HighLight News

      ပဲခူးတိုင်းဒေသကြီး၊ သာယာဝတီခရိုင်၊ သာယာဝတီမြို့နယ်၊ ဂုံမင်းမြောင်ကျေးရွာရှိ သိန်းမေတ္တာဆန်စက်သို့ (၂၆-၆-၂၀၂၄) ရက်နေ့၊ နံနက်(၁၀:၀၀) နာရီအချိန်တွင် စားသုံး/ ထုတ်လုံတာဝန်ခံ ဒေါ်ခိုင်ခိုင်ရီနှင့် သတင်းနည်းတာဝန်ခံ ဒေါ်ကြည်ကြည်ချိုတို့သည် သိန်းမေတ္တာဆန်စက်ပိုင်ရှင် ဦးမြင့်သိန်းနှင့်တွေ့ဆုံ၍ ဆွေးနွေးခဲ့ပါသည်။ ရှေးဦးစွာ ဒေါ်ခိုင်ခိုင်ရီက စားသုံးသူကာကွယ်ရေးဥပဒေ အခန်း(၁၈)ပါ ကုန်စည်များပေါ်တွင် ကုန်အညွှန်းအမှတ်အသား‌ဖော်ပြခြင်းနှင့်စပ်လျဉ်း၍ ကုန်စည်အမျိုးအစားအလိုက် သတ်မှတ်ချက်များနှင့်အညီ ထုတ်လုပ်ဖြန့်ဖြူးရောင်းချရန်၊ ဥပဒေ အခန်း(၁၀)ပါ စီးပွားရေးလုပ်ငန်းရှင်၏တာဝန် များ၊ ဥပဒေ အခန်း(၁၁)ပါ ကုန်စည်နှင့်စပ်လျဉ်း၍ အာမခံချက်ပေးရန်နှင့် စားသုံးသူပြည်သူများအတွက် ဘေးအန္တရာယ်ကင်းရှင်းစေရေး အထူးအလေးထားဆောင်ရွက်ရန် အသိပညာပေးဆွေးနွေးဆောင်ရွက်ခဲ့ပြီး  အသိပညာပေးလက်ကမ်းစာ‌စောင်များဖြန့်ဝေခဲ့ကြောင်းသိရှိရပါသည်။

DOCA(ပဲခူး)

      ပဲခူးတိုင်းဒေသကြီး၊ နတ်တလင်းခရိုင်၊ ပေါင်းတည်မြို့နယ်၊ အထွေထွေအုပ်ချုပ်ရေးဦးစီးဌာန၏ အစည်းအဝေးခန်းမ၌ (၂၄-၆-၂၀၂၄)ရက်နေ့၊ နေ့လယ် (၁၃:၀၀) နာရီအချိန်တွင် မြို့နယ်ကုန်ဈေးနှုန်း တည်ငြိမ်ရေးအဖွဲ့၏ ပြည်တွင်းစားဆန်ဈေးနှုန်းများ သင့်တင့်မျှတစွာတည်ငြိမ်မှန်ကန်စေရေး လုပ်ငန်းညှိနှိုင်းအစည်းအဝေးကျင်းပပြုလုပ်ခဲ့ပါသည်။

       အဆိုပါလုပ်ငန်းညှိနှိုင်းအစည်းအဝေးတွင် မြို့နယ်စီမံအုပ်ချုပ်ရေးအဖွဲ့ဥက္ကဋ္ဌက ပြည်တွင်းစားဆန်ဈေးနှုန်းများ သင့်တင့်မျှတစွာတည်ငြိမ်မှန်ကန်စွာရောင်းချနိုင်ရေးနှင့်    နေ့စဉ်ရောင်းချပေးနိုင်ရေးတို့ကိုလည်းကောင်း၊ စားသုံးသူရေးရာဦးစီးဌာန၊ မြို့နယ်တာဝန်ခံကလည်း အွန်လိုင်းမှတစ်ဆင့် ဆန်စပါးသိုလှောင်ခွင့်လိုင်စင်လျှောက်ထားခြင်းနှင့်ပတ်သက်၍  ရှင်းလင်းဆွေးနွေးခဲ့ရာ ဆန်/စပါးလုပ်ငန်းရှင်များ၊ ဆန်ကုန်သည်များ၊ ဆန်လက်လီ/လက်ကားရောင်းချသော လုပ်ငန်းရှင်များတက်ရောက်ခဲ့ကြောင်းသိရှိရပါသည်။

DOCA(ပဲခူး)

     စားသုံးသူပြည်သူများအား ထုတ်ကုန်လုံခြုံစိတ်ချရမှုရှိစေရေး၊ ဘေးအန္တရာယ်ရှိသောကုန်စည်များ ဈေးကွက်အတွင်းမှပပျောက်စေရေးနှင့် စားသုံးသူကာကွယ်ရေးဥပဒေပြဋ္ဌာန်းချက်ပါ ကုန်စည်များတွင် မြန်မာဘာသာဖြင့် ကုန်အညွှန်းအမှတ်အသားဖော်ပြထားမှုအခြေအနေတို့နှင့်စပ်လျဉ်း၍ သက်ဆိုင်ရာမိတ်ဖက်ဌာနများနှင့်ပူးပေါင်းကာ ဈေးကွက်စောင့်ကြည့်စစ်ဆေးခြင်းလုပ်ငန်းများဆောင်ရွက်လျက်ရှိရာ ၂၀၂၄ခုနှစ်၊ ဇွန်လ (၁၆)ရက်နေ့မှ (၃၀)ရက်နေ့အတွင်း၌ ပြည်ခရိုင်၊ ပြည်မြို့၊ မြို့ပေါ်စတိုးဆိုင်များရှိ ကလေးအသုံးအဆောင်ပစ္စည်းအမျိုးမျိုးကိုလည်းကောင်း၊ ရွှေတောင်မြို့၊ မြို့ပေါ်ကုန်စုံဆိုင်များရှိ ကလေးအသုံးအဆောင်ပစ္စည်းအမျိုးမျိုးကိုလည်းကောင်း၊ ယွန်းတန်းရပ်ကွက် ကုန်စုံဆိုင်များရှိ စားသုံးဆီအမျိုးမျိုးကိုလည်းကောင်း၊ ပန်းတောင်းမြို့၊ ဥသျှစ်ပင်မြို့ပေါ် ကုန်စုံဆိုင်များရှိ ကလေးအသုံးအဆောင်ပစ္စည်းအမျိုးမျိုးကိုလည်းကောင်း၊  ပေါက်ခေါင်းမြို့တွင် မြို့မဈေးကုန်စုံဆိုင်များရှိ စားသုံးဆီအမျိုးမျိုးကိုလည်းကောင်း ဈေးကွက်စောင့်ကြည့်စစ်ဆေးခြင်းများကို သက်ဆိုင်ရာမြို့နယ်တာဝန်ခံနှင့် ဝန်ထမ်းများသည် သွားရောက်၍ ကုန်အညွှန်းအမှတ်အသားပါသတ်မှတ်ချက်များနှင့်ကိုက်ညီမှုရှိသော ကုန်စည်များကိုတင်သွင်းရောင်းချခြင်းရှိ/မရှိ၊ သက်ဆိုင်ရာဌာန၏ထောက်ခံမှုရှိ/မရှိတို့ကို ဈေးကွက်စောင့်ကြည့်စစ်ဆေးခဲ့ကြောင်းနှင့် စောင့်ကြည့်စစ်ဆေးခဲ့သည့် ကုန်စည်များတွင် ကုန်အညွှန်းအမှတ်အသားဖော်ပြချက်များနှင့်ကိုက်ညီမှုရှိကြောင်း သတင်းရရှိပါသည်။

DOCA(ပဲခူး)

     စားသုံးသူရေးရာဦးစီးဌာန၊ တိုင်းဒေသကြီးဦးစီးမှူး၏ လမ်းညွှန်ချက်အရ စားသုံးသူများအားလုံးသည် ကုန်စည်နှင့်ဝန်ဆောင်မှုများအသုံးပြုရာတွင် ဘေးအန္တရာယ်ကင်းရှင်းစွာသုံးစွဲနိုင်ရေးအတွက် ခရိုင်အတွင်းရှိ  ထုတ်လုပ်လျက်ရှိသော ကုန်စည်များနှင့်စပ်လျဉ်း၍ အာမခံချက်ပေးခြင်းနှင့် ကုန်အညွှန်းအမှတ်အသားများပြည့်စုံမှန်ကန်စွာဖော်ပြမှုရှိစေရေးရည်ရွယ်၍ ဆောင်ရွက်လျက်ရှိရာ ပြည်ခရိုင်အတွင်း ၂၀၂၄ခုနှစ်၊ ဇွန်လ (၁၆)ရက်နေ့မှ (၃၀)ရက်နေ့အတွင်း ပြည်မြို့၊ နဝဒေးစက်မှုဇုန်ရှိ ဦးဇော်ထက်ပိုင်၏ ဇေယျာရွှေတည်ဆန်စက်နှင့် ဦးမြတ်သူ၏ ပွင့်ထွန်းဆန်စက်သို့လည်းကောင်း၊ စက်မှုဇုန်(၁)ရှိ ဦးအောင်ဇော်မင်း၏ A-1လယ်ယာသုံးစက်ကိရိယာလုပ်ငန်းသို့လည်းကောင်း၊ ရွှေတောင်မြို့၊ ကြာနီကန်ရပ်ကွက်၊ ရန်ကုန်-ပြည်လမ်းနေ ဦးရဲမျိုးအောင်၏ သရဖူဆန်စက်သို့လည်းကောင်း၊ ပန်းတောင်းမြို့တွင် ဥသျှစ်ပင်ဒေသရှိ ဦးစိုးသူရအောင်၏ စိန်သုံးလုံးအိမ်ဆောက်ပစ္စည်းဆိုင်၊ ဒေါ်သဉ္ဇာလတ်၏ ဘရဏီအိမ်ဆောက်ပစ္စည်းဆိုင်နှင့် ဦးဝင်းလတ်၏ ဘရဏီစက်သုံးဆီအရောင်းဆိုင်သို့လည်းကောင်း၊ ပေါက်ခေါင်းမြို့တွင် အမှတ်(၅)ရပ်ကွက်ရှိ ဦးသိန်းဇော်၏ ဝါစက်သို့လည်းကောင်း၊ အမှတ်(၃)ရပ်ကွက်ရှိ ဒေါ်ခင်မာလွင်ဆန်စက်သို့လည်းကောင်း သက်ဆိုင်ရာမြို့နယ်တာဝန်ခံနှင့် ဝန်ထမ်းများသည်သွားရောက်၍ မိမိတို့ဖြန့်ဖြူးရောင်းချလျက်ရှိသောကုန်စည်များတွင် အရည်အသွေး၊ အလေးချိန်၊ အချင်အတွယ်၊ ပမာဏနှင့် အမျိုးအစားများ မှန်ကန်စွာဖြန့်ဖြူးရောင်းချမှုရှိစေရေး၊ စီးပွားရေးကျင့်ဝတ်၊ စည်းကမ်းနှင့်အညီ ထုတ်လုပ်ရောင်းချမှုရှိစေရေး၊ ကုန်စည်အလိုက် ဖော်ပြရမည့်ကုန်အညွှန်းအမှတ်အသားများ၊ ပြည့်စုံမှန်ကန်စွာဖော်ပြမှုရှိစေရေး လိုက်နာဆောင်ရွက်ကြရန်နှင့် နောက်ပိုင်းကာလများတွင် ကွင်းဆင်းစစ်ဆေးမှုများနှင့်အတူ အရေးယူဆောင်ရွက်မှုများပြုလုပ်ဆောင်ရွက်သွားမည်ဖြစ်သည့်အတွက် စီးပွားရေးလုပ်ငန်းရှင်များအနေဖြင့် အထူးအလေးထားလိုက်နာဆောင်ရွက်ကြရန် ရှင်းလင်းဆွေးနွေးပြောကြားခဲ့ကြောင်းသိရှိရပါသည်။

DOCA(ပဲခူး)

     ကချင်ပြည်နယ်အစိုးရအဖွဲ့၊ စီးပွားရေးရာဝန်ကြီး၊ ဦးမျိုးဆွေနှင့် စားသုံးသူရေးရာဦးစီးဌာန၊ ပြည်နယ်ဦးစီးမှူး၊ ဦးကိုကိုဦးတို့သည် ကချင်ပြည်နယ်၊ စားသုံးသူရေးရာဦးစီးဌာန၊ ပြည်နယ်ဦးစီးမှူးရုံးအစည်းအဝေးခန်းမ၌ ၂၆-၆-၂၀၂၄ ရက်နေ့၊ နေ့လယ် (၁၅း၀၀) နာရီအချိန်တွင် ကချင်ပြည်နယ်အတွင်း စားအုန်းဆီဖြန့်ဖြူးရောင်းချရာ၌ စနစ်တကျရှိစေရေးနှင့် စျေးကွက်အတွင်း သင့်တင့်မျှတသည့်စျေးနှုန်းဖြင့် ဖြန့်ဖြူးရောင်းချစေရေးအတွက် စားအုန်းဆီ လက်လီ/လက်ကားရောင်းချသည့် ကုန်သည်များနှင့်တွေ့ဆုံဆွေးနွေးပွဲအခမ်းအနားကျင်းပပြုလုပ်ခဲ့ပါ သည်။

      ထိုတွေ့ဆုံဆွေးနွေးပွဲအခမ်းအနားတွင် ကချင်ပြည်နယ်အစိုးရအဖွဲ့၊ စီးပွား‌ရေးရာဝန်ကြီး ဦးမျိုးဆွေက ကချင်ပြည်နယ်အနေနှင့် စားအုန်းဆီများကို စားသုံးသူပြည်သူများသို့ စျေးနှုန်းသက်သာစွာရောင်းချနိုင်ရန် ၂၀၂၃ခုနှစ်၊ မေလမှ စ၍ထုတ်ယူဖြန့်ဖြူးရောင်းချပေးလျက်ရှိပြီး တစ်လလျှင် တန်(၁၀၀) ခွဲတမ်းရရှိခဲ့ကြောင်း၊ ၂၀၂၃ခုနှစ်၊ ဒီဇင်ဘာလတွင် ကချင်ပြည်နယ်အစိုးရအဖွဲ့၏ တောင်းဆိုမှုကြောင့် တစ်လလျှင် တန်(၅၀၀) ခွဲတမ်းရရှိခဲ့ပြီး၊ ၂၀၂၄ခုနှစ်၊ မေလနှင့် ဇွန်လများတွင် တန်(၁၀၀) သာပြန်လည်ရရှိခဲ့သည့်အတွက် ၂၀၂၄ခုနှစ်၊ ဇွန်လ ၈ရက်နေ့တွင် ကျင်းပပြုလုပ်ခဲ့သည့် စားသုံးဆီတင်သွင်းသိုလှောင်ဖြန့်ဖြူးရောင်းချခြင်းဆိုင်ရာ လုပ်ငန်းညှိနှိုင်းအစည်းအဝေးတွင် ကော်မတီဥက္ကဋ္ဌဖြစ်သည့် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ဒုတိယဝန်ကြီးအား တစ်လလျှင် တန်(၅၀၀) ထုတ်ယူခွင့်ပြုပါရန် တင်ပြခဲ့ကြောင်း၊ ၂၀၂၄ခုနှစ်၊ ဇွန်လ ၁၉ရက်‌နေ့တွင် ကျင်းပပြုလုပ်သည့်   ပြည်ထောင်စုကုန်ဈေးနှုန်းတည်ငြိမ်ရေးကော်မတီ၏  (၂/၂၀၂၄ )ကြိမ်မြောက်အစည်းအဝေးတွင်လည်း  ပြည်နယ်ဝန်ကြီးချုပ်က တန် (၅၀၀)ထုတ်ယူခွင့်ပြုပါရန် တင်ပြခဲ့ကြောင်း၊ စားအုန်းဆီများကို သတ်မှတ်ပေးထားသည့် စျေးနှုန်းဖြင့်သာရောင်းချရန်နှင့်‌ စျေးနှုန်းမြှင့်တင်ရောင်းချခြင်း (သို့မဟုတ်) ဈေးနှုန်းမြင့်တင်ရောင်းချရန်ရည်ရွယ်ချက်ဖြင့် သိုလှောင်ပါက အရေးကြီးကုန်စည်နှင့် ဝန်ဆောင်မှုဥပဒေအရ အရေးယူဆောင်ရွက်သွားမည်ဖြစ်ကြောင်း၊ စားအုန်းဆီရောင်းချနေမှုအား ပြည်နယ်စားအုန်းဆီဖြန့်ဖြူးခြင်းလုပ်ငန်းကြီးကြပ်ရေးအဖွဲ့ဖြင့် စစ်ဆေးသွားမည်ဖြစ်ပါကြောင်း ပြောကြားခဲ့ပါသည်။ စားသုံးသူရေးရာဦးစီးဌာန၊ ပြည်နယ်ဦးစီးမှူး၊ ဦးကိုကိုဦးက လိုအပ်သည်များကို ဖြည့်စွက်ရှင်းလင်းဆွေးနွေးခဲ့ပြီးအခမ်းအနားကို နေ့လယ်(၁၅း၃၀)နာရီ အချိန်တွင် ရုပ်သိမ်းခဲ့ကြောင်း၊ အဆိုပါအခမ်းအနားသို့ စားအုန်းဆီ လက်လီ/လက်ကားကုန်သည် ၂၉ဦးတက်ရောက်ခဲ့ကြောင်းသိရှိရပါသည်။

DOCA(ကချင်)