HighLight News

     စားသုံးသူရေးရာဦးစီးဌာန၊ ပဲခူးတိုင်း‌ဒေသကြီဦးစီးမှူးရုံးရှိ ထုတ်ကုန်လုံခြုံစိတ်ချရမှုဌာနခွဲတာဝန်ခံ ဦးကျော်ဆန်းဝင်း (ဦးစီးမှူး) နှင့် ပဲခူးခရိုင်၊ ပဲခူးမြို့နယ်တာဝန်ခံ ဦးစိုးဝင်းတို့သည် ၂၀၂၄ခုနှစ်၊ ဇန်နဝါရီလ ၂၉ရက်နေ့၊ နံနက် (၁၁:၀၀) နာရီအချိန်တွင် သနပ္ပင်မြို့နယ်၊ စည်ပင်သာယာရေးအဖွဲ့၊ သနပ္ပင်ဈေးတာဝန်ခံတို့နှင့်ပူးပေါင်း၍ သနပ္ပင်မြို့ရှိ စားသုံးဆီအရောင်းဆိုင်များသို့ သွားရောက်၍ စားသုံးဆီများကို သတ်မှတ်ရည်ညွှန်းဈေးနှုန်းဖြင့်ရောင်းချခြင်းရှိ/မရှိ ဈေးကွက်စောင့်ကြည့်စစ်ဆေးခဲ့ကြပါသည်။

       ဌာနဆိုင်ရာပူးပေါင်းအဖွဲ့သည် သနပ္ပင်မြို့၊ ဈေးအတွင်းနှင့် ဈေးပြင်ပရှိ ရပ်ကွက်ကုန်စုံဆိုင်များတွင်ရောင်းချသော စားသုံးဆီများအား သတ်မှတ်ရည်ညွှန်းဈေးနှုန်းဖြင့် ရောင်းချခြင်းရှိ/မရှိတို့ကိုလည်းကောင်း၊ စားသုံးဆီဘူးများပေါ်တွင် မြန်မာဘာသာဖြင့် ကုန်အညွှန်းအမှတ်အသားပြည့်စုံမှုရှိ/မရှိတို့ကိုလည်းကောင်း စစ်ဆေးခဲ့ပြီးနောက် ဌာနအနေဖြင့် ရောင်းချသူများအား ဟင်းသီးဟင်းရွက်ဆီနှင့်စပ်လျဉ်း၍ ကုန်အညွှန်းအမှတ်အသားဖော်ပြရာတွင် စီးပွားရေးလုပ်ငန်းရှင်များလိုက်နာဆောင်ရွက်ရန်အတွက် ညွှန်ကြားချက်များကိုပြောကြားခဲ့ပြီး စားသုံးသူများနစ်နာဆုံးရှုံးမှုများမဖြစ်ပေါ်စေရေး စားသုံးသူကာကွယ်ရေးဥပဒေပါပြဋ္ဌာန်းချက်များ၊ ညွှန်ကြားချက်များနှင့်အညီဆောင်ရွက်ရန်လိုအပ်ကြောင်း အသိပေးပြောကြားခဲ့မှုကိုသိရှိရပါသည်။

DOCA(ပဲခူး)

   စားသုံးသူရေးရာဦးစီးဌာန၊ ရန်ကုန်အရှေ့ပိုင်းခရိုင်ဦးစီးမှူးအနေဖြင့် ခရိုင်အတွင်းမြို့နယ်များရှိ စက်သုံးဆီအရောင်းဆိုင်များ၏ နေ့စဉ်ရောင်းချနေသော စက်သုံးဆီဈေးနှုန်းများသည် PPRD မှ ထုတ်ပြန်ထားသော ရည်ညွှန်းဈေးအတိုင်းရောင်းချခြင်းရှိ/မရှိနှင့် စက်သုံးဆီပြတ်လပ်မှုရှိ/မရှိတို့၏ အခြေအနေများကို တိုင်းဒေသကြီးဦးစီးမှူးရုံးသို့ ပေးပို့တင်ပြလျက်ရှိပါသည်။

     ထိုသို့ဆောင်ရွက်လျက်ရှိရာ ရန်ကုန်အရှေ့ပိုင်းခရိုင်ဦးစီးမှူးရုံးမှ တာဝန်ရှိသူများသည် (၂၆-၁-၂၀၂၄) ရက်နေ့၊ နံနက် (၉:၃၀) နာရီအချိန်တွင် သာကေတမြို့နယ်၊ မင်္ဂလာတောင်ညွန့်မြို့နယ်၊  ပုဇွန်တောင်မြို့နယ်၊ တာမွေမြို့နယ်၊ တောင်ဥက္ကလာပမြို့နယ်၊ သင်္ဃန်းကျွန်းမြို့နယ်တို့ရှိ စက်သုံးဆီအရောင်းဆိုင်များသို့လည်းကောင်း၊ (၂၉-၁-၂၀၂၄) ရက်နေ့၊ နံနက် (၀၉း၃၀) နာရီအချိန်တွင် အရှေ့ဒဂုံမြို့နယ်၊ တောင်ဒဂုံမြို့နယ်၊ မြောက်ဒဂုံမြို့နယ်တို့ရှိ စက်သုံးဆီအရောင်းဆိုင်များသို့လည်းကောင်း သွားရောက်ကာ ဆိုင်တာဝန်ခံများနှင့်တွေဆုံ၍ PPRD မှထုတ်ပြန်ထားသည့် ရည်ညွှန်းဈေးအတိုင်း ရောင်းချခြင်းရှိ/မရှိ၊ ဆီကန်ဝင်ဆံ့နိုင်မှုပမာဏ၊ ဆီပြတ်လပ်ခြင်းရှိ/မရှိ၊ Terminal များမှ ဆီထုတ်ယူမှုအခြေအနေ၊ ဆီဘောက်ဆာကားများပုံမှန်ဝင်ရောက်နိုင်ခြင်းရှိ/မရှိ တို့ကိုမေးမြန်းခဲ့ရာ ဆိုင်တာဝန်ခံများက ရည်ညွှန်းဈေးအတိုင်း ရောင်းချလျက်ရှိကြောင်း၊ ဆီဘောက်ဆာကားများမှာ ပုံမှန်ဝင်ရောက်လျက်ရှိကြောင်းတွေ့ရှိခဲ့ရပါသည်။ စက်သုံးဆီဆိုင်များ၏ သတ်မှတ်စည်းကမ်းချက်များနှင့်အညီ ရောင်းချစေရေး၊ မီးဘေးအန္တရာယ်ကြိုတင်ကာကွယ်ရေးနှင့် စားသုံးသူကာကွယ်ရေးဥပဒေပါ စီးပွားရေးလုပ်ငန်းရှင်တာဝန်များနှင့်အညီ လုပ်ကိုင်ဆောင်ရွက်စေလိုကြောင်း အသိပညာပေးပြောကြားခဲ့မှုကိုသိရှိရပါသည်။

DOCA(ရန်ကုန်)

     စားသုံးသူရေးရာဦးစီးဌာန၊ အရှေ့ပိုင်းခရိုင်ဦးစီးမှူးရုံးမှ တာဝန်ရှိသူများသည် (၂၄-၁-၂၀၂၄) ရက်နေ့၊ နေ့လယ် (၁၂:၀၀) နာရီခန့်အချိန်တွင် ဒဂုံဆိပ်ကမ်းမြို့နယ်၊ ယုဇနဥယျာဉ်မြို့တော်၊ ဈေးစည်ပင်ရုံး၌ ဈေးသူ‌/ဈေးသားများအား စားသုံးသူကာကွယ်ရေးအသိပညာပေးဟောပြောပွဲပြုလုပ်ခဲ့ကြောင်းသိရှိရပါသည်။

    အဆိုပါဟောပြောပွဲတွင် ဒဂုံမြို့သစ်မြို့နယ်တာဝန်ခံ ဦးနေလင်း (ဒုကြီးကြပ်ရေးမှူး) က စားသုံးသူကာကွယ်ရေးဥပဒေအကြောင်းကိုလည်းကောင်း၊ ဥပဒပါ စီးပွားရေးလုပ်ငန်းရှင်က တာဝန် ယူရမည့် အချက် (၁၁) ချက်ကိုလည်းကောင်း၊ အသေးစိတ်ပြောကြားခဲ့ပြီး ကုန်စည်နှင့်စပ်လျဉ်း၍ အာမခံပေးခြင်း၊ အာမခံပေးထားမှုအပေါ် စားသုံးသူကလည်း တောင်းဆိုနိုင်သည့်အခွင့်အရေးများရှိကြောင်း၊ မိမိတို့သည် စီးပွားရေးလုပ်ငန်းရှင်ဟုဆိုသော်လည်း စားသုံးသူလည်းဖြစ်သည့်အတွက် နစ်နာဆုံးရှံးမှုများဖြစ်ပါက ကုစားခွင့်ရှိကြောင်း၊ ကုန်ညွှန်းအမှတ်အသားဖော်ပြခြင်းနှင့်စပ်လျဉ်း၍ စီးပွားရေးလုပ်ငန်းရှင်မှာ တာဝန်ရှိကြောင်း၊ ဥပဒေပါပြစ်မှုပြစ်ဒဏ်များအကြောင်း၊ နစ်နာဆုံးရှံးမှုများရှိပါက အလွယ်တကူတိုင်ကြားနိုင်ရန် စားသုံးသူသတင်းပြန့်ကြားရေးနှင့်တိုင်ကြားမှုလက်ခံဆောင်ရွက်ရေးစင်တာ ( CICC ) ရုံးခန်းများကို သက်ဆိုင်ရာစားသုံးသူရေးရာဦးစီးဌာန၊ ခရိုင်ရုံးများတွင် ဖွင့်လှစ်ထားသည့်အတွက် လာရောက်တိုင်ကြားနိုင်ကြောင်း ဟောပြောခဲ့ပါသည်။ ဟောပြောပွဲကို ဈေးတာဝန်ခံနှင့် အတူဝန်ထမ်း ( ၂ )ဦး၊ ဈေးသူ/ဈေးသား (၁၅) ဦးတက်ရောက်ခဲ့ပြီး စားသုံးသူအသိပညာပေးလက်ကမ်းစာစောင်များဖြန့်ဝေပေးခဲ့ကြောင်း သိရှိရပါသည်။

DOCA(ရန်ကုန်)

    ရန်ကုန်တိုင်းဒေသကြီး၊ တိုက်ကြီးမြို့နယ်၊ မြို့မဈေးတွင် စားသုံးသူကာကွယ်ရေးဆိုင်ရာအသိပညာပေးခြင်း၊ စားသုံးဆီ၊ စားအုန်းဆီရောင်းချမှုများကို သိရှိလိုက်နာစေရန်အတွက် မြို့မဈေးအတွင်း စီးပွားရေးလုပ်ငန်းရှင် ဆီရောင်းချသူများနှင့်ဆွေးနွေးခဲ့ပါသည်။ အပတ်စဉ်ကွင်းဆင်းဆောင်ရွက်မှုများကို မြို့နယ်စည်ပင်သာယာရေးအဖွဲ့၊ ကျန်းမာရေးဌာနများနှင့်လည်း ပူးပေါင်းကွင်းဆင်းဆောင်ရွက်လျက်ရှိပါသည်။

     ကွင်းဆင်းစိစစ်ရာတွင် စားသုံးသူအခွင့်အရေး (၈)ချက်နှင့် စီးပွားရေးလုပ်ငန်းရှင်များလိုက်နာရန်အချက်အလက်များကိုလည်းကောင်း၊ အဓိကအမှတ်တံဆိပ်ဖြစ်သော ပုစွန်တံဆိပ်ပါ စားသုံးဆီများရောင်းချမှုမရှိစေရေးနှင့် ပြည်သူများလုံလောက်စွာရောင်းချပေးနေသော စားအုန်းဆီများအား ရည်ညွှန်းဈေး၊ ကုန်ကျစရိတ်နှင့် ၂%အမြတ်နှင့်သာရောင်းချပေးသွားရန်၊ ဈေးနှုန်းမှန်ကန်စွာရောင်းချရန်၊ မြို့နယ်တွင်းကျော်၍လည်းကောင်း၊ သိုလှောင်ခြင်း၊ ဈေးနှုန်း ပိုရောင်းချခြင်းမပြုလုပ်စေရန်နှင့် ပုစွန်တံဆိပ်ပါ စားသုံးဆီများရောင်းချ/ သိုလှောင်ခြင်း၊ စားအုန်းဆီများကိုလည်း ဈေးနှုန်းမြှင့်တင်ရောင်းချခြင်းနှင့် နယ်ကျော်ခိုးထုတ်ရောင်းချမှုများတွေ့ရှိပါက လုပ်ထုံးလုပ်နည်းနှင့်အညီ အရေးယူဆောင်ရွက်သွားမည်ဖြစ်ကြောင်း အသိပညာပေးပြောကြားခဲ့ပါသည်။ သက်ဆိုင်ရာ/ဌာနဆိုင်ရာများနှင့်ပူးပေါင်း၍ ကွင်းဆင်းဆောင်ရွက်မှုများကို အချိန်နှင့်တပြေးညီ ဆောင်ရွက်လျက်ရှိကြောင်း၊ စားအုန်းဆီများအား ပြည်သူများလက်ဝယ်ရရှိရေးကိုလည်း ကြပ်မတ်ဆောင်ရွက်ပေးနေပါသဖြင့် တိုက်ကြီးမြို့နယ်အတွင်း စားအုန်းဆီတန်းစီးဝယ်ယူမှုမရှိတော့ဘဲ မိသားစုများအဆင်ပြေလုံလောက်စွာစားသုံးနိုင်ကြောင်းသိရှိရပါသည်။

DOCA(ရန်ကုန်)

    စားသုံးသူရေးရာဦးစီးဌာန၊ ကရင်ပြည်နယ်ဦးစီးမှူးရုံးမှ ဦးမျိုးဝင်းနိုင် (ဦးစီးအရာရှိ) နှင့် ဒေါ်စုနွေးသီရိမောင်(အကြီးတန်းစာရေး)တို့သည် (၃၁-၁-၂၀၂၄)  ရက်နေ့၊ နံနက် (၀၉:၃၀) နာရီအချိန်တွင် ကရင်ပြည်နယ်၊ ဘားအံမြို့ရှိ အ.ထ.က ခွဲ (၂) ၌ စားသုံးသူကာကွယ်ရေးဆိုင်ရာ အသိပညာပေးဟောပြောပွဲကျင်းပခဲ့ကြောင်းသိရှိရပါသည်။

    အဆိုပါဟောပြောပွဲတွင် ဦးမျိုးဝင်းနိုင်(ဦးစီးအရာရှိ)က စားသုံးသူအခွင့်အရေးများအကြောင်းနှင့် ကုန်အညွှန်းအမှတ်အသားအကြောင်းကို ရှင်းလင်းပြောကြားခဲ့ပြီး တက်ရောက်လာသော ကျောင်းသား/ ကျောင်းသူများက သိလိုသည်များကိုမေးမြန်းခဲ့ရာ  ၎င်းအနေဖြင့် ပြန်လည်ဖြေကြားခဲ့ပါသည်။

     ဟောပြောပွဲတွင် ကျောင်းအုပ်ဆရာမကြီး (၁)ဦး၊ ဆရာ/ဆရာမ (၇)ဦးနှင့် ကျောင်းသား/ ကျောင်းသူစုစုပေါင်း (၈၅) ဦးတက်ရောက်ခဲ့ကြကာ  စားသုံးသူအသိပညာပေးလက်ကမ်းစာစောင်များဖြန့်ဝေခဲ့ပြီး အခမ်းအနားကို နံနက် (၁၀:၃၀) နာရီအချိန်တွင် ရုပ်သိမ်းခဲ့ကြောင်းသိရှိရပါသည်။

DOCA(ကရင်)