မိတ္ထီလာခရိုင်အတွင်း စပါးအများဆုံးစိုက်ပျိုးသော ဝမ်းတွင်းမြို့နယ်၌ ဒီဇင်ဘာလမှစ၍ မိုးစပါးများ အရောင်းအဝယ်ဖြစ်လာကြောင်း သိရသည်။ မိုးစပါးအသစ်များမှာ နှစ်စဉ် ဒီဇင်ဘာ၊ ဇန်နဝါရီလများတွင် ထွက်ရှိရာ ဝမ်းတွင်းမြို့နယ်တွင် မနောသုခ၊ ဧရာပဒေသာစပါးများအပြင် ပေါ်ဆန်း (ဘေးကြား) များလည်း စိုက်ပျိုးသဖြင့် အရောင်းအဝယ်ဖြစ်ကြောင်း သိရသည်။ ယခုနှစ်အသစ်ထွက်ရှိလာသော မိုးစပါးဈေးနှုန်းများမှာ မနောသုခတစ်တင်းလျင် ၂၀၀၀၀/၂၂၀၀၀ ကျပ်၊ ဧရာပဒေသာတစ်တင်းလျင် ၃၀၀၀၀/၃၂၀၀၀ ကျပ်၊ ပေါ်ဆန်း(ဘေးကြား)မှာ ၄၀၀၀၀ ကျပ်ဈေးရှိပြီး ယခင်နှစ် စပါးသစ်ဈေးမှာ မနောသုခတစ်တင်းလျင် ၂၀၀၀၀ ကျပ်၊ ဧရာပဒေသာ တစ်တင်းလျင် ၃၀၀၀၀ ကျပ်ရှိခဲ့ကြောင်း သိရသည်။
ယခုဇန်နဝါရီလစတုတ္ထပတ်တွင် ဆန်သစ်ဈေးအနေဖြင့် မနောသုခတစ်အိတ်လျင် ၆၅၀၀၀ ကျပ်၊ ဧရာပဒေသာတစ်အိတ်လျင် ၁၁၅၀၀၀ ကျပ်၊ ပေါ်ဆန်း(ဘေးကြား)တစ်အိတ်လျင် ၁၃၀၀၀၀ ကျပ်ဈေးရှိပြီး ဆန်သစ်ဖြစ်၍ အရောင်းအဝယ်အေးကြောင်း သိရသည်။
မိတ္ထီလာခရိုင်အတွင်း စပါးကို မိုးစိုက်အနေဖြင့် စိုက်ပျိုးမှုများပြီး ခရိုင်အတွင်း မိတ္ထီလာ၊ မလှိုင်၊ သာစည်၊ ဝမ်းတွင်းမြို့နယ်(၄)မြို့နယ်အနက် ဝမ်းတွင်းမြို့နယ်မှာ အများဆုံးစိုက်ပျိုးကြောင်းနှင့် ယခုနှစ် မိုးစပါးတစ်ဧကလျင် တင်း(၈၀)ဝန်းကျင် ထွက်ရှိကြောင်း စပါးစိုက်ပျိုးသည့်တောင်သူနှင့် စက်ပိုင်ရှင်များထံမှ သိရှိရပါသည်။
DOCA(မန္တလေး)