မန္တလေးတိုင်းဒေသကြီး ညောင်ဦးမြို့နယ် ကျောက်ကူးမြစ်ရေတင်ဖြင့် စိုက်ပျိုးထားသည့် နွေပဲတီစိမ်းများ အောင်မြင်ဖြစ်ထွန်းနေကာ ဆွတ်ခူးရောင်းချချိန် မနှစ်ကထက် ဈေးနှုန်းပိုမိုရရှိိနေ သောကြောင့် မြစ်ရေတင်ဖြင့် စိုက်ပျိုးသည့် ကျေးလက်တောင်သူများ အဆင်ပြေနေကြကြောင်း သိရသည်။ ညောင်ဦးမြို့နယ် ကျောက်ကူးမြစ်ရေတင်ဖြင့် စိုက်ပျိုးထားသည့် နွေပဲတီစိမ်း စိုက် ဧက(၂၃၀)ဧကရှိကြောင်း၊ ပဲတီစိမ်းစိုက်ခင်းများ ကောင်းမွန်ကာ ပြီးခဲ့သည့်နှစ်က နွေပဲတီစိမ်း တစ်တင်းလျှင်(၉၅၀၀၀)ကျပ်ဖြင့် ရောင်းချခဲ့ကြပြီး ယခုနှစ် နွေပဲတီစိမ်းပေါ်ချိန် (၁၅၀၀၀၀) ကျပ် ရောင်းချရခြင်းကြောင့် မြစ်ရေတင်ဖြင့် စိုက်ပျိုးသည့် ကျေးလက်တောင်သူများ တွက်ချေ ကိုက်နေကြကြောင်းသိရသည်။ နွေပဲတီစိမ်းကို မတ်လလယ်တွင် စတင်စိုက်ပျိုးပြီး၊ ၄၅ရက်ရှိလျှင် ပဲတီစိမ်းအဖူး၊ အပွင့်များစတင်ပွင့်ပြီး ရက်၆၀၊ ၂လပြည့်လျှင် စတင်ခူးဆွတ်ရကြောင်း၊ ထွက်ရှိလာ သည့် နွေပဲတီစိမ်းများအား ပခုက္ကူမြို့၊ ညောင်ဦးမြို့၊ ကျောက်ပန်းတောင်းမြို့များရှိ ပွဲရုံများသို့ သွား ရောက် ရောင်းချကြကြောင်းသိရသည်။ ကျောက်ကူးမြစ်ရေတင်မှ ရေသွင်းခ ၁ဧကတွင် နွေပဲတီစိမ်း တစ်သီးပြီးသည်အထိ (၃၀၀၀)ကျပ်ပေးသွင်းရပြီး ရေကို ၅ကြိမ်/၆ကြိမ် အထိရေသွင်းပေးရကြောင်း၊ နွေပဲတီစိမ်းစိုက်တောင်သူတစ်ဦးပြောကြားချက်အရ သိရသည်။ ညောင်ဦးမြို့နယ် မြစ်ရေတင်ရရှိ သည့်ကျေးရွာများတွင် နွေပဲတီစိမ်းများ အောင်မြင်ဖြစ်ထွန်းပြီး ဆွတ်ခူးရောင်းချချိန်ဈေးကောင်း ရရှိလျက်ရှိကြောင်းသိရသည်။
DOCA(မန္တလေး)