ရှမ်းပြည်နယ်(တောင်ပိုင်း) ပင်းတယမြို့နယ်တွင် စိုက်ပျိုးလျက်ရှိသော ဖယောင်းသစ်ခွ (ခ) ခိုင်ရွှေဝါပန်းများသည် တစ်နှစ်တွင်တစ်ကြိမ်သာ ဖူးပွင့်သည့်ရာသီပေါ်ပန်းဖြစ်ပြီး တန်ခူးလမှ စတင်ဖူးပွင့်ခဲ့ရာ ယခုအခါ၌ ဈေးကွက်အတွင်း တွင်တွင်ကျယ်ကျယ် ရောင်းချလျက်ရှိပါသည်။ ယင်းဖယောင်းသစ်ခွများသည် ဖူးငုံစမှ အပွင့်များပွင့်သည့်အထိ ရက်ရှည်အထားခံ ခိုင်ခံ့သောကြောင့် လူအများက ဘုရားပန်းအဖြစ် ကပ်လှူပူဇော်ကြသဖြင့် ဝယ်ယူအားမြင့်တက်လျက်ရှိပါသည်။ ထို့ အပြင် အပွင့်များကြွေပြီးနောက် သစ်ပင်၏ပင်ရင်းများတွင် အုန်းဆံဖတ်များဖြင့် ကပ်၍ချည်ကာ ပြန်စိုက်လျှင်လည်း နောက်တစ်နှစ်တွင် ပန်းများပြန်ပွင့်သည့်အထိ အကြမ်းခံသော သစ်ခွဖြစ်သောကြောင့် လူကြိုက်များသောပန်းဖြစ်သည်။
ဖယောင်းသစ်ခွများတွင် တစ်ဖူးထိုး၊ နှစ်ဖူးထိုးဟူ၍ ရှိပြီး နှစ်ဖူးထိုးသည် တစ်ဖူးထိုးထက်ပို၍ ဈေးနှုန်းမြင့်ပါသည်။ တစ်ဖူးထိုး အရှည် ဆယ်ပင်ပါတစ်စီးလျှင် ကျပ် (၂၅၀၀)မှ ကျပ်(၃၀၀၀) ခန့်လည်းကောင်း၊ နှစ်ဖူးထိုးအရှည် ဆယ်ပင်ပါ တစ်စီးလျှင် (၅၀၀၀)ကျပ်မှ (၈၀၀၀)ကျပ် အထိလည်းကောင်း ပေါက်ဈေးရှိနေပြီး ပင်းတယဒေသအတွင်းသာမက အောင်ပန်း၊ တောင်ကြီး၊ ရန်ကုန်နှင့် မန္တလေးသို့ အဓိကရောင်းချလျက်ရှိပြီး အခြားအနယ်နယ်အရပ်ရပ်သို့လည်း တင်ပို့ ရောင်းချနေကြလျက်ရှိကြောင်း သတင်းရရှိပါသည်။
DOCA(ရှမ်း)