မြင်းခြံခရိုင်၊ တောင်သာမြို့နယ်တွင် ပြည်တွင်းစားသုံးဆီဖူလုံစေရေးနှင့် ပိုလျှံရေးအတွက် အရေးကြီးသီးနှံတစ်မျိုးဖြစ်သည့် နေကြာ(ဆောင်း) များစိုက်ပျိုးထားကြောင်း၊ နေကြာဆောင်းများ အောင်မြင်ဖြစ်ထွန်းရိတ်သိမ်းပြီး ဖြစ်ကြောင်းသိရှိရသည်။ အကောင်းဆုံးစိုက်ပျိုးချိန်မှာ စက်တင်ဘာလ၊ အောက်တိုဘာလနှင့် နိုဝင်ဘာလတို့တွင် စတင်စိုက်ပျိုးပြီး ဇန်နဝါရီလ၊ ဖေဖော်ဝါရီလနှင့် မတ်လတို့တွင် ရိတ်သိမ်းထွက်ပေါ်ကြောင်း၊ စိုက်ပျိုးချိန်မှ ရိတ်သိမ်းချိန်အထိ (၄)လခန့်ကြာ မြင့်ကြောင်း သိရှိရသည်။ စိုက်ပျိုးရာတွင် တန်းကြား(၂)ပေ၊ ပင်ကြား(၉)လက်မ ခွာ၍စိုက်ပျိုးကြောင်း၊ မျိုးအနေဖြင့် ဆင်းရွှေကြာ-၂ ၊ ရေဆင်းစပ်မျိုး-၁ နေကြာမျိုးကို အဓိကစိုက်ပျိုးကြကြောင်း၊ ၂၀၂၅-၂၀၂၆ခုနှစ်၊ နေကြာဆောင်းကို တစ်မြို့နယ်လုံးအနေဖြင့် စီမံကိန်းသီးနှံ (၃၁၀၅) ဧကလျာထား ချက်၌ ရာနှုန်းပြည့်စိုက်ပျိုးခဲ့ကြောင်း၊ မျိုး၊ သွင်းအားစု၊ လုပ်သားခအပါအဝင် (၇၅၀,၀၀၀) ကျပ်ခန့်ကုန်ကျကြောင်း၊ တစ်ဧကအထွက်နှုန်းအနေဖြင့်(၂၄-၂၅)တင်းခန့် ထွက်ရှိခဲ့ ကြောင်း၊ ယခု ထွက်ပေါ်ချိန်တွင် ဆီနေကြာတစ်ပိဿာလျှင် (၇၈၀၀)ကျပ်ခန့် ပေါက်ဈေးများ ရှိခဲ့ကြောင်း၊ တစ်ဧကအကျိုးအမြတ်အနေဖြင့် (၁၀)သိန်းကျပ်ခန့်ရရှိကြောင်း၊ စိုက်ပျိုးထားရှိသော ကျေးရွာများမှာ ထန်းပင်ကန်ရွာ၊ နန်းတည်ရွာ၊ ဆည်ကုန်းရွာ၊ မင်းစုရွာ၊ ရုံးတောရွာနှင့် ဝဲလောင် ကျေးရွာများတွင် စိုက်ပျိုးထားကြောင်း၊ ၎င်းကျေးရွာများမှထွက်ရှိသော နေကြာများကို မြင်းခြံမြို့ ရှိပွဲရုံများသို့ တင်ပို့ရောင်းချကြောင်း၊ တောင်သူများအနေဖြင့် အကျိုးအမြတ်များလည်းရရှိကြောင်း နေကြာစိုက်တောင်သူတစ်ဦး၏ ပြောပြချက် အရသိရှိရသည်။ ထိုပွဲရုံများမှတဆင့် မန္တလေးမြို့နှင့် ရန်ကုန်မြို့ရှိဘုရင့်နောင်ပွဲရုံသို့တင်ပို့ ရောင်းချကြောင်း ပွဲရုံများမှသိရှိရသည်။
DOCA(မန္တလေး)