မကွေးတိုင်းဒေသကြီး၊ ပခုက္ကူခရိုင်၊ ရေစကြိုမြို့နယ်အတွင်း ပဲစဉ်းငုံ၊ မြေပဲ၊ နှမ်း၊ ပဲတီစိမ်း၊ CP ပြောင်းဖူးစေ့၊ ထောပတ်ပဲနှင့် မတ်ပဲ သီးနှံများကို အများအပြား စိုက်ပျိုးလျက်ရှိပါသည်။ ရေစကြိုမြို့နယ် ကျေးရွာများတွင် သီးထပ်အဖြစ် နွေပဲတီစိမ်း သီးနှံများကို ဒီဇင်ဘာလနှင့် ဇန်နဝါရီ လများတွင် ကြဲပတ်စနစ်ဖြင့် စတင်စိုက်ပျိုးကြပါသည်။ (၁)ဧကအနေဖြင့် မျိုးစေ့ (၈)ပြည်ခန့် ကုန်ကျကြောင်း၊ စိုက်ပျိုးစရိတ်အနေဖြင့် မျိုး၊ သွင်းအားစု၊ ထွန်ယက်ခ၊ ရိတ်သိမ်းချွေလှေ့ခ စုစုပေါင်း ကုန်ကျစရိတ်မှာ ကျပ်(၁၀) သိန်းခန့် ကုန်ကျကြောင်း ပဲတီစိမ်းစိုက်တောင်သူတစ်ဦး၏ ပြောကြား ချက်အရ သိရှိရပါသည်။
ပဲတီစိမ်း (၁) ဧက ထွက်ရှိမှုအနေဖြင့် ရာသီဥတုအခြေအနေအပေါ်မှုတည်၍ အထွက်တင်း များ ကွာခြားလျက်ရှိပါသည်။ ယခုနှစ်အနေဖြင့် ရာသီဥတုအခြေအနေကောင်းသဖြင့် အထွက်တင်း (၂၀ မှ ၂၅) တင်းခန့် ထွက်ရှိပါကြောင်း၊ မေလတွင် စတင်ရိတ်သိမ်းလျက်ရှိပြီး ဇွန်လတွင် ဖြိုင်ဖြိုင် ထွက်ပေါ်လျက်ရှိပါသည်။ ဈေးကွက်အနေဖြင့် ရေစကြိုမြို့ပေါ်ရှိ ပွဲရုံများသို့ တင်ပို့ရောင်းချပြီး ထိုမှ တစ်ဆင့် ပခုက္ကူ၊မန္တလေး၊ ရန်ကုန်မြို့များသို့ တင်ပို့ရောင်းချလျက်ရှိကြောင်း သိရှိရပါသည်။ ဈေးနှုန်း အနေဖြင့် ၂၀၂၅ခုနှစ်၊ ဇွန်လ(စတုတ္ထပတ်)တွင် ပဲတီစိမ်း (၁)တင်းလျှင် အရည်အသွေးပေါ်မူတည်ပြီး ကျပ်(၉၀၀၀၀ မှ ၁၀၀၀၀၀)ဖြင့် အရောင်းအဝယ်ဖြစ်လျက်ရှိပါသည်။ ပဲတီစိမ်းစိုက်တောင်သူများ အ နေဖြင့် (၁)ဧကလျှင် အကျိုးအမြတ် ကျပ်(၁၀) သိန်းခန့်ရရှိကြောင်း ပဲတီစိမ်း(၃)ဧကစိုက် တောင်သူ တစ်ဦး၏ ပြောကြားချက်အရ သိရှိရပါသည်။
DOCA(မကွေး)