HighLight News

    ရန်ကုန်တိုင်းဒေသကြီး၊ တရားမဝင်ကုန်သွယ်မှုတိုက်ဖျက်ရေးအထူးအဖွဲ့၏ ညွှန်ကြားချက်အရ ခရိုင်အထွေထွေအုပ်ချုပ်ရေးဦးစီးဌာနမှ ဒုတိယမြို့နယ်အုပ်ချုပ်ရေးမှူး ဦးသက်နိုင်ဝင်း၊ စားသုံးသူရေးရာဦးစီးဌာန၊ အရှေ့ပိုင်းခရိုင်ဦးစီးမှူးရုံးမှ ဒုတိယဦးစီးမှူး ဒေါ်လဲ့လဲ့ဌေး၊ ကုန်သွယ်ရေးဦးစီးဌာနမှ လက်ထောက်ညွှန်ကြားရေးမှူး ဦးဦးသန့်၊ သတ္ထုတွင်းဦးစီးဌာနမှ လက်ထောက်ညွှန်ကြားရေးမှူး ဒေါ်ဖြူဖြူဆွေ၊ စက်မှုကြီးကြပ်ရေးနှင့်စစ်ဆေးရေးဦးစီးဌာနမှ လက်ထောက်ညွှန်ကြားရေးမှူး ဦးအာကာထွန်း၊ အမှတ်(၃) ရေကြောင်းရဲကွက်ကဲမှုအဖွဲ့ခွဲမှ ဒုတိယရဲမျူးနိုင်လင်းနှင့်   အကောက်ခွန်ဦးစီးဌာနမှ အကောက်ခွန်မှူး ဦးအောင်နိုင်ဦးတို့ပါဝင်သောအဖွဲ့များသည် (၉-၂-၂၀၂၄) ရက်နေ့၊ နံနက် (၁၀:၀၀)နာရီအချိန်တွင် သာကေတမြို့နယ်ရှိ ( 5Star ) ဆိပ်ကမ်း သို့သွားရောက်စစ်ဆေးခဲ့ကြောင်းသိရှိရပါသည်။

      အဆိုပါ (5Star) ဆိပ်ကမ်းတွင် ဆိုက်ကပ်ထားသော MV, MCL 3 ရေယာဉ်ဖြင့် ရန်ကုန်မြို့မှ ကော့သောင်းမြို့သို့ပို့ဆောင်မည့် Aluminum Scrap UBC များကိုစစ်ဆေးခဲ့ရာ Aluminum Scrap UBC သည် ကုန်သွယ်ရေးဦးစီးဌာနမှ ပို့ကုန်လိုင်စင်နှင့် သက်ဆိုင်ရာဌာနများ၏ ထောက်ခံချက်များကိုလည်းရယူထားခြင်းဖြစ်ကြောင်းစိစစ်တွေ့ရှိခဲ့သဖြင့် တရားဝင်ကုန်စည်များသာဖြစ်ကြောင်းနှင့် အဆိုပါကုန်ပစ္စည်းများကို Multi Resources Co., Ltd နှင့် Water Front Co., Ltd တို့မှ တင်ပို့ခြင်းဖြစ်ကြောင်းသိရှိရပါသည်။

DOCA(ရန်ကုန်)

    ရန်ကုန်တိုင်းဒေသကြီး၊ တရားမဝင်ကုန်သွယ်မှုတိုက်ဖျက်ရေးအထူးအဖွဲ့သည် ရန်ကုန်တိုင်းဒေသကြီး၏ သက်ဆိုင်ရာဧရိယာအတွင်း တရားမဝင်ကုန်သွယ်မှုတိုက်ဖျက်ရေးလုပ်ငန်းများ အကောင်အထည်ဖော်ဆောင်ရွက်နိုင်ရေးအတွက် အသေးစိတ်စီမံချက်များရေးဆွဲဆောင်ရွက်လျက်ရှိရာ စားသုံးသူရေးရာဦးစီးဠာန၊ ရန်ကုန်အရှေ့ပိုင်းခရိုင်အတွင်း၌လည်း ခရိုင်အဆင့်ဖွဲ့စည်းထားသဖြင့် သက်ဆိုင်ရာဌာနများနှင့်ပူးပေါင်း၍ ကုန်သွယ်မှု/ ကုန်စည်စီးဆင်းမှုများအပေါ်  သတ်မှတ်ထားသည့် လုပ်ငန်းစဉ်များအတိုင်း အကောင်အထည်ဖော်လုပ်ကိုင်ဆောင်ရွက်လျက်ရှိပါသည်။

    ထိုသို့ဆောင်ရွက်စဉ်အတွင်း  ခရိုင်တရားမဝင်ကုန်သွယ်မှုတိုက်ဖျက်ရေးအဖွဲ့ဝင်များဖြစ်သော မြန်မာနိုင်ငံရဲတပ်ဖွဲ့မှတာဝန်ရှိသူများ၊ မီးရထားမှတာဝန်ရှိသူများ၊ စားသုံးသူရေးရာဦးစီးဌာန၊ အရှေ့ပိုင်းခရိုင်ဦးစီးမှူးရုံးမှတာဝန်ရှိသူများ၊ ရန်ကုန်ဘူတာကြီးမှ လုံခြုံရေးတပ်ဖွဲ့ဝင်များပူးပေါင်း၍ ဗိုလ်တထောင်ခရိုင်၊ မင်္ဂလာတောင်ညွန့်မြို့နယ်၊ ရန်ကုန်ဘူတာကြီးသို့ (၁၃-၂-၂၀၂၄) ရက်နေ့၊ နံနက် (၀၄:၀၀) နာရီအချိန်၌ မန္တလေးဘူတာကြီးမှထွက်ခွာလာခဲ့သည့် ရထားအမှတ်- 2DN (အစုန်) ကိုသွားရောက်စစ်ဆေးရာ အဆိုပါရထားမှာ ဘူတာကြီးသို့ ည (၁၀:၀၀) နာရီအချိန်တွင် ဆိုက်ကပ်ခဲ့ကြောင်း၊ ၎င်းနောက် ရထားတွဲပေါ်တွင်ပါလာသည့် ပါဆယ်ထုပ်များကို  (၁၄-၂-၂၀၂၄) ရက်နေ့၊ နံနက် (၁၀:၀၀) နာရီအချိန်တွင် အဖွဲ့စုံရှေ့၌ ဖွင့်ဖောက်စစ်ဆေးခဲ့ရာ တရားမဝင်ကုန်ပစ္စည်းများကို သယ်ဆောင်လာခြင်းမရှိကြောင်းသိရှိရပါသည်။

DOCA(ရန်ကုန်)

    စားသုံးသူရေးရာဦးစီးဌာန၊ ရန်ကုန်အရှေ့ပိုင်းခရိုင်ဦးစီးမှူးရုံးမှ ခရိုင်ဦးစီးမှူး ဦးလှစိုးနှင့်ဝန်ထမ်းများ၊ အစားအသောက်နှင့်ဆေးဝါးကွက်ကဲရေးဦးစီးဌာန၊ မြို့နယ်ပြည်သူ့ကျန်းမာရေးဦးစီးဌာန၊ မြို့နယ်အထွေထွေအုပ်ချုပ်ရေးဦးစီးဌာန၊ အထူးစုံစမ်းစစ်ဆေးရေးအဖွဲ့များပူးပေါင်း၍    (၈-၂-၂၀၂၄) ရက်နေ့၊ နေ့လယ် (၁၃:၃၀) နာရီအချိန်တွင် မင်္ဂလာတောင်ညွန့်မြို့နယ်အတွင်းရှိ Medilink Co., Ltd, Asia Health & Wealth Co., Ltd , Shwin Lann Co., Ltd စသည့်  ဆေးဝါးနှင့်ဆေးပစ္စည်းများရောင်းချနေသော ဆေးကုမ္ပဏီများသို့ ရှောင်တခင်ဝင်ရောက်စစ်ဆေးခဲ့ကြောင်းသိရှိရပါသည်။

       အဆိုပါဆေးကုမ္ပဏီများသို့ ရှောင်တခင်ဝင်ရောက်စစ်ဆေးခဲ့ရာတွင် စားသုံးသူပြည်သူများအနေဖြင့် ဆေးနှင့်ဆေးပစ္စည်းများကိုဝယ်ယူသုံးဆွဲရာတွင်  ဆေးဝါးများပြတ်လပ်မှုမရှိစေရေးနှင့် ဆေးကုမ္ပဏီများအနေဖြင့် ဆေးဈေးနှုန်းများအဆမတန်မြှင့်တင်ရောင်းချခြင်းရှိ/မရှိ၊ ဈေးကစားရန်ရည်ရွယ်ချက်ဖြင့် ဆေးဝါးများသိုလှောင်ထားခြင်းရှိ/မရှိ၊  ဈေးကွက်အတွင်းသို့ ကုန်ပစ္စည်းများ နေ့စဉ်ပုံမှန်ထုတ်ပေးခြင်း/ ဖြန့်ဝေပေးခြင်း၊ ဆေးလက်ကျန်များကိုစစ်ဆေးခြင်းနှင့် လုပ်ငန်းများဆက်လက်လုပ်ကိုင်ခြင်းရှိ/မရှိအခြေအနေတို့ကိုစစ်ဆေးခဲ့ကြောင်းသိရှိရပါသည်။

DOCA(ရန်ကုန်)

     စားသုံးသူရေးရာဦးစီးဌာန၊ မြောက်ပိုင်းခရိုင်ဦးစီးမှူးရုံးမှ ဒေါ်တင်တင်ဌေး (ရုံးအုပ်)၊ ဒေါ်ဖြူဖြူမြင့် (ဒုကြီးကြပ်ရေးမှူး)၊ ကျန်းမာရေးဦးစီးဌာနမှ ကျန်းမာရေးမှူး ဦးမြင့်ထွေး၊ ရန်ကုန်မြို့ တော်စည်ပင်သာယာရေးကော်မတီမှ ဈေးတာဝန်ခံ ဦးဝေဝင်းအောင်တို့သည် ၂၀၂၄ခုနှစ်၊ ဖေဖေါ်ဝါရီလ (၁၃)ရက်နေ့တွင် တိုက်ကြီးနှင့်မှော်ဘီမြို့နယ်ရှိဈေးများသို့ ကွင်းဆင်းစစ်ဆေးခဲ့ကြပါသည်။

    ထိုသို့စစ်ဆေးခဲ့ရာတွင် တိုက်ကြီးနှင့်မှော်ဘီမြို့နယ်မှ ကျန်းမာရေးဦးစီးဌာန၊ ဈေးတာဝန်ခံများနှင့်  တိုက်ကြီးမြို့နယ်နှင့် မှော်ဘီမြို့နယ်များရှိ မြို့မဈေးအတွင်းရှိ ကုန်စုံဆိုင်များတွင်ရောင်းချနေသော ကလေးအာဟာရဖြည့်စွက်စာအမျိုးမျိုးဖြစ်သည့် Similac, Gold Power, Pediasure, Dupro (1),DG-2  နှင့် စားသုံးဆီအမျိုးမျိုးဖြစ်သော ရွှေနန်းထိုက်၊ အမေထွား၊ ရန်ကုန်၊ ရွှေအုံ၊ Cook၊ Goody၊ Lotus၊ Sunar၊ Meizan၊ Yarthetpan အစရှိသော စားသုံးဆီအမျိုးမျိုးတို့တွင် ကုန်စည်အမျိုးအစားအလိုက် သတ်မှတ်ချက်များနှင့်အညီ သိသာထင်ရှားစွာဖော်ပြပါရှိ ရရမည့်အချက်များနှင့် ကုန်အညွှန်းအမှတ်အသားဖော်ပြခြင်းနှင့်ကိုက်ညီသည့် ကုန်စည်များကိုသာဝယ်ယူရောင်းချရန်လိုအပ်ကြောင်းအသိပညာပေးပြောကြားခဲ့ပြီးနောက် ကုန်အညွှန်းအမှတ်အသားတွင် ဖော်ပြရမည့်အချက်များပြည့်စုံစွာပါဝင်ခြင်းရှိ/မရှိကိုစစ်ဆေးခဲ့ရာ ပြည့်စုံမှုရှိကြောင်း စစ်ဆေးတွေ့ရှိခဲ့ပါသည်။

DOCA(ရန်ကုန်)

     ရန်ကုန်တိုင်းဒေသကြီး၊ စားသုံးသူရေးရာဦးစီးဌာန၊ တောင်ပိုင်းခရိုင်ဦးစီးမှူးရုံးလက်အောက်ရှိ စားသုံးသူရေးရာဦးစီးဌာန၊ ပြန်ကြားရေးနှင့်ပြည်သူ့ဆက်ဆံရေးဦးစီးဌာနနှင့် မြန်မာတိုင်းရင်ဆေးဦးစီးဌာနတို့ပူးပေါင်း၍ ၂၀၂၄ခုနှစ်၊ ဖေဖော်ဝါရီလ (၉)ရက်နေ့၊ နံနက်(၁၀:၀၀)နာရီအချိန်တွင် စားသုံးသူပြည်သူများအား စားသုံးသူကာကွယ်ရေးအသိပညာပေးရေးလုပ်ငန်းနှင့် စာဖတ်ရှိန်မြှင့်တင်ရေးလုပ်ငန်းများကို စဉ်ဆက်မပြတ်ဆောင်ရွက်လျက်ရှိရာ ရန်ကုန်တိုင်းဒေသကြီး၊ ခရမ်းမြို့နယ်၊ တမံကြီးကျေးရွာရှိ အ.ထ.က (ခွဲ) စာသင်ကျောင်း၌လည်း အသိပညာပေး ဟောပြောပွဲကျင်းပခဲ့ကြောင်းသိရပါသည်။

     အဆိုပါဟောပြောပွဲတွင် စားသုံးသူရေးရာဦးစီးဌာနမှ မြို့နယ်တာဝန်ခံက စားသုံးသူများဘေးအန္တရာယ်ကင်းရှင်းစေရေးနှင့် ထုတ်ကုန်များလုံခြုံစိတ်ချရမှုရှိစေရေးအတွက် စားသုံးသူ၏ အခွင့်အရေးနှင့်တာဝန်များ၊ ကုန်စည်တွင်ဖော်ပြပါရှိရမည့် ကုန်အညွှန်းအမှတ်အသားဖော်ပြရာတွင် မြန်မာဘာသာဖြင့် မဖြစ်မနေဖော်ပြပါရှိရမည့်အချက်များ၊ စားသုံးသူများအမှန်တကယ် နစ်နာဆုံးရှုံးမှုများရှိလာပါက တိုင်ကြားနိုင်သည့်နည်းလမ်းများ၊ ကျောင်းသား/ ကျောင်းသူများအနေဖြင့် မြန်မာဘာသာဖြင့် ကုန်အညွှန်းအမှတ်အသားဖော်ပြပါရှိသည့် စားသောက်ကုန်များ ကိုသာ ကြည့်ရှုစစ်ဆေးပြီးမှ ဝယ်ယူသုံးစွဲကြရန်၊ ဆိုးဆေးအများအပြားသုံးစွဲထားသော အစားအသောက်များကို အားပေးဝယ်ယူသုံးစွဲခြင်းများမပြုလုပ်ကြရန်၊ ဈေးကွက်အတွင်း တရားမဝင်ကုန်စည်များအား ဈေးကွက်စောင့်ကြည့်ကွင်းဆင်းစစ်ဆေးခြင်းများကို မိမိတို့၏ဌာနအနေဖြင့် စဉ်ဆက်မပြတ်ဆောင်ရွက်လျက်ရှိကြောင်း စသည်တို့ကို အသိပညာပေးဆွေးနွေးဟောပြောခဲ့ပြီး ဆက်လက်၍ မြန်မာတိုင်းရင်းဆေးဦးစီးဌာန၊ မြို့နယ်ဦးစီးမှူးက နိုင်ငံတော်အနေဖြင့် တိုင်းရင်းဆေးများကို အဆင့်မြှင့်တင်နိုင်ရေးအတွက် လမ်းညွှန်မှာကြားထားကြောင်း၊ ယခုအချိန်တွင်မိမိတို့ဌာနအနေဖြင့် အရည်အသွေးမြင့်တိုင်းရင်းဆေးများကိုထုတ်လုပ်ဖြန့်ဖြူးရောင်းချပေးလျက်ရှိကြောင်းတို့ကိုအသိပညာပေးဟောပြောခဲ့ပြီး ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ ဦးစီးမှူးကလည်း ပြည်သူများအနေဖြင့် အသိပညာဗဟုသုတတိုးပွားစေရန်ရည်ရွယ်၍ ပြည်သူ့စာကြည့်တိုက် Online page မှတစ်ဆင့် စာအုပ်မိတ်ဆက်ပုံပြောခြင်း၊ ကဗျာရွတ်ခြင်း၊ အပြင်စာအုပ်များငှားရမ်းပေးခြင်း၊ စာအုပ်ပြပွဲ၊ ပြိုင်ပွဲများပြုလုပ်ပေးခြင်းနှင့် စာပေများကို အဆက်မပြတ်လေ့လာဖတ်ရှုကြရန်နှင့် စာအုပ်၊ စာစောင်များလေ့လာဖတ်ရှုခြင်းကြောင့် ကိုယ်တိုင်စဉ်းစားတွေးခေါ်တတ်သော အတွေးအခေါ်အမြော်အမြင်များရရှိလာပြီး ဘေးကင်းလုံခြုံစိတ်ချရသော အစားအသောက်များကို ရွေးချယ်ဝယ်ယူစားသောက်နိုင်မည်ဖြစ်သောကြောင့် မိမိတို့ဌာနအနေဖြင့် စာဖတ်ရှိန်မြှင့်တင်ရေးအသိပညာပေးခြင်းလုပ်ငန်းအစီအစဉ်ကိုလည်း စားသုံးသူရေးရာဦးစီးဌာနနှင့်ပူးပေါင်း၍ စဉ်ဆက်မပြတ်ဆက်လက်ဆောင်ရွက်သွားမည်ဟုပြောကြားခဲ့ကြောင်း သိရှိရပါသည်။

DOCA(ရန်ကုန်)