သတင်းနှင့် လှုပ်ရှားမှုများ

      တနင်္သာရီတိုင်းဒေသကြီး၊ မြိတ်ခရိုင်၊ စားသုံးသူရေးရာဦးစီးဌာနမှ တာဝန်ရှိသူများသည် ၂၀၂၄ခုနှစ်၊ မေလ(၁၅) ရက်နေ့၊နေ့လယ်ပိုင်းတွင် မြိတ်မြို့၊ ကမ်းနားလမ်း၊ ထားဝယ်စုရပ်ရှိ  "ဆိမ့်ဆိမ့်လေး" ငါးပိထောင်းလုပ်ငန်းသို့သွားရောက်၍ လုပ်ငန်းရှင်အား ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ တွေ့ဆုံ ဆွေးနွေးခဲ့ကြပါသည်။

   ထို့သို့တွေ့ဆုံဆွေးနွေးရာတွင် ဘေးအန္တရာယ်ကင်းသော စားသောက်ကုန်များ ဦးစားပေးထုတ်လုပ်နိုင်ရေးနှင့် သန့်ရှင်းလတ်ဆတ်သောထုတ်ကုန်များ ထုတ်လုပ်နိုင်ရေး၊ သက်တမ်းလွန်ထုတ်ကုန်ပစ္စည်းများမရှိစေရေးအတွက် အထူးဂရုပြုဆောင်ရွက်နိုင်ရေး၊ ကုန်အညွှန်းအမှတ်အသားပြည့်စုံစွာဖော်ပြနိုင်ရေးတို့ကို ဆွေးနွေးပြောကြားခဲ့ပြီး ကုန်အညွှန်းအမှတ်အသားဖော်ပြခြင်းဆိုင်ရာ အသိပညာပေးလက်ကမ်းစာစောင်များဖြန့်ဝေပေးခဲ့ကြောင်းသိရှိရပါသည်။

DOCA(တနင်္သာရီ)

          ရန်ကုန်တိုင်းဒေသကြီး တရားမဝင်ကုန်သွယ်မှုတိုက်ဖျက်ရေး အထူးအဖွဲ့၏ညွှန်ကြားချက်အရ သာကေတမြို့အထွေထွေအုပ်ချုပ်ရေးဦးစီးဌာနမှ ဒုတိယမြို့နယ်အုပ်ချုပ်ရေးမှူး ဦးသက်နိုင်ဝင်း၊ စားသုံးသူရေးရာဦးစီးဌာန၊ အရှေ့ပိုင်းခရိုင်ဦးစီးမှူးရုံးမှ ဒုကြီးကြပ်ရေးမှူး ဦးမြသန်းနိုင်၊  မြန်မာ့ဆိပ်ကမ်းအာဏာပိုင်မှ ကြီးကြပ်ရေးမှူး ဦးဝင်းနိုင်၊ အမှတ်(၃)ရေကြောင်းရဲကွက်ကဲမှုအဖွဲ့ခွဲမှ ရဲမှူးအောင်ကျော်ထူးနှင့် အကောက်ခွန်ဦးစီးဌာနမှ ဒုအကောက်ခွန်မှူးဦးဇေမောင်မောင် တို့ပါဝင်သောအဖွဲ့များသည် (၁၆-၅-၂၀၂၄)ရက်နေ့ နံနက် (၁၁:၀၀)နာရီအချိန်တွင် သာကေတမြို့နယ်( ယုဇန ) ဆိပ်ကမ်းအား သွားရောက်စစ်ဆေးခဲ့ကြောင်း သိရှိရပါသည်။

      အဆိုပါ(ယုဇန) ဆိပ်ကမ်းတွင်ဆိုက်ကပ်ထားသော MT စန္ဒီ  ရေယာဉ်ဖြင့် ရန်ကုန်မြို့မှ ကော့သောင်းမြို့သို့ ကျောက်မှုန့်၊ အရက်၊ အထွေထွေစားသောက်ကုန်မျိုးစုံ၊ လူသုံးကုန်မျိုးစုံများကို တင်ဆောင်နေကြောင်းစစ်ဆေးတွေ့ရှိခဲ့သဖြင့် တရားဝင်ကုန်စည်များသာဖြစ်ကြောင်းသိရှိရပါသည်။

DOCA(ရန်ကုန်)

       ဒလမြို့နယ် စားသုံးဆီစီစစ်ရေးအဖွဲ့ဥက္ကဌနှင့် အဖွဲ့ဝင်များသည် စားသုံးဆီဖြန့်ဖြူးရောင်းချလျှက်ရှိသော စားသုံးဆီကိုယ်စားလှယ်များဈေးအတွင်း/ အပြင် လက်လီဖြန့်ဖြူးရောင်းချလျက်ရှိသော စားသုံးဆီဆိုင်များမှတာဝန်ခံများနှင့်တွေ့ဆုံဆွေးနွေးပွဲကို မေလ(၁၅) ရက်နေ့၊ နံနက်(၁၀:၀၀)နာရီအချိန်တွင် မြို့နယ်အထွေထွေအုပ်ချုပ်ရေးဦးစီးဌာန အစည်းအဝေးခန်းမ၌ကျင်းပကြောင်းသိရှိရပါသည်။

        အဆိုပါတွေ့ဆုံပွဲတွင် ဒလမြို့နယ်စားသုံးဆီစီစစ်ရေးအဖွဲ့ဥက္ကဌဦးစည်သူကျော်က စားသုံးဆီဖြန့်ဖြူးရောင်းချသည့် စားသုံးဆီကိုယ်စားလှယ်များနှင့် ဈေးအတွင်း/ အပြင် လက်လီဖြန့်ဖြူးရောင်းချလျှက်ရှိသော စားသုံးဆီဆိုင်များမှ တာဝန်ခံများကို စီးပွားရေးနှင့်ကူးသန်းရောင်းဝယ်ရေးဝန်ကြီးဌာနက ထုတ်ပြန်ထားသော အမိန့်ကြော်ငြာချက်များအား လိုက်နာဆောင်ရွက်ရန်နှင့် ဝန်ကြီးဌာနအောက်ရှိစားသုံးသူရေးရာဦးစီးဌာနမှလည်း စားသုံးဆီဈေးနှုန်းတည်ငြိမ်စေရေးအတွက် သက်ဆိုင်ရာဝန်ကြီးဌာန၊ အဖွဲ့အစည်းများနှင့် ပူးပေါင်းပြီး စားသုံးဆီတင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီကိုဖွဲ့စည်းကာ မြို့နယ်အလိုက်စားသုံးဆီခွဲတမ်းရရှိမှု၊ ၎င်းရရှိသည့်ခွဲတမ်းများကိုပြန်လည်ဖြန့်ဝေမှု၊ တရားမဝင်သိုလှောင်ထားရှိမှု၊ ဈေးနှုန်းအဆမတန်မြှင့်တင်ရောင်းချမှုများ မဖြစ်ပေါ်စေရေး ဂရုပြုဆောင်ရွက်ကြရန်တို့ကို ရှင်းလင်းဆွေးနွေးပြောကြားခဲ့ကြောင်းသိရှိရပါသည်။

        အဆိုပါတွေ့ဆုံဆွေးနွေးပွဲတွင် ဒလမြို့နယ်အထွေထွေအုပ်ချုပ်ရေးဦးစီးဌာနမှ မြို့နယ်အုပ်ချုပ်ရေးမှူး ဦးစည်သူကျော်နှင့်ဝန်ထမ်းများ၊ မြန်မာနိုင်ငံရဲတပ်ဖွဲ့မှ မြို့နယ်ရဲမှူးဦးကျော်မင်းဦး၊ မြို့နယ်စည်ပင်သာယာရေးမှ အမှုဆောင်အရာရှိဦးအောင်အောင်နှင့်ဝန်ထမ်းများ၊ စားသုံးဆီလက်လီ၊ လက်ကားဖြန့်ဖြူး ရောင်းချနေသည့် စားသုံးဆီကိုယ်စားလှယ်များ၊ ဈေးအတွင်း/ အပြင်လက်လီဖြန့်ဖြူးရောင်းချလျှက်ရှိသော စားသုံးဆီဆိုင်များမှတာဝန်ခံများ စားသုံးသူရေးရာဦးစီးဌာနမှမြို့နယ်တာဝန်ခံ ဦးသန်းနိုင်တို့တက်ရောက်ခဲ့ကြောင်းသိရှိရသည်။

DOCA(ရန်ကုန်)

    စားသုံးသူရေးရာဦးစီးဌာန၊ မြောက်ပိုင်းခရိုင်ဦးစီးမှူးရုံးမှ ဒေါ်နီလာဦး၊ ဒုတိယဦးစီးမှူးအပါ (၃)ဦး၊ အမှတ်(၅)၊ဈေးတာဝန်ခံအပါ (၂)ဦးတို့ပူးပေါင်း၍ (၁၄-၅-၂၀၂၄)ရက်နေ့ နေ့လယ်(၁၀:၀၀) နာရီအချိန်တွင် လှိုင်သာယာ(အရှေ့ပိုင်း)မြို့နယ်ရှိ အမှတ်(၅)ဈေးအတွင်းရှိ ကုန်မျိုးစုံဆိုင်များသို့ အသင့်သောက်အချိုရည်အမျိုးမျိုးနှင့်ပတ်သက်ပြီး ကွင်းဆင်းစစ်ဆေးခဲ့ပါသည်။

      ထိုသို့ဆောင်ရွက်ရာတွင် အမှတ်(၅)ဈေးအတွင်းရှိ ကုန်မျိုးစုံဆိုင်များဖြစ်သော ဒေါ်ခိုင်မြတ်၊ ဒေါ်စန်းစန်းမြင့်၊ ဦးအောင်အောင်ဦး၊ ဒေါ်ခင်ယုမော်နှင့် ဦးကျော်နိုင်ဝင်းဆိုင်များ၌ ရောင်းချလျက်ရှိ Max, VeVe, Sinkist, M-150, Royal-D, Code, Fire-Dragon, Pepsi, Vito, Asia, Sport, Rocker, Stine, Sprite, Speed, V-Code နှင့် Coca အချိုရည်များတွင် တံဆိပ်အမှတ်အသား၊ အမျိုးအမည်၊ အမျိုးအစား၊ အရေအတွက်နှင့် အသားတင်ပမာဏ၊ ထားသို သိမ်းဆည်းမှုအညွှန်း၊ သုံးစွဲပုံနည်းလမ်း၊ ထုတ်လုပ်ရက်စွဲ၊ သက်တမ်းကုန်ဆုံးရက်စွဲ၊ ကျန်းမာရေးဆိုင်ရာ ဘေးထွက်ဆိုးကျိုးနှင့် FDA ထောက် ခံချက်များပါရှိကြောင်းစစ်ဆေးတွေ့ရှိရပါသည်။

DOCA(ရန်ကုန်)

   စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ရွှေဘိုခရိုင်ဦးစီးမှူးရုံးအနေဖြင့် စားသုံးသူကာကွယ်ရေးအသိပညာပေးဟောပြောပွဲများဆောင်ရွက်ခြင်း၊  စီးပွားရေးလုပ်ငန်းရှင်များနှင့်တွေ့ဆုံပြီး ဌာနမှထုတ်ပြန်ထားရှိသည့် ဥပဒေ၊ အမိန့်နှင့်ညွှန်ကြားချက်များအား ရှင်းလင်းဆွေးနွေးခြင်းများဆောင်ရွက်လျက်ရှိသည့်အပြင် ထုတ်ကုန်များလုံခြုံစိတ်ချရမှုရှိစေရေးနှင့် ကုန်အညွှန်းအမှတ်အသားများပြည့်စုံစွာထည့်သွင်းဖော်ပြရေးအတွက် ဈေးကွက်စောင့်ကြည့်စစ်ဆေးခြင်းများကို လစဉ်ဆောင်ရွက်လျက်ရှိရာ (၁၅-၅-၂၀၂၄)ရက်နေ့၊  နံနက်(၁၀:၀၀)နာရီအချိန်တွင် ရွှေဘိုခရိုင်စားသုံးသူ ရေးရာဦးစီးဌာနမှ ဒု-ခရိုင်ဦးစီးမှူးဦးဆောင်၍ ရွှေဘိုမြို့နယ်တာဝန်ခံ၊ စားသုံးသူရေးရာဌာနခွဲတာဝန်ခံနှင့် ထုတ်ကုန်လုံခြုံစိတ်ချရမှုဌာနခွဲတာဝန်ခံတို့သည် ရွှေဘိုမြို့၊ အမှတ်(၁၀)ရပ်ကွက်အတွင်းရှိ ကုန်မျိုးစုံရောင်းဝယ်ရေးဆိုင်တွင် ရောင်းချသော အသင့်သောက်အချိုရည်အမှတ်တံဆိပ်အမျိုးမျိုးအား ဈေးကွက်စောင့်ကြည့်စစ်ဆေးခဲ့ကြပါသည်။

     ထိုသို့ဈေးကွက်စောင့်ကြည့်စစ်ဆေးရာတွင် ဒု-ခရိုင်ဦးစီးမှူးက စားသုံးသူကာကွယ်ရေးဥပဒေပါ စားသုံးသူအခွင့်အရေးနှင့် စီးပွားရေးလုပ်ငန်းရှင်၏တာဝန်များ၊ ကုန်အညွှန်းအမှတ်အသားဖော်ပြခြင်းအကြောင်းများ၊ ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ မြန်မာနိုင်ငံစားသုံးသူကာကွယ်ရေး ကော်မရှင်၏ ညွှန်ကြားချက်အမှတ် (၂/၂၀၁၉)ပါအကြောင်းများ၊ အသင့်သောက်အချိုရည်အမျိုးမျိုးတွင် အရွယ်အစား၊ အရေအတွက်နှင့် အသားတင်ပမာဏ၊ ထားသိုသိမ်းဆည်းမှုအညွှန်းနှင့် ဓါတ်မတည့်ကြောင်းဖော်ပြချက်တို့ကို မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု (သို့မဟုတ်) တစ်ခုထက်ပို၍တွဲလျက်ဖြစ်စေ ဖော်ပြရန်လိုအပ်ကြောင်းတို့ကို အသိပညာပေးဆွေးနွေးခဲ့ပြီး စားသုံးသူကာကွယ်ရေးအသိပညာပေးလက်ကမ်းစာစောင်များဖြန့်ဝေပေးခဲ့ကြောင်း သတင်းရရှိပါသည်။

DOCA(စစ်ကိုင်း)