ပြည်ပကုန်သွယ်မှုသတင်းများ

      တရုတ်နိုင်ငံ၌ ကောက်ပဲသီးနှံထုတ်လုပ်မှုတည်ငြိမ်စေရေး အစဉ်တစိုက်ကြိုးပမ်းကြရန် တိုက်တွန်းထားပြီးဖြစ်ရာ ၂၀၂၄ ခုနှစ်တွင် ကောက်ပဲသီးနှံ စုစုပေါင်း တန်ချိန်သန်း ၇၀၀ ကျော်ရရှိမည်ဟု မျှော်မှန်းထားကြောင်း စိုက်ပျိုးရေးဝန်ကြီးဌာနမှ တာဝန်ရှိသူတစ်ဦးက ပြောကြားခဲ့ပါသည်။

    အမျိုးသားစာရင်းအင်းဗျူရို၏ ကိန်းဂဏန်းအချက်အလက်အရ အဆိုပါထုတ်လုပ်မှုပမာဏသည်  ၂၀၂၃ ခုနှစ်တွင် ရိတ်သိမ်းထွက်ရှိခဲ့သော ကောက်ပဲသီးနှံပမာဏ တန်ချိန်သန်း ၆၉၅.၄၁ ထက် ၀.၇ ရာခိုင်နှုန်း ပိုမိုမြင့်မားမည်ဖြစ်ပါသည်။ လူဦးရေ ၁.၄ ဘီလီယံအတွက် ဘရာဇီးနှင့် အမေရိကန်နိုင်ငံတို့ထံမှ တင်သွင်းသည့် ကုန်များအပေါ် များစွာမှီခိုရလျက်ရှိသော ကမ္ဘာ့အကြီးဆုံး ကောက်ပဲသီးနှံထုတ်လုပ်သူ တရုတ်နိုင်ငံအနေဖြင့် စားနပ်ရိက္ခာဖူလုံရေးအတွက် လယ်ယာသုံးစက်ကိရိယာနှင့် မျိုးစေ့နည်းပညာတို့တွင် ရင်းနှီးမြှုပ်နှံမှုများတိုးမြှင့်ခြင်းကို မကြာသေးမီနှစ်များ၌ ဆောင်ရွက်ခဲ့သည်။

       တရုတ်နိုင်ငံ၏ နှစ်စဉ်ကောက်ပဲသီးနှံထုတ်လုပ်မှုသည် ဂျင် (Jin) အလေးချိန်အားဖြင့် ၁.၃ ထရီလီယံ (တန်ချိန် ၆၅၀ သန်း) ကျော်ဖြင့် ၉ နှစ်ဆက်တိုက် တည်ငြိမ်လျက်ရှိခဲ့ပြီး ယခုနှစ်တွင် ပထမဆုံးအကြိမ်အဖြစ် ဂျင် ၁.၄ ထရီလီယံ (တန်ချိန် ၇၀၀ သန်း) ကို ကျော်လွန်မည်ဟု ခန့်မှန်းထားကြောင်း၊ သို့သော် ပဲပုပ်စေ့သိုလှောင်မှုအတွက် တင်သွင်းမှုအပေါ် မှီခိုနေရဆဲဖြစ်ပြီး၊ ပြောင်းသီးနှံ စိုက်ပျိုးမှုမှာလည်း လိုအပ်သည့်ပမာဏအောက် ကျဆင်းလျက်ရှိခဲ့ကြောင်း၊ သိသာသည့် ပြောင်းလဲမှုမရှိခြင်းကြောင့် နိုင်ငံ၏ စားနပ်ရိက္ခာ ထုတ်လုပ်မှုနှင့် လိုအပ်ချက်တို့ကို ညီညွတ်မျှတမှု ရှိစေရေး လုပ်ဆောင်ရန် ခက်ခဲလျက်ရှိကြောင်း၊ ထို့ကြောင့် ကောက်ပဲသီးနှံထုတ်လုပ်မှု တည်ငြိမ်စေရေး အားထုတ်ကြိုးပမ်းမှုများကို လျော့ချဆောင်ရွက်ခြင်းမပြုရန် လိုအပ်ကြောင်းဖြင့် စိုက်ပျိုးရေးနှင့် ကျေးလက်ရေးရာဝန်ကြီးဌာနမှ ဒုတိယဝန်ကြီး Zhang Xingwang က ဘေဂျင်းတွင် ကျင်းပပြုလုပ်ခဲ့သည့် သတင်းစာရှင်းလင်းပွဲတစ်ခု၌ ထုတ်ဖော်ပြောကြားခဲ့သည်။

     အဆိုပါ ဝန်ကြီးဌာနအနေဖြင့် သီးနှံအထွက်ပမာဏကို မြှင့်တင်ရန်အတွက် ဆီအထွက်နှုန်းနှင့် သီးနှံအထွက်နှုန်းမြင့်မားသော ပဲပုပ်မျိုးကွဲများကို ရွေးချယ်စိုက်ပျိုးလျက်ရှိသည့်အပြင် ပဲပုပ် ပြုပြင်ထုတ်လုပ်မှုဆိုင်ရာ အထောက်အပံ့များပေးအပ်မှုနှင့် သိုလှောင်သိမ်းဆည်းခြင်းဆိုင်ရာ အစီအမံများကို စီစဉ်ဆောင်ရွက်လျက်ရှိကြောင်း၊ နိုင်ငံပိုင်ဝယ်ယူရေးအေဂျင်စီဖြစ်သော Sinograin သည် ၎င်း၏ ပြောင်းဝယ်ယူမှုပမာဏကို မြှင့်တင်မည်ဖြစ်ပြီး ထိုသို့လုပ်ဆောင်ခြင်းက လယ်သမားများ၏ ဝင်ငွေနှင့် စိုက်ပျိုးထုတ်လုပ်မှုတို့ကို မြှင့်တင်ရာတွင် အထောက်အကူပြုမည်ဖြစ်ကြောင်း သိရှိရပါသည်။

Source : Hellenic Shipping News , 27 Oct 2024(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

      ဘရာဇီးနိုင်ငံ၏ ပဲပုပ်စိုက်ပျိုးထုတ်လုပ်မှုသည် ယခင်နှစ်သီးနှံရာသီကာလထက် ၆ ရာခိုင် နှုန်း တိုးတက်လျက် ၂၀၂၄-၂၅ သီးနှံရာသီနှစ်တွင် တန်ချိန် ၁၆၁ သန်းအထိ စံချိန်တင်ရောက်ရှိနိုင် ကြောင်း အမေရိကန်စိုက်ပျိုးရေးဦးစီးဌာန (USDA) လက်အောက်ရှိ ပြည်ပစိုက်ပျိုးရေးဝန်ဆောင်မှု ဌာန (FAS) က နောက်ဆုံးထုတ်ပြန်သော အစီရင်ခံစာတစ်စောင်၌ ဖော်ပြခဲ့သည်။

     မျိုးရိုးဗီဇဆိုင်ရာ ပြုပြင်ဖန်တီးထားသည့် မျိုးစေ့များ၊ ဓာတုပစ္စည်းများနှင့် မြေဩဇာများ အပါအဝင် နည်းပညာဆိုင်ရာ ပြောင်းလဲဖော်ဆောင်မှုနှင့် ရင်းနှီးမြှုပ်နှံမှုများကို လုပ်ဆောင်ခဲ့ခြင်း အရ နှစ်အလိုက်နှိုင်းယှဉ်ရာတွင် ထုတ်လုပ်မှုတိုးတက်မည်ဟု ခန့်မှန်းထားခြင်းဖြစ်သည်။ ပြောင်းသီးနှံစိုက်ပျိုးမှုထက် အမြတ်အစွန်းပိုမိုရရှိခြင်း၊ စိုက်ပျိုးထုတ်လုပ်ရန် ပိုမိုလွယ်ကူခြင်းတို့ကြောင့် ဈေးနှုန်းများနည်းပါးလျက်ရှိသော်လည်း ဘရာဇီး လယ်သမားများအနေဖြင့် ပဲပုပ်တိုးချဲ့စိုက်ပျိုးမှုကို ဆက်လက်လုပ်ကိုင်လျက်ရှိကြသည်။

    ကမ္ဘာ့ပဲပုပ်စေ့ ဝယ်လိုအားမှာ ဆက်လက်တိုးတက်နေမည်ဟု ခန့်မှန်းမှုနှင့်အတူ ရိတ်သိမ်း ထွက်ရှိမည့်သီးနှံများ ဈေးကွက်သို့ ဝင်ရောက်ချိန်၌ ဝယ်လက်များ၏ ဝယ်ယူရန်အသင့်ရှိမည့် အခြေအနေအရ ဘရာဇီးလယ်သမားများသည် ၎င်းတို့၏ ပဲပုပ်စိုက်ပျိုးမှုကို ဆက်လက်တိုးချဲ့လုပ် ဆောင်လိမ့်မည်ဖြစ်ကြောင်း၊ ဘရာဇီးနိုင်ငံ၏ ပဲပုပ်စေ့တင်ပို့မှုသည် ယခင်သီးနှံရာသီနှစ်ကထက် တန်ချိန် ၃ သန်း ပိုမိုလျက် တန်ချိန် ၁၀၂ သန်းအထိ စံချိန်တင်ရောက်ရှိမည်ဟု ခန့်မှန်းရကြောင်း၊ ကုန်စည်ပေးသွင်းအား ပိုလျှံမည့်မျှော်မှန်းချက်များ တိုးပွားလာခြင်းနှင့် ဘရာဇီး ရီယယ်ငွေကြေး၏ တန်ဖိုးနိမ့်ကျလျက်  ငွေလဲလှယ်မှုနှုန်းထား အထူးကောင်းမွန်မှုတို့အပေါ် အခြေခံလျက် ယခုကဲ့သို့ ခန့်မှန်းထားခြင်းဖြစ်ကြောင်း FAS ဌာနက ဖော်ပြထားသည်။

      ထိုသို့ ပဲပုပ်စေ့တင်ပို့မှု၏ ၇၅ ရာခိုင်နှုန်းခန့်သည် ကာလကြာမြင့်စွာကပင် ဘရာဇီးနိုင်ငံ၏ အဓိကဝယ်လက်အဖြစ် ရပ်တည်နေသော တရုတ်နိုင်ငံသို့ တင်ပို့ရဖွယ်ရှိသည်။ ပဲပုပ်ကုန်ကြမ်း များပြားမှုနှင့် ပဲပုပ်ထုတ်ကုန်များဖြစ်သော ပဲပုပ်ဆီနှင့် ပဲပုပ်ဆီကြိတ်ဖတ်တို့အပေါ် ပြည်တွင်းဈေးကွက်နှင့် ပြည်ပတင်ပို့မှုဈေးကွက်တို့၌ ဝယ်လိုအားများ မြင့်တက်လာမှုတို့အရ ၂၀၂၄-၂၅ သီးနှံ ရာသီနှစ်အတွင်း ဘရာဇီး၏ ပဲပုပ်ကြိတ်ခွဲထုတ်လုပ်မှုမှာ တန်ချိန် ၅၅.၅ သန်းခန့်ရှိနိုင်ပြီး ၂၀၂၃-၂၄ ခုနှစ်ကထက် ၂.၅ ရာခိုင်နှုန်းခန့် တိုးတက်မည်ဖြစ်ကြောင်း သိရှိရသည်။

Source: World Grain, 28 Oct 2024(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

      အောက်တိုဘာလ ၂၃ရက်နေ့တွင် ဘယ်ဂျီယမ်နိုင်ငံ၊ ဘရက်ဆဲလ်မြို့တွင် ကျင်းပပြုလုပ်ခဲ့သည့် ဗီယက်နမ်-ဘယ်ဂျီယမ် စီးပွားရေးဖိုရမ်သည် နှစ်နိုင်ငံလုံးမှ လုပ်ငန်းများအတွက် အခွင့်အလမ်းနှင့် ပူးပေါင်းဆောင်ရွက်မှုအခွင့်အလမ်းများရှာဖွေစေနိုင်ခဲ့ကြောင်းသိရပါသည်။ ဖိုရမ်တွင် ဘယ်ဂျီယမ်နိုင်ငံ အထက်လွှတ်တော်ဥက္ကဋ္ဌ Andries Goyffay က ဗီယက်နမ်သည် အနာဂတ်စီးပွားရေးကြီးထွားမှုကိုမြှင့်တင်ရာတွင် အဓိကနေရာတွင် ရှိနေခြင်းနှင့်အတူ ပြည်ပရင်းနှီးမြှုပ်နှံသူများအတွက် ဆွဲဆောင်မှုရှိသောနိုင်ငံထဲမှ တစ်ခုဖြစ်လာကြောင်း၊ စီးပွားရေးတည်ငြိမ်မှု၊ မဟာဗျူဟာမြောက်တည်နေရာ၊ ကမ္ဘာလုံးဆိုင်ရာကုန်သွယ်မှုသို့ အားကောင်းစွာဝင်ရောက်လာမှု၊ နိုင်ငံရေးတည်ငြိမ်မှု၊ ငယ်ရွယ်ပြီး ကျွမ်းကျင်သော လူဦးရေမြင့်တက်လာမှုတို့သည် ဗီယက်နမ်အား နိုင်ငံတကာအသိုက်အဝန်းတွင် အလွန်ဆွဲဆောင်နိုင်စေသော အချက်များဖြစ်စေကြောင်းပြောကြားခဲ့ပါသည်။ လတ်တလောတွင် ဘယ်ဂျီယမ်ရင်းနှီးမြှုပ်နှံသူများသည် ဗီယက်နမ်၌ အမေရိကန်ဒေါ်လာ ၁.၁ ဘီလီယံတန်ဖိုးရှိသော စီမံကိန်း ၉၅ခုတွင် ရင်းနှီးမြှုပ်နှံထားနေကြောင်းသိရပါသည်။ ဘယ်ဂျီယမ်နိုင်ငံဆိုင်ရာ ဗီယက်နမ်သံအမတ်ကြီးဖြစ်သူ Nguyen Van Thao ကလည်း နှစ်နိုင်ငံကြားထောက်ပံ့ပို့ဆောင်ရေး၊ ပင်လယ်ဆိပ်ကမ်းနှင့် သန့်စင်သောစွမ်းအင်တို့တွင် ကြီးမားသောအလားအလာရှိသည့် ပူးပေါင်းဆောင်ရွက်မှုတို့ကို အသားပေးပြောကြားခဲ့ကြောင်းသိရပါသည်။ ဖိုရမ်တက်ရောက်ခဲ့သည့် South Export Alliance ၏ ညွှန်ကြားရေးမှူးဖြစ်သူ Francois Coloval က EU- ဗီယက်နမ်လွတ်လပ်သော ကုန်သွယ်ရေးသဘောတူညီချက်သည် ဗီယက်နမ်အား အိမ်နီးချင်းနိုင်ငံများထက် ယှဉ်ပြိုင်နိုင်စွမ်းပိုမြင့်စေပြီး ရင်းနှီးမြှုပ်နှံရေးဆောင်ရွက်မှုများနှင့် ဈေးကွက်တိုးချဲ့ခြင်းတို့အတွက် သင့်လျော်သောအခြေအနေများကို ဖန်တီးပေးနိုင်ကြောင်းပြောကြားခဲ့ပါသည်။ VBB ဥပဒေလုပ်ငန်းမှ Elyse Kneller က ဗီယက်နမ်လုပ်ငန်းများ ဥရောပဈေးကွက်တွင် ယှဉ်ပြိုင်နိုင်စွမ်းမြှင့်တင်နိုင်ရန်နှင့် စီးပွားရေးလည်ပတ်မှု တရားဝင်စေရန် EU ၏ Carbon Border Adjustment Mechanism ကိုလိုက်နာရန်နှင့် နားလည်သဘောပေါက်သင့်ကြောင်းနှင့် ထိုစည်းမျဉ်းများသည် ဗီယက်နမ်ကုန်ပစ္စည်းများ ဈေးကွက်ထိုးဖောက်ရန် စွမ်းရည်နှင့် ကုန်ကျစရိတ်ကို သက်ရောက်စေနိုင်ကြောင်းပြောကြားခဲ့ပါသည်။ ထိုဖိုရမ်တွင် ဗီယက်နမ်လုပ်ငန်းများသည် ၎င်းတို့၏ တမူထူးခြားသောကုန်ပစ္စည်းများကို ဘယ်ဂျီယမ်ဈေးကွက်ကို မိတ်ဆက်ခဲ့ကြောင်းသိရပါသည်။

Source : Vietnam Plus

DOCA(ရန်ကုန်)                      

        ကမ္ဘောဒီးယားကုန်သည်ကြီးများအသင်း (The Cambodia Chamber Of Commerce) (CCC) သည် မြို့တော်ရှိကုန်သည်များ၊ စီးပွားရေးလုပ်ငန်းရှင်များ၊ နိုင်ငံတွင်းနှင့် နိုင်ငံတကာ စီးပွားရေးအသင်းအဖွဲ့များအား ၎င်းတို့၏ပြဿနာများကိုဖြေရှင်းနိုင်ရန်အတွက် ထိရောက်သော ဖြေရှင်းနည်းများရှာဖွေရန်အဆိုပြုချက်များကို CCC သို့တင်ပြရန် တောင်းဆိုထားသည်။ ကမ္ဘောဒီးယားကုန်သည်ကြီးများအသင်းသည် ပုဂ္ဂလိကကဏ္ဍကို ကိုယ်စားပြုပြီး တော်ဝင်အစိုးရနှင့် လက်တွဲလုပ်ဆောင်ရမည်ဟု ကမ္ဘောဒီးယားနိုင်ငံ ကမ္ဘာ့ကုန်သွယ်ရေးအဖွဲ့ (WTO) တွင် အဖွဲ့ဝင်အဖြစ် နှစ်၂၀ပြည့်အခမ်းအနားတွင် ဝန်ကြီးချုပ် Hun Manet ကပြောကြားခဲ့သည်။ CCC မှ တနင်္ဂနွေနေ့တွင် ၎င်း၏လူမှုကွန်ရက်တွင် ဖော်ပြချက်အရ ကမ္ဘောဒီးယားကုန်သည်ကြီးများအသင်းသည် အစိုးရ-ပုဂ္ဂလိကကဏ္ဍဖိုရမ် (G-PSF) ဖြင့်ညှိနှိုင်းဖြေရှင်းရာတွင် ပုဂ္ဂလိကကဏ္ဍကို ကိုယ်စားပြုသောအဖွဲ့အစည်းဖြစ်ပြီး လုပ်ငန်း (၁၆) ခု၊ နည်းပညာဆိုင်ရာလုပ်ငန်းအဖွဲ့ (၈) ဖွဲ့ပါဝင်သည်။ ထို့ပြင် စိန်ခေါ်မှုများအတွက် အဖြေရှာရန်နှင့် ကမ္ဘောဒီးယားနိုင်ငံ ပြည်တွင်းနှင့်ပြည်ပစီးပွားရေးနှင့် ရင်းနှီးမြှုပ်နှံမှုလုပ်ငန်းများကိုမြှင့်တင်မည်ဖြစ်ကြောင်း ထုတ်ပြန်ချက်တွင် ထပ်မံပြောကြားခဲ့သည်။ ကမ္ဘောဒီးယားကုန်သည်ကြီးများအသင်းသည် နိုင်ငံတွင်းရှိ စီးပွားရေးလုပ်ငန်းများကိုပိုမိုကောင်းမွန်စေရန် ပံ့ပိုးကူညီခြင်းဖြင့် အစိုးရ၏ ပုဂ္ဂလိကကဏ္ဍနှင့် အဖွဲ့အစည်းများဖွံ့ဖြိုးတိုးတက်ရေးကို မြှင့်တင်ရန်ရည်ရွယ်ချက်ဖြင့် စီးပွားရေးလုပ်ငန်းရှင်များနှင့် ရင်းနှီးမြှုပ်နှံသူများအားလုံး၏ စိန်ခေါ်မှုများနှင့် စိုးရိမ်မှုများကိုဖြေရှင်းပေးမည် ဖြစ်ကြောင်းပြောကြားခဲ့သည်။ “ကမ္ဘောဒီးယားကုန်သည်ကြီးများအသင်းသည် နိုင်ငံတော်နှင့်လက်တွဲဆောင်ရွက်ရန် ပုဂ္ဂလိကကဏ္ဍ၏ကိုယ်စားလှယ်အဖြစ် ဆောင်ရွက်သင့်သည်” ဟု ဝန်ကြီးချုပ် Hun Manet က လေးနက်စွာပြောကြားခဲ့သည်။

Source : Khmer Time

DOCA(ရန်ကုန်) 

         ယခုနှစ်၏ ပထမ ၉လတာကာလတွင် ကမ္ဘောဒီးယား-တရုတ်ကြားကုန်သွယ်မှုပမာဏသည် အမေရိကန်‌ဒေါ်လာ ၁၁.၁၄ ဘီလီယံထိရောက်ရှိခဲ့ပြီး လွန်ခဲ့သည့်နှစ် (၂၀၂၃) ၏ တူညီသည့်ကာလထက် ၂၂.၅% မြင့်တက်ခဲ့ကြောင်း အကောက်ခွန်နှင့် အခွန်အထွေထွေဦးစီးဌာန၏ တင်ပြချက်အရသိရပါသည်။ ထို ၉လတာကာလတွင် ကမ္ဘောဒီးယားသည် တရုတ်သို့ အမေရိကန်ဒေါ်လာ ၁.၂၇ ဘီလီယံတန်ဖိုးရှိသည့် ကုန်ပစ္စည်းများတင်ပို့ခဲ့ပြီး အမေရိကန်ဒေါ်လာ ၉.၈၆ ဘီလီယံတန်ဖိုးရှိသည့် ကုန်ပစ္စည်းများပြန်လည်တင်သွင်းခဲ့ကြောင်းသိရပါသည်။ တရုတ်သို့ အဓိကတင်ပို့သည့် ကုန်ပစ္စည်းများမှာ ဆန်၊ ငှက်ပျောသီးများ၊ သရက်သီးများ၊ ပီလောပီနံ၊ ရေထွက်ကုန်နှင့် အဝတ်အထည်တို့ဖြစ်ပြီး အဝတ်အထည်အတွက် ကုန်ကြမ်းပစ္စည်းများ၊ စက်ပစ္စည်းများ၊ ယာဉ်များ၊ စားသောက်ကုန်များ၊ အီလတ်ထရောနစ်ပစ္စည်းများနှင့် ဆေးဝါးများကို ပြန်လည်တင်သွင်းကြောင်းသိရပါသည်။ ကမ္ဘောဒီးယား-တရုတ် အပြန်အလှန်ကုန်သွယ်ရေးသဘောတူညီချက်နှင့် RECP သဘောတူညီချက်တို့က ကမ္ဘောဒီးယားစိုက်ပျိုးရေးထုတ်ကုန်များ တရုတ်သို့တင်ပို့မှုအရှိန်မြှင့်တင်ရန် ကူညီပေးနိုင်မည်ဟု စီးပွားကူးသန်းဝန်ကြီးဌာန၏ ပြောခွင့်ရပုဂ္ဂိုလ် Penn Sovichect ကပြောကြားခဲ့ပါသည်။ နှစ်နိုင်ငံခေါင်းဆောင်များသည်လည်း တရုတ်-ကမ္ဘောဒီးယား ခင်မင်ရင်းနှီးမှုတည်ငြိမ်စွာဖွံ့ဖြိုးတိုးတက်ရေးအတွက် ပြောဆိုမှုများဆောင်ရွက်ခဲ့ပြီဖြစ်ပြီး “Action Plan on Building a China-Cambodia Community with a Shared Future” အကောင်အထည်ဖော်ရန်အတွက် အစိုးရအချင်းချင်းညှိနှိုင်းဆောင်ရွက်ရေးကော်မတီ၏ အခန်းကဏ္ဍကို အပြည့်အဝလုပ်ဆောင်ခွင့်ပေးရန် သဘောတူညီခဲ့ကြကြောင်းသိရပါသည်။ နှစ်နိုင်ငံ၏ အနီးကပ်ပူးပေါင်းဆောင်ရွက်ခြင်းနှင့် မျှဝေသည့် အနာဂတ်တည်ထောင်ရန် သဘောတူညီမှုတို့သည် နှစ်နိုင်ငံမှ ရင်းနှီးမြှုပ်နှံသူများနှင့် စီးပွားရေးသမားများအကြား ယုံကြည်မှုတည်ဆောက်ရာတွင် တွန်းအားပေးနိုင်မည်ဟု ကမ္ဘောဒီးယားကုန်သည်များအသင်း၏ ဒုတိယဥက္ကဋ္ဌဖြစ်သူ Lim Heng ကပြောကြားခဲ့ပါသည်။

Source : Khmer Times

DOCA(ရန်ကုန်)