HighLight News

   ၂၀၂၄ခုနှစ်၊ ဇွန်လ(၇)ရက်နေ့၊ နံနက်(၀၉:၀၀)နာရီအချိန်တွင် မြန်အောင်မြို့နယ်၊ စားသုံးသူရေးရာဦးစီးဌာနမှ မြို့နယ်တာဝန်ခံသည် အမှတ်(၅)ရပ်ကွက်၊ တာကြီးတန်းလမ်း၊ ပြန်ကြားရေးနှင့်ပြည်သူ့ဆက်ဆံရေးဦးစီးဌာန၌ Online မှ ဈေးရောင်းချသူများ ယုံကြည်စိတ်ချမှုရှိစေရန်၊ အတုအပလိမ်လည်ရောင်းချခြင်းများမရှိစေရန်နှင့် Online Shopping များနှင့်ပတ်သက်၍ စားသုံးသူများ၏ ထိခိုက်နစ်နာမှုများကိုကာကွယ်နိုင်ရန်ရည်ရွယ်လျက် စားသုံးသူပြည်သူများအား အွန်လိုင်းစနစ်ဖြင့် ရောင်းချခြင်းနှင့်စပ်လျဉ်း၍ အသိပညာပေးဟောပြောပွဲဆောင်ရွက်ခဲ့ကြောင်း သတင်းရရှိပါသည်။

   ဟောပြောပွဲတွင် စားသုံးသူရေးရာဦးစီးဌာနမှ မြို့နယ်တာဝန်ခံ ဦးမြင့်အောင်က စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ကုန်သွယ်ရေးဦးစီးဌာနမှ Online Shop များမှတ်ပုံတင်နိုင်ရန် လုပ်ဆောင်ပေးနေပြီး Online မှ ဈေးရောင်းချမည့်သူများက မိမိတို့လုပ်ငန်းများကို မြန်မာနိုင်ငံ ကုမ္ပဏီများဥပဒေအရ စီးပွားရေးလုပ်ငန်းများဆောင်ရွက်ရန် မှတ်ပုံတင်ထားရမည်ဖြစ်ကြောင်း၊ တရားဝင်ကိုယ်ပိုင်ဝက်ဘ်ဆိုက်တစ်ခုရှိရမည်ဖြစ်ကြောင်း၊ အွန်လိုင်းစနစ်ဖြင့်ရောင်းချသူသည် မိမိရောင်းချသော ကုန်စည် သို့မဟုတ် ဝန်ဆောင်မှုနှင့်စပ်လျဉ်း၍ ရိုးရှင်းမှန်ကန်သောသတင်းအချက်အလက်နှင့် အာမခံချက်များပေးအပ်ရမည်ဖြစ်ပြီး ကျသင့်တန်ဖိုးနှင့်ညီမျှသော အရည်အသွေးပြည့်မီစေရန် တာဝန်ယူမှု၊ တာဝန်ခံမှုရှိရမည်ဖြစ်ကြောင်း၊ Online မှတ်ပုံတင်လျှောက်ထားသူသည် လူပုဂ္ဂိုလ်တစ်ဦးချင်းသော်လည်းကောင်း၊ ကုမ္ပဏီ သို့မဟုတ် စီးပွားရေးအဖွဲ့အစည်းအနေဖြင့်သော်လည်းကောင်း လျှောက်ထားနိုင်ကြောင်း၊ Online မှတ်ပုံတင်ခြင်းဆိုင်ရာ အသေးစိတ်အချက်အလက်များကို ဝန်ကြီးဌာန၏ ဝက်ဘ်ဆိုက်တွင် ဝင်ရောက်ကြည့်ရှုနိုင်ကြောင်း၊ မှတ်ပုံတင်ခြင်းအားဖြင့် ရောင်းသူနှင့်ဝယ်သူကြားမှာ ယုံကြည်မှုပိုမိုရရှိစေမည်ဖြစ်ပြီး အငြင်းပွားမှုများရှိလာလျှင်လည်း ဥပဒေကြောင်းအရ မှန်ကန်စွာဖြေရှင်းနိုင်မည်ဖြစ်ကြောင်း၊ မှတ်ပုံတင်လက်မှတ်မရှိဘဲ အွန်လိုင်းစနစ်ဖြင့်ရောင်းချခြင်းကိုဆောင်ရွက်မည်ဆိုပါက အရေးကြီးကုန်စည်နှင့်ဝန်ဆောင်မှုဥပဒေ ပုဒ်မ(၅)အရ အရေးယူခြင်းခံရမည်ဖြစ်ကြောင်း၊ ဆက်လက်၍ Online Shopping မှတ်ပုံတင်လျှောက်ထားခြင်းအဆင့်များကို အသေးစိတ်ရှင်းလင်းဆွေးနွေးအသိပညာပေးဟောပြောခဲ့ကြောင်းသိရှိရပါသည်။ အဆိုပါဟောပြာပွဲသို့ စားသုံးသူပြည်သူ (၅၀)ဦးခန့်တက်ရောက်ခဲ့ကြောင်း သတင်းရရှိပါသည်။

DOCA(ဧရာဝတီ)

      ဧရာဝတီတိုင်းဒေသကြီး၊ ဟင်္သာတမြို့၊  တာငါးဆယ်(မ)ရပ်ကွက်၊ ဈေးကလေးလမ်းရှိ စားသုံးသူရေးရာဦးစီးဌာန၊ ဟင်္သာတခရိုင်ဦးစီးမှူးရုံးတွင် ဟင်္သာတမြို့ပေါ်ရှိ စားအုန်းဆီဖြန့်ဖြူးရောင်းချသည့်လုပ်ငန်းရှင်(၉၁)ဦးအား (၉-၆-၂၀၂၄)ရက်နေ့၊ နေ့လယ်(၁၄:၀၀)နာရီအချိန်တွင် စားအုန်းဆီ ဖြန့်ဖြူးခြင်းလုပ်ငန်းဆိုင်ရာ စံလုပ်ထုံးလုပ်နည်းများ(မူကြမ်း)ကို ရှင်းလင်းဟောပြောခြင်းဆောင်ရွက်ခဲ့ပါသည်။

      ဟောပြောပွဲတွင် ဟင်္သာတခရိုင်ဦးစီးမှူး ဦးဇော်မင်းက စားအုန်းဆီဖြန့်ဖြူးခြင်းဆိုင်ရာ စံလုပ်ထုံးလုပ်နည်းများ(မူကြမ်း)ပါ စားအုန်းဆီတင်သွင်း၊သိုလှောင်၊ ဖြန့်ဖြူးခြင်းဆိုင်ရာ လုပ်ငန်းစဉ်ချမှတ်အကောင်အထည်ဖော်ရခြင်း၏ ရည်ရွယ်ချက်၊ လုပ်ငန်းစဉ်တစ်လျှောက် စနစ်တကျရှိစေရေး၊ ဈေးကွက်အတွင်း သင့်တင့်မျှတသည့်ဈေးနှုန်းဖြင့် ဖြန့်ဖြူးရောင်းချစေရေးဆောင်ရွက်ရန်၊ စားအုန်းဆီဖြန့်ဖြူးခြင်းလုပ်ငန်းများအား အကောင်အထည်ဖော်ဆောင်ရွက်ရာတွင် စနစ်တကျရှိစေရန် အပိုင်း (၃)ပိုင်းဖြင့်ခွဲခြားထားပြီး သတ်မှတ်ထားသောစည်းမျဉ်းစည်းကမ်းများအတိုင်း ကထိကဝတ်များ၊ တာဝန်ယူမှု၊ တာဝန်ခံမှုများဖြင့် ဆောင်ရွက်သွားရန်လိုအပ်ကြောင်း ရှင်းလင်းဆွေးနွေးခဲ့ပါသည်။ ဆက်လက်၍ ဒု-ခရိုင်ဦးစီးမှူး ဦးမောင်မောင်မြတ်ခိုင်က ဟင်္သာတခရိုင်အတွက် စားအုန်းဆီခွဲတမ်းရရှိမှုနှင့် ဖြန့်ဖြူးရောင်းချမှုအခြေအနေများအား အကျယ်တဝင့်ဆွေးနွေးခဲ့ပြီး၊ မြို့နယ်တာဝန်ခံ ဦးမိုးကျော်က ဈေးကွက်အတွင်း စားအုန်းဆီဖြန့်ဖြူးရောင်းချရာတွင် ဈေးနှုန်းမြှင့်တင်ရောင်းချခြင်း သို့မဟုတ် ဈေးနှုန်းမြှင့်တင်ရန် ရည်ရွယ်ချက်ဖြင့် သိုလှောင်ခြင်းများမရှိစေရေး၊ စားအုန်းဆီအရောင်းကိုယ်စားလှယ်များ၊ လက်လီ/ လက်ကားရောင်းချသူများအနေဖြင့် သတ်မှတ်ရည်ညွှန်းဈေးနှုန်းဖြင့် ဖြန့်ဖြူးရောင်းချခြင်းမရှိပါက သက်ဆိုင်ရာတည်ဆဲဥပဒေများနှင့်အညီ  အရေးယူဆောင်ရွက်သွားမည်ဟု အသိပေးဆွေးနွေးခဲ့ကြောင်းသိရှိရပါသည်။ 

DOCA(ဧရာဝတီ)

     စားသုံးသူရေးရာဦးစီးဌာန၊ မွန်ပြည်နယ်ဦးစီးမှူးရုံး၊ ထုတ်ကုန်လုံခြုံစိတ်ချရမှုဌာနခွဲမှ ဌာနခွဲတာဝန်ခံသည် ၇-၆-၂၀၂၄ ရက်နေ့တွင် “TKC” အမှတ်တံဆိပ်ပါ ဟင်းခပ်အရသာမှုန့်ထုတ်လုပ်သည့် လုပ်ငန်းရှင်နှင့်တွေ့ဆုံခဲ့သည်။

    ထိုသို့တွေ့ဆုံရာတွင် ထုတ်ကုန်လုံခြုံစိတ်ချရမှုဌာနခွဲမှ ဌာနခွဲတာဝန်ခံက လုပ်ငန်းရှင်အား မြန်မာနိုင်ငံစားသုံးသူကာကွယ်ရေးကော်မရှင်၏ (၂/၂၀၁၉) ညွှန်ကြားချက်နှင့်အညီ ၎င်းတို့၏ထုတ်ကုန်ပစ္စည်းများပေါ်တွင် ဖော်ပြရမည့်အမျိုးအမည်၊ အသားတင်ပမာဏ၊ သုံးစွဲပုံနည်းလမ်း၊ ထားသိုသိမ်းဆည်းမှုအညွှန်း၊ ဓာတ်မတည့်ကြောင်းဖော်ပြချက်များကို ဖော်ပြရမည့်အပြင် အမှတ်တံဆိပ်၊ ပါဝင်ပစ္စည်း၊ နေရပ်လိပ်စာ၊ ဖုန်းနံပါတ်တို့အားပြည့်စုံစွာဖော်ပြထားရှိရန်လိုအပ်ကြောင်း ဆွေးနွေးခဲ့မှုကိုသိရှိရပါသည်။

DOCA(မွန်)

       မွန်ပြည်နယ်၊ ကျိုက်မရောမြို့နယ်တွင် ၂၀၂၄-၂၀၂၅ ခုနှစ် မိုးစပါးရာသီ၌ မိုးစပါး ကြဲခင်းစနစ် စိုက်ပျိုးခြင်းအစား မျိုးစေ့ချကိရိယာ(seeder) ဖြင့် စိုက်ပျိုးခြင်း၊ မြို့နယ်အဆင့် ကွင်းသရုပ်ပြစိုက်ပျိုးခြင်းကို ၉-၆-၂၀၂၄ ရက်နေ့၊ နံနက် (၀၈း၀၀) နာရီအချိန်တွင် ကလိုင်းကနိုင်ကျေးရွာ အုပ်စု ၃၈၁(က)၊ ဦးပိုင်အမှတ်(၁၇၁)၊ တောင်သူ ဦးမွန်ဆူအာမက်၏ လယ်မြေ (၅.၀၁)ဧက၌ ဆောင်ရွက်ခဲ့သည်။

      အဆိုပါမိုးစပါး မျိုးစေ့ချကိရိယာဖြင့် စိုက်ပျိုးခြင်းကွင်းသရုပ်ပြပွဲသို့ မြို့နယ်စီမံအုပ်ချုပ်ရေးအဖွဲ့ဥက္ကဋ္ဌ ဦးကျော်စိုးဦးနှင့်အဖွဲ့ဝင်များ၊ မြို့နယ်စိုက်ပျိုးထုတ်လုပ်မှုတိုးတက်မြင့်မားရေးအဖွဲ့၊ ရပ်ကွက်ကျေးရွာအုပ်စုမှ အုပ်ချုပ်ရေးမှူးများနှင့် တောင်သူများ၊ စားသုံးသူရေးရာဦးစီးဌာနမှ မြို့နယ်တာဝန်ခံနှင့် ဌာနဆိုင်ရာတာဝန်ရှိသူများ၊ စုစုပေါင်း(၅၄)ဦးတက်ရောက်ခဲ့ကြသည်။

     ကွင်းသရုပ်ပြပွဲတွင် မြို့နယ်စီမံအုပ်ချုပ်ရေးအဖွဲ့ဥက္ကဋ္ဌက ယခုနှစ်မိုးရာသီ၌ ကြဲခင်းစနစ်ဖြင့် စိုက်ပျိူးခြင်းအစား ယခုကဲ့သို့  မျိုးစေ့ချကိရိယာများဖြင့် အစားထိုးစိုက်ပျိုးကြရန် မွန်ပြည်နယ်အစိုးရအဖွဲ့အနေဖြင့်လည်း တောင်သူများအတွက် မျိုးစေ့ချကိရိယာ (၆၀) ခုအား ထောက်ပံ့ပေးထားပြီးဖြစ်ရာ တောင်သူများ လွယ်ကူစွာစိုက်ပျိုးနိုင်ပြီးဖြစ်ကြောင်း ရှင်းလင်းပြောကြားခဲ့ပြီး မြို့နယ်စိုက်ပျိုးရေးဦးစီးဌာနမှ  ဦးစီးအရာရှိ  ဦးလှတင်မောင်က မျိုးစေ့ချကိရိယာဖြင့် စိုက်ပျိုးခြင်း၏ အားသာချက်များနှင့် ရှောင်ရန်ဆောင်ရန်အချက်များအား ရှင်းလင်းပြောကြားခဲ့ကြောင်းသိရှိရပါသည်။

DOCA(မွန်)

      စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူးနှင့် ခရိုင်ဦးစီးမှူးတို့၏ လမ်းညွှန်မှုဖြင့် ပခုက္ကူခရိုင်ဦးစီးမှူးရုံးမှ ဆိပ်ဖြူမြို့နယ်တာဝန်ခံ ဦးဇော်နေလင်းနှင့်ဝန်ထမ်းသည် မြို့နယ်စည်ပင်သာယာရေးအဖွဲ့နှင့်ပူးပေါင်း၍ (၇-၆-၂၀၂၄)ရက်နေ့၊ နံနက်(၀၉:၀၀)နာရီအချိန်တွင် ဆိပ်ဖြ မြို့၊ ယောဝရပ်ကွက်ရှိ မုန့်ဟင်းခါးရောင်းချသောလုပ်ငန်းရှင်အား တွေ့ဆုံဆွေးနွေးအသိပညာပေးဆွေးနွေးခဲ့ပါသည်။

        ထိုသို့ဟောပြောဆွေးနွေးရာတွင် မြို့နယ်တာဝန်ခံ ဦးဇော်နေလင်းက လုပ်ငန်းရှင်အား စားသုံးသူကာကွယ်ရေးဥပဒေ(၂၀၁၉)ပါ စီးပွားရေးလုပ်ငန်းရှင်၏လိုက်နာရမည့်တာဝန်များ၊ စားသုံးသူများ၏ ရယူတောင်းဆိုနိုင်သည့်အခွင့်အရေးများ၊ လိုက်နာရမည့်တာဝန်များ၊ စားသုံးသူများအနေဖြင့် ဝယ်ယူသုံးစွဲရာတွင် နစ်နာမှုမရှိစေရေး အသိပညာပေးဆွေးနွေးပြီး တားမြစ်ချက်များ၊ ပြစ်မှုပြစ်ဒဏ်များအား အသေးစိတ်ရှင်းလင်းဆွေးနွေးခဲ့ပြီး လုပ်ငန်းရှင်များအနေဖြင့် မိမိတို့ထုတ်လုပ်သောကုန်စည်သည် ဘေးကင်းပြီးလုံခြုံစိတ်ချရမှုရှိမှသာ ဈေးကွက်တွင်နေရာရရှိပြီး စားသုံးသူများကလည်း ယုံကြည်စိတ်ချစွာရွေးချယ်ဝယ်ယူ သုံးစွဲကြမည်ဖြစ်ကြောင်း၊ မုန့်ဟင်းခါးဖတ်များထုတ်လုပ်ရောင်းချရာတွင် စားသုံးသူများဘေးဥပဒ်ဖြစ်စေမည့် တာရှည်ခံဆေးများထည့်သွင်းအသုံးမပြုစေရေး လုပ်ငန်းရှင်များအား အသိပညာပေးရှင်းလင်းဆွေးနွေးခဲ့ပြီး စည်ပင်အမှုဆောင်အရာရှိက ဆက်လက်၍ ကုန်ပစ္စည်းများထုတ်လုပ်ရာတွင် သန့်ရှင်းသပ်ရပ်စွာထုတ်လုပ်ရောင်းချရေး အသိပညာပေးဆွေးနွေးခဲ့ပြီး မြို့နယ်တာဝန်ခံနှင့် ဝန်ထမ်းက စီးပွားရေးလုပ်ငန်းရှင်နှင့် လုပ်သားများအား စားသုံးသူကာကွယ်ရေးဆိုင်ရာ အသိပညာပေးလက်ကမ်းစာစောင်မျာ ဖြန့်ဝေပေးခဲ့ကြောင်းသိရှိရပါသည်။

DOCA(မကွေး)