ရန်ကုန်တိုင်းဒေသကြီး၊ တွံတေးခရိုင်၊ ဒလမြို့နယ်ရှိ Mobile Phone အရောင်းဆိုင်များသို့ မေလ(၂၃)ရက်နေ့၊ နံနက် (၁၁:၀၀) နာရီအချိန်တွင် စားသုံးသူရေးရာဦးစီးဌာန၊ ရန်ကုန် တိုင်းဒေသကြီးဦးစီးမှူးရုံး၏ ညွှန်ကြားချက်နှင့်အညီ Mobile Phone များရောင်းချနေသော အရောင်းဆိုင်များသို့ ကုန်အညွှန်းအမှတ်အသား စစ်ဆေးခြင်း အသိပညာပေးခြင်း၊ တင်သွင်း ဖြန့်ဖြူး ရောင်းချလျက်ရှိသည့် အခြေအနေအား ကွင်းဆင်းစစ်ဆေးခဲ့ကြောင်း သိရသည်။
ထိုသို့ ဈေးကွက်အတွင်း ကွင်းဆင်းစစ်ဆေးခဲ့ရာတွင် စားသုံးသူရေးရာဦးစီးဌာနမှ မြို့နယ်တာဝန်ခံ ဦးသန်းနိုင်တို့သည် အမှတ်(၁၁၇၃) ဒလ-တွံတေးလမ်း၊ ဗညားဒလရပ်ကွက်ရှိ မခိုင် ဖုန်းနှင့်ဖုန်းအပိုပစ္စည်းအရောင်းဆိုင်နှင့် အမှတ်(၁၇) ဒလ-တွံတေးလမ်း၊ တပင်ရွှေထီး ရပ်ကွက်ရှိ လင်း ဖုန်းနှင့်ဖုန်းအပိုပစ္စည်းအမျိုးမျိုးအရောင်းဆိုင်သို့ သွားရောက်ပြီး ဆိုင်ပိုင်ရှင် စီးပွားရေး လုပ်ငန်းရှင်နှင့် တွေ့ဆုံကာ Mobile Phone အမျိုးမျိုးတို့တွင် မြန်မာဘာသာ ဖြင့်ဖြစ်စေ၊ မြန်မာဘာသာ (သို့မဟုတ်) တစ်ခုထက်ပို၍ တွဲလျက်ဖြစ်စေ ဖော်ပြရန် မြန်မာနိုင်ငံ စားသုံးသူကာကွယ်ရေး ကော်မရှင်မှ ထုတ်ပြန်သော ညွှန်ကြားချက်အမှတ် (၂/၂၀၁၉)နှင့်အညီ လိုက်နာဆောင်ရွက် သွားကြရန်၊ ကုန်အညွှန်းအမှတ်အသား ပြည့်စုံမှုမရှိသည့် လက်ကိုင်ဖုန်းများအားရောင်းချခြင်း မပြုလုပ်ကြရန် ညွှန်ကြားချက်အမှတ် (၂/၂၀၁၉)နှင့်အညီ လိုက်နာမှု မရှိပါက စားသုံးသူကာကွယ်ရေး ဥပဒေပုဒ်မ (၇၃)အရ အရေးယူဆောင်ရွက်သွားမည် ဖြစ်ကြောင်း အသိပညာပေး ဆောင်ရွက်ခဲ့ကြောင်း သိရှိရပါသည်။
DOCA(ရန်ကုန်)