HighLight News

   စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူး၏လမ်းညွှန်မှုဖြင့် သရက်ခရိုင်၊ ကံမမြို့နယ်တာဝန်ခံ ဒေါ်နွဲ့ယဉ်ဝင်း (ဒုတိယဦးစီးမှူး) သည် (၈-၂-၂၀၂၄)ရက်နေ့၊ နေ့လယ် (၁၃း၀၀)နာရီအချိန်တွင် ကံမမြို့၊ ပြန်ကြားရေးနှင့်ပြည်သူ့ဆက်ဆံရေးဦးစီးဌာန၌ အသိပညာပေး (Talk Show) ဟောပြောပွဲပြုလုပ်ဆောင်ရွက်ခဲ့ပါသည်။

     အဆိုပါဟောပြောပွဲတွင်  ကံမမြို့နယ်တာဝန်ခံက စီးပွားရေးနှင့်ကူးသန်းရောင်းဝယ်ရေးဝန်ကြီးဌာနလက်အောက်ရှိ စားသုံးသူရေးရာဦးစီးဌာနမှာ စားသုံးသူများ၏ အခွင့်အရေးများကိုအပြည့်အဝရရှိစေရန်နှင့် အကျိုးစီးပွားများကို အကာအကွယ်ပေးနေသော ဌာနကြီးတစ်ခုဖြစ်ပါကြောင်း၊ စားသုံးသူတို့တွင် စားသုံးသူအခွင့်အရေးများရှိပြီး မိမိတို့အနေဖြင့် ကုန်စည်/ဝန်ဆောင်မှုနှင့်စပ်လျဉ်း၍ မိမိတို့၏ရုပ်ပိုင်းဆိုင်ရာကိုဖြစ်စေ၊ စိတ်ပိုင်းဆိုင်ရာကိုဖြစ်စေ၊ ဂုဏ်သိက္ခာကိုဖြစ်စေ၊ နာမည်ဂုဏ်သတင်းကိုဖြစ်စေ၊ ပိုင်ဆိုင်မှုတစ်ရပ်ရပ်ကိုဖြစ်စေ၊ ဥပဒေနှင့်မညီသော ထိခိုက်နစ်နာမှုများဖြစ်ပေါ်လာလျှင်ဖြစ်စေ၊ စားသုံးသူအခွင့်အရေးများအနက် အချက်တစ်ချက်ချက်ကို ချိုးဖောက်ခံရလျှင်ဖြစ်စေ၊ စားသုံးသူနစ်နာဆုံးရှုံးမှုများဖြစ်ပေါ် လာပါက တိုင်ကြားနိုင်သည့်နည်းလမ်း(၈)ခုရှိကြောင်း၊ ၎င်းတို့မှာ (၁) ပြည်ထောင်စုနယ်မြေ၊ တိုင်းဒေသကြီး/ ပြည်နယ်ဦးစီးမှူးရုံးမျာသို့ လူကိုယ်တိုင် (သို့) စာဖြင့်ဖြစ်စေ၊ ဖုန်းဖြင့်ဖြစ်စေ၊ (၂) စားသုံးသူသတင်းပြန်ကြားရေးနှင့်တိုင်ကြားမှုလက်ခံဆောင်ရွက်ရေးစင်တာ (Consumer Information and Complaint Center CICC) များသို့ လူကိုယ်တိုင် (သို့) စာဖြင့်ဖြစ်စေ၊ ဖုန်းဖြင့်ဖြစ်စေ၊ (၃) စားသုံးသူရေးရာဦးစီးဌာန၏ Website ဖြစ်သော w. w. w. doca. gov. mm သို့လည်းကောင်း၊ (၄) စားသုံးသူရေးရာဦးစီးဌာန၏ DOCA Myanmar Mobile Application ကို Google Playstore  မှ download ရယူပြီး ဆက်သွယ်တိုင်ကြားနိုင်ခြင်း၊ (၅) စားသုံးသူရေးရာဦးစီးဌာန၏ consumer websitedoca @ gmail. com, ciccnpt @ gmail. com သို့လည်းဆက်သွယ်တိုင်ကြားနိုင်ခြင်း၊ (၆) စားသုံးသူရေးရာဦးစီးဌာန၏  Consumer Call Center No.(1535) သို့လည်းကောင်း၊ (၇) စားသုံးသူရေးရာဦးစီးဌာန၏ Facebook Page နှင့် CICC Nay Pyi Taw Facebook Page တို့သို့လည်းကောင်း၊ (၈) စားသုံးသူသမဂ္ဂအဖွဲ့ကဲ့သို့သော စားသုံးသူကာကွယ်ရေးဆိုင်ရာအသင်းအဖွဲ့များမှတစ်ဆင့်လည်း ဆက်သွယ်တိုင်ကြားနိုင်ကြောင်း အသေးစိတ်အသိပညာပေးရှင်းလင်းဆွေးနွေးပြောကြားခဲ့ကြောင်းသိရှိရပါသည်။

DOCA(မကွေး)

     မကွေးတိုင်းဒေသကြီး၊ သရက်ခရိုင်၊ ကံမမြို့နယ်ကျေးရွာများတွင် နွေစပါးစိုက်ပျိုးမည့် တောင်သူများအား တိုက်ရိုက်မျိုးစေ့ချကိရိယာ (Seeder) ပေးအပ်ပွဲအခမ်းအနားကို(၂၈-၁-၂၀၂၄) ရက်နေ့၊ နံနက်(၁၀း၀၀)နာရီအချိန်တွင်  ထန်းကောက်‌ကျေးရွာအုပ်စု၊ ထန်းကောက်ကျေးရွာ၌ ကျင်းပပြုလုပ်ခဲ့ရာ သရက်ခရိုင်စီမံအုပ်ချုပ်ရေးမှူး၊ မြို့နယ်စီမံအုပ်ချုပ်ရေးမှူးနှင့်အဖွဲ့ဝင်များ၊ မြို့နယ်အဆင့်ဌာနဆိုင်ရာအကြီးအကဲများ၊ စိုက်ပျိုးရေးဦးစီးဌာနမှဝန်ထမ်းများ၊ ကျေးရွာအုပ်စုအုပ်ချုပ်ရေးမှူးများနှင့် စာရေးဝန်ထမ်းများ၊ နွေစပါးစိုက်ပျိုးမည့် တောင်သူများတက်ရောက်ခဲ့ကြောင်းသိရှိရပါသည်။

     အခမ်းအနားတွင် သရက်ခရိုင်စီမံအုပ်ချုပ်ရေးမှူးက တိုက်ရိုက်မျိုးစေ့ချကိရိယာ (Seeder) ပေးအပ်ရခြင်းရည်ရွယ်ချက်ကို ဆွေးနွေးပြောကြားခဲ့ပြီး မြို့နယ်စီမံအုပ်ချုပ်ရေးမှူးနှင့် မြို့နယ်စိုက်ပျိုးရေးဦးစီးမှူးတို့က နွေစပါးလျာထားဧကအတိုင်း အပြည့်အဝစိုက်ပျိုးနိုင်ရေး၊ တဧကလျှင် စပါးတင်း (၁၅၀)ထွက်ရှိရေး၊ ဆာဖိုးသာစပါးမျိုးကို ပြောင်းလဲစိုက်ပျိုးနိုင်ရေး၊ စပါးအထွက်နှုန်းကောင်းမွန်သည့် မျိုးစပါးများပြောင်းလဲစိုက်ပျိုးနိုင်ရေး၊ စိုက်တမံ၏အင်္ဂါရပ်များနှင့်အညီ စိုက်ပျိုးနိုင်ရေး၊ အတန်းလိုက်စိုက်ပျိုးနိုင်‌ရေး၊ သဘာဝမြေသြဇာနှင့် ဓာတ်မြေသြဇာတွဲဖက်အသုံးပြုနိုင်ရေးတို့အတွက် ဆောင်ရွက်ထားရှိသည့် အစီအမံများကိုပြောကြားခဲ့ကြောင်းသိရှိရပါသည်။

      ထို့နောက် သရက်ခရိုင်စီမံအုပ်ချုပ်ရေးမှူး၊ မြို့နယ်စီမံအုပ်ချုပ်ရေးမှူးနှင့် တာဝန်ရှိသူများက ကျေးရွာအုပ်စုအလိုက် နွေစပါးစိုက်ပျိုးမည့် တောင်သူများလက်ဝယ်သို့ တိုက်ရိုက်မျိုးစေ့ချကိရိယာ (Seeder) များပေးအပ်ခဲ့ပါသည်။ ကံမမြို့နယ်၊ မ‌ဒေးဆည်ရေသောက်ဧရိယာအတွင်း နွေစပါးဧက (၁၇၂၇)ဧကနှင့် ခြောက်ထောင့်ဆိုလာလျှပ်စစ်ရေတင်ဧရိယာအတွင်း ဧက(၁၀၀)ဧက၊ စုစုပေါင်းဧက (၁၈၂၇)ဧကလျာထားစိုက်ပျိုးသွားမည်ဖြစ်ကြောင်း စိုက်ပျိုးရေးဦးစီးဌာနမှသိရှိရပါသည်။

DOCA(မကွေး)

    မကွေးတိုင်းဒေသကြီး၊ မင်းဘူးခရိုင်၊ ပွင့်ဖြူမြို့နယ်အတွင်းရှိ ဒေသခံတောင်သူများ၏ ဘဝဖွံ့ဖြိုးတိုးတက်စေရန်ရည်ရွယ်၍ ပွင့်ဖြူမြို့နယ်၊ တောင်သူအကျိုးပြုအသင်းအဖွဲ့၏ ကြီးမှုကျင်းပသော သီးနှံမျိုးစုံတောင်သူစုပေါင်းရောင်းချပွဲများကျင်းပပြုလုပ်နိုင်ရေး အကြိုဆွေးနွေးပွဲကို ပွင့်ဖြူမြို့နယ်၊ လက်ပနွယ်ကျေးရွာ၊ ရွာလယ်ဓမ္မာရုံတွင် (၅-၂-၂၀၂၄)ရက်နေ့၊ နံနက်(၀၉:၃၀)နာရီအချိန်တွင် ပွင့်ဖြူမြို့ နယ်ကျေးရွာအသီးသီးမှ တောင်သူများပါဝင်သော အကြိုဆွေးနွေးပွဲကျင်းပပြုလုပ်ခဲ့ကြပါသည်။

      ရှေးဦးစွာ တောင်သူအကျိုးပြုအသင်းဥက္ကဋ္ဌ ဦးမြင့်အောင်က အသင်း၏ ရှေးဆက်လက်ဆောင်ရွက်မည့်လုပ်ငန်းများအကြောင်း၊ သီးနှံစုပေါင်းရောင်းချပွဲအတွက် လိုအပ်သော ဒေတာများ၊ စုပေါင်းရောင်းချပွဲပြုလုပ်ရာမှရရှိလာသော ရလဒ်ကောင်းများ၊ သွင်းအားစုများစုပေါင်းဝယ်ယူမည့် အစီအစဉ်များ၊ စိုက်ပျိုးရေးနည်းပညာများ၊ မျိုးစေ့လိုအပ်ချက်များ၊ မြေဆီလွှာနှင့်သဘာဝပတ်ဝန်းကျင်ထိန်းသိမ်းရေးနည်းစနစ်များအကြောင်းနှင့် မြင့်မြတ်တော်ဝင်ကုမ္ပဏီမှ တာဝန်ရှိသူများက သီးနှံများအား A,B,C အဆင့်(၃)ဆင့်အပြင် Other အဆင့်ပါ ဝယ်ယူပေးမည့်အကြောင်း၊ ဝယ်ယူမည့်ကတ္တားအနေအထား၊ အချင်အတွယ်နှင့် အိတ်ခွံအလေးချိန် စသည့်အချက်များပါဝင်သော ဆွေးနွေးခြင်းများဆောင်ရွက်ခဲ့ကြပြီးနောက် မြို့နယ်တာဝန်ခံ၊ စားသုံးသူရေးရာဦးစီးဌာနမှ ဒုတိယဦးစီးမှူး ဒေါ်ဌေးဌေးဝင်းက ဘေးကင်းလုံခြုံသော သီးနှံများဖြစ်ပေါ်လာစေရေးနှင့် ဈေးနှုန်း၊ ဈေးကွက်အနေအထားများအပြင် စားသုံးသူအခွင့်အရေးနှင့်တာဝန်များအကြောင်း၊ နစ်နာဆုံးရှုံးမှုများဖြစ်ပေါ်လာပါက တိုင်ကြားနိုင်သော နည်းလမ်းများအကြောင်းကို ဆွေးနွေးဟောပြာခဲ့ပါသည်။

       အဆိုပါဆွေးနွေးဟောပြောပွဲတွင် တောင်သူ(၅၀)ဦးနှင့် မြင့်မြတ်တော်ဝင်ကုမ္ပဏီမှ တာဝန်ရှိသူများနှင့် စားသုံးသူရေးရာဦးစီးဌာနမှဝန်ထမ်းများတက်ရောက်ခဲ့ကြကြောင်းသိရှိရပါသည်။

DOCA(မကွေး)

    မကွေးတိုင်းဒေသကြီး၊ မင်းဘူးခရိုင်၊ မင်းဘူးမြို့နယ်၊ ဦးဩဘာသခန်းမ၌ မကွေးတိုင်းဒေသကြီးအစိုးရအဖွဲ့၏ စီစဉ်ကြီးကြပ်မှုဖြင့် နိုင်ငံ့ဝန်ထမ်းပင်စင်စားများအား ကျန်းမာရေး စောင့်ရှောက်မှုပေးခြင်း၊ အာဟာရကျွေးမွေးခြင်းနှင့် အခြေခံစားသောက်ကုန်များပေးအပ်ခြင်း အခမ်းအနားကျင်းပပြုလုပ်ခဲ့ပါသည်။

     အဆိုပါ အခမ်းအနားအား (၆-၂-၂၀၂၄)ရက်နေ့၊ နံနက်(၁၀:၀၀)နာရီအချိန်တွင် စတင်ကျင်းပခဲ့ပြီး ခရိုင်ဥက္ကဋ္ဌနှင့် စီမံအဖွဲ့ဝင်များ၊ မြို့နယ်ဥက္ကဋ္ဌနှင့်စီမံအဖွဲ့ဝင်များ၊ ဌာနဆိုင်ရာ အကြီးအကဲများ၊ ခရိုင်အမျိုးသမီးရေးရာအဖွဲ့ဝင်များ၊ မြို့နယ်အမျိုးသမီးရေးရာအဖွဲ့ဝင်များ၊ NGO အဖွဲ့ဝင်များနှင့် အမှတ်(၁/၂/၃/၄)မှ နိုင်ငံ့ဝန်ထမ်းပင်စင်စားများ၊  ထောက်ရှာပင်ကျေးရွာရှိ နိုင်ငံ့ဝန်ထမ်းပင်စင်စားများတက်ရောက်ခဲ့ကြပါသည်။ အခမ်းအနားတွင် ခရိုင်စီမံဥက္ကဋ္ဌ ဦးထွန်းထွန်းဝင်းက အဖွင့်အမှာစကားပြောကြားခဲ့ပြီးနောက် နိုင်ငံ့ဝန်ထမ်းပင်စင်စားများအား ထောက်ပံ့ရေးပစ္စည်းများပေးအပ်ခြင်းဆောင်ရွက်ခဲ့ကာ နိုင်ငံ့ဝန်ထမ်းပင်စင်စားသုံးထောင်ကျော်က လက်ခံရယူခဲ့ပါသည်။ နိုင်ငံ့ဝန်ထမ်းပင်စင်စားများကိုယ်စား အမှတ်(၂)ရပ်ကွက်မှ ပင်စင်စားတစ်ဦးက ကျေးဇူးတင်စကားပြောကြားခဲ့ပါသည်။ ၎င်းနောက် ပင်စင်စားများအား အာဟာရကျွေးမွေးခြင်းနှင့် ကျန်းမာရေးစောင့်ရှောက်မှုများပြုလုပ်ပေးခဲ့ကြောင်းသိရှိရပါသည်။

DOCA(မကွေး)

    မကွေးတိုင်းဒေသကြီး၊ ချောက်ခရိုင်၊ ချောက်မြို့နယ်၊ အုံမြားကြီးကျေးရွာ၊ အခြေခံပညာအထက်တန်းကျောင်း(ခွဲ)၌ ဌာနဆိုင်ရာများပူးပေါင်း၍ (၂-၂-၂၀၂၄) ရက်နေ့၊ နံနက်(၁၀:၀၀)နာရီအချိန်တွင် အသိပညာပေးဟောပြောပွဲကျင်းပပြုလုပ်ခဲ့ပါသည်။

     ရှေးဦးစွာ ကျောင်းအုပ်ဆရာမကြီး ဒေါ်ဌေးဌေးဝင်းက အဖွင့်အမှာစကားပြောကြားခဲ့ပြီး ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ ဦးစီးအရာရှိ ဒေါ်သိမ့်ဝါက “စာရိတ္တမဏ္ဍိုင်ကြံ့ခိုင်ပါစေ” ခေါင်းစဉ်ဖြင့်လည်းကောင်း၊ မြို့နယ်ဘေးအန္တရာယ်ဆိုင်ရာစီမံခန့်ခွဲမှုဦးစီးဌာန၊ လက်ထောက်ညွှန်ကြားရေးမှူး ဦးစောမြဖောင်းက “သဘာဝဘေးအန္တရာယ်အကြောင်းသိကောင်းစရာ” ခေါင်းစဉ်ဖြင့်လည်းကောင်း၊ မြို့နယ်စားသုံးသူရေးရာဦးစီးဌာန၊ မြို့နယ်တာဝန်ခံ ဒေါ်မြတ်မြတ်မိုးက “စားသုံးသူအခွင့်အရေးဆိုင်ရာအသိပညာပေး” ခေါင်းစဉ်ဖြင့်လည်းကောင်း၊ မြို့နယ်ပတ်ဝန်းကျင်ထိန်းသိမ်းရေးဦးစီးဌာန၊ မြို့နယ်တာဝန်ခံ ဒေါ်ဆုဆုဇင်က “ရာသီဥတုပြောင်းလဲမှုနှင့် လူနေမှုဘဝ” ခေါင်းစဉ်ဖြင့်လည်းကောင်း အသီးသီးပြောကြားခဲ့ကြပြီး သက်ဆိုင်ရာဌာနအလိုက် အသိပညာပေးလက်ကမ်းစာစောင်များဖြန့်ဝေပေးခဲ့ကြောင်းသိရသည်။

      ၎င်းနောက် မူလတန်းအဆင့်ကျောင်းသား/ ကျောင်းသူလေးများအား မြို့နယ်ပြန်ကြားရေးနှင့်ပြည်သူ့ဆက်ဆံရေးဦးစီးဌာနဝန်ထမ်းများက ပုံပြင်ပြောပြခြင်း၊ ဉာဏ်စမ်းအမေး/ အဖြေမေးမြန်းခြင်းများနှင့် မြို့နယ်ပတ်ဝန်းကျင်ထိန်းသိမ်းရေးဦးစီးဌာနဝန်ထမ်းများက သဘာဝပတ်ဝန်းကျင်ဆိုင်ရာသိကောင်းစရာများကို အသိပညာပေးခြင်းများဆောင်ရွက်ခဲ့ကြောင်းသိရပါသည်။

     အဆိုပါအသိပညာပေးဟောပြောပွဲတွင် ကျောင်းအုပ်ဆရာမကြီး ဒေါ်ဌေးဌေးဝင်းနှင့် ဆရာ/ ဆရာမ၊ ကျောင်းသား/ ကျောင်းသူစုစုပေါင်း (၂၂၅)ဦးတက်ရောက်ခဲ့ကြောင်း သိရှိရပါသည်။

DOCA(မကွေး)