တောင်ငူခရိုင်၊ ဖြူးမြို့နယ်၊ ဇေယျဝတီမြို့၊ လင်းယောခင်ကျေးရွာရှိ ရွာသူ/ရွာသားများသည် လယ်ယာလုပ်ငန်းအပြင် မိရိုးဖလာလုပ်ငန်းဖြစ်သော တာခြင်းတောင်းယက်လုပ်ခြင်းလုပ်ငန်းကိုလည်းလုပ်ကိုင်ကြပါသည်။ အများအားဖြင့် မိသားစုများ တစ်နိုင်တစ်ပိုင်ဝိုင်းဝန်းလုပ်ကိုင်ကြသောလုပ်ငန်းဖြစ်ပါသည်။
တာခြင်းတောင်းယက်လုပ်ခြင်းအတွက် အဓိကလိုအပ်သောကုန်ကြမ်းမှာ သပွတ်ဝါးဖြစ်ပါသည်။ တာခြင်းတောင်းပြုလုပ်ပုံမှာ ၎င်းဝါးသပွတ်အား ခွဲခြမ်းစိတ်ဖြာ၍ ပုံဖော်ယက်လုပ်ရပါသည်။ တာခြင်းတောင်းယက်လုပ်ရာတွင် လိုအပ်သောဝါးအား ဖြူးမြို့၊ အနောက်ပဲခူးရိုးမတောင်ပေါ်မှ ဝယ်ယူရရှိပါသည်။ လိုအပ်သောကုန်ကြမ်းဝါးအား ဝါးအလုံး ၃၀ပါ တစ်စည်းလျှင် ၆၀၀၀ ကျပ်နှုန်းဖြင့် ဝယ်ယူရရှိပါသည်။
တာခြင်းတောင်းများအား ၅လုံးတစ်တွဲတွဲ၍ ရောင်းချကြပါသည်။ တာခြင်းတောင်း ၁လုံးလျှင် အကြီး ၆၀၀ကျပ်နှင့် အရွယ်အစားအနည်းငယ်သေးသော ခြင်းတာင်း ၁လုံးလျှင် ၅၀၀ ကျပ်ဖြင့် ရောင်းချကြကြောင်း သိရှိရပါသည်။
တာခြင်းတောင်းအား နွားချေးသယ်ယူရာတွင်လည်းကောင်း၊ လုပ်ငန်းခွင်များ၌ မြေကြီးသယ်ရာတွင်လည်းကောင်း အသုံးပြုနိုင်ပါသည်။ လင်းယောခင်ကျေးရွာထွက် တာခြင်းတောင်းများအား ဒေသတွင်းအနီးပတ်ဝန်းကျင်ရှိ ကျေးရွာများသို့ တင်ပို့ရောင်းချကြပါသည်။ မြန်မာနိုင်ငံသည် စိုက်ပျိုးရေးနိုင်ငံဖြစ်သောကြောင့် တောင်သူဦးကြီးများအနေဖြင့် နွားချေးများကိုကျုံး၍ စွန့်ပစ်ရာတွင် ၎င်းတာခြင်းတောင်းများအား အသုံးပြုကြရသောကြောင့် တာခြင်းတောင်း များ၏ ဈေးကွက်များမှာ တည်မြဲနေမည်ဖြစ်ပါကြောင်း လေ့လာသိရှိခဲ့မှုအား တင်ပြလိုက်ရပါသည်။
DOCA(ပဲခူး)