HighLight News

Powered by Drupal

ကရင်ပြည်နယ်အတွင်းရှိ သောက်ရေသန့်လုပ်ငန်းရှင်များအား ကုန်အညွှန်းအမှတ်အသားနှင့်စပ်လျဉ်း၍ အသိပညာ တွေ့ဆုံဆွေးနွေး

          ၂၀.၁.၂၀၂၂ ရက်နေ့၊ နံနက် ၁၀ : ၀၀ နာရီအချိန်တွင် ကရင်ပြည်နယ် စားသုံးသူရေးရာဦးစီးဌာန၊ ပြည်နယ်ဦးစီးမှူးရုံး၊ အစည်းအဝေးခန်းမ၌ ကုန်အညွှန်းအမှတ်အသားနှင့်စပ်လျဉ်း၍ စစ်ဆေးခံနိုင်မှု ဆောင်ရွက်ကြရန်နှင့် ထုတ်ကုန်လုံခြုံစိတ်ချရမှုရှိစေရန်အတွက် ကုန်အညွှန်းအမှတ် အသားဆိုင်ရာ အသိပညာပေး ဆွေးနွေးပွဲအခမ်းအနားကျင်းပပြုလုပ်ခဲ့ကြောင်း သိရပါသည်။

          အဆိုပါဆွေးနွေးပွဲတွင် စားသုံးသူရေးရာဦးစီးဌာနမှ  ပြည်နယ်ဦးစီးမှူး ဦးသန်းဦးက ဌာန၏ မျော်မှန်းချက်၊ ရည်မှန်းချက်အကြောင်း၊ စားသုံးသူကာကွယ်ရေးဥပဒေအကြောင်း၊ စားသုံးသူနှင့်စီးပွားရေးလုပ်ငန်းရှင်အကြား အငြင်းပွားမှုမဖြစ်အောင် စီးပွားရေးလုပ်ငန်းရှင်များလိုက်နာရမည့်အချက်များ၊ ကုန်အညွှန်းအမှတ်အသား ဖော်ပြခြင်းများနှင့်ပတ်သက်၍ အဖွင့်အမှာစကားပြေားကြားခဲ့ပါသည်။

          ဆက်လက်၍ ကရင်ပြည်နယ် သောက်ရေသန့်လုပ်ငန်းရှင်များအသင်း ဥက္ကဌ ဦးအောင်ကျော်သူက ကရင်ပြည်နယ်၊ ဘားအံမြို့ရှိ သောက်ရေသန့်လုပ်ငန်းရှင်များအသင်းကို (၄၂)ဦး ဖွဲ့စည်းထားပြီးဖြစ်ကြောင်း၊ သောက်ရေသန့်လုပ်ငန်းရှင်များသည် တစ်နှင့်တစ်ဦး ညှိနှိုင်းပူးပေါင်းဆောင်ရွက်ခြင်းတို့ကြောင့် စီးပွားရေးလုပ်ငန်းများအောင်မြင်မှုရရှိနေကြောင်း၊ အသင်းအဖွဲ့အနေဖြင့် FDA ရဲ့အနီးကပ်ကြည့်ကြပ်မှုတွင်ဆောင်ရွက်ခဲ့ကြောင်း၊ အကြောင်းအမျိုးမျိုးကြောင့် အသင်းမဝင်ရသေးသော လုပ်ငန်းရှင်များကိုလည်း အသင်းအဖွဲ့တွင် ဝင်ရောက်နိုင်ရေး ဆောင်ရွက်နေကြောင်း၊ ရေကြီးသည့်ကာလနှင့် COVID – 19 ကာလတွင် ကရင်ပြည်နယ်အတွင်း အခက်အခဲဖြစ်သော မြို့နယ်များ၊ ကျေးရွာများတွင် ရေသန့်လုပ်ငန်းရှင်များသည် ရေသန့်ဘူး ၂၀ လီတာဘူးများကို ကူညီဆောင်ပေးခြင်းလုပ်ငန်းဆောင်ရွက်ခဲ့ကြောင်း၊ ဌာနဆိုင်ရာများနှင့် ပူးပေါင်းဆောင်ရွက်နေကြောင်း ဆွေးနွေးပြောကြားပြီး သောက်ရေသန့်လုပ်ငန်းရှင်များသည် တစ်ဦးချင်းဆီ မိတ်ဆက်စကားပြောခဲ့ကြောင်းသိရပါသည်။

          ထို့နောက် ပြည်နယ်ဦးစီးမှူးဦးသန်းဦးက ကုန်စည်များတွင် ထုတ်ကုန်လုံခြုံစိတ်ချ ရမှုရှိစေရန်အတွက် စားသုံးသူကာကွယ်ရေးဥပဒေ အခန်း(၁၈)၊ ပုဒ်မ(၄၃)အရ၊ ကုန်အညွှန်း အမှတ်အသားဖော်ပြ ခြင်းနှင့်စပ်လျဉ်း၍ ကုန်စည်များပေါ်တွင် မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု သို့မဟုတ် တစ်ခုထက်ပို၍ တွဲလျက်ဖြစ်စေ ဖော်ပြရမည်ဖြစ်ကြောင်းနှင့် ကုန်စည်များပေါ်တွင် အဓိကပါဝင်ရမည်အချက်များမှာ ကုန်စည်၏ အမျိုးအမည်၊ အရွယ်အစား၊ အရေအတွက်နှင့် အသားတင်ပမာဏ၊ ထားသိုသိမ်းဆည်းမှုအညွှန်း၊ သုံးစွဲပုံနည်းလမ်း၊ ကျန်းမာရေးဆိုင်ရာ ဘေးထွက်ဆိုးကျိုး၊ ဓာတ်မတည့်ကြောင်းဖော်ပြချက်၊ ကြိုတင်သတိပေးချက်များ ပါဝင်ရမည် ဖြစ်ကြောင်းနှင့် သက်ဆိုင်ရာဌာနများမှ သတ်မှတ်ထားသည့် စည်းမျဉ်း/စည်းကမ်းကိုပါ စီးပွားရေးလုပ်ငန်းရှင်များက လိုက်နာဆောင်ရွက်ရမည်ဖြစ်ကြောင်းနှင့် သောက်ရေသန့် လုပ်ငန်းရှင်များကို ကုန်အညွှန်းအမှတ်အသားနှင့်စပ်လျဉ်း၍ ရေသန့်တံဆိပ်များကို စစ်ဆေး ခံနိုင်မှုပြုလုပ်ဆောင်ရွက်ကြရန်  ဆွေးနွေးပြောကြားခဲ့ပါသည်။ ထပ်မံ၍ ဆီထွက်သီးနှံများ အကြောင်းကိုလည်း အကျယ်တစ်ဝင့် သိကောင်းစရာများကို ဆွေးနွေးပြောကြားခဲ့ပါသည်။

          ဆွေးနွေးပွဲတွင် တက်ရောက်လာကြသော သောက်ရေသန့်လုပ်ငန်းရှင်များသည် မိမိတို့အနေဖြင့် လိုက်နာရမည့်အချက်များကို လိုက်နာဆောင်ရွက်သွားမည်ဖြစ်ကြောင်းနှင့် ရေသန့်တံဆိပ်များကိုလည်း စစ်ဆေးခံနိုင်ရေး ဆောင်ရွက်သွားမည်ဖြစ်ကြောင်း ပြောကြားခဲ့ပါသည်။ ဆွေးနွေးပွဲတွင် တက်ရောက်သူဦးရေ (၁၈)ဦးတက်ရောက်ခဲ့ပြီး (၁၁:၃၀)အနာရီအချိန်တွင် အခမ်းအနားပြီးမြှောက်ခဲ့ပြီး  စားသုံးသူကာကွယ်ရေး ဥပဒေစာအုပ်နှင့် လက်ကမ်းစာစောင်များလည်း ဖြန့်ဝေခဲ့ကြောင်း သိရှိရပါသည်။

DOCA(ကရင်)

စားသောက်ကုန်မျိုးစုံရောင်းချသော စတိုးဆိုင်များသို့ ကွင်းဆင်းစစ်ဆေး အသိပညာပေးဆောင်ရွက်ခြင်း

         စီးပွားရေးနှင့်ကူးသန်းရောင်းဝယ်ရေးဝန်ကြီးဌာန ၊ စားသုံးသူရေးရာဦးစီးဌာန၊ ရခိုင်ပြည်နယ် စစ်တွေခရိုင်ဦးစီးမှူးနှင့် စစ်တွေမြို့နယ်တာဝန်ခံရုံးမှ ဝန်ထမ်းများနှင့်အတူ မိတ်ဖက်ဌာနများ      ဖြစ်သော (အစားအသောက်နှင့် ဆေးဝါးကွပ်ကဲရေးဦးစီးဌာန(FDA) ၊ ကျန်းမာရေးဦးစီးဌာန ၊ အထွေထွေအုပ်ချုပ်ရေးဦးစီးဌာန၊ စည်ပင်သာယာရေးအဖွဲ့ ၊ မြန်မာနိုင်ငံရဲတပ်ဖွဲ့) မှ တာဝန်ရှိသူများနှင့်  (၁၉-၁-၂၀၂၂) ရက်နေ့ နေ့လည်(၁:၃၀)နာရီ မှ ညနေ(၅:၀၀)နာရီအချိန်ထိ စစ်တွေမြို့ပေါ်ရပ်ကွက်များရှိ စားသောက်ကုန်မျိုးစုံရောင်းချသော စတိုးဆိုင်(၁၁)ဆိုင်သို့ သွားရောက်၍ စားသုံးသူကာကွယ်ရေး၊ ထုတ်ကုန်လုံခြုံစိတ်ချရမှုရှိစေရေး၊ ဘေးဥပါဒ်အန္တရာယ်ကင်းရှင်းစေရေး စားသုံးရန်မသင့်သော အစားအသောက်များအား ဈေးကွက်အတွင်းမှ ပပျောက်စေရေး ကွင်းဆင်းစစ်ဆေးခဲ့ပါသည်။

            ရခိုင်ပြည်နယ် အစားအသောက်နှင့် ဆေးဝါးကွပ်ကဲရေးဦးစီးဌာနမှ ၂၀၂၁ ခုနှစ် စက်တင်ဘာလအတွင်း စစ်တွေမြို့ ဈေးကွက် အတွင်းမှ ဈေးကွက်နမူနာကောက်ယူခဲ့သော အချို့စားသောက်ကုန်များသည် Sodium Cyclamate နှင့် Benzoic acid သတ်မှတ်ပမာဏထက် ကျော်လွန်၍ ပါဝင်နေခြင်းကြောင့် ဈေးကွက်အတွင်း ရောင်းချမှုများမပြုလုပ်စေရေး၊ စားသုံးရန်မသင့်သောကြောင့် ဈေးရောင်းသူများ‌ နောက်နောင်ဝယ်ယူရောင်းချမှုများမပြုလုပ်စေရေး အသိပေးခြင်း၊ စားသုံးသူရေးရာဦးစီးဌာန၊ စားသုံးသူကာကွယ်ရေးဥပဒေ (၂၀၁၉) အခန်း (၁၈) ၊ ပုဒ်မ (၄၁) ပြဌာန်းချက် ကုန်အညွှန်းအမှတ်အသားဖော်ပြရာတွင် ပါဝင်ရမည့်အချက်များ ပြည့်စုံစွာပါဝင်သော စားသောက်ကုန်များအား ရောင်းချစေရေးနှင့်  ကုန်စည်များတွင် ကုန်အညွှန်းအမှတ်အသားအား မြန်မာဘာသာဖြင့်ဖြစ်စေ၊ မြန်မာ ဘာသာနှင့် အခြားဘာသာတစ်ခု (သို့မဟုတ်) တစ်ခုထက်ပို၍တွဲလျှက်ဖြစ်စေ ဖော်ပြထားသော စားသောက်ကုန်များအား ဈေးကွက်အတွင်း တင်သွင်းရောင်းချစေရေး အသိပေးဆောင်ရွက်ခြင်း၊ FDA ဌာနမှ လက်ကမ်းစာစောင်များပေးဝေခဲ့ပြီး စားသုံးသူရေးရာဦးစီးဌာနမှလည်း စားသုံးသူကာကွယ်ရေးကော်မရှင်၏ (၃-၁၂-၂၀၁၉)ရက်နေ့ ညွှန်ကြားချက် (၂/၂၀၁၉) လက်ကမ်း စာစောင်များ ပေးဝေခဲ့ပါသည်။ ထို့နောက် စားသုံးရန်မသင့်သော သက်တမ်းလွန်စားသောက်ကုန် (၁၂) မျိုး / ခု‌ ရေ (၇၇) ခု အား အဖွဲ့ဖြင့် သိမ်းဆည်းမှုပြုလုပ်ပြီး FDA ဌာနမှ ဈေးကွက်အတွင်းရောင်းချနေသည့် စားသောက် ကုန်သီးစုံ(၃)မျိုး နှင် အချိုရည် (၃) မျိုး အား ဓါတ်ခွဲစမ်းသပ်စစ်ဆေးရန် နမူနာ ကောက်ဝယ်ယူခြင်း ၊ စားသုံးသူများလုံခြုံစိတ်ချရမှုရှိစေရန်နှင့် စားသုံးသူများအနေဖြင့် ဘေးဥပါဒ် အန္တရာယ်ကင်းရှင်းသော အစားအသောက်များအားစားသုံးနိုင်ရန် ရည်ရွယ်၍ ဈေးကွက်အတွင်းသို့ ကွင်းဆင်းစစ်ဆေး အသိပညာပေးလုပ်ငန်းများ ဆောင်ရွက်ခဲ့ကြောင်း သတင်းရရှိပါသည်။

စားသုံးသူရေးရာဦးစီးဌာန(ရခိုင်ပြည်နယ်)    

ရှမ်းပြည်နယ်(တောင်ပိုင်း) ဟိုပုံးမြို့ရဲ့ စတော်ဘယ်ရီ

ယခုအချိန်အခါတွင် ရှမ်းပြည်နယ်(တောင်ပိုင်း)၌ ရာသီပေါ်သီးနှံတစ်မျိုးဖြစ်သည့် စတော်ဘယ်ရီသီးများ စတင်ထွက်ရှိချိန်ဖြစ်ပါသည်။ မူရင်းဒေသမှာ မြောက်အမေရိကတိုက်မှ ဖြစ်ပြီး အင်္ဂလိပ်အမည် Strawberry ဖြစ်ပါသည်။ စတော်ဘယ်ရီသည် အေးမြသောရာသီဥတုကို နှစ်သက်သဖြင့် မြန်မာနိုင်ငံတွင် ရှမ်းပြည်နယ်(တောင်ပိုင်း) ကလောမြို့နယ်၊ ဟိုပုံးမြို့နယ်နှင့် မန္တလေးတိုင်း ပြင်ဦးလွင်မြို့နယ် တို့တွင် အများဆုံးစိုက်ပျိုးကြကြောင်း သိရှိရပါသည်။
ရှမ်းပြည်နယ်(တောင်ပိုင်း) ဟိုပုံးမြို့နယ်တွင် တစ်ပိုင်တစ်နိုင်စိုက်ပျိုးမှုများပြားပြီး စိုက်ပျိုး သည့်မြေများမှာ မြေနီ(မြေစေး) အမျိုးအစားဖြစ်၍ မိုးအကုန်ဆောင်းအကူးကာလဖြစ်သည့် အောက်တိုဘာလတွင် စတင်စိုက်ပျိုးပြီး ဒီဇင်ဘာလကုန်တွင် ခူးဆွတ်ကြပါသည်။ မြေတွင်ကပ်၍ ရှင်သန်ကြီးထွားသည့် အပင်အမျိုးအစားဖြစ်သောကြောင့် ပေါင်းမြက်များကင်းရှင်းရေးကို အထူး ဂရုစိုက်ရသလို တစ်ပတ်တစ်ခါ ရေသွင်းခြင်းများလည်း ပြုလုပ်ပေးရပါတယ်လို့ သိရှိရပါတယ်။
စတော်ဘယ်ရီသီး၏ အရောင်မှာ အသီးစသီးချိန်တွင် အဖြူရောင်ရှိပြီး စတင်မှည့်လာချိန်တွင် အပန်းရောင်သန်းနေ၍ အလုံးစုံရင့်မှည့်ချိန်တွင် အနီရောင်ရှိပြောင်းလဲလာပါသည်။ အသီးများသည် မြေနှင့် ထိတွေ့ချိန်တွင် ပုပ်ဆွေးတတ်သဖြင့် အသီးစတင်သီးချိန်တွင် အပင်ပတ်လည်ကို ကောက်ရိုး ခြောက်များ(သို့) မြက်ခြောက်များခင်းထားပေးရကြောင်း၊ နောက်တစ်နည်းမှာ အပင်စတင် စိုက်ပျိုးသည့်အချိန်တွင် စိုက်ခင်းအတွင်း ပလပ်စတစ်များအုပ်ပြီး အပေါက်ဖောက်ကာ စိုက်ပျိုးပေးရကြောင်း သိရှိရပါသည်။ နေ့စဉ်ခူးဆွတ်ရောင်းချနိုင်သော်လည်း ၅ရက် ၁ ကြိမ် ခူးဆွတ် ပါက အထွက်နှုန်းပိုကောင်းကြောင်းနှင့် စတင်ခူးဆွတ်ချိန်မှ ရက်ပေါင်း ၆၀ခန့်အထိ ပုံမှန်ခူးဆွတ်နိုင် ကြောင်း သိရှိရပါသည်။
စတော်ဘယ်ရီသီးမှာ အာဟာရဓါတ်ပြည့်ဝစွာပါဝင်ပြီး ဓါတ်တိုးဆန့်ကျင်ပစ္စည်းတွေလည်း ကြွယ်ဝစွာပါဝင်နေပါသည်။ ထို့အပြင် စတော်ဘယ်ရီသီးကို ဖျော်ရည်အဖြင့်သောက်သုံးခြင်းအပြင် ရေခဲချောင်း၊ ကိတ်မုန့်၊ သီးစုံသုပ်၊ ဝိုင် ၊ ယို စသဖြင့် အမျိုးမျိုးပြောင်းလဲအသုံးပြုနိုင်ပါသေးသည်။ ထိုသို့ စားသုံးခြင်းဖြင့် အသားအရည်ကို ကျန်းမာစေခြင်း၊ အရိုးများကို ကြံ့ခိုင်သန်မာစေခြင်း၊ သွေးတိုးကျစေနိုင်ခြင်း၊ ဆီးချိုရောဂါကို ထိန်းညှိပေးခြင်း၊ သွေးလည်ပတ်မှုအား ကောင်းစေခြင်း၊ ကင်ဆာရောဂါကို ကာကွယ်ပေးခြင်းနှင့် အနာကျက်မြန်စေခြင်း စတဲ့အကျိုးကျေးဇူးများကို ရရှိခံစား စေနိုင်ပါသည်။
ယခုချိန်သည် စတော်ဘယ်ရီသီး စတင်ပေါ်ပေါက်ချိန်ဖြစ်သဖြင့် ဈေးနှုန်းအနည်းငယ် မြင့်နေပြီး စတော်ဘယ်ရီထည့်သည့် ဝါးခြင်းတောင်း ပုံမှန်ဆိုဒ် ၁ တောင်းလျှင် ၃၀၀၀/- နှင့် ပလပ်စတစ်ရေပုံးအမည်း အလတ်ဆိုဒ် ၁ ပုံးလျှင် ၆၀၀၀/- ကျပ်အထိ ဈေးရှိနေသော်လည်း ရာသီပေါ်သီးနှံအနေဖြင့်လည်းကောင်း၊ ရှမ်းပြည်နယ် လက်ဆောင်အနေဖြင့်လည်းကောင်း၊ ကိုဗစ်-၁၉ ရောဂါကို ကာကွယ်ရန်အနေဖြင့်လည်းကောင်း ဝယ်ယူစားသုံးသင့်ပါကြောင်း ရေးသားလိုက် ရပါသည်။
၂၁.၁.၂၀၂၂

မွန်ပြည်နယ်၏(၂၀၂၀-၂၀၂၁)ခုနှစ်ကာလအတွင်းဒေသထွက်ကုန်ရော်ဘာဈေးနှုန်းများပြောင်းလဲမှု လေ့လာဆန်းစစ်သုံးသပ်ချက်

မွန်ပြည်နယ်သည် ရော်ဘာစိုက်ပျိုးဧက အများဆုံးပြည်နယ်တစ်ခုဖြစ်ရာ ၂၀၂၀ ခုနှစ်တွင် ရော်ဘာစိုက်ဧက (၅၀၁၇၁၉) ဧကရှိပြီး အစေးလှီးဧက (၃၃၀၀၁၄)ဧကရှိရာ ရော်ဘာထွက်ရှိမှုစုစုပေါင်း တန်ချိန် သိန်း(၂၄၀၀)ထွက်ရှိကြောင်း မွန်ပြည်နယ်စိုက်ပျိုးရေးဦးစီးဌာန စာရင်းအရသိရှိရသည်။ မော်လမြိုင်ကုန်စည်ဒိုင်၏ နေ့စဉ်ဒေသထွက်ကုန်ဈေးနှုန်း အချက်အလက်များအရ ၂၀၂၁ ခုနှစ် ဇန်နဝါရီလ(၁)ရက်နေ့ ရော်ဘာပေါက်ဈေးမှ RSS-3 တစ်ပေါင်လျှင် (၇၃၀) ကျပ်ရှိခဲ့ပြီး ဇန်နဝါရီလ တစ်လလုံးတွင်ရော်ဘာဈေးနှုန်းများအတက်အကျပြောင်းလဲမှုများစွာဖြစ်ပေါ်ခဲ့မှုမရှိကြောင်းသိရှိရသည်။
ဖေဖော်ဝါရီလအတွင်း အကြောင်းအမျိုးမျိုးကြောင့် ဈေးကွက်အတွင်း အရောင်းအဝယ်ရပ်တန့်မှုများဖြစ်ပေါ်ခဲ့သည်။ ဖေဖော်ဝါရီလအတွင်းရော်ဘာဈေးနှုန်းများသည် အတက်အကျများသည့် အခြေအနေများဖြစ်ပေါ်ခဲ့သည့်အပြင် ဘဏ်လုပ်ငန်းအခက်အခဲများကြောင့် တောင်သူများ၊ အလုပ်သမားများအနေဖြင့် ငွေကြေးလှည့်ပတ်မှု ကိစ္စအဝဝနှင့်ပတ်သက်၍ အခက် အခဲများရင်ဆိုင်ခဲ့ရသည်။ ဖေဖော်ဝါရီလ တတိယအပတ်မှစ၍ မတ်လကုန်သည်အထိ မွန်ပြည်နယ်တွင် ရော်ဘာရွက်ကြွေချိန်ဖြစ်သောကြောင့် အစေးထွက်မှုလျော့နည်းလာသည်။ သို့ရာတွင်ယိုးဒယား နယ်စပ် နှင့်တရုတ်နိုင်ငံမှ ဝယ်လိုအားများရှိသည့် အတွက်ရော်ဘာဈေးနှုန်းသည် ရာသီပိတ်သိမ်းချိန် မေလအထိ ဈေးနှုန်းများတဖြည်းဖြည်း မြင့်တက်လာသည်ကိုတွေ့ ရှိရသည်။ (၂၀၂၁)ခုနှစ်ဇန်နဝါရီလမှ မေလအထိ (၅)လတာကာလအတွင်း တွင်ဖြစ်ပေါ်ခဲ့သော ရော်ဘာပေါက်‌ဈေးမှာ အမြင့်ဆုံးဖြစ်ခဲ့ပြီး RSS-3 တစ်ပေါင်လျှင်(၉၂၀)ကျပ်ထိရှိခဲ့သည်။
(၂၀၂၀)ပြည့်နှစ် ရော်ဘာဈေးနှုန်း အချက်အလက်များအရ ဖေဖော်ဝါရီလတွင် ရော်ဘာ ပေါက်ဈေး (၆၈၀)ကျပ်နှင့် (၇၄၀) ကျပ်ကြားပေါက်ဈေးရှိခဲ့သော်လည်း မတ်လမှစ၍ ဈေးနှုန်းများ တဖြည်းဖြည်းကျဆင်းလာခဲ့ရာ (၅၅၀) ခန့်ရှိခဲ့သည်။ ထို့နောက် မတ်လ(၂၅)မှ ဧပြီ(၅)ရက်နေ့အထိ ပေါက်ဈေးသတ်မှတ်ခြင်းမရှိဘဲ ဝယ်သူစိတ်ကြိုက်အနိမ့်ဈေးဖြင့် ရောင်းဝယ်မှုပြုလုပ်ခဲ့သောကြောင့် တောင်သူများအတွက် ဆုံးရှုံးနစ်နာမှုများဖြစ်ပေါ်ခဲ့သည်။
(၂၀၂၀)နှင့်(၂၀၂၁)ကိုနှိုင်းယှဉ်လျှင် (၂၀၂၁)ရော်ဘာရာသီ (စက်တင်ဘာလ၊ အောက်တိုဘာလ၊ နိုဝင်ဘာလ၊ ဒီဇင်ဘာလ)သည် ဈေးနှုန်းမြင့်တက်ခဲ့သော်လည်း ကျွမ်းကျင်လုပ်သားရှားပါးခြင်း၊ စက်ပစ္စည်းဝယ်ယူရန်ခက်ခဲခြင်းနှင့် အက်စစ်များ ဈေးနှုန်းမြင့်တက်မှုတို့ကြောင့် တောင်သူများအနေဖြင့် အကျိုးပို၍ဖြစ်ထွန်းမှု မရရှိခဲ့ကြောင်းယူဆ နိုင်ပါသည်။ ထိုသို့ရော်ဘာဈေးနှုန်း တက်လာသည့် အကြောင်းအရင်းတစ်ခုမှာ ကိုဗစ်(၁၉)ရောဂါ ကာကွယ်တားဆီးရေးအတွက် လိုအပ်သည့်လက်အိတ်ထုတ်လုပ်ရန်နိုင်ငံခြားမှ ရော်ဘာဝယ်လိုအား များလာခြင်းကြောင့်ဖြစ်သည်။ (၂၀၂၁) ခုနှစ် ရော်ဘာပိတ်သိမ်းချိန်ဖြစ်သော ဇွန်၊ ဇူလိုင်၊ ဩဂုတ်လများ သည် ရော်ဘာအစေးထွက်နှုန်း ကျဆင်းလာသည့်အတွက် ရော်ဘာဈေးနှုန်း ပေါက်ဈေးမှာ RSS-3 တစ်ပေါင်လျှင်(၁၂၀၀)ကျပ်ထိဈေးနှုန်းမြင့်တက်ခဲ့သည်။
ထို့ကြောင့် ယခုနှစ် (၂၀၂၂) ခုနှစ် ဇန်နဝါရီလတွင်ရော်ဘာ ဈေးနှုန်းမှာ RSS-3 တစ်ပေါင်လျှင် (၁၀၃၀) ကျပ်ပေါက်ဈေးဖြစ်ပေါ်နေပြီး (၂၀၂၂)ရာသီပိတ်သိမ်းချိန် ဇွန်၊ ဇူလိုင်၊ ဩဂုတ်လများတွင်လည်း ရော်ဘာဈေးနှုန်း မြင့်တက်လာနိုင်ချေရှိကြောင်း သုံးသပ်ရပါသည်။
DOCA(မွန်)

ကြို့ပင်ကောက်မြို့ဒေသထုတ်ကုန် ဒိန်ချဉ်လုပ်ငန်းရှင်နှင့်တွေ့ဆုံခြင်း

ပဲခူးတိုင်းဒေသကြီး၊သာယာဝတီခရိုင်အတွင်းရှိ ကြို့ပင်ကောက်မြို့သည် ရထားလမ်း၊ ကားလမ်း ဆုံသည့်မြို့ ဖြစ်သည်နှင့်အညီ အရောင်းအဝယ်ကောင်းသော မြို့ဖြစ်ပါသည်။ တိုးမြင့်ဒိန်ချဉ် လုပ်ငန်း လုပ်ကိုင်သည့် ဆိုင်တည်နေရာသည် ကားများရပ်နားရာ အမှတ်(၂) ရန်ကုန်-ပြည် ကားလမ်းဘေးတွင် တည်ရှိပြီး၂၀၂၂ခုနှစ် ဇန်နဝါရီလ(၁၈)ရက်နေ့တွင် စားသုံးသူရေးရာ ဦးစီးဌာန၊ ကြို့ပင်ကောက်မြို့နယ် တာဝန်ခံ ဒေါ်ရီရီရှိန်နှင့် အဖွဲ့သည် တိုးမြင့်ဒိန်ချဉ် လုပ်ငန်း လုပ်ကိုင်သော ဦးဂျန်ကီးနှင့် တွေ့ဆုံဆွေးနွေးခဲ့ပါသည်။ ဒိန်ချဉ် လုပ်ငန်း လုပ်ကိုင်နေသည်မှာ( ၁၀နှစ်) ကျော်ပြီ ဖြစ်ကြောင်း နွားနို့ကုန်ကြမ်းကို မိမိမွေးမြူရေးခြံမှ မွေးမြူထားသော နွား ၁၄ ကောင်မှ ရသည့်အပြင် ဇီးကုန်း ၊ ပေါင်းတည် ၊ရွှေတောင် ၊ ပြည် ၊ မန္တလေးမြို့များမှ ၁ပိဿာ( ၁၂၀၀ကျပ်)မှ (၁၅၀၀ကျပ်) ထိဝယ်ယူရကြောင်း၊ သကြား ၁ပိဿာလျှင် ( ၂၀၀၀ မှ ၂၂၀၀ကျပ် ) ထိ ဝယ်ရပြီး ဆား ၁ပိဿာလျှင် (၂၀၀ကျပ်) တို့ဖြင့် ဝယ်သုံးရပါကြောင်း၊ တစ်နေ့လျှင်(၀.၃မီလီ) ဗူးပေါင်း ( ၅၀၀၀ ) ထုတ်လုပ်နိုင်ပြီး ကြို့ပင်ကောက်မြို့အပြင် ပြည် ၊ရန်ကုန် ၊စစ်တွေ၊ ကျောက်ဖြူ ၊ မော်လမြိုင် မြို့ကြီးများသို့ လက်လီ လက်ကားဖြန့်ဖြူးရောင်းချလျက်ရှိကြောင်း၊ ဒိန်ချဉ် အမျိုးအစားအနေဖြင့် ရိုးရိုးဒိန်ချဉ်၊ ချောကလက် ဒိန်ချဉ်၊ ရာသီပေါ်သီးနှံများဖြစ်သော ထောပတ်သီး၊ ငှက်ပျောသီး၊ စတော်ဘယ်ရီသီး၊ နဂါးမောက်သီးများဖြင့်လည်း ထပ်မံထုတ်လုပ်ကြောင်း၊ ၁ဗူးလျှင်(၅၀၀ကျပ်)၁၀ဗူးလျှင် (၄၅၀၀ကျပ်)နှုန်းဖြင့် ရောင်းချပါကြောင်း၊ လုပ်သားအင်အား အနေဖြင့် ကျား/မ (၁၆)ဦးရှိကြောင်း သိရှိရပါသည်။
ထို့နောက် မြို့နယ်တာဝန်ခံမှ စားသုံးသူကာကွယ်ပေးရေး ဥပဒေအခန်း(၁၈)ပါ ကုန်အညွှန်း အမှတ်အသားများအား မြန်မာဘာသာဖြင့်ဖြစ်စေ ၊ မြန်မာနှင့် အခြားဘာသာတွဲ လျှက် ဖြစ်စေ ၊ ကုန်စည်အမျိုးအစားအလိုက် သတ်မှတ်ချက်များနှင့်အညီ သိသာထင်ရှားစွာ ဖေါ်ပြရန်နှင့် ထုတ်လုပ် သည့်ရက်စွဲ ၊ ကုန်ဆုံးသည့်ရက်စွဲ ၊သုံးစွဲပုံ အညွှန်း၊ထားသိုသိမ်းဆည်းပုံအညွှန်း၊ ဓါတ်မတည့်ကြောင်း ဖေါ်ပြချက် ၊ကြိုတင်သတိပေးချက်များကို မဖြစ်မနေဖေါ်ပြရန် လိုအပ်ကြောင်း အသိပညာပေးဆွေးနွေးပြီး လက်ကမ်းစာစောင်များဖြန့်ဝေခဲ့ကြောင်း သတင်းရရှိပါသည်။
DOCA(ပဲခူး)

တောင်ငူ ဈေးကွက်မှ သံတောင်ကြီးကွမ်းသီး

ပဲခူးတိုင်းဒေသကြီး၌ ကွမ်းသီးစိုက်ဧက (၂၀၀၀)ကျော်တွင် တောင်ငူခရိုင်၌ စိုက်ဧက (၁၀၀၀)ကျော် စိုက်ပျိုးလျက်ရှိပြီး တောင်ငူခရိုင်နှင့် နယ်နမိတ်ခြင်း ဆက်စပ်လျှက်ရှိသော ကရင်ပြည်နယ်၊ သံတောင်ကြီးဒေသတွင် ကွမ်းသီးစိုက်ဧကအများဆုံး စိုက်ပျိုးလျှက်ရှိကြောင်း သိရှိရပါသည်။ သံတောင်ကြီးဒေသ၏ ကွမ်းသီးစိုက်ဧကမှာ (၅၈၇၇) ဧကခန့်ရှိပြီး တစ်ဧက အထွက်နှုန်း အနေဖြင့်( ၃၁၃ )ပိဿာခန့် ထွက်ရှိကြောင်း သိရှိရပါသည်။ ကွမ်းသီးဈေးကွက် အနေဖြင့် တောင်ငူခရိုင်မှထွက်ရှိသော ကွမ်းသီးများသာမက သံတောင်ကြီးဒေသ မှထွက်ရှိသော ကွမ်းသီးများသည်လည်း တောင်ငူမြို့ရှိပွဲရုံများသို့ အဓိက တင်သွင်းပြီး တောင်ငူမြို့မှ တစ်ဆင့် ရန်ကုန် ၊ မန္တလေးမြို့များသို့ အသီးသီးတင်ပို့ရောင်းချကြောင်း သိရှိရပါသည်။ ယခင်နှစ်တွင် သံတောင်ကြီး ဒေသမှ တောင်ငူပွဲရုံရောက် ဈေးနှုန်းမှာ ကွမ်းသီးတစ်ပိဿာလျှင် ၇၀၀၀ကျပ် ရှိခဲ့ပြီး ယခုနှစ်တွင် သံတောင်ကြီးဒေသမှ တောင်ငူပွဲရုံရောက်ဈေးနှုန်းမှာ ကွမ်းသီးတစ်ပိဿာလျှင် ၁၀၀၀၀ကျပ် ဖြစ်သဖြင့် ကွမ်းသီးစိုက်တောင်သူများအနေဖြင့် ယခင်နှစ်ထက် ဈေးပိုရပြီး အကျိုးအမြတ် ပိုလာကြောင်း သိရှိရသည်။
ယခုကဲ့သို့ ဈေးမြင့်တက်လာရခြင်းမှာ သယ်ယူပို့ဆောင်ခနှုန်းထားများ မြင့်တက်လာခြင်း၊ လုပ်သားခများမြင့်တက်လာခြင်း၊ အခြားကုန်ကျစရိတ်များမြင့်တက်လာခြင်းကြောင့် ပွဲရုံများမှ တောင်သူများ တွက်ချေကိုက်သည့် ဈေးနှုန်းများဖြင့် ဈေးတိုးမြှင့် ဝယ်ယူလာခြင်းဖြစ်ကြောင်း သိရှိရပါသည်။

မွန်ပြည်နယ်၌ သက်သာသောဈေးနှုန်းဖြင့်စားအုန်းဆီများအား စတုတ္ထအကြိမ်မြောက်ဆက်လက်ဖြန့်ဖြူးရောင်းချ

          မွန်ပြည်နယ်တွင် စားသုံးသူရေးရာဦးစီးဌာန၊ မွန်ပြည်နယ်ဦးစီးမှူးရုံးနှင့် မွန်ပြည်နယ်စားဆီနှင့် စားသောက်ကုန်စည် လုပ်ငန်းရှင်များအသင်းတို့ကပူးပေါင်း၍ မြန်မာနိုင်ငံဆီကုန်သည်နှင့် လုပ်ငန်းရှင်များအသင်းထံမှ ခွဲဝေရရှိသော စားအုန်းဆီပိဿာချိန် (၁၆၅၀၀) အား တစ်ပိဿာလျှင် (၄၅၀၀) ကျပ်နှုန်းဖြင့် ၁၈-၁-၂၀၂၂ ရက်နေ့မှစတင်၍ မော်လမြိုင်၊ ပေါင်၊ ချောင်းဆုံမြို့နယ်များ အတွင်းရှိ စည်ပင်သာယာဈေးများမှတဆင့် မွန်ပြည်နယ်အတွင်းရှိ စားသုံးသူပြည်သူများအား ရောင်းချပေးသွားမည်ဖြစ်ပါသည်။ ဝယ်ယူလိုသူ စားသုံးသူပြည်သူများအနေဖြင့် စားသုံးသူရေးရာ ဦးစီးဌာန၊ မွန်ပြည်နယ်ဦးစီးမှူးရုံး၊ တယ်လီဖုန်းအမှတ် ၀၅၇-၂၀၂၄၃၁၈ နှင့် မွန်ပြည်နယ်စားဆီနှင့် စားသောက်ကုန်စည်လုပ်ငန်းရှင်များအသင်းမှ အတွင်းရေးမှူးဖြစ်သူ ဒေါ်ခင်မေစီ တယ်လီဖုန်း အမှတ် ၀၉-၄၀၉၁၃၈၆၆၈ ထံသို့ ဆက်သွယ်ဝယ်ယူနိုင်ပါကြောင်း သိရှိရပါသည်။

မွန်ပြည်နယ်

ဆန်စပါးကဏ္ဍ ဖွံ့ဖြိုးတိုးတက်ရေး တပင်ရွှေထီးစပါးရောင်းဝယ်ရေးက အဓိကထားဦးစားပေး

          စားသုံးသူရေးရာဦးစီးဌာန၊ မအူပင်ခရိုင်ဦးစီးမှူးရုံးမှ ဒုခရိုင်ဦးစီးမှူး ဦးအောင်ဇော်ဦးနှင့် ဝန်ထမ်းများသည် မအူပင်မြို့နယ် တလုပ်လပ်အရှေ့ကျေးရွာရှိ တပင်ရွှေထီးစပါးရောင်းဝယ်ရေးသို့ (၁၉.၁.၂၀၂၂) နေ့ နေ့လည်(၁၃:၀၀)အချိန်တွင် ကွင်းဆင်းလေ့လာ ဆွေးနွေးခဲ့ပါသည်။

          အဆိုပါ ကွင်းဆင်းလေ့လာဆောင်ရွက်မှုတွင် တပင်ရွှေထီး စပါးရောင်းဝယ်ရေး၏ ပိုင်ရှင် ဦးဒလစ်(ခေါ်)ဦးညဏ်ထွန်းမှ မိမိတို့စပါးရောင်းဝယ်ရေးသည် မအူပင်မြို့နယ်ရှိ တောင်သူများ စပါး အရည်အသွေးကောင်းရင် ကောင်းသလို အရည်အသွေးနိမ့်လျှင် နိမ့်သလို သင့်တင့်မျှတသော ဈေးကောင်းပေး၍ ဝယ်ယူသဖြင့် မအူပင်မြို့နယ်တွင်းရှိ ကျေးရွာအုပ်စု အများစုက တောင်သူများ လာရောက်ရောင်းချကြောင်း၊ စိုက်ပျိုးရေးဦးစီးဌာနမှ ထုတ်လုပ်သော မျိုးကောင်းမျိုးသန့်များကို စိုက်ပျိုးရေး နည်းပညာများဖြင့် စိုက်ပျိုးထုတ်လုပ်စေပြီး မျိုးကောင်းမျိုးသန့် စပါးများကို ဈေးကောင်းပေး၍ သက်ဆိုင်ရာ ဆန်၊စပါးကုမ္ပဏီများဖြင့် ချိတ်ဆက်ရောင်းဝယ်မှု ပြုလုပ်လျှက် ရှိကြောင်း ဆွေးနွေးတင်ပြခဲ့ပါသည်။

          လက်ရှိဝယ်ယူနေသောဈေးများမှာ မနောသုခစပါးတင်း(၁၀၀)လျှင် (၆၉၀၀၀၀)ကျပ်၊ ဆင်းသုခစပါးတင်း(၁၀၀)လျှင် (၆၉၀၀၀၀)ကျပ်၊ နှံကားစပါးတင်း(၁၀၀)လျှင် (၆၄၀၀၀၀)ကျပ် အရောင်းအဝယ် ဖြစ်နေပါသည်။

စားသုံးသူရေးရာဦးစီးဌာန၊ မအူပင်ခရိုင်မှ ဒုခရိုင်ဦးစီးမှူး ဦးအောင်ဇော်ဦးက အရည်အသွေး မြင့်စပါးများ သိုလှောင်နိုင်ရန်အတွက် သိုလှောင်ရုံကို စပါးများ မသိုလှောင်မှီ သန့်ရှင်းရေး ဆောင်ရွက်၍ ပိုးသက်ဆေးများဖြန့်ဝေခြင်း စပါးများသိုလှောင်စဉ် လေခေါင်းတိုင်များ ထားရှိပေး ခြင်းဖြင့် စပါးအရည်အသွေးများ ပိုမိုကောင်းမွန်၍ အရည်အသွေးမြင့် ဈေးကွက်ဝင်ဆန်များ ရရှိလာနိုင်မည့် အကြောင်းများကို အကျယ်တဝင့်ဆွေးနွေးပြောကြားခဲ့ကြောင်း သတင်းရရှိပါသည်။

ဧရာဝတီတိုင်းဒေသကြီးမြောင်းမြခရိုင် ၊ ဝါးခယ်မမြို့နယ်၊ မြို့မဈေးတာဝန်ခံရုံး၌ စားသုံးဆီလုပ်ငန်းရှင်အား အသိပညာပေးဟောပြော

          ဧရာဝတီတိုင်းဒေသကြီး၊ မြောင်းမြခရိုင်၊ ဝါးခယ်မမြို့နယ်၊ မြို့မဈေးတာဝန်ခံရုံး၌ (၁၇.၁.၂၀၂၂)ရက်နေ့၊ နေ့လည် (၁၃:၀၀)နာရီအချိန်တွင် စားသုံးသူရေးရာဦးစီးဌာန၊ ဝါးခယ်မမြို့နယ် တာဝန်ခံဦးအောင်မိုးသည် မြို့နယ်စည်ပင်သာယာရေးအဖွဲ့နှင့်ပူးပေါင်း၍ စားသုံးဆီလုပ်ငန်းရှင် များအား စီးပွားရေးလုပ်ငန်းရှင်များ လိုက်နာဆောင်ရွက်ရမည့်အချက်များနှင့်  စားသုံးသူကာကွယ် ရေးဥပဒေပါအချက်များအား အသိပညာပေးဟောပြောပွဲပြုလုပ်ခဲ့ပါသည်။

          ထိုသို့ဟောပြောဆွေးနွေးပွွဲသို့ စားသုံးဆီလုပ်ငန်းရှင်(၁၁)ဦးတက်ရောက်ပြီး၊ မြို့နယ် တာဝန်ခံမှ မြန်မာနိုင်ငံအစားအသောက်နှင့် ဆေးဝါးကွပ်ကဲရေးဦးစီးဌာနမှ ထုတ်ပြန်သည့် အမိန့်ကြော် ငြာစာ (၅၂၄/၂၀၂၁)ပါအချက်များဖြစ်သော အမှတ်တံဆိပ်ပါ ဘူးသွင်းသောက်ရေသန့်နှင့် အမှတ် တံဆိပ်ပါ စားအုန်းဆီတို့အာ ထိန်းချုပ်အစားအသောက်အဖြစ်သတ်မှတ်လိုက်ကြောင်း၊ စီးပွားရေး  လုပ်ငန်းရှင်များအနေဖြင့် FDA ထောက်ခံချက်လိုင်စင်ရှိမှသာ ရောင်းချခွင့်ရှိကြောင်း၊ ဟင်းသီး ဟင်းရွက်ဆီ Vegetable Oil, Cooking Oil နှင့်ပတ်သက်၍ ကုန်အညွှန်းအမှတ်အသားဖော်ပြရာ၌ စီးပွားရေးလုပ်ငန်းရှင်များ လိုက်နာရမည့်ညွှန်ကြားချက်ကို (၂၀.၁၂.၂၀၂၁)ရက်နေ့ ညွှန်ကြားချက် (၁/၂၀၂၁)ဖြင့် ထုတ်ပြန်ခဲ့ပြီး၊ ကုန်အညွှန်းဖော်ပြရာတွင် ကုန်စည်၏အမျိုးအမည်ကို မြန်မာဘာ သာဖြင့်ဖော်ပြရန်၊ ကုန်စည်၏အသားတင်ပမာဏနှင့်အရွယ်အစားတို့အား ပိဿာ၊ ကျပ်သားတို့ကို မြန်မာဘာသာဖြင့်ဖော်ပြရန်နှင့် (၆)လပြည့်မြောက်မည့် (၂၁.၆.၂၀၂၂)ရက်နေ့နောက်ပိုင်းအာဏာ သက်ရောက်မည်ဖြစ်၍ လိုက်နာဆောင်ရွက်မှုမရှိသော လုပ်ငန်းရှင်များအားဥပဒေနှင့်အညီ အရေး ယူဆောင်ရွက်မည်ဖြစ်ကြောင်း အသိပေးဆွေးနွေးခဲ့ပါသည်။

          ဆက်လက်၍ စားသုံးသူကာကွယ်ရေးဥပဒေပါ စားသုံးသူအခွင့်အရေးနှင့်တာဝန်များ  စီးပွားရေးလုပ်ငန်းရှင်၏  တာဝန်များနှင့် ကုန်အညွှန်းအမှတ်အသားဖော်ပြရာတွင် လိုက်နာဆောင် ရွက်ရမည့်အချက်များကို  ရှင်းလင်းဆွေးနွေးခဲ့ကြောင်းသိရှိရပါသည်။

စားသုံးသူရေးရာဦးစီးဌာန(ဧရာဝတီတိုင်းဒေသကြီး)

ဒေသတွင်းအလုပ်အကိုင်အခွင့်အလမ်းများဖန်တီးပေးလျက်ရှိသည့် “တဲကြီး စကော၊ စကာ”ယက်လုပ်ခြင်းလုပ်ငန်း

          စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မကွေးတိုင်း ဒေသကြီး၊ ပခုက္ကူခရိုင်ဦးစီးမှူးရုံးမှ  ပြည်တွင်းကုန်သွယ်မှုကဏ္ဍ ဖွံ့ဖြိုးတိုးတက်စေရေးအတွက် တိုင်း/ခရိုင်ဦးစီးမှူးတို့၏လမ်းညွှန်မှုဖြင့် ဒုဦးစီးမှူး ဒေါ်မြင့်မြင့်သန်းသည် (၁၆.၁.၂၀၂၂)ရက်နေ့၊ နံနက်(၀၉:၀၀)နာရီအချိန်တွင် ဆိပ်ဖြူမြို့နှင့်(၃)မိုင်ခန့်အကွာအဝေးရှိသော အလုပ်အကိုင်အခွင့်အလမ်း များစွာဖန်တီးပေးလျှက်ရှိပြီး ဘိုးစဉ်ဘောင်ဆက်လုပ်ကိုင်လာခဲ့သော မြန်မာ့ရိုးရာလက်မှုပညာ ဝါးဖြင့်ပြုလုပ်သော စကော၊ စကာ၊ အုပ်ဆောင်းအမျိုးမျိုး ထုတ်လုပ်လျက်ရှိသော တဲကြီးကျေးရွာသို့  သွားရောက်၍ ကွင်းဆင်းလေ့လာခဲ့ပါသည်။

          ဆိပ်ဖြူမြို့သည် မြန်မာနိုင်ငံအလယ်ပိုင်း မကွေးတိုင်းဒေသကြီး၊ ပခုက္ကူခရိုင်အတွင်းတွင် တည်ရှိပြီး မြို့နယ်လူဦးရေနေထိုင်မှုမှာ(၁၁၃၇၈၅)ခန့်နေထိုင်ကြောင်း၊ ပူအိုက်စွတ်စိုသော ရာသီဥတု အနေအထားတွင်ရှိပြီး အရှေ့ဘက်တွင် ချောက်မြို့နယ်၊ အနောက်ဘက်တွင် ဆောမြို့နယ်၊ တောင်ဘက်တွင် စလင်းမြို့နယ်နှင့် မြောက်ဘက်တွင် ပခုက္ကူမြို့နယ်၊ ပေါက်မြို့နယ်တို့နှင့် ထိစပ် လျက်ရှိပြီး မြို့နယ်အနောက်ဘက်ရှိ တောင်တန်းများသည် ပုံတောင်ပုံညာတောင်တန်းများနှင့် ဆက်စပ်လျက်ရှိကြောင်း သိရှိရပါသည်။

          ဆိပ်ဖြူမြို့နယ်သည် စီးပွားရေးအချက်အခြာကျသော ဒေသတစ်ခုဖြစ်ပြီး မြို့နယ်အတွင်းရှိ ဒေသခံပြည်သူလူထုသည် စိုက်ပျိုးရေးလုပ်ငန်းကို အဓိကထား၍ လုပ်ကိုင်ဆောင်ရွက်ကြ ပြီး ကုန်းလမ်းရေလမ်းများဆုံရာ လမ်းမပေါ်တွင် တည်ရှိ၍ လမ်းပန်းဆက်သွယ်ရေး ကောင်းမွန် သော ဒေသဖြစ်ပါကြောင်း၊ ဆိပ်ဖြူမြို့နယ်၏ အဓိကထုတ်ကုန်မှာ ကြက်သွန်နီဖြစ်ပြီး အခြား ထွက်ကုန်များမှာ စပါး၊ မြေပဲ၊ နှမ်း၊ ပဲတီစိမ်း၊ ကုလားပဲ၊ ပဲစဉ်းငုံ၊ စားတော်ပဲတို့ဖြစ်ပါကြောင်း၊ ထွက်ကုန်များသည် အရည်အသွေးကောင်းမွန်၍ ရန်ကုန်တိုင်းဒေသကြီး ဘုရင့်နောင်ပွဲရုံသို့ အများဆုံးတင်ပို့ ရောင်းချရပါကြောင်း၊ မြို့နယ်တွင် စိုက်ပျိုးရေးလုပ်ငန်းအပြင် မွေးမြူရေးများ လည်း လုပ်ကိုင်ကြလျက်ရှိပြီး ကြက်သွန်ကြော်လုပ်ငန်း၊ ပဲကြော်လုပ်ငန်း၊ ပဲကြီးလှော်လုပ်ငန်း၊  မုန့်မျိုးစုံလုပ်ငန်း၊ ချည်ထည်ယက်လုပ်ခြင်းလုပ်ငန်း၊ ဝါးထရံယက်လုပ်ခြင်းလုပ်ငန်း၊ စကောစကာ၊ အုပ်စောင်း အမျိုးမျိုး ယက်လုပ်ခြင်းလုပ်ငန်းနှင့် မုန့်ဟင်းခါးဖတ် ထုတ်လုပ်ခြင်းလုပ်ငန်းများ လုပ်ကိုင်ကြ၍ မြို့နယ်အတွင်းရှိဒေသခံပြည်သူများသည် အလုပ်အကိုင်အခွင့်အလမ်းများစွာ ရရှိကြ ကြောင်း သိရှိရပါသည်။

                    တဲကြီးကျေးရွာသည် အိမ်ခြေ(၂၅၀)ခန့်ရှိပြီး လူဦးရေ(၁၀၀၀)ဝန်းကျင်ခန့် နေထိုင် ကြောင်း၊ ဝါးဖြင့်ပြုလုပ်သော ထုတ်ကုန်များကို ကျေးရွာအတွင်းရှိ အသက်(၁၀)နှစ်ကလေးအရွယ်မှ စ၍ တစ်ရွာလုံး အမျိုးသားအမျိုးသမီးမကျန် ယက်လုပ်တတ်ကြကြောင်း၊ ပစ္စည်းယက်လုပ် ရာတွင် အလုပ်သမားငှားရမ်းခြင်း မပြုလုပ်ရဘဲ အိမ်တိုင်းရှိ မိသားစုဝင်တိုင်း ယက်လုပ်ကြပြီး ထုတ်လုပ်ရောင်းချရာတွင် ချောမွေ့သေသပ်သောကြောင့် တဲကြီး စကော၊ စကာဟုဆိုလျှင် လူတိုင်း သိရှိ၍ ဈေးကွက်အတွင်းတွင်  နာမည်ရရှိပြီး  ဈေးကောင်းရရှိကြောင်း ၊ တစ်ဖက်တစ်လမ်းမှလည်း စိုက်ပျိုး ရေးအနေဖြင့် ကြက်သွန်၊ မြေပဲ၊ နှမ်းနှင့် သီးနှံမျိုးစုံ စိုက်ပျိုးပြီး မွေးမြူရေးအနေဖြင့်လည်း နွား၊ သိုး၊ ဆိတ်များ မွေးမြူလုပ်ကိုင်ကြ၍ ကျေးရွာအတွင်းရှိ ဒေသခံပြည်သူများသည် အလုပ်အကိုင် အခွင့်အလမ်းပေါများပြီး နေ့စဉ်ဝင်ငွေရရှိသောကြောင့် ဖွံ့ဖြိုးတိုးတက်သော ကျေးရွာဖြစ်ကြောင်း သိရှိရပါသည်။

          စိုက်ပျိုးတောင်သူများ၊ အိမ်ရှင်မများ မဖြစ်မနေအသုံးပြုရသော စကော၊ စကာ၊ အုပ်ဆောင်း အမျိုးမျိုး ယက်လုပ်ရာတွင် ကုန်ကြမ်းအဖြစ် ဝါးနှင့်ကြိမ်ကိုအသုံးပြုရပြီး ဝါးကို အဓိကထား သုံးကြောင်း၊ ဆိပ်ဖြူမြို့နှင့်ဆောမြို့အစပ်ရှိ ကန်စွန်းမတောင်ပေါ်မှ ဝါးကို ဝယ်ယူရကြောင်း၊  မြစ်ကြီးနားမြို့မှ ထွက်ရှိသော ကြိမ်ကို မန္တလေးမြို့မှတစ်ဆင့်ဆိပ်ဖြူမြို့ တဲကြီးကျေးရွာအထိ ကားတစ်စီးလုံးအပြတ်ငှားရမ်း၍ ယက်လုပ်သူများစုပေါင်းပြီး ဝယ်ယူသောကြောင့် ဈေးနှုန်းချိုသာ စွာရရှိကြောင်း၊ (၆)ပေ (၁၀)ချောင်းပါတစ်စည်းကို (၁၇၀၀)ကျပ် ဝယ်ယူရ၍ တစ်ချောင်းလျှင် (၁၇၀) ကျပ် ဈေးနှုန်းရှိကြောင်း သိရှိရပါသည်။ အဓိကကုန်ကြမ်းဖြစ်သော ဝါးကို ဝယ်ယူရာတွင် ဝါး ကုန်သည်များက တောင်ပေါ်မှ ကျေးရွာအထိ ကားဖြင့် လာရောက် ရောင်းချပေးကြောင်း၊ ကားတစ်စီးလုံးအပြည့် တင်ဆောင်လာပြီး ခွဲဝေယူကြကြောင်း၊ ဝါးတစ်လုံးလျှင် (၆၅၀)ကျပ် ပေးဝယ်ရကြောင်း၊ ကုန်ကြမ်းဖြစ်သော ဝါး၊ ကြိမ်တို့ကို ဝယ်ယူရာတွင် ပစ္စည်းပေါများ၍ ထုတ်လုပ်မှု ပြုလုပ်ရာတွင် အဆင်ပြေကြောင်းသိရှိရပါသည်။

          ပစ္စည်းထုတ်လုပ်မှုမှာ စကော၊ အုပ်ဆောင်း အကြီးအလတ်အသေးနှင့် စကာကို အစိပ်အကျဲ လိုက်၍ အမျိုးမျိုးကွဲပြားထုတ်လုပ်ကြောင်း၊ ဆိုဒ်ကြီးများကို ဝယ်ယူလိုပါက ကြိုတင်မှာယူမှသာ ယက်လုပ်ပေးကြောင်း၊ ယက်လုပ်ရာတွင်လည်း တောင်သူများ၊ အိမ်ရှင်မများအသုံးပြုသော ဆန်ချ စကာ၊ ဆန်ကွဲချစကာ၊ သီးနှံမျိုးစုံချစကာ၊ သဲချစကာ၊ မြေပဲဆံနှင့်အခြမ်းအသေးချစကာ အမျိုးမျိုး ယက်လုပ်ကြကြောင်း၊ အုပ်ဆောင်းများမှာလည်း ထမင်းစားပွဲ၊ ရေအိုးများတွင်ဖုံးအုပ်ရန် အရွယ် အစားအမျိုးမျိုးထုတ်လုပ်လျက်ရှိကြောင်း သိရှိရပါသည်။ ပစ္စည်းထုတ်လုပ်ရာတွင် လူတစ်ဦးလျှင် တစ်နေ့ဝါးတစ်လုံးခွဲစိပ်အချောသပ်ပြီး ယက်လုပ်ရာတွင် စကော၊ စကာ ပျမ်းမျှသုံးချပ်ခန့် ရရှိ ကြောင်း၊ တစ်လလျှင် ဝါးအလုံး(၃၀)ခန့်ပြီးစီးအောင် ယက်လုပ်နိုင်ကြကြောင်း၊ (၁၀)နှစ်ကလေးမှ စ၍ ယက်လုပ်တတ်သောကြောင့် ကျေးရွာအတွင်းရှိ အိမ်တိုင်း မိသားစုဝင် များလျှင်များသလို ပစ္စည်းများများ ထုတ်လုပ်ပြီးစီးနိုင်၍ နေ့စဉ်ဝင်ငွေ ရရှိလျက်ရှိကြောင်း သိရှိရပါသည်။

          ရောင်းချရသည့် ဈေးနှုန်းများအနေဖြင့် စကော၊ စကာအကြီး တစ်ချပ်လျှင် ယခင်နှစ် (၂၇၀၀) ကျပ်၊ ယခုနှစ်(၂၃၀၀)ကျပ်၊ အလတ်တစ်ချပ်လျှင် ယခင်နှစ် (၁၈၀၀) ကျပ်၊ ယခုနှစ်(၁၅၀၀)ကျပ်၊ အသေးတစ်ချပ်လျှင် ယခင်နှစ် (၁၂၀၀)ကျပ်၊ ယခုနှစ်(၁၀၀၀)ကျပ် ရောင်းချရပါကြောင်း၊ ယခင်နှစ် ထက်ယခုနှစ် ရောင်းဈေးနှုန်းများ ကျဆင်းသွားရခြင်း အကြောင်းမှာ ရောင်းဝယ်ဖောက်ကားမှု ပြုလုပ်ရာတွင် မိမိတို့ပြည်တွင်း၌ ကိုဗစ် ၁၉ ရောဂါကူးစက်ပြန့်ပွားနေမှုကြောင့် သယ်ယူပို့ဆောင် ရေး အခက်အခဲများနှင့်ကြုံတွေ့ရခြင်း၊ ဒေသတွင်းဈေးကွက်များ၌ ဝယ်လိုအားကျဆင်းနေခြင်းတို့

ကြောင့် အရောင်းအဝယ်မဖြစ်ဘဲ ပစ္စည်းဈေးနှုန်းများ ကျဆင်း၍ လုပ်ငန်းရှင်များ နေ့စဉ်ဝင်ငွေရရှိမှု နည်းသွားကြောင်းသိရှိရပါသည်။ လူတစ်ဦး စကော၊ စကာတစ်ချပ်ထုတ်လုပ်ရာတွင် ဝါး၊ ကြိမ် ဝယ်ယူခနှင့် ကိုယ်တိုင် ယက်လုပ်ကြ၍ အလုပ်သမားငှားရမ်းခမပါခြင်း၊ ဝယ်ယူရသောကုန်ကြမ်း ပစ္စည်းမှာ ပစ္စည်းပေါများပြီး ဈေးနှုန်း သင့်တင့်မျှတမှုရှိ၍ ကုန်ကျငွေမှာ (၅၀၀)ကျပ်ဝန်းကျင်ခန့် ရှိကြောင်း၊ ယခုနှစ်တွင် (၁၅၀၀)ကျပ် ဈေးနှုန်းခန့် ရောင်းချရပါသောကြောင့် တစ်ချပ်လျှင်(၁၀၀၀) ဝန်းကျင်ခန့် အကျိုးအမြတ်ရရှိကြောင်း၊ တစ်နေကုန် စကော၊ စကာ ယက်လုပ်ပါက စကော၊ စကာ (၃)ချပ်ခန့် ယက်လုပ်နိုင်ကြောင်း သိရှိရပါသည်။

          ဈေးကွက်အနေဖြင့် ဆိပ်ဖြူမြို့နယ် တဲကြီးကျေးရွာမှထွက်ရှိသော စကော၊ စကာ၊ အုပ်ဆောင်း အမျိုးမျိုးတို့ကို ဆိပ်ဖြူမြို့နယ် နေရာဒေသအနှံ့အပြားနှင့် မကွေးတိုင်းဒေသကြီး အတွင်းရှိ ချောက်၊ ကျောက်ပန်းတောင်း၊ မကွေး၊ ဆင်ဖြူ ကျွန်း၊ စလင်း၊ စလေ၊ တောင်တွင်းကြီး၊ နတ်မောက်၊ သရက်၊ မင်းဘူး၊ အောင်လံမြို့တို့ဖြစ်ပြီး ထုတ်ကုန် အများဆုံးကို အောင်လံမြို့သို့ အဓိကထား၍ ရောင်းချဖြန့်ဖြူးလျက်ရှိသည့်အပြင် (၁၂)လ ရာသီဘုရားပွဲတော် ဈေးများဖြစ်သော ဆိပ်ဖြူမြို့ မြောက်ယမကျေးရွာရှိ အလိုတော်ပေါက်ဘုရား ပွဲတော်၊ မန္တလေးတိုင်းဒေသကြီး ညောင်ဦးခရိုင်အတွင်းရှိ ပုဂံအာနန္ဒာဘုရားပွဲတော်၊ တညောင် ဘုရားပွဲတော်၊ စလေ သေခဲလှဘုရား ပွဲတော်၊ မကွေးမြသလွန်ဘုရားပွဲတော်အချိန်များတွင်လည်း သွားရောက်ပြီး ရောင်းချခြင်း၊ ဈေးသည်အချင်းချင်း ပစ္စည်းများ ဖလှယ်ခြင်းများပြုလုပ်ကြပါ ကြောင်း၊ နှစ်စဉ်မြို့နယ် အတွင်းရှိ နီးစပ်ရာဒေသများသို့လည်း ဆိုင်ကယ်များဖြင့် လှည့်လည် ရောင်းချခြင်းရှိ၍ နှစ်စဉ် မိမိတို့ ယက်လုပ်ပြီးသော ထုတ်ကုန်ပစ္စည်းများမှာ ယခင်နှစ်များတွင် လက်ကျန်မရှိ ရောင်းချခဲ့ရပါ သော်လည်း ယခု(၂)နှစ်အတွင်းတွင် သယ်ယူပို့ဆောင်ရေး ခက်ခဲမှု ကြောင့် ဝယ်လိုအား နည်းသွား၍ ထုတ်ကုန်ပစ္စည်းလက်ကျန်များကြောင်း၊ ရောင်းမကုန်၍ ကျန်ရှိ သောပစ္စည်းများကို  မိမိတို့အိမ်တွင် ထိန်းသိမ်းထားရှိရကြောင်း၊ တဲကြီးကျေးရွာဒေသတွင်းရှိ လုပ်ငန်းရှင်များအနေဖြင့် လမ်းပန်း ဆက်သွယ်ရေး ကောင်းမွန်လာပြီး ဘုရားပွဲတော်ဈေး (၁၂ ပွဲဈေး) များ ပြန်လည်ဖွင့်လှစ်လာပါက ထုတ်လုပ်သော ပစ္စည်းများ လက်ကျန်မရှိအောင် ရောင်းအားကောင်း၍ ဝင်ငွေပိုမိုရရှိလာမည် ဖြစ်ပြီး အလုပ်အကိုင်အခွင့်အလမ်းများလည်း ပေါများ၍ ပြည်တွင်း ကုန်သွယ်မှုကဏ္ဍ ပိုမိုဖွံ့ဖြိုး တိုးတက်လာမည်ဟု မျှော်လင့်နေကြပါကြောင်း သတင်းရရှိပါသည်။

စားသုံးသူရေးရာဦးစီးဌာန(မကွေးတိုင်းဒေသကြီး)

Pages

Subscribe to RSS - HighLight News