“(ဆောင်း)ပဲကြီးအစိုများ စတင်ထွက်ပေါ်မှုနှင့် ဈေးနှုန်းအခြေအနေ”

       မန္တလေးတိုင်းဒေသကြီး၊ ကျောက်ဆည်ခရိုင်သည် ဆည်ရေသောက်ဒေသတစ်ခုဖြစ်သောကြောင့် စပါး၊ ပဲ၊ ပြောင်း၊ နှမ်းသီးနှံမျိုးစုံ အောင်မြင်ဖြစ်ထွန်းလျက်ရှိရာ ကျောက်ဆည်ခရိုင်အတွင်းရှိ ကျေးလက်နေတောင်သူများသည် မိသားစု အပိုဝင်‌ငွေရရှိရေးအတွက် ဆောင်းသီးနှံဖြစ်သော ပဲကြီးသီးနှံကို လယ်ကန်သင်းရိုးများတွင် တစ်ပိုင်တစ်နိုင်စိုက်ပျိုးလာရာမှ ယခုအခါတွင် တွက်ခြေကိုက်သီးနှံဖြစ်သောကြောင့် လယ်မြေ၊ ယာမြေများတွင် စီးပွားဖြစ်အများအပြား စိုက်ပျိုးလာကြပါသည် ။

        ၂၀၂၅-၂၀၂၆ ဘဏ္ဍာနှစ်တွင် ပဲကြီး စိုက်ပျိုးမှုအနေဖြင့် ကျောက်ဆည်မြို့နယ်တွင်(၂၄၂)ဧက ၊ မြစ်သားမြို့နယ်တွင် (၂၄၀)ဧက၊ စုစုပေါင်း(၄၈၂)ဧက စိုက်ပျိုးထားရှိပြီးကြောင်း သက်ဆိုင်ရာဌာန၏စာရင်းများအရ သိရှိရပါသည်။ ပဲကြီးသီးနှံကိုအောက်တိုဘာလတွင် စတင်စိုက်ပျိုးကြပြီး စိုက်ပျိုးရာတွင် ထွန်မွှေ၊ စိုက်ကြောင်းဆွဲပြီး ကျင်းဖောက်စနစ်ဖြင့် စိုက်ပျိုးကြကြောင်း၊ (၁)ဧက ကုန်ကျစရိတ်အနေဖြင့်မျိုး၊ သွင်းအားစု၊ ရိတ်သိမ်း၊ ချွေလှေ့၊ အလုပ်သမားခအပါအဝင် စုစုပေါင်း(၃၀၀,၀၀၀/-)ကျပ် ဝန်းကျင်ကုန်ကြကြောင်း၊ ယခင်နှစ် အထွက်နှုန်းအနေဖြင့် ပဲကြီးအခြောက် (၁၀-၁၂)တင်းခန့် ထွက်ရှိခဲ့ကြောင်း၊ ဈေးနှုန်းအနေဖြင့် ပဲကြီးအခြောက် တစ်တင်းလျှင် (၈၀,၀၀၀/-)ကျပ်၊ ပဲကြီးအစို (၁)ပြည်လျှင်(၂,၅၀၀-၃,၀၀၀)ကျပ် ဈေးနှုန်းများဖြင့်ရောင်းဝယ်ခဲ့ကြောင်း၊ ရိတ်သိမ်းပြီးပဲကြီးအခြောက်များကို ဒေသတွင်းရှိ ပွဲရုံများကိုသာ ရောင်းချကြပြီး ပဲကြီးလှော်၊ ပဲကြီးကြော်လုပ်ငန်းရှင်များမှလည်း ကျေးရွာအရောက် လာရောက်ဝယ်ယူကြကြောင်း၊ (၁)ဧက အကျိုးအမြတ်အနေဖြင့် (၅၀၀,၀၀၀/-)ကျပ်ဝန်းကျင် မြတ်ခဲ့ကြောင်း၊ ပဲကြီးသီးနှံမှာ စိုက်ပျိုးသည်မှ ရိတ်သိမ်းပြီးသည်အထိ (၃)လမှ(၆)လအတွင်းရှိပါသည်။ စိုက်ပျိုးပြီး (၃)လအကြာတွင် အဖူးအပွင့်များစတင်ဖူးပွင့်ပြီး ယခုအချိန်တွင် အစောစိုက် (ဆောင်း)ပဲကြီးအစိုများ စတင်ထွက်ပေါ်လျက်ရှိပြီး ပေါ်ဦးပေါ်စအချိန်တွင် ပဲကြီးအစို ဈေးနှုန်းမှာ လက်ကားဈေး (၁)ပြည်လျှင် (၁၀,၀၀၀)ကျပ်၊ လက်လီဈေး တစ်ဘူးလျှင်(၁,၅၀၀)ကျပ် ဈေးဖြင့်ရောင်းချလျက်ရှိကြောင်း၊ တောင်သူအများစုမှာ ပဲကြီးအစိုများကိုသာ ခူးဆွတ်၍ ရောင်းချကြကြောင်း၊ ပဲကြီးအခြောက် ဈေးနှုန်းအနေဖြင့် ယခုအချိန်တွင် တစ်တင်းလျှင် (၁၁၀,၀၀၀)ကျပ်စျေးနှုန်းဖြင့် အရောင်းအဝယ်ဖြစ်လျက်ရှိကြောင်းကို နေလသုခပွဲရုံ မှသိရှိရသည်။ ပဲကြီးသီးနှံ စိုက်ပျိုးခြင်းဖြင့် မိသားစုအပိုဝင်ငွေရရှိရုံသာမက ကျွဲစာ၊ နွားစာများအတွက်လည်း ဖူလုံလျက်ရှိသောကြောင့် ပိုမိုတိုးချဲ့ စိုက်ပျိုးသင့်ပါကြောင်းကို ဖျောက်ဆိပ်ပင်ကျေးရွာမှ ပဲကြီးစိုက်တောင်သူတစ်ဦးထံမှ သိရှိရပါသည်။

DOCA(မန္တလေး)