သတင်းနှင့် လှုပ်ရှားမှုများ

       စားသုံးသူရေးရာဦးစီးဌာန၊ တောင်ငူခရိုင်၊ ရေတာရှည်မြို့နယ်တာဝန်ခံ ဦးဇော်ဇော်ထွေးသည် (၂၂.၅.၂၀၂၄)ရက်နေ့ နံနက်ပိုင်းက ရေတာရှည်မြို့ရှိ မဟာဆန်စက်နှင့် ဟိန်းဆန်စက်များသို့ သွားရောက်၍ ဆန်စပါးသိုလှောင်ထားရှိမှုနှင့် ဈေးနှုန်းဈေးကွက်အခြေအနေများကို ကွင်းဆင်းစစ်ဆေးခဲ့ပါသည်။

   ကွင်းဆင်းစစ်ဆေးခဲ့သည့် ဆန်စက်များအနေဖြင့် ယခုထွက်ရှိနေသော နွေစပါးများကို ဝယ်ယူကြိတ်ခွဲခြင်းဖြစ်ပြီး တင်း ၁၀၀ လျှင် ၁၉၅၀၀၀၀ ကျပ် ဝယ်ယူရကြောင်း၊ ကြိတ်ခွဲထွက်ရှိ သည့် ဆန်များကို တစ်အိတ်လျှင် ၇၂၀၀၀ ကျပ်မှ ၇၆၀၀၀ ကျပ်အထိ ရောင်းချရကြောင်း၊ လျှပ်စစ်မီး ပုံမှန်မရရှိခြင်းကြောင့် ပုံမှန်ကြိတ်ခွဲနိုင်မှုမရှိသဖြင့် ဆန်မြောက်များစွာသိုလှောင်ထားခြင်း မရှိ ကြောင်း၊ လက်ကျန်ဆန်များကို ရန်ကုန်မြို့နှင့် မိတ္ထီလာမြို့များသို့ ပုံမှန်ဖြန့်ဖြူးပေးလျက်ရှိကြောင်း သိရှိရပါသည်။

     စားသုံးသူရေးရာဦးစီးဌာန၊ မြို့နယ်တာဝန်ခံသည် ကွင်းဆင်းစစ်ဆေးစဉ် သက်ဆိုင်ရာ လုပ်ငန်းရှင်များအား မိမိခရိုင်အတွင်း ဆန်ပြတ်လပ်မှုမရှိစေရေး၊ ဆန်ဈေးနှုန်းကြီးမြင့်မှုမရှိစေရေးတို့အတွက် ဆန်များကို ဈေးနှုန်းမြှင့်တင်ရောင်းချခြင်း၊ ဈေးနှုန်းမြှင့်တင်ဖြန့်ဖြူးခြင်း၊ ဈေးကစားရန် ရည်ရွယ်ချက်ဖြင့်သိုလှောင်ခြင်းများမပြုရန် အသိပေးဆွေးနွေးခဲ့ကြောင်း သိရပါသည်။

DOCA(ပဲခူး)

     (၂၃-၅-၂၀၂၄) ရက်နေ့၌ မွန်ပြည်နယ်၊ ဘီးလင်းမြို့နယ်တာဝန်ခံရုံးမှဝန်ထမ်းများသည် မြို့နယ်အထွေထွေအုပ်ချုပ်ရေးဦးစီးဌာန၊ မြို့နယ်ပြန်ကြားရေးနှင့်ပြည်သူ့ဆက်ဆံရေးဦးစီးဌာနတို့နှင့်ပူးပေါင်း၍ ဘီးလင်းမြို့နယ်၊ ကန်သာယာရပ်ကွက်နှင့် ဘိုးရာဇာရပ်ကွက်အတွင်းရှိ ကုန်စုံဆိုင်များသို့သွားရောက်၍ စားသုံးသူများဘေးအန္တရာယ်ကင်းစေးရန်အတွက် အသင့်စားခေါက်ဆွဲခြောက်ထုပ်များတွင် ကုန်အညွှန်းအမှတ်အသားပြည့်စုံစွာဖော်ပြထားခြင်းရှိ/ မရှိတို့ကို ကွင်းဆင်းစစ်ဆေးခဲ့ကြောင်းသိရှိရပါသည်။

    ထိုသို့ ကွင်းဆင်းစစ်ဆေးရာ ခေါက်ဆွဲခြောက်ထုပ်များတွင် မြန်မာစာဖြင့်ကုန်အညွှန်းအမှတ်အသား ပြည့်စုံစွာဖော်ပြထားခြင်းရှိ/ မရှိ၊ သက်ဆိုင်ရာဌာနများ၏ ထောက်ခံချက်ပါ/ မပါနှင့် စားသုံးသူများဘေးအန္တရာယ်ဖြစ်စေနိုင်သော ခေါက်ဆွဲခြောက်ထုပ်များရောင်းချခြင်းရှိ/ မရှိတို့ကို စစ်ဆေးခဲ့ရာစားသုံးသူများ ဘေးအန္တရာယ်ကင်းပြီး ကုန်အညွှန်းအမှတ်အသားပြည့်စုံစွာဖော်ပြထားသော ခေါက်ဆွဲခြောက်ထုပ်များကိုသာတွေ့ရှိရပြီး ဘေးအန္တရာယ်ကင်းသောကုန်စည်များကိုသာ ဈေးကွက်အတွင်း ဖြန့်ဖြူးရောင်းချစေရန် အသိပေးဆောင်ရွက်ခဲ့ကြောင်းသိရှိရပါသည်။

DOCA(မွန်)

    စားသုံးသူရေးရာဦးစီးဌာန၊ တောင်ငူမြို့နယ်တာဝန်ခံ ဦးမြင့်သူသည် (၂၂.၅.၂၀၂၄)ရက်နေ့ မွန်းလွဲပိုင်းက တောင်ငူမြို့နယ် ရဲတပ်ဖွဲ့မှူး ရဲမှူးတင်ဦး ဦးဆောင်သောအဖွဲ့က တောင်ငူမြို့နယ်အတွင်းရှိ စက်သုံးဆီအရောင်းဆိုင်များသို့ ဈေးကွက်စောင့်ကြည့် စစ်ဆေးရာတွင် ပူးပေါင်းပါဝင် ဆောင်ရွက်ခဲ့ပါသည်။

   စက်သုံးဆီဈေးကွက်စောင့်ကြည့်စစ်ဆေးရေးအဖွဲ့သည် တောင်ငူမြို့နယ်အတွင်းရှိ Nilar Yoma, High Way Star, New Day, Regency နှင့် Puma စက်သုံးဆီအရောင်းဆိုင်များသို့ သွားရောက်၍ ရောင်းချနေမှုအခြေအနေများ၊ ဈေးနှုန်းနှင့် လက်ကျန်အခြေအနေများကို ကြည့်ရှုစစ်ဆေးပြီး ဌာနဆိုင်ရာများမှ တာဝန်ရှိသူများက သက်ဆိုင်ရာဌာနများအလိုက် လိုအပ်သည်များကို မှာကြားပါသည်။

   စားသုံးသူရေးရာဦးစီးဌာန၊ မြို့နယ်တာဝန်ခံက စက်သုံးဆီရောင်းချရာတွင် အလေးချိန်နှင့် ဈေးနှုန်းမှန်ကန်စွာဖြင့် စားသုံးသူများထိခိုက်နစ်နာမှုမရှိစေရေး ဆောင်ရွက်ရန် ဆွေးနွေးမှာကြားခဲ့ကြောင်း၊ အဖွဲ့တွင် ခရိုင်ရေနံထွက်ပစ္စည်းကြီးကြပ်ရေးဦးစီးဌာန၊ မြို့နယ်အထွေထွေအုပ်ချုပ်ရေးဦးစီးဌာနနှင့် မြို့နယ်မီးသတ်တပ်ဖွဲ့တို့မှ တာဝန်ရှိသူများ ပူးပေါင်းပါဝင်ဆောင်ရွက်ကြောင်း သိရပါသည်။

DOCA(ပဲခူး)

    ပြည်ထောင်စုဝန်ကြီး၏ လမ်းညွှန်မှာကြားချက်အရ ရန်ကုန်တိုင်းဒေသကြီး၊ စားသုံးသူရေးရာဦးစီးဌာန၊ မြောက်ပိုင်းခရိုင်ဦးစီးမှူးရုံးမှ ခရိုင်ဦးစီးမှူး ဦးအောင်တင်စိုးနှင့်ဝန်ထမ်းများသည် 24-5-2024 ရက်နေ့၊ နံနက် (10း00) နာရီအချိန်တွင် အမှတ် (၅၆၁)၊ အမှတ်(၄)လမ်းမကြီး၊ ရွှေပြည်သာမြို့နယ်ရှိ Steel နှင့် H-Beam များကိုအသုံးပြုထုတ်လုပ်ထားသော ဆောက်လုပ်ရေးလုပ်ငန်းသုံးပစ္စည်းများထုတ်လုပ်သည့် ကုန်ချောစက်ရုံသို့သွားရောက်၍ စက်ရုံပိုင်ရှင် ဦးမောင်မောင်အုန်းနှင့်တွေ့ဆုံမေးမြန်းရာ သွင်းကုန်လိုင်စင်အခက်အခဲရှိပြီး တစ်လလျှင် H-Beam & I-Beam, Galvanzied Iron Sheet In Coil, Prime Pre-Painted Galvanzied Iron Sheet In Coil, Opp Insulator, Mild Steel Sheets, Opp Glue, Bolts & Nuts, Screws ကုန်ကြမ်းလိုအပ်ချက် (821) MT လိုအပ်ပြီး စက်ရုံ၌ ကုန်ကြမ်းလက်ကျန်လည်းမရှိတော့ကြောင်း ကွင်းဆင်းစစ်ဆေးမှုအရသိရှိခဲ့ရပါသည်။

DOCA(ရန်ကုန်)

     စားသုံးသူရေးရာဦးစီးဌာန၊ ရန်ကုန်တိုင်းဒေသကြီးဦးစီးမှူးရုံးတွင် ၆-၅-၂၀၂၄ ရက်နေ့တွင် ကြာသပတေးနေ့စကားဝိုင်းအစီအစဉ် Thursday Talk ကျင်းပပြုလုပ်ခဲ့ပါသည်။ စားသုံးသူရေးရာဦးစီးဌာန၊ ရန်ကုန်တိုင်းဒေသကြီး၊ ဒုတိယတိုင်းဒေသကြီးဦးစီးမှူး ဦးမြင့်အောင်နှင့်တကွ အရာထမ်းများ၊ အမှုထမ်းများ၊ စုစုပေါင်း ၃၄ဦးတက်ရောက်ခဲ့ကြပါသည်။ အခမ်းအနားစတင်ချိန်တွင် ဒုတိယတိုင်းဒေသကြီးဦးစီးမှူး ဦးမြင့်အောင်က အဖွင့်အမှာစကားပြောကြားခဲ့ပါသည်။ ထို့နောက် ရန်ကုန်တိုင်းဒေသကြီးဦးစီးမှူးရုံး၊ သတင်းအချက်အလက်နည်းပညာနှင့် အရည်အသွေးစီမံခန့်ခွဲရေးဌာနခွဲမှ ဒေါ်စန္ဒာဝင်း (ဦးစီးအရာရှိ) က “သတင်းအချက်အလက်နည်းပညာနှင့် အရည်အသွေးစီမံခန့်ခွဲရေးဌာနခွဲအကြောင်းသိကောင်းစရာများ” ခေါင်းစဉ်ဖြင့် ဌာနခွဲ၏လုပ်ဆောင်ချက်များကို အသိပညာပေးရှင်းလင်းပြောကြားခဲ့ပါသည်။ ၎င်းနောက် ဌာနခွဲ၏ မျှော်မှန်းချက်နှင့် ရည်မှန်းချက်၊ ဌာနခွဲ၏တာဝန်များ၊ ICT လုပ်ငန်းဆောင်ရွက်ချက်များ၊ အရည်အသွေးစီမံခန့်ခွဲမှုလုပ်ငန်းဆောင်ရွက်ချက်များ၊ ဌာန၏လုပ်ဆောင်ချက်များ၊ Video Clip ပြုလုပ်ခြင်းများကို ရှင်းလင်း‌ပြော ကြားခဲ့ပါသည်။ သတင်းအချက်အလက်နည်းပညာနှင့် အရည်အသွေးစီမံခန့်ခွဲရေးဌာနခွဲသည် ဌာန၏ Website ဖြစ်သော www. doca. gov. mm ကိုထိန်းသိမ်းခြင်း၊ စီမံခန့်ခွဲခြင်းနှင့် သတင်းဆောင်းပါးများလွှင့်တင်ခြင်း၊ ကွန်ပျူတာအပါအဝင် ICT ဆက်စပ်ပစ္စည်းများ၊ Network ပစ္စည်းများ၊ Server ပြုပြင်ထိန်းသိမ်းခြင်းဆိုင်ရာပစ္စည်းများဝယ်ယူဖြည့်တင်းခြင်း၊ စားသုံးသူအသိပညာပေးမီဒီယာကမ်ပိန်းများကျင်းပခြင်း၊ Consumer Call Center တည်ထောင်ထားရှိခြင်း၊ ဝန်ထမ်းများ၏ လစာစရိတ်တွက်ချက်သည့် Government Employees Payroll System (GEPS) Software နှင့် ဌာနရှိပုံသေပိုင် ၉မျိုးနှင့်ပတ်သက်သည့် Fixed Assets Reporting Software တို့ကိုရေးဆွဲအသုံးပြုခြင်း၊ ပြည်တွင်းပြည်ပမှ ထုတ်လုပ်တင်သွင်းလာသော ကုန်ပစ္စည်းများ၏အရည်အသွေးများကို ဓာတ်ခွဲစစ်ဆေး၍ Test Report ထုတ်ပေးခြင်းဖြင့် စားသုံးသူကာကွယ်ပေးရေးလုပ်ငန်းများ အဆင်ပြေချောမွေ့စေရန် ကူညီပေးခြင်း၊ ဓာတ်ခွဲနည်းပညာများ အစဉ်တိုးတက်မှုရှိစေရေးအတွက် ပြည်တွင်း/ ပြည်ပဓာတ်ခွဲခန်းများနှင့်ချိတ်ဆက်၍ ရင်ဘောင်တန်းလိုက်နာဆောင်ရွက်ခြင်း၊ ပို့ကုန်အရည်အသွေးစီမံခန့်ခွဲရေးဆိုင်ရာကိစ္စရပ်များတွင် ပူးပေါင်းဆောင်ရွက်ခြင်း၊ စိုက်ပျိုးရေးအခြေခံထုတ်ကုန်စံချိန်စံညွန်းများ‌ရေးဆွဲခြင်းနှင့် နည်းပညာဆိုင်ရာစည်းမျဉ်းများ ရေးဆွဲခြင်းတို့ကို ဆောင်ရွက်လျက်ရှိကြောင်း သိရှိရပါသည်။

    ထို့နောက် ဒုတိယတိုင်းဒေသကြီးဦးစီးမှူး ဦးမြင့်အောင်က နိဂုံးချုပ်အမှာစကားပြောကြားခဲ့ပြီး ဆွေးနွေးပြောကြားခဲ့သည့် ဒေါ်စန္ဒာဝင်း (ဦးစီးအရာရှိ) အား ဆုချီးမြှင့်ပေးအပ်ခဲ့ကာ အခမ်းအနား အောင်မြင်စွာပြီးမြောက်ခဲ့ကြောင်းသိရှိရပါသည်။

DOCA(ရန်ကုန်)