုင်ငံသည် ထိုင်းနိုင်ငံနှင့် ဘရာဇီးနိုင်ငံတို့အတွက် သကာရည်တင်ပို့ရာ ထိပ်တန်း ဈေးကွက်တစ်ခုဖြစ်ကြောင်း၊ ဘရာဇီးသည် ကမ္ဘာ့အကြီးဆုံး သကြားထုတ်လုပ်သည့် နိုင်ငံဖြစ်ပြီး ၎င်း၏နောက်တွင် ဩစတေးလျသည် ဒုတိယနေရာနှင့် ထိုင်းနိုင်ငံသည် တတိယအများဆုံး သကြား ထုတ်လုပ်သည့် နိုင်ငံအဖြစ် လက်ရှိတွင် စက်ရုံပေါင်း ၅၈ ခုရှိကြောင်း သိရှိရသည်။
ထိုင်းနိုင်ငံသည် လွန်ခဲ့သော ၇ နှစ် - ၈ နှစ် ခန့်ကာလမှ စတင်၍ တရုတ်နိုင်ငံသို့ သကာရည် တင်ပို့မှုကို လုပ်ဆောင်ခဲ့ပြီး ကနဦးတွင် တစ်နှစ်လျှင် တန်ချိန် ၁၀၀၀၀၀ တင်ပို့ခဲ့သည်။ OCSB ၏ အဆိုအရ တင်ပို့မှုပမာဏသည် ၂၀၂၃ ခုနှစ်တွင် တန်ချိန် ၆၀၀၀၀၀ မှ ၇၀၀၀၀၀ အတွင်းအထိ ဆက်လက်တိုးမြင့်လာခဲ့ပြီး ယခင်နှစ်တွင် တန်ချိန် ၁.၂ သန်းအထိ မြင့်မားလာခဲ့ကြောင်း သိရှိ ရသည်။
တရုတ်နိုင်ငံအနေဖြင့် ၂၀၂၄ ခုနှစ်၊ ဒီဇင်ဘာလ ၁၀ ရက်နေ့တွင် ထိုင်းနိုင်ငံမှ သကာရည် တင်သွင်းမှုကို ရပ်တန့်ရန် ဆုံးဖြတ်ခဲ့ပြီး ဘတ်ငွေ သန်း ၄၀၀ ကျော်တန်ဖိုးရှိသော သကာရည် များပါဝင်သည့် ထိုင်းကုန်တင်သင်္ဘောများသည် တရုတ်နိုင်ငံကမ်းရိုးတန်းတွင် သောင်တင်လျက် ရှိနေခဲ့သည်။
Source: Bangkok Post, 8 January, 2025(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)