မန္တလေးတိုင်းဒေသကြီး၊ ပြင်ဦးလွင်မြို့သည် ရာသီဥတုအေးပြီး တောင်ပေါ်မြို့တစ်မြို့ ဖြစ်ပါသည်။ မြေဆီမြေလွှာကောင်းမွန်သောကြောင့် နှစ်ရှည်သီးနှံအပြင် ရာသီပေါ်သီးနှံများ အများ အပြားစိုက်ပျိုးပြီး စီးပွားရေးအဆင်ပြေလျှက်ရှိရာ ပန်းဂေါ်ဖီ(ပန်းမုံလာ)ကို မိရိုးဖလာ စိုက်ပျိုးသူ များလည်း ရှိပါသည်။ ပန်းဂေါ်ဖီ(ပန်းမုံလာ)သည် ဂေါ်ဖီထုပ်ကဲ့သို့ အအေးကြိုက်ပြီး ဂေါ်ဖီထုပ်ထက် အပူဒဏ် ခံနိုင်သည် အေးပြီးအစိုဓါတ်အမြဲရရန်လိုပါသည်။ ရာသီဥတုခြောက်သွေ့ပါက အပွင့်မဖြစ် ထွန်းပါ၊ မြေအမျိုးအစားထက် ရာသီဥတုပို အရေးကြီးပါသည်။ မြေပြန့်ဒေသတွင် အေးသောအချိန် စိုက်ပျိုးပြီး တောင်ပေါ်ဒေသတွင် ဧပြီလမှ အောက်တိုဘာလအထိ စိုက်ပျိုးပါသည်။ သက်လျင်မျိုး သည် အပွင့်အရွယ်ငယ်ပြီး၊ အရွယ်အစားအပွင့်ကြီးမားသော သက်ကြီးမျိုးကို တောင်ပေါ်ဒေသတွင် အများဆုံးစိုက်ပျိုးသည်။ ပျိုးထောင်ပြုလုပ်စဉ် စိုက်ခင်းကို ထယ်(၂)စပ်၊ (၃)စပ်ဝင်၍ ပြုပြင်ပေးရ ပါသည်။ ပေါင်းမြက်၊ အမှိုက်၊ ကျောက်ခဲများကို ရှင်းပေးရပါသည်။ ပျိုးတောင်ပေါ်တွင် မျိုးစေ့ကြဲရန် (၂)လက်မခြား မြောင်းဆွဲပြီး မျိုးစေ့ကို ညီညာစွာချ၍ အပေါ်မှ နွားချေး၊ မြေဆွေးပါးပါးအုပ်ကာ ၎င်းအပေါ်ကောက်ရိုးပါးပါး ဖုံးအုပ်ပြီး ရေရွဲရွဲလောင်းပေးရပါမည်။ (၃၊၄)ရက် ကြာလျှင် အညှောင့်ပေါက်လာပြီး ပျိုးပင်သက်(၃၅-၄၀)ရောက်လျှင် ပြောင်းရွှေ့စိုက်ပျိုးနိုင်ပါသည်။ တစ်ပင်နှင့်တစ်ပင် ၁ပေခွဲ၂ပေခြား တစ်တန်းနှင့်တစ်တန်း (၂)ပေ၊ (၂)ပေခွဲထား စိုက်ပျိုးနိုင်ပါသည်။ သက်တမ်းကိုလိုက်ပြီး ရွှေ့စိုက်ပျိုးချိန် (၂)လ (၂)ခွဲကြာလျှင် စတင်ခုတ်ယူနိုင်ပါသည်။ ပန်းဂေါ်ဖီ (ပန်းမုံလာ) ကို မိသားစုထမင်းဝိုင်းများတွင် အမျိုးမျိုးချက်ပြုတ်စားသောက်ကြကြောင်း၊ ပန်းဂေါ်ဖီ တွင် အာဟာရဓာတ် အများအပြားပါဝင်ပြီး ကျန်းမာရေးအထောက်အကူပြု ဟင်းသီးဟင်းရွက်ဖြစ် ကြောင်း၊ ပါဝင်သောဓာတ်ပစ္စည်းများမှာ နှလုံးရောဂါ၊ ကင်ဆာရောဂါတွေ ဖြစ်နိုင်ခြေလျော့ချစေပြီး ဗီတာမင်နှင့် သတ္တုဓာတ်အားလုံး ပန်းဂေါ်ဖီတွင် ပါဝင်ကြောင်း၊ အမျှင်ဓာတ်ကြွယ်ဝစေပြီး အစာအိမ်အူလမ်းကြောင်းကို အထောက်အကူပြုပြီး ကိုယ်ခံအားကိုလည်း တိုးတက်စေကြောင်း၊ ယခုအချိန်တွင် ပန်းဂေါ်ဖီ တစ်ပွင့်လျှင် ၂၀၀၀-၂၅၀၀ ကျပ်ဖြင့် ရောင်းချပြီး ပြင်ဦးလွင်မြို့မှတစ်ဆင့် နီးစပ်ရာမြို့များသို့ နေ့စဉ်တင်ပို့ရောင်းချကြောင်း သိရှိရပါသည်။
DOCA(မန္တလေး)