
ဧရာဝတီတိုင်းဒေသကြီး ပုသိမ်မြို့နယ်တွင် ဒေသခံများထုတ်လုပ်သည့် ဒေသထွက်ကုန်များ ရောင်းအားသိသိသာသာ ကောင်းမွန်လာသည်ကို တွေ့ရသည်။ အထူးသဖြင့် ပုသိမ်ဟာလဝါ၊ ပုသိမ်ထီး၊ ငါးပိ၊ ငါးခြောက်၊ အခြားဒေသထွက်ကုန်များနှင့် လက်မှုပစ္စည်းများကို ခရီးသွားဧည့်သည်များက ပိုမိုဝယ်ယူလာကြကြောင်း ဒေသထွက်ကုန် ထုတ်လုပ်ဖြန့်ဖြူး ရောင်းချသူများထံမှ သိရသည်။
ပုသိမ်မြို့၏ အချက်အချာကျသောနေရာများတွင် ဆိုင်ခန်းများ ဖွင့်လှစ်ရောင်းချလျက်ရှိသော လုပ်ငန်းရှင်များအနေဖြင့်လည်း ဒေသထွက်ကုန်အပြင် အခြားလက်မှုလုပ်ငန်းများကို မြှင့်တင်ရာလည်း ရောက်သည်ဟု ဆိုသည်။ "အရင်ကထက် ဒေသထွက်ပစ္စည်းတွေကို လူကြိုက်များလာတယ်။ အထူးသဖြင့် ပုသိမ်ဟာလာဝါရဲ့ အရသာနဲ့ အရည်အသွေးက နာမည်ကြီး လာတာကြောင့် ပြည်တွင်းခရီးသွားတွေရော ဒေသခံတွေပါ ဝယ်ယူကြတယ်" ဟု ဟာလဝါ လုပ်ငန်းရှင် တစ်ဦးမှ ပြောကြားပါသည်။
ဒေသထွက်ကုန်များ ပိုမိုရောင်းအားကောင်းလာရခြင်းမှာ ဒေသခံများ၏ ကိုယ်ပိုင်ထုတ်လုပ်မှု အရည်အသွေး တိုးတက်လာခြင်း၊ ခရီးသွားဧည့်သည်များ ဒေသထွက်ပစ္စည်းများကို လက်ဆောင်အဖြစ် ပိုမိုဝယ်ယူလာခြင်းနှင့် အစိုးရနှင့် အသင်းအဖွဲ့များအနေဖြင့် ဒေသထွက်ကုန် ပစ္စည်းများအား ဈေးကွက်တင်သည့် အစီအစဉ်များသာမက နှစ်စဉ် လွတ်လပ်ရေးနှင့် ပြည်ထောင်စုနေ့များတွင် ဒေသထွက်ကုန်များအား ခရိုင်အလိုက် ခင်းကျင်းပြသမှုများ ပိုမိုလုပ်ဆောင်လာခြင်းတို့ကြောင့် ဖြစ်သည်။
ထို့ပြင် ပုသိမ်မြို့နယ် ကျေးလက်ဒေသများမှ MSMEs လုပ်ငန်းရှင်များမှ ၎င်းတို့၏ ထုတ်ကုန်များကို တိုက်ရိုက်ဈေးကွက်သို့ ရောက်ရှိစေရန် ပူးပေါင်းဆောင်ရွက်လာကြသည်။ ဤသို့ဖြင့် ဒေသထွက်ကုန်များ၏ ဈေးနှုန်းများလည်း တည်ငြိမ်လာကာ ထုတ်လုပ်သူများအတွက် အကျိုးအမြတ် ပိုမိုရရှိလာကြောင်း သိရရသည့်အပြင် ကျေးလက်ဒေသဖွံ့ဖြိုးရေးအတွက် ဒေသထွက်ကုန်များ ဈေးကွက်ရရှိရေးသည် အရေးကြီးသော အခန်းကဏ္ဍမှ ပါဝင်နေပြီး ပုသိမ်မြို့တွင်းရှိ စီးပွားရေးလုပ်ငန်းများ ပိုမိုအားကောင်းစေမည်ဖြစ်ပါကြောင်း ရေးသားတင်ပြလိုက်ရပါသည်။
DOCA(ဧရာဝတီ)