စစ်ကိုင်းတိုင်းဒေသကြီးအတွင်းရှိ ခရိုင်/မြို့နယ်များအနေဖြင့် စိုက်ပျိုးရေးနှင့်မွေးမြူရေးကို မြှင့်တင်ကာ စက်မှုလုပ်ငန်းများ၊ စက်မှုဇုန်များတည်ဆောက်၍ တန်ဖိုးမြှင့်ထုတ်ကုန်များ ထုတ်လုပ်ရောင်းချနိုင်ရေးအတွက် တိုင်းဒေသကြီး စိုက်ပျိုးရေးနှင့်မွေးမြူရေးကဏ္ဍ ထုတ်ကုန်များ တိုးမြှင့်ထုတ်လုပ်ရေး ညှိနှိုင်းအစည်းအဝေးကို ဇွန်လ ၃ ရက် နံနက် (၉:၀၀) နာရီတွင် တိုင်းဒေသကြီးအစိုးရအဖွဲ့ အစည်းအဝေးခန်းမ(၁)တွင် ကျင်းပရာ အစည်းအဝေးသို့ တိုင်းဒေသကြီး ဝန်ကြီးချုပ်နှင့် တိုင်းဒေသကြီးအစိုးရအဖွဲ့ဝင်များ၊ တိုင်း/ခရိုင်အဆင့် စိုက်ပျိုးရေးကြီးကြပ်မှု ကော်မတီဥက္ကဌနှင့်အဖွဲ့ဝင်များ တက်ရောက်ခဲ့ကြပါသည်။
ရှေးဦးစွာ တိုင်းဒေသကြီးဝန်ကြီးချုပ်က စစ်ကိုင်းတိုင်းဒေသကြီးအတွင်း စိုက်ပျိုးရေးနှင့် မွေးမြူရေး ထုတ်ကုန်များ တိုးမြှင့်ထုတ်လုပ်နိုင်ရေးအတွက် ဆောင်ရွက်ရာတွင် လျာထားချက် ပြည့်မီရန်သာမက အရည်အသွေးမြင့်ပြီး ဈေးကွက်ယှဉ်ပြိုင်နိုင်သော ထုတ်ကုန်ဖြစ်အောင် ကြိုးစား ထုတ်လုပ်ရန်လိုကြောင်း၊ ပြည်ပပို့ကုန်များအနေဖြင့် နိုင်ငံတကာဈေးကွက်အထိရောင်းချနိုင်ရန် မျှော်မှန်းကြိုးပမ်းရမည်ဖြစ်ကြောင်း၊ တိုင်းဒေသကြီးအစိုးရအဖွဲ့နှင့် သက်ဆိုင်ရာဌာနများ၊ အစိုးရနှင့် ပုဂ္ဂလိကကဏ္ဍစိုက်ပျိုးရေး၊ မွေးမြူရေးလုပ်ငန်းများ ဖွံ့ဖြိုးရေးအတွက် အားပေးကူညီဆောင်ရွက်ပေးသွားမည်ဖြစ်ကြောင်း၊ မွေးမြူရေးနှင့်သားငါးကဏ္ဍနှင့်စပ်လျဉ်းပြီး စားနပ်ရိက္ခာဖူလုံရေး၊ အာဟာရပြည့်ဝရေး၊ အစားအစာဘေးကင်းလုံခြုံမှုရှိစေရေးနှင့် မွေးမြူရေးလုပ်ငန်းလုပ်ကိုင်သူများ ဝင်ငွေတိုးတက်ရရှိရေးအတွက် အကောင်အထည်ဖော်ဆောင်ရွက်လျက်ရှိရာ မွေးမြူထုတ်လုပ်သော အသားများအတွက် မျိုးကောင်းမျိုးသန့်ရရှိမွေးမြူထုတ်လုပ်ဆောင်ရွက်ရန် လိုအပ်ကြောင်း ပြောကြားခဲ့ပါသည်။
ထို့နောက် တိုင်းဒေသကြီးစီမံကိန်းရေးဆွဲရေးဦးစီးဌာန၊ ညွှန်ကြားရေးမှူးက တိုင်းဒေသကြီး၏ စိုက်ပျိုးရေးနှင့်မွေးမြူရေးကဏ္ဍတိုးမြှင့်ဆောင်ရွက်နိုင်ရေးအတွက် ၂၀၂၂-၂၀၂၃ဘဏ္ဍာနှစ် ဒေသန္တရစီမံကိန်းရည်မှန်းချက်အပေါ် ဧပြီလကုန်အထိ အကောင်အထည်ဖော်ဆောင်ရွက်နိုင်မှု အခြေအနေများအား ရှင်းလင်းတင်ပြပြီး တိုင်းဒေသကြီးစားသုံးသူရေးရာဦးစီးဌာန၊ ညွှန်ကြားရေးမှူးက ၂၀၂၂-၂၀၂၃ဘဏ္ဍာနှစ် နွေစပါးရိတ်သိမ်းပြီးစီးမှုအခြေအနေများ၊ ခရိုင်အလိုက် မိုးစပါးလျာထားချက်များ၊ ဆီထွက်သီးနံများ၏စိုက်ပျိုးထွက်ရှိမှု၊ စားသုံးပိုလျှံမှုများ၊ ဖရဲ၊ သခွား၊ သရက်များ၏ စိုက်ပျိုးထွက်ရှိမှု၊ ပြည်ပတင်ပို့မှုနှင့် တစ်ဧကကုန်ကျစရိတ်များ၊ နေ့စဉ်ဖြစ်ပေါ်နေသော အခြေခံစားကုန်များ၏ ဈေးနှုန်းများ၊ ဓာတ်မြေဩဇာ၊ ပိုးသတ်ဆေးဈေးနှုန်းများ၊ စက်သုံးဆီ၊ စားအုန်းဆီ ဈေးနှုန်းများနှင့် လက်ရှိဖြစ်ပေါ်နေသောအခက်အခဲများ၊ ဌာနဆိုင်ရာများနှင့် ပူးပေါင်းတူညီဆောင်ရွက်ပေးထားမှုအခြေအနေများ၊ တမူးကုန်သွယ်ရေးစခန်းမှ လအလိုက်ကုန်သွယ်မှုအခြေအနေများအား အသေးစိတ်ရှင်းလင်းတင်ပြခဲ့ပြီး တိုင်း/ခရိုင်အဆင့် စိုက်ပျိုးရေးကြီးကြပ်မှုကော်မတီ ဥက္ကဌနှင့် အဖွဲ့ဝင်များသည် ၎င်းတို့၏ကဏ္ဍအသီးသီးအလိုက် စိုက်ပျိုးရေး၊ မွေးမြူရေးလုပ်ငန်းများ ဆောင်ရွက်ထားရှိမှုအခြေအနေများ၊ ဆက်လက်ဆောင်ရွက်မည့်အခြေအနေများ တင်ပြဆွေးနွေးကြပါသည်။
တင်ပြချက်များအပေါ် တိုင်းဒေသကြီးဝန်ကြီးချုပ်က လိုအပ်သည်များကို တာဝန်ရှိသူများနှင့် ဖြည့်ဆည်းပေါင်းစပ်ဆောင်ရွက်ပေးမည်ဖြစ်ကြောင်း၊ (၂၃)ကြိမ်မြောက် ဆို၊က၊ရေး ပြိုင်ပွဲကိုလည်း ဝန်ထမ်းမိသားစုဝင်များ၊ ဌာနဆိုင်ရာဝန်ထမ်းများ ပါဝင်ယှဉ်ပြိုင်နိုင်ရေး တိုက်တွန်းပေးစေလိုကြောင်း နိဂုံးချုပ်ပြောကြားပြီး အစည်းအဝေးကို (၁၃:၀၀)နာရီတွင် ရုပ်သိမ်းခဲ့ပါသည်။
DOCA(စစ်ကိုင်း)
