ဂျပန်ပြည်တွင်းဈေးကွက်တွင် ဆန်ပြတ်လပ်မှုဖြစ်ပေါ်နေသည့်အတွက် ပုဂ္ဂလိကကဏ္ဍမှ ဆန်တင်သွင်းမှုများ အရှိန်အဟုန်ဖြင့် မြင့်တက်လျက်ရှိပြီး ၂၀၂၄ ဘဏ္ဍာနှစ်အတွင်း ယခုနှစ် ဇန်နဝါရီလကုန်အထိ အစိုးရထံသို့ ဆန်တင်သွင်းခွင့်လျှောက်ထားမှုမှာ ၉၉၁ တန်အထိ စံချိန်တင် ရောက်ရှိလာကြောင်းသိရှိရပါသည်။
ပြည်ပမှဆန်တင်သွင်းခြင်းအတွက် အခွန်နှုန်းထား မြင့်မားစွာ ပေးဆောင်နေရသော်လည်း ကုမ္ပဏီများအနေဖြင့် လက်ရှိအချိန်တွင် အကျိုးအမြတ်ရရှိလျက်ရှိကြောင်း၊ တိုကျိုမြို့ အခြေစိုက် ကုန်သွယ်မှု အဓိကဆောင်ရွက်နေသည့် ကုမ္ပဏီတစ်ခုဖြစ်သော Kanematsu Corp အနေဖြင့် အမဲထမင်းပေါင်းရောင်းချသည့် စားသောက်ဆိုင်ခွဲ လုပ်ငန်းများတွင် ဆန်လိုအပ်ချက် မြင့်မားခြင်း ကြောင့် ၂၀၂၅ ခုနှစ်တွင် ဆန်တန်ချိန် ၁၀၀၀၀ တင်သွင်းရန် စီစဉ်ဆောင်ရွက်လျက်ရှိကြောင်း သိရှိ ရပါသည်။
ဂျပန်နိုင်ငံ၌ ဆန်တင်သွင်းမှုကို ပုံစံနှစ်မျိုးဖြင့် ဆောင်ရွက်လျက်ရှိရာ ပထမပုံစံသည် ကမ္ဘာ့ကုန်သွယ်ရေးအဖွဲ့မှ ချမှတ်ထားသော စည်းမျဉ်းများနှင့်အညီ အစိုးရက ပြည်ပနိုင်ငံများထံမှ ပမာဏ အတိအကျဖြင့် ဝယ်ယူပြီး တင်သွင်းခြင်းဖြစ်ပြီး ဒုတိယစနစ်သည် ကုန်သည်များနှင့် အခြားကုမ္ပဏီများက အစိုးရသို့ အခွန်ပေးဆောင်၍ ၎င်းတို့၏ အစီအစဉ်ဖြင့် တင်သွင်းခြင်းဖြစ် ပါသည်။
ဂျပန်အစိုးရအနေဖြင့် အဓိကစားသုံးသည့်အစားအစာဖြစ်သည့် ဆန်ကို တန်ချိန် ၁၀၀၀၀၀ အထိတင်သွင်းပြီး ဈေးကွက်တွင် ရောင်းချပေးလျက်ရှိကြောင်း၊ ၂၀၁၉ ဘဏ္ဍာနှစ်မှ စတင်၍ ပုဂ္ဂလိကကဏ္ဍမှ ဆန်တင်သွင်းမှုကို မှတ်တမ်းတင်ထားရှိခဲ့ပြီး ၂၀၂၀ ပြည့်နှစ်တွင် ဆန်တန်ချိန် ၄၂၆ တန် တင်သွင်းခဲ့ကြောင်း၊ မှတ်တမ်းများအရ ပုဂ္ဂလိကကဏ္ဍသည် နှစ်စဉ် ဆန်တန်ချိန် ၂၀၀ နှင့် ၄၀၀ ကြား တင်သွင်းမှုရှိခဲ့ကြောင်း၊ သို့ရာတွင် ၂၀၂၄ ဘဏ္ဍာနှစ်အတွင်း ဒီဇင်ဘာလကုန်တွင် တန်ချိန် ၄၆၈ တန်အထိ တင်သွင်းမှုရှိခဲ့ပြီးနောက် ဇန်နဝါရီလကုန်အတွင် ၉၉၁ တန်အထိ နှစ်ဆ ကျော် တိုးတက်လာခြင်းဖြစ်ကြောင်း သိရှိရပါသည်။
ဆန်ဖြန့်ဖြူးမှု လုပ်ငန်းနယ်ပယ်နှင့် နီးစပ်သည့် သတင်းအရင်းအမြစ်များအရ အမေရိကန် ပြည်ထောင်စုမှ တင်သွင်းသည့် ဆန်လုံးလတ်အမျိုးအစား Calrose ဆန်ကို သယ်ယူပို့ဆောင်ခနှင့် အခြားစရိတ်များအပါအဝင် တစ်ကီလိုဂရမ်လျှင် ယန်း ၁၅၀ ခန့်ဖြင့် ဝယ်ယူရရှိပြီး၊ အခွန်ပေး ဆောင်ခ ထည့်ပေါင်းပြီးပါက တစ်ကီလိုဂရမ်လျှင် စုစုပေါင်းကျသင့်ဈေးနှုန်းသည် ယန်းငွေ ၅၀၀ ခန့်ရှိကြောင်း သိရှိရပါသည်။
လက်ရှိကာလတွင် စတိုးဆိုင်များ၌ ပြည်တွင်းမှ ထွက်ရှိသည့်ဆန်ကို တစ်ကီလိုဂရမ်လျှင် ယန်း ၉၀၀ နှုန်းခန့်ဖြင့် ရောင်းချလျက်ရှိရာ ကုမ္ပဏီများအနေဖြင့် ဆန်တင်သွင်းမှုမှ အကျိုးအမြတ် လုံလောက်စွာ ဖြစ်ထွန်းလျက်ရှိပါသည်။ ယိုကိုဟားမားမြို့ အခြေစိုက် OK စူပါမားကက် ဆိုင်ခွဲများ လုပ်ငန်း၏ အရောင်းဆိုင် ၁၀ ဆိုင်တွင် မတ်လ ၇ ရက်နေ့အထိ ၅ ကီလိုဂရမ်ဝင် Calrose ဆန် တစ်အိတ်လျှင် အခွန်ပါဝင်ပြီး ယန်း ၃၃၃၅ နှုန်းဖြင့် ရောင်းချလျက်ရှိသည်။ ယင်းကုမ္ပဏီ အနေဖြင့် အဆိုပါစတိုးဆိုင် ၁၀ ခု၌ ဆန်ရောင်းချမှုရမှု အခြေအနေပေါ်မူတည်၍ အခြားနေရာဒေသများတွင် ရောင်းချရန် သင့်မသင့် ဆုံးဖြတ်သွားမည်ဖြစ်ပါသည်။
ပြည်ပနိုင်ငံများထံမှ ဂျပန်နိုင်ငံအစိုးရက ဆန်ဝယ်ယူသည့်စနစ်ကို အခွင့်အလမ်း အနည်း ဆုံး ဝယ်ယူမှုစနစ် (minimum access system) ဟု ခေါ်ဆိုပြီး ၁၉၉၃ ဥရုဂွေး ကုန်သွယ်ရေး ဆွေးနွေးပွဲများအရ ၁၉၉၅ ဘဏ္ဍာနှစ်၌ အဆိုပါစနစ်ကို အကောင်အထည်ဖော်ဆောင်ခဲ့ခြင်း ဖြစ် ကြောင်း၊ လက်ရှိကာလတွင် ဆန်တင်သွင်းခွင့် ကိုတာခွဲတမ်း တန်ချိန် ၇၇၀၀၀၀ သတ်မှတ်ထား ပြီး အဓိကစားသုံးကုန်အဖြစ် အထွေထွေသုံးအတွက် ဆန်တန်ချိန် ၁၀၀၀၀၀ ကိုသာ တင်သွင်းရန် ကန့်သတ်ထားကြောင်း၊ ပြည်တွင်း၌ ဆန်စပါး ရိတ်သိမ်းထွက်ရှိမှု ကျဆင်းခြင်းအရ အစိုးရသည် ပြည်ပမှတင်သွင်းသည့်ဆန်များကို ၇ နှစ်တာကာလအတွင်း ပထမဆုံးအကြိမ်အဖြစ် ၂၀၂၄ ဘဏ္ဍာ နှစ်တွင် ရောင်းချခဲ့ခြင်းဖြစ်ကြောင်း သိရှိရပါသည်။
Source : The Yomiuri Shimbun, March 15, 2025(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)