ပြည်ပကုန်သွယ်မှုသတင်းများ

    ဗီယက်နမ်နိုင်ငံသည် ပြည်တွင်းကုန်ထုတ်လုပ်မှုနှင့် စားသုံးရန်လိုအပ်ချက်တို့အပေါ် ဖြည့် ဆည်းရန်အတွက် ပြည်ပမှဆန်များကို တင်သွင်းလျက်ရှိရာ ၂၀၂၄ ခုနှစ် ပထမ ၉ လအတွင်း တင်သွင်းမှုတန်ဖိုးမှာ ဒေါ်လာ ၉၉၆ သန်းရှိပြီး ယခင်နှစ် အလားတူကာလ၌ တင်သွင်းခဲ့မှုနှင့် နှိုင်း ယှဉ်ပါက ၅၇.၃ ရာခိုင်နှုန်း မြင့်တက်လာကြောင်း Vietnam News သတင်းဌာနက ဖော်ပြပါသည်။

   အဆိုပါတန်ဖိုးသည် ဗီယက်နမ်၏ ဆန်စပါးကဏ္ဍတွင် စံချိန်တင်မြင့်တက်မှုတစ်ရပ်ဖြစ်ပြီး ယခင် ၁ နှစ်လုံး၌ တင်သွင်းခဲ့သည့်တန်ဖိုး ဒေါ်လာသန်း ၈၆၀ ကို ကျော်လွန်ခဲ့သည်။ ဗီယက်နမ် အထွေထွေအကောက်ခွန်ဌာန၏ စာရင်းများအရ ယခုနှစ် စက်တင်ဘာလ၌ ဆန်တင်သွင်းမှုတန်ဖိုး မှာ ဒေါ်လာ ၁၁၇ သန်းရှိပြီး ယခင်နှစ် ကာလတူထက် ၁၅၄ ရာခိုင်နှုန်း မြင့်တက်ခဲ့ကြောင်း သိရှိ ရသည်။

    ရှေ့လာမည့် ၂ လတာ၌ လက်ရှိနှုန်းထားအတိုင်း ဆက်လက်တင်သွင်းပါက ကမ္ဘာ့ တတိယ အကြီးဆုံး ဆန်တင်ပို့သည့်နိုင်ငံဖြစ်သော ဗီယက်နမ်၏ ၂၀၂၄ ခုနှစ်အတွက် ဆန်တင်သွင်းမှု တန်ဖိုးသည် ဒေါ်လာ ၁.၃ ဘီလီယံခန့်အထိ ရောက်ရှိလာနိုင်ခြေရှိသည်။

    ဆန်တင်သွင်းမှု များပြားလာသည့် အခြေအနေနှင့် စပ်လျဉ်း၍ ကောက်ပဲသီးနှံထုတ်လုပ်မှု ဦးစီးဌာနမှ ညွှန်ကြားရေးမှူး Nguyễn Như Cường က ရှင်းလင်းပြောဆိုရာ၌ ချက်ပြုတ်စားသုံး သည့် ဆန်၊ ကိတ်မုန့်၊ ခေါက်ဆွဲခြောက်များနှင့် Phở ခေါ် ဗီယက်နမ်ရိုးရာ ဆန်ခေါက်ဆွဲလုပ်ငန်းများအတွက် ကုန်ကြမ်းအဖြစ် သုံးစွဲသည့်ဆန်များ အပါအဝင် ဆန်ထုတ်ကုန်များကို ကဏ္ဍခွဲ အမျိုးမျိုး သတ်မှတ်ထားကြောင်း၊ သို့ဖြစ်ရာ ဗီယက်နမ်အနေဖြင့် ဆန်ကို ပြည်ပသို့တင်ပို့မှုအပြင် မကြာသေးမီနှစ်များ၌ စားသောက်ကုန် ပြုပြင်ထုတ်လုပ်မှုလုပ်ငန်းများ၊ တိရစ္ဆာန်မွေးမြူရေးအစာနှင့် ဘေးထွက်ပစ္စည်း ထုတ်လုပ်မှုများတွင် ကုန်ကြမ်းပြတ်လပ်မှု မဖြစ်စေရေးအတွက် အိန္ဒိယကဲ့သို့သော အဓိကဆန်တင်ပို့သည့်နိုင်ငံများထံမှ ပြန်လည်တင်သွင်းခဲ့ရကြောင်း သိရှိရသည်။

   စပါးစိုက်ပျိုးမှုပုံစံ ပြောင်းလဲလာခြင်းသည် ပြည်ပမှ ဆန်တင်သွင်းမှု မြင့်တက်လာစေရန် တွန်းအားပေးသည့် အချက်ဖြစ်ကြောင်း၊ လယ်သမားများသည် ပြည်ပသို့တင်ပို့ရန်အတွက် အရည် အသွေး မြင့်မားသည့် ဆန်မွှေးများ စိုက်ပျိုးထုတ်လုပ်မှုကို အလေးပေးလုပ်ကိုင်လာကြကြောင်း၊ သို့သော် ပြည်တွင်း၌ ဆန်ခေါက်ဆွဲထုတ်လုပ်ရာတွင် စရိတ်စကသက်သာသည့် ဆန်ကြမ်းများကိုသာ လိုအပ်ချက်ရှိကြောင်း လုပ်ငန်းရှင်များက ပြောဆိုကြသည်။

   အကျိုးရလဒ်အားဖြင့် စီးပွားရေးလုပ်ငန်းများသည် ထုတ်လုပ်မှုကုန်ကျစရိတ်ကို လျှော့ချရန်အတွက် ဈေးနှုန်းသက်သာသောဆန်များ တင်သွင်းမှုကို ရွေးချယ်လုပ်ကိုင် လာကြခြင်းဖြစ် သည်။ ထို့အပြင် အချို့သော ပို့ကုန်လုပ်ငန်းရှင်များကလည်း နှစ်ကုန်ပိုင်းကာလအတွင်း အမှာစာများကို အပြည့်အဝ ဖြည့်ဆည်းပေးသွင်းနိုင်ရေးအတွက် ကမ္ဘောဒီးယားအပါအဝင် အိမ်နီးချင်းနိုင်ငံ များထံမှ ဆန်များကို ဝယ်ယူတင်သွင်းခဲ့ကြသည်။

    ဗီယက်နမ်စားသောက်ကုန်အသင်းမှ ကျွမ်းကျင်သူများက ဗီယက်နမ်နိုင်ငံအနေဖြင့် ၎င်း၏ ဆန်စပါးကဏ္ဍအား အရည်အသွေးမြင့် မျိုးကွဲများထုတ်လုပ်ရေးကို ဦးတည်သည့် အခြေခံစနစ်သို့ ပြောင်းလဲဖော်ဆောင်နေချိန်တွင် ပြည်တွင်း၌ အဆင့်နိမ့်ဆန်များ ဝယ်လိုအားမှာ မြင့်မားလာခဲ့ပြီး ကျိုးကြောင်းဆီလျော်သည့် ဆောင်ရွက်ချက်အဖြစ် ဆန်အရင်းအမြစ်အသစ်များ ရှာဖွေခြင်းကို ဖြစ်ပေါ်စေခဲ့သည်ဟု ပြောဆိုခဲ့ကြသည်။

    အတိတ်ကာလ၌ အမြောက်အမြားစိုက်ပျိုးထုတ်လုပ်ခဲ့သည့် ဗီယက်နမ်၏ IR50404 စပါး အမျိုးအစားနှင့် အလားသဏ္ဌာန်တူညီသော ဆန်စပါးမျိုးကို အိန္ဒိယနိုင်ငံတွင် ကျယ်ပြန့်စွာ စိုက်ပျိုး ထုတ်လုပ်လျက်ရှိရာ အထွက်နှုန်းကောင်းမွန်မှုနှင့် ဈေးနှုန်းသက်သာမှုရှိသည်။ တန်ဖိုးမြင့်ဆန်ကို ရောင်းချပြီး တန်ဖိုးနိမ့်သည့်ဆန်များအား ကုန်ထုတ်လုပ်ငန်းများ၌ အသုံးပြုခြင်းကို စီးပွားရေး တွက်ခြေကိုက်သည့် နည်းလမ်းအဖြစ် စဉ်းစားဆောင်ရွက်လျက်ရှိခြင်းဖြစ်သည်။

    လက်ရှိကာလတွင် ဗီယက်နမ်နိုင်ငံသည် ပြည်တွင်း၌ စိုက်ပျိုးထုတ်လုပ်သည့်ဆန်ထက် ဈေးနှုန်း ပိုမိုနိမ့်ကျမှုရှိသော ဆန်များကို မြန်မာ၊ ပါကစ္စတန်နှင့် ကမ္ဘောဒီးယားတို့ထံမှလည်း ရယူ တင်သွင်းလျက်ရှိသည်။ ၂၀၂၄ ခုနှစ် ပထမ ၉ လအတွင်း ပြည်ပသို့ ဗီယက်နမ်ဆန်တင်ပို့ရာတွင် ပျမ်းမျှဈေးနှုန်းသည် ၁ တန်လျှင် ၆၂၄ ဒေါ်လာခန့်ရှိပြီး ယခင်နှစ်ကာလတူ ပျမ်းမျှဈေးနှုန်းထက် ၁၃.၁ ရာခိုင်နှုန်း တိုးတက်ခဲ့ချိန်၌ ပြည်ပမှ တင်သွင်းသည့်ဆန်များ၏ ဈေးနှုန်းများမှာ ၁ တန်လျှင် ဒေါ်လာ ၄၈၀ မှ ၅၀၀ အတွင်းသာ ရှိခဲ့သည်။

      ပြုပြင်ထုတ်လုပ်မှုလုပ်ငန်းများအတွက် ဆန်တင်သွင်းခြင်းသည် ကုန်သွယ်ရေး လုပ်ကိုင် ဆောင်ရွက်မှုများ၏ သဘာဝကျသော အစိတ်အပိုင်းတစ်ရပ်ဖြစ်ကြောင်း၊ တင်သွင်းလာသည့်ဆန် များသည် အဆင့်နိမ့်ဆန်များသုံးစွဲရသည့် လုပ်ငန်းကဏ္ဍ၌ လိုအပ်ချက်အပေါ် ဖြည့်ဆည်းနိုင်သည့်အပြင် ထုတ်လုပ်မှုစရိတ်ကိုလည်း လျော့ကျစေသဖြင့် ကုမ္ပဏီများအတွက် အကျိုးအမြတ်ရရှိမှုကို သေချာခိုင်မာစေကြောင်း၊ ထိုကဲ့သို့ ဆန်တင်သွင်းမှုသည် ပြည်တွင်း ဆန်စပါးစိုက်ပျိုးထုတ်လုပ်မှုအပေါ် ထိခိုက်မှုမရှိပဲ ဈေးနှုန်းတည်ငြိမ်မှုနှင့် ဗီယက်နမ်၏ ဆန်စပါးလုပ်ငန်းလည်ပတ်မှုတို့ကို အထောက်အကူပြုလျက်ရှိကြောင်း လုပ်ငန်းရှင်များက ပြောဆိုကြသည်။

   သို့ရာတွင် ဗီယက်နမ်ဆန်နှင့် အိန္ဒိယဆန်တို့ကို ခွဲခြားသိရှိနိုင်ရန်မှာ ခက်ခဲမှုရှိသည်ဟု ဆန်တင်သွင်းသည့် ကုမ္ပဏီတစ်ခုမှ ကိုယ်စားလှယ်တစ်ဦးက ပြောကြားခဲ့သည်။ အိန္ဒိယဆန် အမြောက်အမြားကို ဗီယက်နမ်က တင်သွင်းနေခြင်းသည် နိုင်ငံခြားဝယ်လက်များအနေဖြင့် တန်ဖိုး အရ အဆိုပြုချက်အပေါ် မေးခွန်းထုတ်ဖွယ်ရာရှိပြီး ဗီယက်နမ်ဆန်အစား ဈေးနှုန်းသက်သာသည့် အိန္ဒိယဆန်များကို ရွေးချယ်ရန် စဉ်းစားမှုသို့ ဦးတည်စေလျက်ရှိကြောင်း၊ ဗီယက်နမ်နိုင်ငံအနေဖြင့် ဆန်တင်သွင်းမှုအပေါ် အနီးကပ် စောင့်ကြည့်ကြပ်မတ်မည့် ဥပဒေပိုင်းဆိုင်ရာနည်းလမ်းရပ်များကို ချမှတ်လျက် အထူးသဖြင့် ပင်ရင်းဒေသနှင့် ဆန်ရယူသည့် အရင်းအမြစ်တို့ကို စိစစ်ဆောင်ရွက်သင့်ကြောင်း Vietnam News သတင်းဌာနက ဖော်ပြထားသည်။

Source: Vietnam News, 5 Oct 2024(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

      တရုတ်လျှပ်စစ်ကား ကုမ္ပဏီကြီး BYD သည် ၎င်း၏ ၁၂ မီတာ K9UD လျှပ်စစ်ဘတ်စ်ကားအစီးရေ ၁၀၀ ကို ဥရုဂွေးနိုင်ငံ၏ အကြီးဆုံးအများပြည်သူသယ်ယူပို့ဆောင်ရေးအော်ပရေတာသို့ စက်တင်ဘာ ၁၉ ရက်နေ့က စတင်ပို့ဆောင်ခဲ့သည်။ BYD ကုမ္ပဏီသည် လက်တင်အမေရိက သယ်ယူပို့ဆောင်ရေးဈေးကွက်တွင် ၎င်း၏တည်ရှိမှုကို ချဲ့ထွင်ထားသည်ဖြစ်ရာကုန်ပို့ဆောင်မှုသည် BYD ကုမ္ပဏီအတွက် နောက်ထပ်ရောင်းချမှုတစ်ခုပင်ဖြစ်သည်။ BYD ၏ တရားဝင်သတင်းထုတ်ပြန်ချက်တွင် K9UD ၏ အသေးစိတ်အချက်အလက်များကို မဖော်ပြထား သောကြောင့်  ၎င်းသည်ဥရောပဗာရှင်းဖြစ်သော 12 m spec တွင် ၁၉.၅ တန် GVWR ပါရှိပြီး လူ ၈၅ ဦးဆံ့ကာ ၎င်း၏ ၄၂၂ kWh Lithium-ion phosphate battery သည် ၄၅၀ ကီလိုမီတာ (မိုင် ၂၈၀ ခန့် ) အကွာဝေးထိမောင်းနှင်နိုင်မည်ဖြစ်သည်။ လျှပ်စစ်ဘတ်စ်ကားကြီးများအတွက် စွမ်းအား ၁၅၀ kW in-Wheel လျှပ်စစ်မော်တာမှရရှိပြီး စုစုပေါင်းမြင်းကောင်ရေ ၄၀၀ ခန့် အထိတိုးမြှင့်ပေးမည်ဖြစ်သည်။ တစ်နည်းဆိုသော် ဘတ်စ်ကားများကို မောင်းနှင်ရန်နှင့် ယာဉ်ကြောများစီဆင်းနေစေရန်လုံလောက်သောစွမ်းအင်ပမာဏပင်ဖြစ်သည်။ ဥရုဂွေးနိုင်ငံသည် သယ်ယူပို့ဆောင်ရေးလုပ်ငန်းများတွင် ကာဗွန်ဒိုင်အောက်ဆိုဒ်ထုတ်လွှတ်မှုကို လျော့ချနိုင်အောင်ဆောင်ရွက်နေစဉ်တွင် ဘရာဇီး၊ ချီလီ၊ ကိုလံဘီယာ၊ အီကွေဒေါနိုင်ငံတို့နှင့်အတူ BYD ၏ ဖောက်သည်နိုင်ငံဖြစ်လာခဲ့ကြောင်းသိရှိရပါသည်။

Source: electrek

 DOCA(ရန်ကုန်)       

          အယ်ဂျီးရီးယားနှင့် တူနီးရှားဆိုင်ရာ ဗီယက်နမ်ကုန်သွယ်ရေးရုံးနှင့် တူနီးရှားနိုင်ငံစက်မှု ကုန်သွယ်ရေးနှင့် လက်မှုပစ္စည်းများအသင်းတို့သည် စီးပွားရေးလုပ်ငန်းအချင်းချင်းချိတ်ဆက်နိုင်ရန်အတွက် ဆွေးနွေးပွဲပြုလုပ်ခဲ့ကြောင်းသိရပါသည်။ ထိုပွဲကို နှစ်နိုင်ငံဝန်ကြီးဌာနများ၊ ကဏ္ဍများနှင့် စီးပွားရေးလုပ်ငန်း ၆၀ မှ တာဝန်ရှိသူများ တက်ရောက်ခဲ့ကြောင်းသိရပါသည်။ ထိုဆွေးနွေးပွဲသည် ကုန်သွယ်ရေးရုံးမှကိုယ်စားလှယ်အဖွဲ့၏ စက်တင်ဘာလ ၃၀ ရက်နေ့မှ အောက်တိုဘာလ ၄ ရက်နေ့အထိ အလုပ်သဘောအလည်အပတ်ခရီးစဉ်၏ ဆောင်ရွက်မှုများထဲမှ တစ်ခုဖြစ်ကြောင်းသိရပါသည်။ ဆွေးနွေးပွဲတွင် တူနီးရှားနိုင်ငံအထည်အလိပ်နှင့် အထည်အဖွဲ့ချုပ်၏ အတွင်းရေးမှူးချုပ်ဖြစ်သူ Noha Dallagi က တူနီးရှားနိုင်ငံသည် အာဖရိက-အာရပ်ဒေသတွင် အရှိန်အဟုန်ဖြင့် ယှဉ်ပြိုင်နိုင်စွမ်းရှိသော စီးပွားရေးများထဲမှတစ်ခုဖြစ်ပြီး နိုင်ငံတကာအသိုင်းအဝိုင်းနှင့်လည်း နက်ရှိုင်းစွာပူးပေါင်းဆောင်ရွက်လျက်ရှိကြောင်းပြောကြားခဲ့ပါသည်။ တူနီးရှားသည် လွတ်လပ်သောကုန်သွယ်ရေးသဘောတူညီချက် ၈ခုတွင် ဝင်ရောက်ထားသည့်အတွက် ဗီယက်နမ်အပါအဝင် နိုင်ငံများမှကုန်ပစ္စည်းများ အာဖရိကနှင့် အာရပ်ဈေးကွက်များသို့ ထိုးဖောက်ဝင်ရောက်ရန် ဂိတ်တံခါးတစ်ခုအဖြစ် ယူဆရကြောင်းသိရပါသည်။ နှစ်စဉ်နှစ်တိုင်း၊ ဆန်၊ သကြား၊ ကော်ဖီနှင့် Green Tea အစရှိသည့် ကုန်ပစ္စည်းများနှင့် ကော်ဖီအကြမ်းထည် တန် ၃၀၀၀၀ နှင့် ဆန်တန်ချိန် ၃၀၀၀၀ တင်သွင်းလျက်ရှိကြောင်းသိရပါသည်။ Noha က ဗီယက်နမ်စီးပွားရေးလုပ်ငန်းများအား ပြုပြင်ထုတ်လုပ်ခြင်း၊ နည်းပညာသစ်နှင့် ငါးမွေးမြူရေးအစရှိသည့် ဧရိယာများတွင် တူနီးရှားလုပ်ငန်းများနှင့် မိတ်ဖက်ပြုလုပ်ကြရန် တောင်းဆိုခဲ့ကြောင်းသိရပါသည်။ အယ်ဂျီးရီးယားနှင့် တူနီးရှားဆိုင်ရာ ဗီယက်နမ်ကုန်သွယ်ရေးအတိုင်ပင်ခံပုဂ္ဂိုလ်ဖြစ်သူ Hoang Duc Nhuan က ဗီယက်နမ်၏စီးပွားရေးနှင့်ကုန်သွယ်ရေးအခြေအနေတွင်ပါဝင်သူများ၊ ပို့ကုန်-သွင်းကုန်မူဝါဒများနှင့် ဗီယက်နမ်-တူနီးရှားဆက်ဆံရေး အခြေအနေများကို အကျဉ်းချုပ်ပြောကြား ခဲ့ကြောင်းသိရပါသည်။ ဗီယက်နမ်သည် တူနီးရှားသို့ ကော်ဖီအကြမ်းထည်၊ ငရုတ်ကောင်း၊ သီဟိုဠ်စေ့များ၊ ပင်လယ်စာ၊ စက်ယန္တရားများနှင့် တပ်ဆင်ပစ္စည်းများ၊ အထည်များနှင့် ဖိနပ်အစရှိသည့် ကုန်ပစ္စည်းများတင်ပို့ပြီး ပင်လယ်စာ၊ စွံပလွံသီးများ၊ ဓါတုပစ္စည်းများ၊ ပလတ်စတစ်ထုတ်ကုန်များ၊ အဝတ်အထည်နှင့် တိရိစ္ဆာန်အစာ ထုတ်လုပ်ရန်အတွက် ကုန်ကြမ်းပစ္စည်းများ ပြန်လည်တင်သွင်းကြောင်းသိရှိရပါသည်။

Source : VietnamPlus

 DOCA(ရန်ကုန်)

       ဗီယက်နမ်နိုင်ငံ၏ ရေထွက်ကုန်တင်ပို့မှုသည် ယခုနှစ် ပထမ ၉ လအတွင်း ကန်ဒေါ်လာ ၇.၁၆ ဘီလီယံအထိရောက်ရှိခဲ့ပြီး တစ်နှစ်ထက်တစ်နှစ် ၈.၅% တိုးလာကြောင်း ဗီယက်နမ် ပင်လယ်စာတင်ပို့ရောင်းချသူများနှင့် ထုတ်လုပ်သူများအသင်း(VASEP) မှ သတင်းထုတ်ပြန်ချက်အရသိရသည်။ စက်တင်ဘာလတွင် ဗီယက်နမ်နိုင်ငံသည် ရေထွက်ကုန်တင်ပို့မှုမှ အမေရိကန် ဒေါ်လာ ၈၆၆ သန်းရရှိခဲ့သည်။ ပုဇွန်သည် ပထမ ၉ လအတွင်း အမေရိကန်ဒေါ်လာ ၂.၈ ဘီလီယံခန့်ဖြင့် အမြင့်ဆုံးနိုင်ငံခြားငွေရရှိသော ရေထွက်ကုန်ပစ္စည်းအဖြစ် ဆက်လက်ရပ်တည်နေပြီး ၁၀.၅% တိုးလာခဲ့သည်။ အေးခဲပုဇွန်တင်ပို့မှုသည် အီကွေဒေါ၊ အိန္ဒိယတို့၏ ပြိုင်ဆိုင်မှုများဖြင့်ရင်ဆိုင်နေရသော်လည်း ပြုပြင်ထားသောပုဇွန်များသည် ခိုင်မာသောဈေးကွက်အနေအထား တစ်ရပ်ပိုင်ဆိုင်နေပြီဖြစ်ကြောင်းသိရသည်။ ပြည်ပသို့ ပြုပြင်ပြီးခြေထောက်ဖြူပုဇွန်များတင်ပို့မှုမှာ ၁၀% နီးပါးတိုးလာပြီး အေးခဲထားသော ခြေထောက်ဖြူပုဇွန်တင်ပို့မှုမှာ ၄.၅% မြင့်တက်လာခဲ့သည်။ ဗီယက်နမ်ငါးခူ အမျိုးအစားတွင်ပါဝင်သော ထရာငါးများတင်ပို့မှုသည် ဇန်နဝါရီမှ စက်တင်ဘာလအတွင်း အမေရိကန်ဒေါ်လာ ၁.၄၆ ဘီလီယံ ရရှိခဲ့ပြီး ပြုပြင်ထားသောထုတ်ကုန်များမှာလည်း ၄၂% တိုးလာခဲ့သည်။ ကုန်ကြမ်းပြတ်လပ်မှုကြောင့် ဩဂုတ်လကတည်းက တူနာငါး တင်ပို့မှုနှေးကွေးခဲ့သော်လည်း ကိုးလအတွင်း ဒေါ်လာ ၇၁၅ သန်းအထိ ၁၆% တိုးလာခဲ့သည်။ ဂဏန်းတင်ပို့မှုသည်တတိယသုံးလပတ်တွင် ၅၆%နှင့် အဓိကအားဖြင့် တရုတ်နိုင်ငံ၏ဝယ်လိုအားကြောင့် ၉လတာကာလအတွင်း ဂဏန်းတင်ပို့မှုမှာ ၆၆% အထိ သိသာသောတိုးတက်မှုကို မြင်တွေ့ခဲ့ရသည်။ VASEP ၏ ခန့်မှန်းချက်အရ ၂၀၂၄ ခုနှစ်အတွက် ရေထွက်ကုန်တင်ပို့မှု စုစုပေါင်းတန်ဖိုးသည် ၉.၅ ဘီလီယံအထိရှိလာမည်ဖြစ်ပြီး ၂၀၂၃ ခုနှစ်ထက် ၇% တိုးလာမည်ဟု ခန့်မှန်းထားကြသည်။ ပုဇွန်တင်ပို့မှုသည် ကန်ဒေါ်လာ ၄ ဘီလီယံနီးပါး ထရောငါးတင်ပို့မှုသည် ကန်ဒေါ်လာ ၂ ဘီလီယံ၊ တူနာတင်ပို့မှုမှ ကန်ဒေါ်လာ ၁ ဘီလီယံနီးပါး၊ ပြည်ကြီးငါးများနှင့် ရေဘဝဲများတင်ပို့မှုမှ ကန်ဒေါ်လာ သန်း ၆၄၀ ရောက်ရှိမည်ဟု ခန့်မှန်းထားကြောင်းသိရသည်။

Source : vnexpress

DOCA(ရန်)

       အင်ဒိုနီးရှားနိုင်ငံတော်ဖွံ့ဖြိုးတိုးတက်မှုစီမံကိန်းအေဂျင်စီ၏ ဘဏ္ဍာရေးဝန်ဆောင်မှုနှင့် နိုင်ငံတော်ပိုင်လုပ်ငန်းများ၏ ညွှန်ကြားရေးမှူးဖြစ်သူ Rosy Widyawati က တစ်ကမ္ဘာလုံးအဆင့် ဟာလာထုတ်ကုန်များစားသုံးမှုသည် ၂၀၂၇ခုနှစ်တွင် အမေရိကန်ဒေါ်လာ ၃.၁ ထရီလီယံသို့ရောက်ရှိရန် ခန့်မှန်းရကြောင်း ၂-၁၀-၂၀၂၄ ရက်နေ့တွင် ပြောကြားခဲ့ပါသည်။ Widyawati က မူစလင်များသည် အစားအစာနှင့် ဖျော်ရည်၊ ဟာလာဖက်ရှင်နှင့် ဟာလာအလှကုန် အစရှိသည့် ရှရီအပ်(အစ္စလာမ်ဥပဒေ)ထုတ်ကုန်များအပေါ် ငွေကြေးသုံးစွဲမှုသည် အလွန်အလားအလာကောင်းလျက်ရှိပြီး ၂၀၂၇ခုနှစ်တွင် ခန့်မှန်းတန်ဖိုး အမေရိကန်ဒေါ်လာ ၃.၁ ထရီလီယံထိရောက်ရှိနိုင်ကြောင်းပြောကြားခဲ့ပါသည်။ ထို့ပြင် Acceleration Towards Golden Indonesia 2024 ခေါင်းစဉ်ဖြင့် You Tube တွင် Live ထုတ်လွှင့်စဉ်ကလည်း Widyawati က အစိုးရသည် Indonesia Sharia Economic Masterplan (MEKSI) 2025-2029 အရ ရှရီအပ် စီးပွားရေးအလားအလာနှင့်ပတ်သက်၍ အကောင်းဆုံးနည်းလမ်းများကိုရှာဖွေနေကြောင်းပြောကြားခဲ့ပါသည်။ Widyawati ၏အဆိုအရ ရှရီအပ်စီးပွားရေးဖွံ့ဖြိုးတိုးတက်ရေးသည် နိုင်ငံတော်စီးပွားရေးပျမ်းမျှကြီးထွားနှုန်းကို ၆ရာခိုင်နှုန်းမှ ၇ရာခိုင်နှုန်းဖြင့် ဖွံ့ဖြိုးတိုးတက်သောနိုင်ငံဖြစ်လာစေရန်အတွက် စီးပွားရေးအင်ဂျင်သစ်တစ်ခုအနေဖြင့် အရေးကြီးကြောင်းသိရပါသည်။ ထိုရည်မှန်းချက်အောင်မြင်စေရန်အတွက် ကမ္ဘာ့အကြီးမားဆုံး မူစလင်နိုင်ငံဖြစ်သည့် အင်ဒိုနီးရှားအတွက် စားသုံးသူအနေသာမက ထုတ်လုပ်သူဖြစ်လာရန် လိုအပ်ကြောင်းသိရပါသည်။ ကမ္ဘာ့အကြီးမားဆုံး ဟာလာထုတ်ကုန်တင်ပို့သည့်နိုင်ငံများမှာ မူစလင်အများဆုံး အဓိကနေထိုင်သည့် နိုင်ငံများမဟုတ်သည့် ဘရာဇီး၊ တရုတ်နှင့် အိန္ဒိယနိုင်ငံတို့ဖြစ်ကြောင်းသိရပါသည်။ MEKSI 2025-2029 အတွက် ပြင်ဆင်ခြင်းအပြင် အင်ဒိုနီးရှားအစိုးရသည် ၂၀၂၄ခုနှစ်၊ ဥပဒေနံပါတ် ၅၉ တွင် ပြဋ္ဌာန်းချက်အရ ရှရီအပ်စီးပွားရေးဖွံ့ဖြိုးတိုးတက်စေရန် ဆောင်ရွက်လျက်ရှိကြောင်းပြောကြားခဲ့ပါသည်။ ရှရီအပ်စီးပွားရေးဖွံ့ဖြိုးတိုးတက်ရေးသည် ဟာလာလုပ်ငန်းနယ်ပယ်နှင့် တင်ပို့မှုတန်ဖိုးမြှင့်တင်ရန် MSMEs များအားကောင်းစေရေးတို့ပါဝင်သည့် ကဏ္ဍ၏တိုးတက်မှုအရှိန်မြှင့်တင်ရန် သီးခြား ပရိုဂရမ်တစ်ခုဖြစ်ကြောင်းသိရပါသည်။ Widyawati က မွတ်စလင်ခရီးသွားဝန်ဆောင်မှုနှင့် အခြေခံအဆောက်အအုံတိုးတက်ခြင်းအားဖြင့် မွတ်စလင်ခရီးသွားအရေအတွက်အရှိန်မြှင့်တင်ပေးမည့် ပရိုဂရမ်ဖွံ့ဖြိုးတိုးတက်ရေးသည် အရေးပါသည်ဟုယူဆရကြောင်းနှင့် ၎င်းတို့ပိုင်ဆိုင်ထားသော ဖက်ရှင်ကဏ္ဍသည်လည်း များစွာပါဝင်ပတ်သက်မှုပေးနိုင်ကြောင်းပြောကြားခဲ့ပါသည်။

Source : Antara News

DOCA(ရန်ကုန်)