HighLight News

     မကွေးတိုင်းဒေသကြီး၊ ချောက်ခရိုင်၊ ချောက်မြို့နယ်အတွင်းရှိပြည်သူများ အခြေခံစားသောက်ကုန်များအား စျေးနှုန်းတည်ငြိမ်စွာဝယ်ယူစားသုံးနိုင်ရေး၊ သင့်တင့်မျှတသောစျေးနှုန်းဖြင့် ဝယ်ယူနိုင်ရေးအတွက် မြို့ပေါ်ရပ်ကွက်များတွင် MPower Energy Company Limited ၏ စားသုံးဆီကိုယ်စားလှယ် ဒေါ်အမီအောင်u အမှတ်(၂)ရပ်ကွက်၊ အလယ်ဓမ္မာရုံရပ်တွင် ဆီရောင်းချပေးနေမှုနှင့် မြို့နယ်ဆန်ကုန်သည်များအသင်းက မြို့ပေါ်ရပ်ကွက်များနှင့် ဆန်ဆိုင်များတွင် ပြည်သူများအား ဆန်ရောင်းချပေးနေမှုကို ခရိုင်စီမံအုပ်ချုပ်ရေးအဖွဲ့ ဥက္ကဋ္ဌ ဦးမိုးဇော်နိုင်ဦးဆောင်၍ မြို့နယ်စီမံအုပ်ချုပ်ရေးအဖွဲ့ဥက္ကဋ္ဌ ဦးစိုးလွင်နှင့်အဖွဲ့ဝင်များ၊ မြို့နယ်စားသုံးသူရေးရာဦးစီးဌာန၊ မြို့နယ်တာဝန်ခံ ဒေါ်မြတ်မြတ်မိုးနှင့် ဆက်စပ်ဌာနများပူးပေါင်း၍ (၄-၇-၂၀၂၄) ရက်နေ့၊ နံနက်(၀၉:၀၀) နာရီအချိန်တွင် ကွင်းဆင်းကြည့်ရှုစစ်ဆေးခဲ့ကြောင်းသိရသည်။

     ထိုသို့ကွင်းဆင်းစစ်ဆေးရာတွင် မြို့နယ်အတွင်းရှိ ပြည်သူများအား စားသုံးဆီနှင့် ဆန်များကို သင့်တင့်မျှတသောစျေးနှုန်းဖြင့် ဝယ်ယူနိုင်ရေးအတွက် အိမ်ထောင်စုတစ်စုလျှင် (၁)ပိဿာနှုန်းဖြင့် ဆီပိဿာချိန်(၃၃၀)ပိဿာကို (၁)ပိဿာလျှင် ကျပ်(၅၈၅၀)နှုန်းဖြင့်လည်းကောင်း၊ ဧည့်မထဆန်၊ ရက်(၉၀)ဆန်၊ ဧရာမင်း/ ဧရာပဒေသာဆန်၊ ပေါ်ဆန်းမွှေးတို့ကိုလည်း သင့်တင့်သောစျေးနှုန်းဖြင့်လည်းကောင်း ချိုသာစွာရောင်းချပေးခဲ့ကြောင်းသိရှိရပါသည်။

DOCA(မကွေး)

      စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ကန့်ဘလူမြို့နယ်တာဝန်ခံရုံးအနေဖြင့် (၂-၇-၂၀၂၄)ရက်နေ့၊ နံနက် ၁၁:၀၀ နာရီအချိန်တွင် မြို့နယ်အထွေထွေအုပ်ချုပ်ရေးဦးစီးဌာန၊ မြန်မာနိုင်ငံရဲတပ်ဖွဲ့၊ မြို့နယ်ကျန်းမာရေးဦးစီးဌာန၊ စည်ပင်သာယာရေးအဖွဲ့ စသည့်မိတ်ဖက်ဌာနများနှင့်ပူးပေါင်း၍ မြို့နယ်တာဝန်ခံ ဦးမျိုးဝင်းသန်းနှင့် ဝန်ထမ်း(၁)ဦးတို့သည် ကန့်ဘလူမြို့၊ အမှတ်(၃)ရပ်ကွက်ရှိ ‌ဆေးနှင့်ဆေးပစ္စည်းရောင်းချသည့်ဆိုင်များအား ဈေးနှုန်းမြှင့်တင်ရောင်းချခြင်းရှိ/မရှိ၊ ဈေးကစားရန်ရည်ရွယ်၍ သိုလှောင်ထားခြင်းရှိ/မရှိ၊ စားသုံးသူထိခိုက်နိုင်ခြေမြင့်မားသည့် စံမညီဆေးဝါးများ၊ သက်တမ်းလွန်ဆေးဝါးများ ရောင်းချခြင်းရှိ/မရှိနှင့် ဆေးပစ္စည်းများပြတ်လပ်ခြင်းရှိ/မရှိကို အဖွဲ့စုံဖြင့်ဈေးကွက်စောင့်ကြည့်စစ်ဆေးခဲ့ရာ ဈေးနှုန်းမြှင့်တင်ရောင်းချခြင်း၊ စံမညီဆေးဝါးများရောင်းချခြင်းနှင့် ဆေးပစ္စည်းများပြတ်လပ်မှုမရှိကြောင်းသိရသည်။

         ထိုသို့ဈေးကွက်စောင့်ကြည့်စစ်ဆေးရာတွင် သက်ဆိုင်ရာဌာနများကလည်း မိမိတို့နှင့်သက်ဆိုင်သည့် အမိန့်နှင့်ညွှန်ကြားချက်များကို အသိပေးပြောကြားခဲ့ကြောင်း၊ လုပ်ငန်းရှင်များအနေဖြင့် ဈေးကစားရန်ရည်ရွယ်၍ သိုလှောင်ခြင်း၊ ဈေးနှုန်းမြှင့်တင်ရောင်းချခြင်းများပြုလုပ်ပါက ဥပဒေအရ အရေးယူခြင်းခံရနိုင်ကြောင်း အသိပေးပြောကြားခဲ့ပြီး ကုန်အညွှန်းအမှတ်အသားဖော်ပြခြင်းဆိုင်ရာ အသိပညာပေးလက်ကမ်းစာစောင်များဖြန့်ဝေပေးခဲ့ကြောင်းသိရှိရပါသည်။

DOCA(စစ်ကိုင်း)      

       စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာန၊ ကန့်ဘလူခရိုင်ဦးစီးမှူးရုံး လက်အောက်ရှိ ကျွန်းလှမြို့နယ်တာဝန်ခံရုံးအနေဖြင့် စားသုံးသူအခွင့်အရေးနှင့် အကျိူးစီးပွားကာကွယ်ရန်အတွက် စားသုံးသူကာကွယ်ရေးလုပ်ငန်းများကိုဆောင်ရွက်လျက်ရှိရာ ၂၀၂၄ခုနှစ်၊ ဇူလိုင်လ(၂)ရက်နေ့၊ နံနက် (၀၉း၀၀)နာရီအချိန်တွင် စားသုံးသူရေးရာဦးစီးဌာန၊ ကျွန်းလှမြို့နယ်တာဝန်ခံသည် ကျွန်းလှမြို့နယ်၊ ရှမ်းစုကျေးရွာရှိ “UTN ဦးသိန်းနိုင်” စက်သုံးဆီအရောင်းဆိုင်လုပ်ငန်းရှင်နှင့်သွားရောက်တွေ့ဆုံဆွေးနွေးခဲ့ပါသည်။

          ထိုသို့ကွင်းဆင်းစစ်ဆေးရာတွင် မြို့နယ်အတွင်း စက်သုံးဆီသုံးစွဲသောပြည်သူများ စက်သုံးဆီဝယ်ယူမှုအဆင်ပြေစေရေး၊ စက်သုံးဆီပြတ်လပ်မှုမရှိစေရေး၊ စက်သုံးဆီဈေးနှုန်းများမြှင့်တင်ရောင်းချခြင်းမပြုရန်၊ စက်သုံးဆီတင်သွင်းဖြန့်ဖြူးရောင်းချနေမှုအခြေအနေ၊ (PPRD) စက်သုံးဆီတင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီ၏  နေ့စဉ်သတ်မှတ်ထုတ်ပြန်ထားသော စက်သုံးဆီရည်ညွှန်းဈေးနှုန်းအတိုင်းရောင်းချမှုရှိ/ မရှိ၊ အချင်အတွယ်နှင့် အလေးချိန်မှန်ကန်မှုရှိ/မရှိ စစ်ဆေးရာ သတ်မှတ်ရည်ညွှန်းဈေးနှုန်းအတိုင်း ရောင်းချလျက်ရှိပြီး အချင်အတွယ်မှန်ကန်ကြောင်း၊ စက်သုံးဆီပြတ်လပ်မှုမရှိကြောင်း စစ်ဆေးတွေ့ရှိရပါသည်။ 

         စက်သုံးဆီဆိုင်လုပ်ငန်းရှင်များအနေဖြင့် စက်သုံးဆီဈေးနှုန်းမျာအား အများပြည်သူများမြင်သာအောင် (LED Board) ဖြင့် ပွင်းလင်းမြင်သာအောင် စီစဉ်ပြသထားရှိစေရေးနှင့် ယခုအချိန်ကာလတွင် စက်သုံးဆီဈေးနှုန်းမြင့်တက်နေခြင်း၊ စက်သုံးဆီပြတ်လပ်မှုများဖြစ်ပေါ်နေခြင်းတို့ကြောင့် သုံးစွဲနေသောပြည်သူများ အလွယ်တကူဝယ်ယူသုံးစွဲနိုင်ရေး၊ စက်သုံးဆီများ ပုံမှန်ဖွင့်လှစ်ရောင်းချနိုင်ရေး၊ သတ်မှတ်ရည်ညွှန်းဈေးနှုန်းထက် မြှင့်တင်ရောင်းချမှုမရှိစေရေးနှင့် တရားမဝင်စက်သုံးဆီ၊ ချောဆီများတင်သွင်းဖြန့်ဖြုးရောင်းချနေခြင်းကိုစိစစ်တွေ့ရှိရပါက အရေးယူဆောင်ရွက်ခြင်းများရှိလာနိုင်မည်ဖြစ်ကြောင်းတို့ကို စက်သုံးဆီဆိုင်လုပ်ငန်းရှင်နှင့် သွားရောက်တွေ့ဆုံဆွေးနွေးပြောကြားခဲ့ကြောင်းသိရှိရပါသည်။

DOCA(စစ်ကိုင်း)

     စားသုံးသူရေးရာဦးစီးဌာန၊ မြစ်ကြီးနားခရိုင်ဦးစီးမှူးရုံးမှ ခရိုင်ဦးစီးမှူး၊ ဦးဇေယျာအောင်သည် ၈-၇-၂၀၂၄ ရက်နေ့တွင် မြစ်ကြီးနားမြို့၊ သီတာရပ်ကွက်ရှိ International Language&Business Centre(ILBC) International School တွင် ဆရာ/ဆရာမ(၁၀)ဦး၊ ကျောင်းသား/ ကျောင်းသူ(၇၀)ဦးအား စားသုံးသူကာကွယ်ရေးအသိပညာများဟောပြောဆွေးနွေးခဲ့ပါသည်။

       ထိုသို့ဟောပြောရာတွင် ခရိုင်ဦးစီးမှူး ဦးဇေယျာအောင်က စားသုံးသူကာကွယ်ရေးစတင်ပေါ်ပေါက်လာပုံ၊ စားသုံးသူ၏အဓိပ္ပါယ်၊ စားသုံးသူအခွင့်အရေးနှင့်တာဝန်များအကြောင်း၊ အစားအသောက်တွင် သုံးစွဲခွင့်မရှိသော ဆိုးဆေးများအကြောင်း၊ မျိုးရိုးဗီဇပြောင်းလဲထားသော အစားအစာအန္တရာယ်များအကြောင်း၊ အသင့်စားခေါက်ဆွဲခြောက်များစားသုံးခြင်းကြောင့် ဖြစ်ပေါ်လာနိုင်သောအန္တရာယ်များ အကြောင်း၊ မိုဘိုင်းဖုန်းသုံးစွဲမှုကြောင့်ဖြစ်ပေါ်လာနိုင်သော အန္တရာယ်များအကြောင်း၊ ဆေးလိပ်နှင့် ဆေးရွက်ကြီးသုံးစွဲမှုကြောင့် ဖြစ်ပေါ်လာနိုင်သည့်ဆိုးကျိုးများအကြောင်း၊ စားသုံးသူသည် ကုန်စည် သို့မဟုတ် ဝန်ဆောင်မှုကိုအသုံးပြုခြင်းကြောင့် နစ်နာဆုံးရှုံးမှုများဖြစ်ပေါ်လာပါက တိုင်ကြားရမည့်နည်းလမ်းများ၊ ကုန်အညွှန်းအမှတ်အသားပြည့်စုံမှုရှိပြီး သက်ဆိုင်ရာဌာနများ၏ ထောက်ခံချက်ပါရှိသော  ကုန်စည်များကိုသာဝယ်ယူသုံးစွဲရန် အသိပညာပေးဟောပြောခဲ့ပြီး စားသုံးသူကာကွယ်ရေးဆိုင်ရာ အသိပညာပေးလက်ကမ်းစာစောင်များဖြန့်ဝေပေးခဲ့ကြောင်းသိရှိရပါသည်။

DOCA(ကချင်)

    စားသုံးသူရေးရာဦးစီးဌာန၊ ဒုတိယပြည်နယ်ဦးစီးမှူးရုံးမှ စစ်ဆေးရေးမှူးနှင့် ဝန်ထမ်းများသည်   ၂၀၂၄ခုနှစ်၊ ဇူလိုင်လ (၄) ရက်နေ့၊ နံနက် (၁၀ꓽ၀၀) နာရီအချိန်တွင် မြို့နယ်အထွေထွေအုပ်ချုပ်ရေးဦးစီးဌာန၊ ခရိုင်အစားအသောက်နှင့်ဆေးဝါးကွပ်ကဲရေးဦးစီးဌာန၊ ခရိုင်ကျန်းမာရေးဦးစီးဌာန၊ မြို့နယ်စည်ပင်သာယာရေးဌာန၊ မြန်မာနိုင်ငံရဲတပ်ဖွဲ့တို့မှ ဝန်ထမ်းများနှင့်ပူးပေါင်း၍ ကျိုင်းတုံမြို့၊ ရပ်ကွက်(၄)၊ ကန်နားလုံကျေးရွာရှိ ကုန်စုံဆိုင်များအား ကိုယ်ဝန်ဆောင်မိခင်များအတွက် နို့ဘူးနှင့်နို့မှုန့်များရောင်းချရာ၌ ကုန်အညွှန်းအမှတ်အသားနှင့်ပတ်သက်၍ ဈေးကွက်စောင့်ကြည့်စစ်ဆေးခြင်းလုပ်ငန်းများဆောင်ရွက်ခဲ့ပါသည်။

         ထိုသို့ ဈေးကွက်စောင့်ကြည့်စစ်ဆေးခြင်းလုပ်ငန်းများဆောင်ရွက်ရာတွင် စစ်ဆေးရေးမှူးနှင့် တာဝန်ရှိပူးပေါင်းအဖွဲ့များသည် ကိုယ်ဝန်ဆောင်မိခင်များအတွက် နို့ဘူးနှင့်နို့မှုန့်များ၊ အခြားစားသောက်ကုန်များ၊ လူသုံးကုန်ပစ္စည်းများရောင်းချသော လုပ်ငန်းရှင်များကို သက်ဆိုင်ရာဌာနအဖွဲ့အစည်းများ၏ ထောက်ခံချက်၊ ခွင့်ပြုချက်များနှင့် မြန်မာစာကုန်အညွှန်းအမှတ်အသားဖော်ပြပါရှိပြီး တရားဝင်တင်သွင်းထားသည့် ကုန်ပစ္စည်းများကိုသာတင်သွင်းဖြန့်ဖြူးရောင်းချရန်၊ တရားမဝင်တင်သွင်းရောင်းချဖြန့်ဖြူးခြင်းမပြုရန်၊ စားသုံးသူကာကွယ်ရေးဥပဒေ အခန်း(၁၈)ပါ “ကုန်အညွှန်းအမှတ်အသားဖော်ပြခြင်း”နှင့် အခန်း(၁၀)ပါ “စီးပွားရေးလုပ်ငန်းရှင်၏တာဝန်များ” ကိုသိရှိလိုက်နာဆောင်ရွက်စေရန် အသိပညာပေးဆွေးနွေးခြင်းများဆောင်ရွက်ခဲ့ကြောင်းသိရှိရပါသည်။

DOCA(ရှမ်း)