မြန်မာ့တစ်ဆယ့်နှစ်လရာသီတွင် ရာသီစာအစားအစာများရှိပါသည်။ မြန်မာလူမျိုးအများစုသည် ရာသီအလိုက်ပေါ်သောရာသီစာများအား နှစ်ခြိုက်စွာစားသုံးကြပါသည်။ ဥသျှစ်ရွက်များမှာ ယခုအချိန်အခါဖြစ်သော မတ်လမှ မေလအတွင်းပေါ်သည့် ရာသီစာဖြစ်ပါသည်။
တောင်ငူမြို့၊ ညောင်ပင်ဈေးတွင် ဥသျှစ်ရွက်များပေါ်နေပြီဖြစ်ပါသည်။ ဥသျှစ်ရွက်များကို တောင်ငူမြို့၏အနီးပတ်ဝန်းကျင်ရှိ ကျေးရွာများမှ လာရောက်ရောင်းချကြကြောင်း သိရှိရပါသည်။ ဥသျှစ်ရွက်များကို အပုံလေးများပုံကာ တစ်ပုံလျှင် ၃၀၀ကျပ်ဖြင့်ရောင်းချကြောင်း သိရှိရပါသည်။
မြန်မာလူမျိုးများသည် ဥသျှစ်ရွက်ကို အချဉ်ရည်ဟင်းချက်ရာတွင် ထည့်ချက်၍လည်းကောင်း၊ ငါးပိရည်နှင့်တွဲဖက်၍ အတို့အမြှုပ်အဖြစ်လည်းကောင်း နှစ်ခြိုက်စွာစားသုံးကြပါသည်။
ဥသျှစ်ရွက်ပေါင်းတိုက်ရည်ကို ကြွေဇွန်းငယ်တစ်ဇွန်းခန့်တိုက်ပေးလျှင် ကလေးများဝမ်းပျက်ရောဂါနှင့် ချွဲသလိပ်ကျပ်ရောဂါများလည်း ပျောက်ကင်းစေပါသည်။ ဥသျှစ်ရွက်ကိုအရည်ညှစ်၍ နံနက်၊ ညသောက်ပေးပါက ဖျားနာခြင်း၊ မျက်ရည်ပူယိုခြင်းနှင့် ချောင်းဆိုးခြင်းများကို ပျောက်ကင်းစေနိုင်ပါသည်။ ကလေးများသန်ထလျှင် ဥသျှစ်ရွက်ညှစ်ရည်ကို ကလေးအသက်အရွယ်အလိုက် ချင့်ချိန်၍တိုက်ပေးခြင်းဖြင့် ရောဂါသက်သာစေနိုင်ကြောင်း လေ့လာသိရှိခဲ့ရခြင်းအား တင်ပြလိုက်ပါသည်။
DOCA(ပဲခူး)