သတင်းနှင့် လှုပ်ရှားမှုများ

        မွန်ပြည်နယ် မုဒုံမြို့နယ်တွင် နွေစပါးစိုက်ပျိုးရာသီ၌ ချောင်းပိတ်၊ မြောင်းပိတ်နှင့် အဇင်းဆည်၊ ဝင်းဖနုံဆည်ရေများဖြင့် နွေးစပါးစိုက်ဧက (၁၃၇၆) ဧက စိုက်ပျိုးနိုင်ခဲ့ပြီး ယခုအခါ ရိတ်သိမ်းခြွေလှေ့ပြီးစီးပြီဖြစ်ကြောင်း သိရသည်။

         ဒေသတွင်း စားနပ်ရိက္ခာဖူလုံစေရန်နှင့် ဆန်စပါး စိုက်ပျိုးထုတ်လုပ်မှုကဏ္ဍဖွံ့ဖြိုး တိုးတက်စေရန် နွေစပါးစိုက်ပျိုးရာသီချိန်၌ တောင်သူများ၏ ကြိုးပမ်းစိုက်ပျိုးခြင်းကြောင့် လျာထားဧကထက် (၇၃၈) ဧကကို ကျော်လွန်စိုက်ပျိုးနိုင်ခဲ့သည်။ မုဒုံမြို့နယ်တွင် အများအား ဖြင့် စိုက်ပျိုးခဲ့သည့် သီးနှံများမှာ ပေါ်ဆန်းရင်၊ ဆင်းသုခ၊ မနောသုခ စသည့်စပါးမျိုးများကို စီးပွားဖြစ်စိုက်ပျိုးကြခဲ့ပြီး ဧပြီလဆန်းပိုင်းမှစတင်၍ စပါးများရိတ်သိမ်းခဲ့ရာ မေလ တတိယ အပတ်အထိ စိုက်ဧကအားလုံးကို ရိတ်သိမ်းခြွေလှေ့ ပြီးစီးပြီဖြစ်ကြောင်း၊ စပါးအထွက်နှုန်း ကောင်းမွန်စေရေးနှင့် ရိတ်သိမ်းခြွေလှေ့ရာတွင် လေလွင့်မှုမရှိစေရန် ရိတ်သိမ်းချိန်လွန် နည်းပညာပေးလုပ်ငန်းများကို  တောင်သူများနှင့်ပူးပေါင်းဆောင်ရွက်ခဲ့ကြောင်း မုဒုံမြို့နယ် စိုက်ပျိုးရေးဦးစီးဌာနမှ သိရသည်။

        မုဒုံမြို့နယ်သည် ရေခံမြေခံအခြေအနေ ကောင်းမွန်၍ စိုက်ပျိုးရေးကဏ္ဍတွင် ပိုမိုအ ဆင်ပြေပြီး လယ်ယာကုန်ထုတ်လမ်း၊ တံတားများ လမ်းပန်းဆက်သွယ်ရေး ကောင်းမွန်ခြင်းနှင့် လက်ရှိအချိန်တွင် စပါးစျေးများ ကောင်းမွန်လာခြင်းတို့ကြောင့် ဒေသခံတောင်သူများအတွက် များစွာအကျိုးဖြစ်ထွန်းလျက်ရှိကြောင်း သိရသည်။

DOCA(မွန်)

         ၂၇.၅.၂၀၂၄ ရက်နေ့တွင် စားသုံးသူရေးရာဦးစီးဌာန၊ မွန်ပြည်နယ်၊ မော်လမြိုင်ခရိုင်၊ မုဒုံမြို့နယ်တာဝန်ခံသည် ပြန်ကြားရေးနှင့်ပြည်သူ့ဆက်ဆံရေးဦးစီးဌာနနှင့်ပူးပေါင်း၍ “ကုန်စည်၊ ဝန်ဆောင်မှုနှင့်ပတ်သက်၍ အသိပညာပေး Talk Show" ဆွေးနွေးပွဲ ကျင်းပပြုလုပ်ခဲ့ကြောင်း သိရှိရပါသည်။

          အဆိုပါ ဆွေးနွေးပွဲတွင် မုဒုံမြို့နယ် ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ ဦးစီးအရာရှိ ဒေါ်မိုးမိုးစန္ဒာထွန်းက "Talk Show" ကျင်းပရခြင်း၏ ရည်ရွယ်ချက်အား ရှင်းလင်းပြောကြားခဲ့ပြီး စားသုံးသူရေးရာဦးစီးဌာန၊ မုဒုံမြို့နယ် တာဝန်ခံမှလည်း စီးပွားရေးလုပ်ငန်းရှင်များ၏ ကုန်စည်နှင့်စပ်လျဥ်း၍ ဖော်ပြရမည့်အာမခံချက်များ၊ အာမခံပေးထားမှုအပေါ် စားသုံးသူ၏ တောင်းဆိုနိုင်သည့်အခွင့်အရေး၊ ဝန်ဆောင်မှုနှင့် ပတ်သက်သည့် အာမခံချက်ပေးထားမှုနှင့်စားသုံးသူ၏ တောင်းဆိုနိုင်သည့် အခွင့်အရေး များအား အကျယ်တဝင့် ဆွေးနွေးခဲ့ပါကြောင်း သိရှိရသည်။

DOCA(မွန်)

    စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာန၊ တိုင်းဒေသကြီးဦးစီးမှူးရုံး၏ အစည်းအဝေးခန်းမ၌ (၂၇-၅-၂၀၂၄) ရက်နေ့တွင် Solar သုံးစွဲမှုနှင့် ပတ်သက်၍ အလုပ်ရုံဆွေးနွေးပွဲအကြိုညှိနှိုင်းအစည်းအဝေးကျင်းပပြုလုပ်ခဲ့ရာ သက်ဆိုင်ရာဌာနဆိုင်ရာများဖြစ်သော တိုင်းရေအရင်းအမြစ်၊ တိုင်းလျှပ်စစ်၊ တိုင်းရေနံ၊ တိုင်းအလုပ်ညွှန်ရောင်းချသည့် လုပ်ငန်းရှင်များဖြစ်သည့် လွင်အီလက်ထရောနစ်၊ သစ်ဆန်းအီလက်ထရောနစ်အရောင်းဆိုင်များနှင့် User (၂) ဦး၊ စုစုပေါင်း (  ၁၅   ) ဦးတက်ရောက်ခဲ့ကြောင်းသိရှိရပါသည်။

        ရှေးဦးစွာ စားသုံးသူရေးရာဦးစီးဌာန၊ တိုင်းဒေသကြီးဦးစီးမှူးက  နေရောင်းခြည်မှရရှိသော စွမ်းအင်ကို လျှပ်စစ်စွမ်းအင်သို့ပြောင်းလဲပေးသည့် Solar photovoltaic System သည့် နိုင်ငံတကာတွင် ပိုမိုတွင်ကျယ်စွာအသုံးပြုလာပြီး မြန်မာနိုင်ငံတွင်လည်း ကျေးလက်၊ မြို့ပြမကျန် သုံးစွဲမှုများလာ သည့်အတွက် နေရောင်ခြည်ရရှိသော မည်သည့်နေရာတွင်မဆို ဆိုလာအသုံးပြု၍ လျှစ်စစ်ထုတ်လုပ်နိုင်သည့်အတွက် လျှပ်စစ်လုံးဝမရရှိသေးသော နေရာဒေသများနှင့် လျှပ်စစ်ဓာတ်အားရရှိမှုနည်းသော နေရာဒေသများတွင် လွယ်ကူစွာတပ်ဆင်အသုံးပြုနေကြပြီဖြစ်ကြောင်း၊ ဆိုလာစွမ်းအင်သုံးလျှပ်စစ်များကို သုံးစွဲသည့် စားသုံးသူပြည်သူများအနေဖြင့် Solar သုံးစွဲမှုနှင့်ပတ်သက်၍  အခြားအိမ်သုံးလျှပ်စစ်ပစ္စည်းများကဲ့သို့ ထုတ်ကုန်အရည်အသွေးစံချိန်စံညွှန်းများနှင့် တပ်ဆင်ပေးသူများကြောင့် မိမိတို့၏ လိုအပ်ချက်နှင့်မကိုက်ညီဘဲ နစ်နာဆုံးရှုံးမှုများဖြစ်ပေါ်လာနိုင်သဖြင့်  စစ်ကိုင်းတိုင်းဒေသကြီး၊ စားသုံးသူရေးရာကော်မတီအစည်းအဝေး (၁/၂၀၂၄) တွင် ထည့်သွင်းဆွေးနွေးခဲ့ပြီး အိမ်သုံးလျှပ်စစ်ပစ္စည်းအမျိုးမျိုးခေါင်းစဉ်အောက်တွင် ဆိုလာဆက်စပ်ပစ္စည်းနှင့် တပ်ဆင်ခြင်းဝန်ဆောင်မှုများထည့်သွင်း၍ ဈေးကွက်စောင့်ကြည့်ဆောင်ရွက်ရန် ဆုံးဖြတ်ချက်ချမှတ်ခဲ့ကြောင်း၊  စားသုံးသူ (ဆိုလာစွမ်းအင်အသုံးပြုသူ)များ လုံခြုံစိတ်ချရမှုရှိစေရေးနှင့် ထိခိုက်နစ်နာမှုမရှိစေရေး အကြိုအလုပ်ရုံဆွေးနွေးပွဲကိုကျင်းပပြီး ဆွေးနွေးဖော်ထုတ်ချက်များမှရရှိသော အချက်များကိုအခြေခံ၍ SOP ရေးဆွဲပညာပေးရန်နှင့် ကွင်းဆင်းစစ်ဆေးနိုင်ရန်အတွက်ရည်ရွယ်၍ ကျင်းပရခြင်းဖြစ်ကြောင်းပြောကြားခဲ့ပါသည်။

         ဆက်လက်၍ သက်ဆိုင်ရာဌာနများက  ဆိုလာစနစ်နှင့်ပတ်သက်၍ သက်ဆိုင်ရာဌာနအလိုက်  ကြီးကြပ်ထိန်းကျောင်းဆောင်ရွက်မှုအခြေအနေ၊ အမိန့်၊ ညွှန်ကြားချက်များထုတ်ပြန်ထားမှုအခြေအနေ၊ ရောင်းချသူများနှင့် ဝယ်ယူအသုံးပြုသူများ လိုက်နာဆောင်ရွက်ရမည့်အချက်များကို ဆွေးနွေးခဲ့ကြပြီး  ရောင်းချသည့် လုပ်ငန်းရှင်များ/ Installer များက ဆိုလာအမျိုးအစားများ၊ ဈေးနှုန်းနှင့် အာမခံပေးမှုအခြေအနေ၊ ကျွမ်းကျင်သည့် အရောင်းဝန်ထမ်းခန့်အပ်ထားမှုအခြေအနေ၊ ရောင်းချမှုပုံစံ၊ ဆိုလာတပ်ဆင်ပေးသည့်ဝန်ဆောင်မှု၊ ဝယ်ယူသူလိုက်နာရမည့် အကြောင်းအရာများ (သို့) User Guide  ပေးသည့် အခြေအနေ၊ ဆိုလာတပ်ဆင်သူများ သိရှိတတ်မြောက်ထားရမည့် အရည်အချင်း/ ကျွမ်းကျင်မှုများများအကြောင်းကို အကျယ်တဝင့်ရှင်းလင်းခဲ့ရာ တက်ရောက်လာသူများက အပြန်အလှန်ဆွေးနွေးခဲ့ကြပြီး အစည်းအဝေးကို အောင်မြင်စွာကျင်းပခဲ့ကြောင်းသိရှိရပါသည်။

DOCA(စစ်ကိုင်း)

      မကွေးတိုင်းဒေသကြီး၊ မကွေးခရိုင်၊ တောင်တွင်းကြီးမြို့နယ်အတွင်းရှိ စိုက်ပျိုးရေးလုပ်ငန်း လုပ်ကိုင်နေကြသည့်တောင်သူများအတွက် သွင်းအားစုလုပ်ငန်းများတွင် အထောက်အကူဖြစ်စေရန် ရည်ရွယ်၍ မြန်မာ့လယ်ယာဖွံ့ဖြိုးရေးဘဏ်မှ ၂၀၂၄-ခုနှစ် မိုးသီးနှံစိုက်ပျိုးစရိတ်ချေးငွေများကို ကျေးရွာ အုပ်စုအလိုက် ထုတ်ချေးပေးမည်ဖြစ်ကြောင်း သိရပါသည်။

      မိုးစိုက်ပျိုးစရိတ်ချေးငွေကို (၂၀.၅.၂၀၂၄)ရက်နေ့မှစတင်၍ ထုတ်ချေးသွားမည်ဖြစ်ပြီး ယာတစ် ဧကလျှင် ကျပ်(၁၀၀၀၀၀)နှင့် လယ်တစ်ဧကလျှင် ကျပ်(၁၅၀၀၀၀)ဖြင့် ထုတ်ချေးပေးသွားမည်ဖြစ် ကြောင်း (၁၇.၅.၂၀၂၄)ရက်နေ့၊ ညနေ (၁၆:၀၀)နာရီအချိန်တွင် မြို့နယ်ချေးငွေအကြံပေးအဖွဲ့နှင့် တွေ့ဆုံ ညှိနှိုင်းအစည်းအဝေးတွင် သိရှိရပါသည်။

      သို့ဖြစ်ပါ၍ တောင်တွင်းကြီးမြို့နယ် မြန်မာ့လယ်ယာဖွံ့ဖြိုးရေးဘဏ်အနေဖြင့် ၂၀၂၄-ခုနှစ် မိုးသီး နှံစိုက်ပျိုးစရိတ်ချေးငွေကို (၇၂)အုပ်စုမှ တောင်သူများကို မြေစာရင်းနှင့် စိုက်ပျိုးရေးတို့မှ ဧကအမှန် ရယူပြီး တစ်နှစ်လုံး လျာထားသိန်း(၈၅၀၀)လျာထားပြီး (၂၀.၅.၂၀၂၄)ရက်နေ့မှစပြီး သိန်း(၂၅၀၀) ထုတ်ချေးသွားမည်ဖြစ်ကြောင်း မြန်မာ့လယ်ယာဖွံ့ဖြိုးရေးဘဏ်မန်နေဂျာ ဦးအေးကိုထံမှ သိရှိရပါသည်။

DOCA(မကွေး)

     စားသုံးသူရေးရာဦးစီးဌာန၊ မကွေးတိုင်းဒေသကြီး၊ မကွေး/ချောက်ခရိုင်ဦးစီးမှူး ဒေါ်တင်တင်လှနှင့်ဝန်ထမ်းများသည် (၂၄.၅.၂၀၂၄)ရက်နေ့၊ နံနက်(၀၈:၀၀)မှ (၁၁:၃၀)နာရီအချိန်ထိ မကွေးမြို့ရှိ စားအုန်းဆီခွဲတမ်းရ လက်ကားဆီကုန်သည်များ၏ စားအုန်းဆီ ဖြန့်ဖြူး‌ရောင်းချမှုအား မကွေးခရိုင် အထွေထွေအုပ်ချုပ်ရေး ဦးစီးဌာန၊ မကွေးမြို့နယ်အထွေထွေအုပ်ချုပ်ရေးဦးစီးဌာန၊ မြန်မာနိုင်ငံရဲတပ်ဖွဲ့၊ အစားအသောက်နှင့် ဆေးဝါးကွပ်ကဲရေးဦးစီးဌာန၊  စည်ပင်သာယာရေးအဖွဲ့များနှင့် ပူးပေါင်းပြီး ရှောင်တခင်ကွင်းဆင်း စစ်ဆေးကြပ်မတ်ခဲ့ပါသည်။

     စစ်ဆေးစဉ် လက်ကားဆီကုန်သည်များ ခွဲတမ်းရရှိသော စားအုန်းဆီများအား စားသုံးသူများ လက်ဝယ်သို့ ပြန့်ပြန့်နှံ့နှံ့ရောက်အောင် အပတ်စဉ် ထုတ်ပြန်ပေးလျှက်ရှိသော သတ်မှတ်ရည်ညွှန်းစျေး နှုန်းများအပေါ်တွင် သယ်ယူစရိတ်နှင့် အမြတ် (၂%)ပေါင်းပြီး စားအုန်းဆီ (၁)ပိဿာလျှင် ကျပ်(၅၅၇၅) ဖြင့် ဖြန့်ဖြူးပေးနေပြီး လက်လီတစ်ဆင့်ရောင်းချပေးနေသူများမှ လူတစ်ဦး (၁)ပိဿာလျှင် ကျပ်(၅၈၀၀) ဖြင့် ပြန်လည်ရောင်းချနေကြောင်း၊ ကိုယ်စားလှယ်အမည်နှင့် စျေးနှုန်းတို့အား ဗီနိုင်းများဖြင့် အများ မြင်သာအောင်ကြော်ငြာရောင်းချနေပြီး ဆီအမျိုးအစားအလိုက် စတီးပုံးများတွင် မြေပဲဆီ၊ နှမ်းဆီ၊ စားအုန်းဆီဟု သိသာအောင် ရေးသားရောင်းချနေကြောင်း သိရှိရပါသည်။

    စားသုံးသူရေးရာဦးစီးဌာနမှ လက်ကား၊ လက်လီဆီရောင်းချသူများအား ၂၀၂၄-ခုနှစ်၊ ဧပြီလအတွင်းအစည်းအဝေးခေါ်ယူပြီး စျေးနှုန်းမြှင့်တင်ရောင်းချခြင်း၊ စျေးကစားရန်ရည်ရွယ်၍ သိုလှောင်ခြင်း ပြုလုပ်ပါက အရေးကြီးကုန်စည်နှင့် ဝန်ဆောင်မှုဥပဒေ ပုဒ်မ (၅)အရ အပြစ်ပေးအရေးယူခံရမည်ဖြစ်ကြောင်း ချပြရှင်းလင်းပြီး သိရှိကြောင်း ဝန်ခံကတိပြုလက်မှတ်များရေးထိုးထားကြောင်း သိရှိရပါသည်။

DOCA(မကွေး)