သတင်းနှင့် လှုပ်ရှားမှုများ

          ပဲခူးတိုင်းဒေသကြီးအတွင်း စိုက်ပျိုးရေး၊ မွေးမြူရေးနှင့် ကုန်ထုတ်လုပ်မှုတိုးတက်မြင့်မားရေးလုပ်ငန်းညှိနှိုင်းအစည်းအဝေးတွင် ပဲခူးတိုင်းဒေသကြီးအစိုးရအဖွဲ့၊ ဝန်ကြီးချုပ်မှ '' မြို့နယ်တစ်မြို့နယ်လျှင် စိုက်ပျိုးရေး၊ မွေးမြူးရေး နှင့် ကုန်ထုတ်လုပ်မှု တိုးတက်မြင့်မားရေးဆောင်ရွက်ရန်အတွက် တစ်လလျှင် ကျေးရွာ (၁၀)ရွာအား ရွေးချယ်ပြီးဆောင်ရွက်ရန်" လမ်းညွှန်မှာကြားချက်နှင့်အညီ စားသုံးသူရေးရာဦးစီးဌာန၊ ပဲခူးတိုင်းဒေသကြီး၊ ပြည်ခရိုင်မှ မြို့နယ်တာဝန်ခံ ဦးထွန်းနိုင်လင်းနှင့် ဝန်ထမ်းများသည် မိတ်ဖက် ဌာနဆိုင်ရာများဖြစ်ကြသည့် ထွေ/အုပ်၊ စိုက်ပျိုးရေး၊ တိမွေးကု၊ ဆည်မြောင်း၊ ကျေးလက်လမ်း၊ ကျေးလက်ဖွံ့၊ လဝကနှင့် မြန်မာလယ်ယာဖွံ့ဖြိုးရေးဘဏ်တို့မှ တာဝန်ရှိသူများနှင့် ပူးပေါင်း၍ ပြည်မြို့နယ် မြောင်းဆုံကျေးရွာ၊ ဘုန်းတော်ကြီးကျောင်း ဓမ္မာရုံ၌ (၁၇.၅.၂၀၂၂)ရက်နေ့ နေ့လည် (၁၃:၀၀)နာရီမှ (၁၇:၃၀) နာရီတွင် စိုက်ပျိုးရေး၊ မွေးမြူရေး နှင့် ကုန်ထုတ်လုပ်မှုမြင့်မားတိုးတက်ရေး အလုပ်ရုံဆွေးနွေးပွဲအား ကျင်းပပြုလုပ်ခဲ့ပါသည်။

        ဆွေးနွေးပွဲတွင် ဦးထွန်းနိုင်လင်းက စားသုံးသူရေးရာဦးစီးဌာန ဖွဲ့စည်းရခြင်း၏ရည်ရွယ်ချက်၊ လက်ရှိဆောင်ရွက်လျှက်ရှိသော စားသုံးသူကာကွယ်ရေးလုပ်ငန်းများ၊ ပြည်တွင်း ကုန်သွယ်မှုဖွံ့ဖြိုးရေး လုပ်ငန်းများနှင့် သီးနှံစိုက်တောင်သူ အစုအဖွဲ့ဖွဲ့စည်းခြင်းဖြင့် မျိုးကောင်း၊ မျိုးသန့်များရယူ၍ တစ်စုတစ်စည်းတည်း စိုက်ပျိုးနိုင်ခြင်း၊ သွင်းအားစုများကို ဈေးနှုန်း ချိုသာစွာဖြင့် ကုမ္ပဏီမှ တိုက်ရိုက်ရယူနိုင်ခြင်း၊ နည်းပညာများအား တစ်စုတစ်စည်းတည်း ရယူနိုင်ခြင်း၊ ထုတ်ကုန်ကို စုစည်းထားနိုင်ပြီး ရောင်းသူဈေးကွက်/ တောင်သူဈေးကွက် ဖော်ဆောင်နိုင်ခြင်း၊ Contract Forming စနစ်ဆောင်ရွက်နိုင်ခြင်း၊ စက်မှုလယ်ယာစနစ် အဆင့်မြင့် လယ်ယာစနစ်ဖော်ဆောင်နိုင်ခြင်း၊ ချေးငွေများရယူ၍  လယ်ယာသုံးစက်ကရိယာများဝယ်ယူနိုင်ခြင်း၊ အရည်အသွေးကောင်းသီးနှံများ ထုတ်လုပ်လာနိုင်သဖြင့် ပြည်ပဈေးကွက်သို့ ထိုးဖောက်နိုင်၍ တောင်သူ၏ ဘဝ အဆင့်အတန်းမြင့်လာနိုင်မှာဖြစ်ကြောင်း တောင်သူ (၇၀)ဦးတို့အား အသိပညာပေး ဆွေးနွေး ဟောပြောခဲ့ကြောင်း သိရှိရပါသည်။

DOCA(ပဲခူး)

            တနင်္သာရီတိုင်း‌ဒေသကြီး၊ စားသုံးသူရေးရာဦးစီးဌာန၊ မြိတ်ခရိုင်ဦးစီးမှူးရုံးမှ ဝန်ထမ်းများသည် စားသုံးသူကာကွယ်ရေးလုပ်ငန်းများ ခိုင်မာတိုးတက်စေရေး၊ စားသုံးသူများ ဘေးအန္တရာယ်ကင်းရှင်းရေးအတွက်ရည်ရွယ်၍ (၂၀.၅.၂၀၂၂)ရက်နေ့၊ နေ့လည်(၁း၀၀)နာရီအချိန်တွင် မြိတ်မြို့၊ ဆိပ်ငယ်ရပ်၊ စည်ပင်သာယာစျေးအတွင်းရှိ အစည်းအဝေးခန်းမ၌ စားသောက်ကုန်၊ အလှကုန်နှင့် အိမ်သုံးဆေးဝါးများ ရောင်းချနေသူများအား အသိပညာပေးဟောပြောဆွေးနွေးခြင်း ဆောင်ရွက်ခဲ့ပါသည်။

          ဟောပြောဆွေးနွေးရာတွင် စားသုံးသူရေးရာဦးစီးဌာန၏ မျှော်မှန်းချက်၊ ရည်ရွယ်ချက်အပါအဝင် စျေးကွက်အတွင်းရောင်းချနေ‌သော ကုန်ပစ္စည်းများတွင် ကုန်စည်အမျိုးအစားအလိုက် ကုန်အညွှန်းအမှတ်အသားဖော်ပြခြင်းများ၊ စားသုံးသူကာကွယ်ရေးဥပဒေပါ စားသုံးသူများ၏ ရရှိနိုင်သောအခွင့်အရေး(၈)ချက်နှင့်တာဝန်များ၊ စီးပွားရေးလုပ်ငန်းရှင်၏တာဝန်များ၊ ဘေးအန္တရာယ်ကင်းရှင်းသောကုန်စည်များ ရောင်းချနိုင်ရေးတို့ကို ပြောကြားပြီး ကုန်အညွှန်းအမှတ်အသား ဖော်ပြထားသော အသိပညာပေးလက်ကမ်းစာစောင်များဖြန့်ဝေပေးခြင်း ဆောင်ရွက်ခဲ့ကြောင်း သတင်းရရှိခဲ့ပါသည်။

DOCA(တနင်္သာရီ)

           စားသုံးသူရေးရာဦးစီးဌာန၊ ကရင်ပြည်နယ်၊ ပြည်နယ်ဦးစီးမှူး ဦးသန်းဦးနှင့် ဝန်ထမ်းများသည် ၂၁-၅-၂၀၂၂ ရက် (စနေနေ့)၊ နံနက် ၀၉:၀၀ နာရီအချိန်တွင် ကရင်ပြည်နယ်၊ လှိုင်းဘွဲ့မြို့၊ ရွှေဂွန်းကျေးရွာ၌ စိုက်ပျိုးရေး၊ မွေးမြူရေးလုပ်ငန်းများ လုပ်ကိုင်သည့် စီးပွားရေးလုပ်ငန်းရှင်များနှင့်တွေ့ဆုံ၍ ဈေးကွက်စီးပွားရေးစနစ်နှင့်အညီ ပုဂ္ဂလိက ကဏ္ဍဖွံ့ဖြိုးတိုးတက်အောင် အားပေးမြှင့်တင်ဆောင်ရွက်ရန်နှင့် စားသုံးသူ ကာကွယ်ရေးနည်းဥပဒေအကြောင်းများ ကျယ်ကျယ်ပြန့်ပြန့် သိရှိနိုင်စေရေးအတွက် ဆွေးနွေးပွဲပြုလုပ်ခဲ့ကြောင်း သိရသည်။

          အဆိုပါဆွေးနွေးပွဲတွင် စားသုံးသူရေးရာဦးစီးဌာနမှ ပြည်နယ်ဦးစီးမှူး ဦးသန်းဦးက  ဌာန၏ မျှော်မှန်းချက်၊ ရည်မှန်းချက်များအကြောင်း ၂၀၂၂ခုနှစ်၊ ဇန်နဝါရီလ ၁၈ ရက်နေ့က ထုတ်ပြန်လိုက်သည့် စားသုံးသူကာကွယ်ရေးနည်းဥပဒေကို အကျယ်တဝင့်ရှင်းလင်းဆွေးနွေးပြီး၊ ပြည်တွင်းကုန်သွယ်မှုဖွံ့ဖြိုးရေး အထောက်အကူ ဖြစ်စေရန်အတွက် ရွှေဂွန်းကျေးရွာတွင် အဓိကအနေဖြင့် ပဲပုတ်နှင့် မြေပဲကို အများဆုံး စိုက်ပျိုးကြပြီး မတ်ပဲတို့ကိုပါ စိုက်ပျိုးသင့်ကြောင်း၊ ဈေးကွက်လေ့လာကြည့်ရာတွင် မတ်ပဲ သည် ပြည်ပမှ ဈေးကောင်းပေးသည့်ပဲဖြစ်ကြောင်း၊ စိုက်ပျိုးရေးကို ပိုမိုတိုးချဲ့ရန်လိုအပ်ပါက မိမိဒေသထဲမှာ စိုက်ပျိုးရေးသိပ္ပံသင်တန်းတက်ထားသည့် လူငယ်နှင့်ပူးပေါင်း၍ စိုက်ပျိုးရေးလုပ်ငန်းများ လုပ်ကိုင်လျှင် ပိုမိုကောင်းမွန်လာမည်ဖြစ်ပါကြောင်း၊ စားသုံးဆီနှင့်ပတ်သက်၍ ကုန်အညွှန်းအမှတ်အသားဖော်ပြထားသည့် ဆီကိုသာ စားသုံးသင့်ကြောင်း၊ စားသုံးသူ ကာကွယ်ရေးနှင့် ပြည်တွင်းကုန်သွယ်မှုဆိုင်ရာ အချက်အလက်များကို သိရှိလိုပါက မိမိတို့ဌာနနှင့် ဆက်သွယ်ဆောင်ရွက်နိုင်ပါကြောင်း ရှင်းလင်းပြောကြားခဲ့ပြီး တက်ရောက်လာသူများက သိလိုသည်များကို မေးမြန်းရာ ပြည်နယ်ဦးစီးမှူးက ပြန်လည်ရှင်းပြခဲ့ပြီး နေ့လယ် ၁၃:၃၀ နာရီအချိန်တွင် ဆွေးနွေးပွဲကို ရုတ်သိမ်းခဲ့ကြောင်း သိရပါသည်။

DOCA(ကရင်)  

          စားသုံးသူရေးရာဦးစီးဌာန၊ ဧရာဝတီတိုင်းဒေသကြီး၊ မအူပင်ခရိုင်ဦးစီးမှူးဦးဇော်မင်းနှင့် အဖွဲ့ဝင်သည် ညောင်တုန်းမြို့နယ် ၊ မြို့နယ်ဦးစီးမှူး ဦးအောင်လွင်နှင့်အတူ (၁၆.၅.၂၀၂၂) နေ့ နံနက်ပိုင်းတွင် သွားရောက်၍ ညောင်တုန်းမြို့နယ် Toe Tet Win Hlaing Co.Ltd သို့ ကွင်းဆင်းစစ်ဆေးမှု ဆောင်ရွက်ခဲ့ပါသည်။

          ၎င်းစစ်ဆေးမှုတွင် တင်ပို့မည်ပြောင်းဆံများ၏ သိုလှောင်ထားရှိမှုများသည် ဘေးအန္တရာယ်ကင်းရှင်းရေးနှင့် သန့်ရှင်းစွာထားရှိမှု ရှိ/ မရှိကိုလည်းကောင်း၊ Toe Tet Win Hlaing Co.Ltd ဒါရိုက်တာ ဦးတိုးရွှေနှင့် လုပ်ငန်းဆောင်ရွက်မှု အဆင့်ဆင့်အား အပြန်အလှန်ဆွေးနွေးပြီး သိုလှောင်ထားရှိသော ပြောင်းဆံများနှင့် ကုမ္ပဏီလုပ်ငန်းခွင်သို့ လိုက်လံစစ်ဆေးခဲ့ကြောင်း သတင်းရရှိပါသည်။

DOCA(ဧရာဝတီ)

            စားသုံးသူရေးရာဦးစီးဌာန၊ ဧရာဝတီတိုင်းဒေသကြီး၊ ညောင်တုန်းမြို့နယ်မှ မြို့နယ်တာဝန်ခံ ဦးအောင်လွင်နှင့် ဝန်ထမ်းများသည် မိတ်ဖက်အဖွဲ့အစည်းဖြစ်သော စည်ပင်သာယာရေးအဖွဲ့နှင့် ပူးပေါင်း၍ (၂၃.၅.၂၀၂၂) ရက်နေ့ နံနက် (၀၉၃၀) နာရီအချိန်တွင် သီဟသူ ဆန်စက်သို့သွားရောက်၍ ထုတ်ကုန်လုံခြုံစိတ်ချရမှုရှိစေရေး ကွင်းဆင်းလေ့လာဆောင်ရွက်ခဲ့ပါသည်။

            အဆိုပါ ကွင်းဆင်းလေ့လာမှုတွင် ညောင်တုန်းမြို့နယ်၊ မြို့နယ်တာဝန်ခံ ဦးအောင်လွင်နှင့် သီဟသူ ဆန်စက်ပိုင်ရှင် တို့တွေ့ဆုံ၍ စားသုံးသူရေးရာဦးစီးဌာန၏ လုပ်ငန်းဆောင်ရွက်မှုများ ထုတ်ကုန်လုံခြုံ စိတ်ချရမှုရှိစေရေး ဆောင်ရွက်ထားနိုင်ရေးတို့အပြင်၊ ညောင်တုန်းမြို့နယ်၏ ဆန်၊စပါး ဈေးကွက်အခြေအနေ၊ ရန်ကုန်သို့ ဆန်တင်ပို့နိုင်မှု အခြေအနေများနှင့် ဆန်းစပါးလုပ်ငန်း၏ ဖွံ့ဖြိုးတိုးတက်မှု အလားအလာကောင်းများကို အကျယ်တဝင့် ဆွေးနွေးအသိပညာပေးဆောင်ရွက်ခဲ့ကြောင်း သတင်းရရှိပါသည်။ 

DOCA(ဧရာဝတီ)