ပြည်ပကုန်သွယ်မှုသတင်းများ

       ဗီယက်နမ်နိုင်ငံသည် ၂၀၂၄ခုနှစ်ကုန်အထိ ခန့်မှန်းချက်များအရ နိုင်ငံခြားတိုက်ရိုက်ရင်းနှီးမြှုပ်နှံမှု (FDI) တွင် အမေရိကန်ဒေါ်လာ ၃၉မှ ၄၀ဘီလီယံအထိ ဆွဲဆောင်နိုင်မည်ဟု မျှော်လင့်ထားသည်။ စီမံကိန်းနှင့် ရင်းနှီးမြှုပ်နှံမှုဝန်ကြီးဌာနအောက်ရှိ နိုင်ငံခြားရင်းနှီးမြှုပ်နှံမှုအေဂျင်စီ (FIA) က ယခုနှစ် ပထမကိုးလအတွင်း စုစုပေါင်းမှတ်ပုံတင်ထားသော နိုင်ငံခြားရင်းနှီးမြှုပ်နှံမှုမတည်ငွေမှာ အမေရိကန်ဒေါ်လာ ၂၄.၇၈ ဘီလီယံကျော်ရှိပြီး ၂၀၂၃ခုနှစ်၏ ကိုးလတာကာလထက် ၁၁.၆% တိုးလာကြောင်းသိရသည်။ စက်တင်ဘာလတစ်လတည်းတွင်ပင် BacNinh၊ Binh Duong နှင့် Dong Nai ပြည်နယ်များသည် ၎င်းတို့၏ ဖွံ့ဖြိုးတိုးတက်ရေးစီမံကိန်းကိုကြေညာခဲ့ပြီး ရင်းနှီးမြှုပ်နှံမှုမြှင့်တင်ရေးလုပ်ငန်းများလုပ်ဆောင်ခဲ့သည်။ ထိုအခမ်းအနားများတွင် ပရောဂျက်များစွာအား ရင်းနှီးမြှုပ်နှံမှုအသစ်များနှင့် တိုးချဲ့ရင်းနှီးမြှုပ်မှုလက်မှတ်များပေးအပ်ခဲ့သည်။ ထို့ကြောင့် စုစုပေါင်းမှတ်ပုံတင်ထားသော ရင်းနှီးမြှုပ်နှံမှုမတည်ငွေ သို့မဟုတ် အပိုရင်းနှီးမြှုပ်နှံမှုတို့သည် နှစ်စကတည်းက အမြင့်ဆုံးအဆင့်သို့ရောက်ရှိခဲ့သည်။ FIA ၏အဆိုအရ ၂၀၂၄ခုနှစ်၊ စက်တင်ဘာလတွင် Amkor, Luxcase နှင့် Advance Tyre Vietnam Ltd Co ၏ အဓိကပရောဂျက်သုံးခုသည် ရင်းနှီးမြှုပ်နှံမှုမတည်ငွေရင်းကိုပြောင်းလဲခဲ့ပြီး ကိုးလတာကာလအတွင်း နောက်ထပ်ရင်းနှီးမြှုပ်နှံမှုမတည်ငွေ ကန်ဒေါ်လာ ၇.၆၄ ဘီလီယံအထိရရှိခဲ့ကာ ၂၀၂၃ခုနှစ်ထက် ၄၈.၁% တိုးတက်ခဲ့သည်။ FIA ၏အဆိုအရ ၂၀၂၄ခုနှစ် ကိုးလတာကာလအတွင်း တစ်ပိုင်းလျှပ်ကူးပစ္စည်း၊ စွမ်းအင် (ဘတ်ထရီ၊ ဓာတ်အားလျှပ်စစ်ဆဲလ်များ၊ ဆီလီကွန်ဘားများထုတ်လုပ်ခြင်း)၊ အစိတ်အပိုင်းများ၊ အီလက်ထရောနစ်ထုတ်ကုန်များနှင့် အပိုတန်ဖိုးမြင့်မားသော ထုတ်ကုန်များထုတ်လုပ်သည့် နယ်ပယ်များတွင် ထပ်လောင်းရင်းနှီးမြှုပ်နှံမှုများရရှိခဲ့သည်။ နည်းပညာကော်ပိုရေးရှင်းများစွာသည်လည်း ဗီယက်နမ်တွင် ရင်းနှီးမြှုပ်နှံရန် စိတ်ဝင်စားမှုကိုပြသနေကြသည်။ Innovate Vietnam 2024 တွင် NVIDIA, Qualcomm, Intel, AMD, Samsung နှင့် Meta ကဲ့သို့သော ကမ္ဘာ့ထိပ်တန်းနည်းပညာကော်ပိုရေးရှင်းကြီးများက ၎င်းတို့၏တည်ရှိမှုကို လူသိများစေခဲ့သည်။ အခမ်းအနားတွင် ကော်ပိုရေးရှင်းခေါင်းဆောင်များသည် ဆီမီးကွန်ဒတ်တာများ၊ ဉာဏ်ရည်တု (AI) နှင့် ဆန်းသစ်တီထွင်မှုနယ်ပယ်များတွင် ရင်းနှီးမြှုပ်နှံမှုနှင့် ပံ့ပိုးကူညီရန် ကတိပြုခဲ့ကြသည်။ NVIDIA ကော်ပိုရေးရှင်း၏ ဒုတိယဥက္ကဋ္ဌ Raymond The က NVIDIA သည် ဗီယက်နမ်နိုင်ငံ၏ စက်မှုလုပ်ငန်းများတွင် ဆန်းသစ်တီထွင်မှုကို အရှိန်မြှင့်ကူညီပေးမည် ဖြစ်ကြောင်းပြောကြားခဲ့သည်။ Meta Group ၏ ကမ္ဘာလုံးဆိုင်ရာရေးရာဥက္ကဋ္ဌ Nick Clegg မှ Meta သည် ၂၀၂၅ခုနှစ်တွင် ဗီယက်နမ်၌ ၎င်း၏နောက်ဆုံးပေါ် ရောနှောထားသော Reality Headset ဖြစ်သော Quest 3s ကိုထုတ်လုပ်သွားမည်ဖြစ်ပြီး အလုပ်အကိုင်ပေါင်း ၁၀၀၀ကိုဖန်တီးပေးမည်ဖြစ်ကြောင်းပြောကြားခဲ့သည်။ ဗီယက်နမ်၏ ကာလရှည်ရင်းနှီးမြှုပ်နှံသူ Samsung Group သည် မြောက်ပိုင်း Bac Ninh ပြည်နယ်ရှိ LED ဖန်သားပြင်စက်ရုံတွင် နောက်ထပ် ဒေါ်လာ ၁.၈ ဘီလီယံရင်းနှီးမြှုပ်နှံရန် စီစဉ်ထားကြောင်းသိရသည်။

Source : vnexpress 

DOCA(ရန်ကုန်) 

        ကမ္ဘောဒီးယားနိုင်ငံသို့ နှစ်စဉ် တရုတ်ခရီးသွားအနည်းဆုံး တစ်သန်းကို လာရောက်လည်ပတ်ရန် တရုတ်ကုမ္ပဏီ ၂၂ခုကျော်က ကတိကဝတ်ပြုခဲ့ကြပြီး လာမည့်နှစ်များတွင်လည်း ထပ်မံတိုးချဲ့သွားရန် အစီအစဉ်ရှိကြောင်း ခရီသွားလာရေးဝန်ကြီး Huot Hak ကပြောကြားခဲ့သည်။ တရုတ်နိုင်ငံ Henan ပြည်နယ်၊ Zhengzhou မြို့၌ အောက်တိုဘာလ ၁၈ရက်နေ့မှ ၂၀ရက်နေ့အထိကျင်းပပြုလုပ်ခဲ့သော 13^th China Zhengzhou International Shaolin Wushu Festival တွင်ပါဝင်ဆင်နွှဲပြီးနောက် သတင်းစာရှင်းလင်းပွဲတွင် ၎င်းကပြောကြားခဲ့ခြင်း ဖြစ်သည်။ ထိုသတင်းစာရှင်းလင်းပွဲတွင် Huot Hak သည် Zhengzhou နှင့် Henan ရှိ အဓိကခရီးသွားကုမ္ပဏီ ၂၂ခုမှ လုပ်ငန်းဆိုင်ရာကိုယ်စားလှယ်များနှင့်တွေ့ဆုံခဲ့ပြီး ခရီးစဉ် Package များအားစီစဉ်ပေးခြင်း၊ အပန်းဖြေစခန်းများဆောက်လုပ်ခြင်း၊ အဆင့်မြင့်ဟိုတယ်များတည်ဆောက်ခြင်းနှင့် ဧည့်လမ်းညွှန်များထောက်ပံ့ခြင်းတို့ပါဝင်ခဲ့သည်။ တရုတ်မီဒီယာ၊ ရုပ်မြင်သံကြား၊ ရေဒီယို၊ ဟီနန်ခရီးသွားလုပ်ငန်းအသင်းနှင့် ဆက်စပ်ကဏ္ဍများမှ သက်ဆိုင်သူများနှင့်လည်းတွေ့ဆုံဆွေးနွေးခဲ့ကြသည်။ အစည်းအဝေးတွင် ကမ္ဘောဒီးယားနိုင်ငံရှိ ခရီးသွားလာရေးအလားအလာများ၊ တော်ဝင်အစိုးရ၏ မူဝါဒများအောက်တွင်ရရှိနိုင်သော ရင်းနှီးမြှုပ်နှံမှုအခွင့်အလမ်းများကိုဆွေးနွေးခဲ့ကြသည်။  ကမ္ဘောဒီးယားနှင့် တရုတ်နိုင်ငံတို့သည် နီးကပ်သောဆက်ဆံရေးကြောင့် ကဏ္ဍအားလုံးတွင် ချစ်ကြည်ရင်းနှီးမှုနှင့် ပူးပေါင်းဆောင်ရွက်မှုအသစ်များကို မြှင့်တင်ပေးကြောင်း ထပ်မံပြောကြားခဲ့သည်။  နှစ်နိုင်ငံကြားရေရှည်ဆက်ဆံရေးကိုမြှင့်တင်ရန်အတွက် ခေါင်းစဉ်အသစ်များချမှတ်ရန် နှစ်ဖက်လုံးကသဘောတူညီကြောင်းနှင့် ကနဦးအဆင့်တွင် ကမ္ဘောဒီးယားသို့ နှစ်စဉ် တရုတ်ခရီးသွားတစ်သန်းလာရောက်လည်ပတ်စေရန် ကတိပြုခဲ့ကြသည်။

Source : Khmer Time

DOCA(ရန်ကုန်)

ကမ္ဘောဒီးယားနိုင်ငံနှင့် ဒေသတွင်းစီးပွားရေးပူးပေါင်းဆောင်ရွက်မှု (Regional Comprehensive Economic Partnership) (RCEP) ကုန်သွယ်မှုသည် ၂၀၂၄ခုနှစ်အတွင်း အမေရိကန်ဒေါ်လာ ၂၅.၅၄ ဘီလီယံအထိရှိခဲ့ပြီး ၂၀၂၃ခုနှစ်ထက် ၁၇.၁ ရာခိုင်နှုန်းတိုးလာကြောင်းသိရသည်။ RCEP အဖွဲ့ဝင်များနှင့် နိုင်ငံတော်ကုန်သွယ်မှုပမာဏသည် စုစုပေါင်းကုန်သွယ်မှု၏ ၆၁.၆ ရာခိုင်နှုန်းရှိကြောင်း အကောက်ခွန်ဦးစီးဌာန၏ အစီရင်ခံစာတွင်ဖော်ပြထားသည်။ ကမ္ဘောဒီးယားနိုင်ငံသည် RCEP နိုင်ငံများသို့ ကုန်ပစ္စည်းဒေါ်လာ ၆.၇၆ ဘီလီယံတင်ပို့ခဲ့ပြီး RCEP နိုင်ငံများမှ သွင်းကုန်တန်ဖိုး အမေရိကန်ဒေါ်လာ ၁၈.၇၈ ဘီလီယံတန်ဖိုးရှိကြောင်းသိရသည်။ RCEP တွင် အာဆီယံအဖွဲ့ဝင် ၁၀နိုင်ငံနှင့် ၎င်းတို့၏ကုန်သွယ်ဖက်နိုင်ငံများဖြစ်သည့် တရုတ်၊ ဂျပန်၊ တောင်ကိုရီးယား၊ ဩစတေးလျနှင့် နယူးဇီလန်နိုင်ငံတို့အပါအဝင် အာရှ-ပစိဖိတ်ဒေသရှိ နိုင်ငံပေါင်း ၁၅နိုင်ငံပါဝင်သည်။ ကမ္ဘောဒီးယားနိုင်ငံ စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၏ ပြောရေးဆိုခွင့်ရှိသူ Penn Sovicheat က RCEP သည် ကမ္ဘောဒီးယား၏ ကုန်သွယ်မှုတိုးတက်စေရေးအတွက် အထောက်အကူဖြစ်ပြီး နိုင်ငံတော်၏ နိုင်ငံခြားရင်းနှီးမြှုပ်နှံမှုများအတွက် အားထားရာဖြစ်ကြောင်းပြောကြားခဲ့သည်။ RCEP ၏သဘောတူညီချက်အရ အကောက်ခွန်ကင်းလွတ်ခွင့်ပေးခြင်းအားဖြင့် ကမ္ဘောဒီးယား၏ RCEP နိုင်ငံများသို့တင်ပို့မှုသည် ၂၀၂၄ခုနှစ်ထက်ကျော်လွန်နိုင်မည်ဟု ထပ်လောင်းပြောကြားခဲ့သည်။ Asean +3 Macroeconomic Research Office (AMRO) မှ စီးပွားရေးလုပ်ငန်းရှင် Hoe Ee Khor က အခွန်နှင့်အခွန်ကင်းလွတ်ခွင့်လျှေ့ချခြင်းသည် ကမ္ဘောဒီးယားကုန်ပစ္စည်းများကို ကြီးမားသောဈေးကွက်သို့ ဝင်ရောက်ရန်ပိုမိုလွယ်ကူစေသည်ဟုဆိုခဲ့သည်။ ကမ္ဘောဒီးယားနိုင်ငံ၏ အဓိကပို့ကုန်/ ထုတ်ကုန်များဖြစ်သည့် အထည်ချုပ်နှင့် စိုက်ပျိုးရေးထွက်ကုန်များသည် RCEP အောက်တွင် အကောက်ခွန်လျှေ့ချမှုကြောင့် ဈေးကွက်ဝင်ရောက်မှုနှင့်အပြိုင် ဈေးနှုန်းများတိုးလာခြင်းမှ အကျိုးအမြတ်များစွာရရှိခဲ့သည်ဟုသိရသည်။
Source: Khmer Times
DOCA(ရန်ကုန်)

ဗီယက်နမ်နိုင်ငံ၏ ကော်ဖီတင်ပို့မှုသည် ၂၀၂၃ခုနှစ်၊ အောက်တိုဘာလ ၁ ရက်နေ့မှ ၂၀၂၄ခုနှစ်၊ စက်တင်ဘာလ ၃၀ရက်နေ့အထိကြာမြင့်ခဲ့သော ၂၀၂၃-၂၀၂၄ သီးနှံနှစ်တွင် ပထမဆုံးအကြိမ်အဖြစ် အမေရိကန်ဒေါ်လာ ၅ဘီလီယံကျော်လွန်သွားခဲ့ကြောင်းသိရသည်။ ဗီယက်နမ်ကော်ဖီနှင့် ကိုကိုးအသင်း(VICOFA) ဥက္ကဋ္ဌ Nguyeh Nam Hai သည် ၂၀၂၃-၂၀၂၄ ခုနှစ် သီးနှံနှစ်တွင် ကော်ဖီတန်ချိန် ၁.၄၆ သန်းခန့်တင်ပို့ခဲ့ပြီး ၂၀၂၂-၂၀၂၃ သီးနှံနှစ်နှင့်နှိုင်းယှဉ်ပါက ၁၂.၁% လျေ့နည်းသွားကြောင်းပြောကြားခဲ့သည်။ ပမာဏလျေ့ကျသွားသော်လည်း ပို့ကုန်တန်ဖိုးသည် ၃၃.၁% မြင့်တက်ခဲ့ပြီး အမေရိကန်ဒေါ်လာ ၅.၄၃ ဘီလီယံအထိရောက်ရှိခဲ့ကာ ကော်ဖီရာသီတွင် အမြင့်ဆုံးအဆင့်အဖြစ် မှတ်တမ်းဝင်ခဲ့သည်။ အကောက်ခွန်ဦးစီးဌာန၏အဆိုအရ စက်တင်ဘာလတစ်လတည်းတွင် ဗီယက်နမ်ကော်ဖီတစ်တန်လျှင် ပျမ်းမျှတင်ပို့သည့်ဈေးနှုန်းမှာ ၅.၄၆၉ ဒေါ်လာရှိပြီး ယခင်လထက် ၅.၈% နှင့် ၂၀၂၃ခုနှစ် စက်တင်ဘာလထက် ၆၈.၇% မြင့်တက်ခဲ့သည်။ ၂၀၂၄ သီးနှံနှစ်တွင် ပျမ်းမျှပို့ကုန်ဈေးမှာ တစ်တန်လျှင် ၃၆၇၃ဒေါ်လာဖြစ်ပြီးယခင်နှစ်ထက် ၅၀% နီးပါးမြင့်တက်လာသည်။ ထိုသို့သောဈေးနှုန်းဖြင့် ကော်ဖီသည် ဗီယက်နမ်၏ အဓိကစိုက်ပျိုးရေးပို့ကုန်များကြားတွင် ဈေးနှုန်းအမြင့်မားဆုံးတင်ပို့သည့် ထုတ်ကုန်ဖြစ်လာခဲ့သည်။ ဥရောပသမဂ္ဂ(EU) သည် ၂၀၂၃-၂၀၂၄ ခုနှစ်သီးနှံနှစ်တွင် ဗီယက်နမ်၏ အကြီးဆုံးကော်ဖီတင်ပို့သည့် ဈေးကွက်အဖြစ်ရပ်တည်ခဲ့ပြီး ပမာဏမှာ ၈.၆% ကျဆင်းခဲ့သော်လည်း တန်ဖိုး ၄၁% မြင့်တက်ခဲ့သည်။ ဂျာမနီ၊ အီတလီနှင့် စပိန်တို့သည် လွန်ခဲ့သည့်ရာသီတွင် ဗီယက်နမ်၏ ထပ်တန်းကော်ဖီတင်ပို့ရောင်းချသည့် ဈေးကွက်သုံးခုအဖြစ်ရပ်တည်ခဲ့ပြီး အမေရိကန်ဒေါ်လာ ၆၀၇သန်း၊ အမေရိကန်ဒေါ်လာ ၄၁၇သန်းနှင့် အမေရိကန်ဒေါ်လာ ၄၁၃သန်းတို့ အသီးသီးရှိခဲ့ကြသည်။ ၂၀၂၂-၂၀၂၃ ခုနှစ် သီးနှံနှစ်နှင့်နှိုင်းယှဉ်ပါက ဂျာမနီမှ ၃၇%၊ အီတလီမှ ၃၀% နှင့် စပိန်မှ ၇၅% တိုးတက်မှုနှုန်းကိုမြင်တွေ့ခဲ့ရသည်။ အခြားဈေးကွက်များဖြစ်သော ဂျပန် (၃၈% မြင့်တက်)နှင့် ရုရှား (၂၀% မြင့်တက်) တို့သည် ပမာဏကျဆင်းနေသော်လည်း ပို့ကုန်တန်ဖိုးမှာ အားကောင်းခဲ့ကြောင်းသိရသည်။
Source : Vietnamplus
DOCA(ရန်ကုန်)

SWISS နာရီတင်ပို့မှုသည် စက်တင်ဘာလတွင် သိသိသာသာကျဆင်းခဲ့ပြီး တရုတ်နိုင်ငံသို့တင်ပို့မှုမှာ ထက်ဝက်ကျဆင်းသွားကာ ဥရောပနိုင်ငံ၏ ရုန်းကန်နေရသော ဇိမ်ခံကုန်ပစ္စည်းကဏ္ဍအပေါ် ဖိအားများ ပိုမိုသက်ရောက်စေခဲ့ကြောင်းသိရသည်။ ဆွစ်ဇာလန်နာရီများ တင်ပို့မှုသည် စုစုပေါင်းတန်ဖိုး ၁.၉ ဘီလီယံ Swiss Franes ခန့်အထိကျဆင်းပြီး တရုတ်နိုင်ငံ၏တင်သွင်းမှုမှာလည်း ၅၀% ကျဆင်းခဲ့ကြောင်း Swiss Watch Industry အဖွဲ့ချုပ်မှ အောက်တိုဘာလ ၁၇ရက်နေ့တွင်ထုတ်ပြန်ခဲ့သည်။ ကမ္ဘာတစ်ဝန်းရှိ ဝယ်ယူသုံးစွဲသူများသည် ကပ်ရောဂါဖြစ်ပွားပြီးနောက်ဈေးကြီးသောနာရီများအား ဝယ်ယူမှုလျှော့ချလိုက်သောကြောင့် ဆွစ်ဇာလန်နာရီထုတ်လုပ်သူများအတွက် စိန်ခေါ်မှုတစ်ရပ်ဖြစ်လာခဲ့သည်။ တရုတ်ပြည်မကြီးနှင့် ဟောင်ကောင်တို့နှင့်အတူ အာရှသို့ ရောင်းအားကျဆင်းမှုသည် လစဉ်တင်ပို့မှု ကျဆင်းမှု၏ သုံးပုံနှစ်ပုံအတွက် တွန်းအားပေးနေကြောင်း အဖွဲ့ချုပ်ကပြောကြားခဲ့သည်။ တင်ပို့မှုစုစုပေါင်းသည် ၂၀၂၃ခုနှစ် ကိုးလတာကာလထက် ၂၀၂၄ခုနှစ်တွင် ၂.၇% ကျဆင်းခဲ့ကြောင်းသိရသည်။ Rolex နှင့် Patek Philippe ကဲ့သို့သော နာမည်ကြီးအမှတ်တံဆိပ်များသည် ရောင်းအားကောင်းနေဆဲဖြစ်ပြီး ထိုအမှတ်တံဆိပ်များကို ဖယ်ထုတ်မည်ဆိုပါက ဆွစ်ဇာလန်နာရီတင်ပို့မှု ကျဆင်းမှုမှာ ပိုမိုသိသာထင်ရှားလာမည်ဟု Vontobel မှ Swiss Equity Research အကြီးအကဲ Jean-Philippe Bertschy ကပြောကြားခဲ့သည်။
Source : businesstimes
DOCA(ရန်ကုန်)