မကွေးတိုင်းဒေသကြီး၊ ပခုက္ကူခရိုင်၊ ပေါက်မြို့နယ်ရှိ ကျေးရွာများတွင် ဒေသတွင်း စားသုံးဆီ ဖူလုံရေးအတွက် ဆီထွက်သီးနှံဖြစ်သည့် နှမ်းသီးနှံကို ဇန်နဝါရီလ (ပထမပတ်)မှ စတင်စိုက်ပျိုးကြပြီး ယခုအချိန်တွင် ရိတ်သိမ်းပြီးစီးလျက်ရှိပါသည်။ နှမ်းအမျိုးအစားများမှာ နှမ်းဝါ၊ စမုံနက်၊ ဆင်းရတနာ-၁၀ မျိုး များကို စိုက်ပျိုးလျက်ရှိပါသည်။ ထွက်ရှိလာသော နှမ်းများကို ဆီစက်သို့ တောင်သူကိုယ်တိုင် ဆီကြိတ်၍ ရောင်းချပြီး နှမ်းဖတ်များကို အမှုန့်ကြိတ်၍ သီးနှံများစိုက်ပျိုးရာတွင် မြေဩဇာအဖြစ် အသုံးပြုကြပါသည်။ တောင်သူများသည် ပခုက္ကူမြို့သို့သွားရောက်ရောင်းချရန် နယ်မြေအခက်အခဲ ကြောင့် ဒေသတွင်းစားသုံးရန်အတွက် စိုက်ပျိုးကြပြီး ပေါက်မြို့၊ မြို့မဈေးသို့ လာရောက်ရောင်းချကြ ပါသည်။
နှမ်းစိုက်တောင်သူများ၏ တစ်ဧက ပျမ်းမျှအထွက်နှုန်းမှာ (၇)တင်း ပတ်ဝန်းကျင်ထိ ထွက်ရှိ ပြီး တောင်သူများ၏ အကျိုးအမြတ်မှာဆီဈေးနှုန်းပေါ်မူတည်နေကြောင်း၊ နှမ်းတစ်တင်း ကြိတ်လျှင် ဆီ(၆-၇)ပိဿာထွက်ရှိကြောင်း၊ တစ်ဧက စိုက်ပျိုးကုန်ကျစရိတ်မှာကျပ်(၁၂)သိန်းခန့်ရှိကြောင်း၊ တစ်ဧက စိုက်ပျိုးထွက်ရှိမှု၏ ဝင်ငွေမှာ ကျပ်(၂၅)သိန်းခန့်ရရှိကြောင်း၊ တောင်သူတစ်ဦး၏ အသား တင် အကျိုး အမြတ် မှာ ကျပ်(၁၃)သိန်းခန့်ထိကျန်ရှိနိုင်ကြောင်း တောင်သူများထံမှ သိရှိရပါသည်။
ယခင် သီးနှံ စိုက်ပျိုးချိန်တွင် နှမ်းဆီဈေးနှုန်းမှာ တစ်ပိဿာလျှင်ကျပ် (၉၀၀၀၀) ထိရှိခဲ့ပြီး ယခု မေလ (ဒုတိယပတ်)တွင် သီးနှံများ ရိတ်သိမ်းပြီးသွားသောကြောင့် တစ်ပိဿာလျှင် ကျပ် (၅၅၀၀၀) ဈေး ဖြင့် အရောင်းအဝယ်ဖြစ်နေပြီး (၁)ပိဿာလျှင် ကျပ် (၃၅၀၀၀) ဈေးနှုန်းကျဆင်းသွားကြောင်း သိရှိရပါသည်။
DOCA(မကွေး)