HighLight News

     မွန်ပြည်နယ်၊ မုဒုံမြို့နယ်တွင် ရော်ဘာအထွက်နှုန်းတိုးတက်ရေးနှင့် အရည်အသွေးမြင့်မားရေးအတွက် နည်းပညာပေးဆွေးနွေးပွဲကို ၂၆-၆-၂၀၂၄ ရက်နေ့က နှစ်ရှည်ပင်များသုတေသနနှင့် နည်းပညာဖွံ့ဖြိုးရေးခြံ (မုဒုံ)ရှိ အစည်းအဝေးခန်းမဆောင်၌ ပြုလုပ်ခဲ့သည်။

      အခမ်းအနားတွင် မွန်ပြည်နယ်၊ စိုက်ပျိုးရေးဦးစီးဌာနမှ ပြည်နယ်ဦးစီးမှူး ဦးလှမိုးအောင်က အဖွင့်အမှာစကားပြောကြားခဲ့ပြီး မော်လမြိုင်ခရိုင်၊ နှစ်ရှည်ပင်များသုတေသနနှင့် နည်းပညာဖွံ့ဖြိုးရေးခြံမှ ဒုတိယညွှန်ကြားရေးမှူး ဒေါ်စမ်းစမ်းတင့်နှင့် တာဝန်ရှိသူများက ရော်ဘာအထွက်နှုန်းတိုးတက်စေရေးအတွက် ရော်ဘာစိုက်တောင်သူများလိုက်နာရမည့်အချက်၊ ရော်ဘာပင်အား မိုးကာအုပ်အစေးခြစ်ခြင်းဖြင့် အကျိုးအမြတ်ရရှိနိုင်မှု၊ ရော်ဘာမျိုးသစ်များ၏ ကြီးထွားမှုနှင့် အထွက်နှုန်းတွေ့ရှိချက်များအား ရှင်းလင်းဆွေးနွေးခဲ့သည်။

     အဆိုပါဆွေးနွေးပွဲသို့ မွန်ပြည်နယ်၊ စိုက်ပျိုးရေးဦးစီးဌာန၊ ပြည်နယ်ဦးစီးမှူးနှင့် ခရိုင်အဆင့်ဌာနဆိုင်ရာများ၊ မုဒုံမြို့နယ်၊ စားသုံးသူရေးရာဦးစီးဌာန၊ မြို့နယ်စီမံအုပ်ချုပ်ရေးအဖွဲ့နှင့် ပြည်နယ်အတွင်းရှိ ရော်ဘာစိုက်ခြံရှင်များတက်ရောက်ကြ၍ သိရှိလိုသည်များကိုမေးမြန်းရာ တာဝန်ရှိသူများက အသီးသီးပြန်လည်ဖြေကြားခဲ့ကြောင်းသိရှိရပါသည်။

DOCA(မွန်)

      မွန်ပြည်နယ်၊ ဘီးလင်းမြို့နယ်၊ စားသုံးသူရေးရာဦးစီးဌာန မြို့နယ်တာဝန်ခံရုံးမှ ဝန်ထမ်းများသည် ၂၅-၆-၂၀၂၄ ရက်နေ့တွင် ဘီးလင်းမြို့၊ ကန်သာယာရပ်ကွက်နှင့် ဇုတ်သုတ်ကျေးရွာတို့ရှိ ဆန်ဆိုင်များအား ဆန်ဈေးနှုန်းမြှင့်တင်ရောင်းချခြင်းအလို့ငှာ သိုလှောင်ခြင်း၊ ရောင်းချဖြန့်ဖြူးခြင်းရှိ/မရှိ၊ ဆန်အမျိုးအစားအလိုက် သိုလှောင်ထားမှုနှင့် အမှန်ရောင်းချနေသောဈေးနှုန်းတို့ကို ကွင်းဆင်းစစ်ဆေးခဲ့ပါသည်။ အဆိုပါစစ်ဆေးရာတွင် ဆန်ဆိုင်များ၌ ဆန်ဈေးနှုန်းမြှင့်တင်ရောင်းချခြင်းအလို့ငှာ သိုလှောင်ခြင်း၊ ရောင်းချဖြန့်ဖြူးခြင်းမရှိကြောင်းတွေ့ရှိရပြီး ဆန်ဆိုင်လုပ်ငန်းရှင်များအား ဆန်ဈေးနှုန်းမတည်ငြိမ်စေမှုဖြစ်ပေါ်စေရန် သိုလှောင်မှု၊ ရောင်းချဖြန့်ဖြူးမှုမပြုရန်အတွက် အသိပေးဆောင်ရွက်ခဲ့ကြောင်း သတင်းရရှိပါသည်။

DOCA(မွန်)

      စားသုံးသူရေးရာဦးစီးဌာန၊ မွန်ပြည်နယ်၊ သထုံခရိုင်၊ ပေါင်မြို့နယ်တာဝန်ခံသည် မြို့နယ်ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ မြို့နယ်အထွေထွေအုပ်ချုပ်ရေးဦးစီးဌာနတို့နှင့်ပူးပေါင်း၍   ၂၄-၆-၂၀၂၄ ရက်နေ့တွင် ပေါင်မြို့နယ်၊ ပေါင်ဘူတာ (အ.မ.က) ကျောင်းတွင် စားသုံးသူကာကွယ်ရေးအသိပညာပေးဟောပြောပွဲပြုလုပ်ပေးခဲ့ကြောင်းသိရှိရပါသည်။

    အဆိုပါဟောပြောပွဲတွင် စားသုံးသူရေးရာဦးစီးဌာနမှ ပေါင်မြို့နယ်တာဝန်ခံ ဦးအောင်မျိုးဦးက စားသုံးသူအခွင့်အရေးနှင့်တာဝန်များ၊ ကုန်အညွှန်းအမှတ်အသားဖော်ပြခြင်းဆိုင်ရာသိကောင်းစရာများ၊ ကုန်စည်နှင့်ဝန်ဆောင်မှုများကိုအသုံးပြုခြင်းကြောင့် စားသုံးသူထိခိုက်နစ်နာမှုများဖြစ်ပေါ်လာပါက စားသုံးသူရေးရာဦးစီးဌာနသို့ လူကိုယ်တိုင်သော်လည်းကောင်း၊ ဖုန်းဖြင့်လည်းကောင်း၊ Website Complaint System မှလည်းကောင်း၊ DOCA Myanmar Mobile Application ဖြင့်လည်းကောင်း၊ Call Center 1535 ကိုခေါ်ဆို၍လည်းကောင်း တိုင်ကြားနိုင်ခြင်းအကြောင်းကို ဟောပြောဆွေးနွေးခဲ့သည်။ အဆိုပါဟောပြောပွဲသို့ ဆရာ/ ဆရာမ၊ ကျောင်းသား/ ကျောင်းသူစုစုပေါင်း (၉၀) ဦးတက်ရောက်ခဲ့ပြီး စားသုံးသူအသိပညာပေးလက်ကမ်းစာစောင်များဖြန့်ဝေပေးခဲ့ကြောင်းသိရှိရပါသည်။

DOCA(မွန်)

    စားသုံးသူရေးရာဦးစီးဌာန၊ မွန်ပြည်နယ်၊ မော်လမြိုင်ခရိုင်ဦးစီးမှူး၊ ကျိုက်မရောမြို့နယ်တာဝန်ခံနှင့် ဝန်ထမ်းများသည် မြို့နယ်ပြန်ကြားရေးနှင့် ပြည်သူ့ဆက်ဆံရေးဦးစီးဌာနနှင့်ပူးပေါင်း၍  ၂၅-၆-၂၀၂၄ ရက်နေ့တွင် ကျိုက်မရောမြို့နယ်၊ ရှင်စောပုရပ်ကွက် (၂)အတွင်းရှိ ရပ်ကွက်နေပြည်သူများအား စားသုံးသူကာကွယ်ရေးအသိပညာပေးဟောပြောပွဲပြုလုပ်ပေးခဲ့ကြောင်းသိရှိရပါသည်။

     အဆိုပါဟောပြောပွဲတွင် စားသုံးသူရေးရာဦးစီးဌာန၊ မော်လမြိုင်ခရိုင်ဦးစီးမှူး ဒေါ်ဝါဝါမြိုင်က ဦးစီးဌာန၏မျှော်မှန်းချက်၊ ရည်မှန်းချက်တာဝန်များ၊ စားသုံးသူအကာအကွယ်ပေးရေးဥပဒေပါ ပြဋ္ဌာန်းချက်များဖြစ်သည့် စားသုံးသူအခွင့်အရေးနှင့်တာဝန်များ၊ ကုန်အညွှန်းအမှတ်အသားနှင့်ပတ်သက်သည့်အချက်များ၊ ကုန်စည်နှင့်ဝန်ဆောင်မှုများအား ရွေးချယ်ဝယ်ယူရာတွင် သတိပြုရမည့်အချက်များ၊ စားသုံးသူထိခိုက်နစ်နာဆုံးရှုံးမှုရှိပါက စားသုံးသူရေးရာဦးစီးဌာနသို့ လူကိုယ်တိုင်သော်လည်းကောင်း၊ ဖုန်းဖြင့်လည်းကောင်း၊ Website Complaint System မှလည်းကောင်း၊ DOCA Myanmar Mobile Application ဖြင့်လည်းကောင်း၊ Call Center 1535 ကို ခေါ်ဆို၍လည်းကောင်း တိုင်ကြားနိုင်ခြင်းအကြောင်း၊ တိုင်ကြားမှုအပေါ် ဖြေရှင်းဆောင်ရွက်ပေးသည့်အခြေအနေများ၊ Online Sale နှင့်ပတ်သက်သည့် သိကောင်းစရာများအား အကျယ်တဝင့်ဆွေးနွေးဟောပြောခဲ့ကြောင်းသိရှိရပါသည်။

DOCA(မွန်)

     ကော့သောင်းမြို့နယ်၊ ကော့သောင်းမြို့နယ်ဆန်စပါးလုပ်ငန်းအသင်း၏ အစည်းအဝေးခန်းမတွင် ကော့သောင်းခရိုင်၊ စားသုံးသူရေးရာဦးစီးဌာန ဒေါ်မြသီတာ (ဦးစီးအရာရှိ)သည် ၂၀၂၄ခုနှစ်၊ ဇွန်လ ၂၂ရက်နေ့၌ ဆန်လက်လီ/လက်ကားရောင်းချနေသည့် အရောင်းဆိုင်ရှင်များနှင့်တွေ့ဆုံခဲ့ကြပါသည်။

       အဆိုပါတွေ့ဆုံဆွေးနွေးရာတွင် ကော့သောင်းမြို့နယ်ဆန်စပါးလုပ်ငန်းအသင်းဥက္ကဋ္ဌ ဦးရဲမွန်က လက်လီ/လက်ကားဆန်အရောင်းဆိုင်များအား ၂၀-၆-၂၀၂၄ ရက်နေ့၌ Vitural စနစ်ဖြင့် ကျင်းပပြုလုပ်သည့် အစည်းအဝေးတွင် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ဒုတိယဝန်ကြီး၏ လမ်းညွှန်မှာကြားချက်များအား အဖွင့်အမှာစကားပြောခဲ့ပြီး၊ ကော့သောင်းခရိုင်၊ စားသုံးသူရေးရာဦးစီးဌာန၊ ဒေါ်မြသီတာ(ဦးစီးအရာရှိ) က လက်လီ/လက်ကားဆန်အရောင်းဆိုင်များ၌ အခြေခံစားသောက်ကုန်ဖြစ်သည့် ဆန်နှင့်ဆီတို့အား အရေးကြီးကုန်စည်အဖြစ် သတ်မှတ်ထားရှိကြောင်း၊ သတ်မှတ်ထားသောကုန်စည်များကို ဈေးနှုန်းမြှင့်တင်ရောင်းချခြင်း၊ ဈေးကစားရန်ရည်ရွယ်ချက်ဖြင့် သိုလှောင်ခြင်းမပြုလုပ်ရန် တားမြစ်ထားကြောင်း၊ တားမြစ်ချက်ဖောက်ဖျက်ကျူးလွန်ပါက အရေးကြီးကုန်စည်နှင့် ဝန်ဆောင်မှုဥပဒေအရလည်းကောင်း၊ စားသုံးသူကာကွယ်ရေးဥပဒေအရလည်းကောင်း အရေးယူခံရမည်ဖြစ်ကြောင်း၊ ဆန်ဆိုင်ကြီးများရှိ ဆန်သိုလှောင်ရုံများကို Online Registration စနစ်ဖြင့် Myanmar Rice Online (MyRo) တွင် မှတ်ပုံတင်ဆောင်ရွက်ရန် တွေ့ဆုံဆွေးနွေးပြောကြားခဲ့‌ကြောင်းသိရှိရပါသည်။

DOCA(တနင်္သာရီ)