သတင်းနှင့် လှုပ်ရှားမှုများ

         ရန်ကုန်တိုင်းဒေသကြီး၊ တွံတေးခရိုင် ကော့မှူးမြို့နယ်အတွင်းရှိ စက်သုံးဆီအရောင်းဆိုင်များ စက်သုံးဆီရောင်းချနေမှုအခြေအနေအား မတ်လ(၁၆)ရက်နေ့၊ နေ့လယ်(၁၂:၀၀)နာရီတွင် ဗိုလ်ချုပ် လမ်းမကြီး၊ ဘေးဝဲယာတွင် စက်သုံးဆီရောင်းချလျက်ရှိသော စက်သုံးဆီဆိုင်များအား သွားရောက်ကွင်းဆင်းစစ်ဆေးခဲ့ကြောင်း သိရှိရပါသည်။

        ထိုသို့ ကွင်းဆင်းစစ်ဆေးခဲ့ရာတွင် ကော့မှူးမြို့နယ် အထွေထွေအုပ်ချုပ်ရေးဦးစီးဌာနမှ အုပ်ချုပ်ရေးမှူး၊ မြို့နယ်မီးသတ်ဦးစီးဌာနမှဦးစီးမှူး၊ မြို့နယ်ရဲမှူးနှင့်တပ်ဖွဲ့ဝင်များ၊ မြို့နယ်စည်ပင်သာယာရေးဦးစီးဌာနမှဝန်ထမ်းများနှင့် စားသုံးသူရေးရာဦးစီးဌာနမှ မြို့နယ်တာဝန်ခံတို့ ပူးပေါင်းအဖွဲ့သည် ဗိုလ်ချုပ်လမ်းမကြီးဝဲယာတွင် ရောင်းချလျက်ရှိသော Max ဆီဆိုင်၊ ရွှေသရဖူ ဆီဆိုင်နှင့် Apex စက်သုံးဆီအရောင်းဆိုင်တို့တွင် ယာဉ်များတန်းစီစောင့်ဆိုင်းဝယ်ယူနေရခြင်း ရှိ/မရှိ ခွဲတမ်းအချိုးကျစနစ်ဖြင့် ရောင်းချနေရမှု ရှိ/မရှိ၊ အပြည့်အဝဖြန့်ဖြူးရောင်းချပေးနိုင်ခြင်း ရှိ/မရှိတို့အား မေးမြန်းခဲ့ရာ စက်သုံးဆီအရောင်းဆိုင်များမှ တာဝန်ရှိမန်နေဂျာတို့နှင့် မိမိတို့၏ ဆီဆိုင်တွင် သတ်မှတ်ထားသည့်ခွဲတမ်းများကိုလည်း အချိန်မီထုတ်ယူရရှိနိုင်ပါသဖြင့်မည်သည့် စက်သုံးဆီ အမျိုးအစားကိုမဆို ဖြန့်ဖြူးရောင်းချပေးလျက်ရှိကြောင်း၊ ယာဉ်တန်းစီတိုး၍ ဝယ်ယူနေရသည့် အခြေအနေများမရှိကြောင်း ပြန်လည်ဖြေကြားခဲ့ပြီး ဆက်လက်၍ ဌာနဆိုင်ရာ တာဝန်ရှိသူများက လက်ရှိဖြစ်ပေါ်နေသည့်အခြေအနေများအရ စက်သုံးဆီ သိုလှောင်ကန်များ တွင် စက်သုံးဆီရှိလျက် ဆီဖြန့်ဖြူးရောင်းချပေးလျှက်မရှိသော စက်သုံးဆီအရောင်းဆိုင်များအား ဥပဒေနှင့်အညီ အရေးယူ ဆောင်ရွက်သွားမည်ဖြစ်ကြောင်းနှင့် ဆောင်ရွက်ထားရှိမှု အခြေအနေအား ဖွဲ့စည်းမိန့်နှင့်အညီ ပြန်လည်တင်ပြရန် မြို့နယ်စက်သုံးဆီစိစစ်ရေးအဖွဲ့အား ဖွဲ့စည်းဆောင်ရွက်လျက်ရှိကြောင်း အသိပညာပေးဟောပြောခဲ့ပြီး စက်သုံးဆီဆိုင်များမှ သတ်မှတ်ဈေးနှုန်းဖြင့် ရောင်းချခြင်းရှိ/မရှိ၊ စက်သုံးဆီဆိုင်များတွင် တပ်ဆင်ထားသော CCTV များမှ Control စနစ်ကောင်းမွန်မှု ရှိ/မရှိ  မြေပြင်ကွင်းဆင်းစစ်ဆေးခဲ့ကြောင်း သိရှိရပါသည်။

DOCA(ရန်ကုန်)

       စားအုန်းဆီဖြန့်ဖြူးရေးစီမံခန့်ခွဲမှု Software Onboarding ပြုလုပ်ခြင်း အခမ်းအနားကို စားသုံးသူရေးရာဦးစီးဌာန၊ ရန်ကုန်တိုင်းဒေသကြီးဦးစီးမှူးရုံး၏ ပဥ္စမထပ်ရှိ အစည်းအဝေးခန်းမ တွင် ၂၀.၃.၂၀၂၄ ၌ ကျင်းပပြုလုပ်ခဲ့ပါသည်။ အခမ်းအနားကို စားသုံးသူရေးရာဦးစီးဌာန၊ ရန်ကုန် တိုင်းဒေသကြီးဦးစီးမှူး ဦးကျော်ကျော်လွင်နှင့်တာဝန်ရှိသူများ၊ ဖိတ်ကြားထားသော ဌာနဆိုင်ရာများမှ တာဝန်ရှိသူများ၊ မြန်မာနိုင်ငံဆီကုန်သည်နှင့် ဆီလုပ်ငန်းရှင်များအသင်းမှ တာဝန်ရှိသူများ၊ ဆီထုတ်ကိုယ်စားလှယ်များ၊ ဆီတင်သွင်းသည့် ကုမ္ပဏီများမှ စုစုပေါင်း ၁၃၆ ဦးတက်ရောက်ခဲ့ပါ သည်။ အခမ်းအနားစတင်ချိန်တွင် စားသုံးသူရေးရာဦးစီးဌာန၊ ရန်ကုန်တိုင်းဒေသကြီးဦးစီးမှူး ဦးကျော်ကျော်လွင်က အဖွင့်အမှာစကား ပြောကြားခဲ့ပါသည်။ ဦးကျော်ကျော်လွင်က စားသုံးဆီ တင်သွင်းသိုလှောင်ဖြန့်ဖြူးရေးအဖွဲ့၏ အသစ်ပြန်လည်ဖွဲ့စည်းမှုအခြေအနေ၊ Software စနစ်လုပ်ဆောင်ရသည့်ရည်ရွယ်ချက်တို့ကို ရှင်းလင်းပြောကြားခဲ့ပါသည်။ ထို့နောက်မြန်မာနိုင်ငံ ဆီကုန်သည်နှင့် ဆီလုပ်ငန်းရှင်များအသင်း၊ ဒုတိယဥက္ကဌ ဦးဌေးမိုးက ဆွေးနွေးပြောကြား ခဲ့ပါသည်။ ဆက်လက်ပြီး Software ဖန်တီးပေးသည့် Capital Connect Company Limited. မှ တာဝန်ရှိသူတစ်ဦးက စားသုံးဆီဖြန့်ဖြူးရေး စီမံခန့်ခွဲမှု Software စနစ်နှင့်ပတ်သက်၍ Onboarding ပြုလုပ်ခြင်းအား ရှင်းလင်းပြသပေးခဲ့ပါသည်။ ထို့နောက်အခမ်းအနားတက်ရောက် လာသူများက သိလိုသည်များကို မေးမြန်းခဲ့ကြပြီး တာဝန်ရှိသူများက ပြန်လည်ရှင်းလင်း ပြောကြားခဲ့ကာ အခမ်းအနားအောင်မြင်စွာ ပြီးမြောက်ခဲ့ပါသည်။

DOCA(ရန်ကုန်)

         ရန်ကုန်တိုင်းဒေသကြီး၊ တောင်ပိုင်းခရိုင် သန်လျင်မြို့နယ်ရှိ  သီလဝါစက်မှုဇုန်၊ Wilmar ဆီကန်မှတစ်ဆင့် ရန်ကုန်တိုင်းဒေသကြီးအတွင်း မြို့နယ်များနှင့် အခြားတိုင်းဒေသကြီး/ ပြည်နယ်များရှိ ကိုယ်စားလှယ်များသို့ စားအုန်းဆီနေ့စဉ် ထုတ်ပေးလျှက်ရှိပါသည်။ စားအုန်းဆီ အား ပြည်တွင်းဈေးကွက်၌ ရောင်းဝယ်ဖောက်ကားရာတွင် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားအုန်းဆီတင်သွင်း သိုလှောင်ဖြန့်ဖြူးခြင်း လုပ်ငန်းကြီးကြပ်ရေးကော်မတီမှ အပတ်စဉ် ထုတ်ပြန်ထားသော အခြေခံလက်ကားရည်ညွှန်းဈေးနှုန်းအပေါ် လက်ကားပြန်လည် ဖြန့်ဖြူးရောင်းချသူများအနေဖြင့် ဒေသအရောက်ဈေးနှုန်းများအပေါ် (၂)ရာခိုင်နှုန်းအမြတ်ထက်မပိုသော ဈေးနှုန်းဖြင့် ဈေးကွက်အတွင်းသို့ ပြန်လည်ဖြန့်ဖြူးရောင်းချစေရေး ဈေးနှုန်း အဆမတန်မြှင့်တင်ရောင်းချခြင်းများ မပြုလုပ်စေရေးတို့အတွက်လည်း ဝန်ထမ်းများမှ ကွင်းဆင်းကြပ်မတ်ဆောင်ရွက်လျှက်ရှိကြောင်းနှင့် (၁၁.၃.၂၀၂၄)ရက်နေ့မှ (၁၆.၃.၂၀၂၄)ရက်နေ့အထိ ဆီကုမ္ပဏီ(၂၁)ခုနှင့် စားအုန်းဆီတန်ချိန် (၄၈၄၄.၈၁၃)တန်ကို ထုတ်ပေးခဲ့ကြောင်း သိရှိရပါသည်။

DOCA(ရန်ကုန်)

     ရန်ကုန်တိုင်းဒေသကြီး၊ တွံတေးခရိုင်၊ ကော့မှူးမြို့နယ်အတွင်းရှိ ဆေးနှင့်ဆေးပစ္စည်း၊ ဆက်စပ်ပစ္စည်းများဝယ်ယူသုံးစွဲရာတွင် အဆင်ပြေရန်ရည်ရွယ်၍ စည်ပင်သာယာမြို့မဈေးအတွင်း/အပြင်နှင့် ရပ်ကွက်များ၌ ရောင်းချလျက်ရှိသော ဆေးဆိုင်နှင့်ဆေးစတိုးများအား ၂၀၂၄ခုနှစ်၊ မတ်လ(၂၁)ရက်နေ့၊ နေ့လယ်(၁၃း၀၀)နာရီအချိန်တွင် လုပ်ငန်းရှင်ဆေးဆိုင်ပိုင်ရှင်များနှင့်သွားရောက်တွေ့ဆုံပြီး ဈေးကွက်အတွင်း ကွင်းဆင်းစစ်ဆေးခဲ့ကြောင်း သိရှိရပါသည်။

    ထိုသို့ ဈေးကွက်အတွင်း ကွင်းဆင်းစစ်ဆေးခဲ့ရာတွင် မြို့နယ်ကျန်းမာရေးဦးစီးဌာနမှ ဝန်ထမ်းများ၊ မြို့နယ်စည်ပင်သာယာရေးဦးစီးဌာနမှ ဈေးတာဝန်ခံနှင့် စားသုံးသူရေးရာဦးစီးဌာနမှ မြို့နယ်တာဝန်ခံတို့ပူးပေါင်းအဖွဲ့သည် စည်ပင်သာယာမြို့မဈေးအတွင်း/အပြင်နှင့် ဗိုလ်ချုပ်လမ်းမကြီး၊ မြို့မရပ်ကွက်၊ မကျီးကန်ရပ်ကွက်များရှိ ဆေးနှင့်စတိုးဆိုင်၊ ဆေးဆိုင်များမှ ဆိုင်ပိုင်ရှင် လုပ်ငန်းရှင်များနှင့်သွားရောက်တွေ့ဆုံပြီး ကိုဗစ်-၁၉ ရောဂါကုသရာတွင်အသုံးပြုသည့် ဆက်စပ်ဆေးပစ္စည်းများနှင့် အခြားဆေးနှင့်ဆေးပစ္စည်းများကို ဈေးကွက်အတွင်း ဝယ်ယူဖြန့်ဖြူးရောင်းချရာ၌ ဈေးနှုန်းများအဆမတန်မြှင့်တင်ရောင်းချခြင်းများမပြုလုပ်ကြရန်နှင့် အစားအသောက်နှင့်ဆေးဝါးကွပ်ကဲရေးဦးစီးဌာန၏ ခွင့်ပြုချက်မပါရှိသော တရားမဝင်ဆေးဝါးများ၊ သက်တမ်းကုန်ဆုံးသောဆေးဝါးများကို မိမိတို့၏ဆေးဆိုင်များတွင် ဖြန့်ဖြူးရောင်းချခြင်းများမပြုလုပ်ကြရန်၊ ကုန်အညွှန်းအမှတ်အသားဖော်ပြချက်ပြည့်စုံစွာဖော်ပြထားသော ဆေးဝါးများကိုသာရောင်းချကြရန်နှင့် စားသုံးသူပြည်သူများအတွက် အဓိကကျသော ကိုဗစ်-၁၉ ဆေးဝါးများ ဈေးကွက်အတွင်းပြတ်လပ်မှုများမဖြစ်စေရန် အသိပညာပေးဟောကြားခဲ့ပြီး ဆေးနှင့်ဆေးပစ္စည်း၊ ဆက်စပ်ပစ္စည်းဈေးနှုန်းအခြေအနေများအား မေးမြန်းစုံစမ်းခဲ့ပြီး ဈေးကွက်အတွင်း ကွင်းဆင်းစစ်ဆေးခဲ့ကြောင်းသိရှိရပါသည်။

DOCA(ရန်ကုန်)

    ရန်ကုန်တိုင်းဒေသကြီး၊ တွံတေးခရိုင်၊ ကော့မှူးမြို့နယ်၌ ဘိလပ်မြေအမျိုးအစားများဝယ်ယူသုံးစွဲရာတွင် ပစ္စည်းပြတ်လပ်မှုမရှိစေရန်နှင့် ဈေးနှုန်းအဆမတန်မြှင့်တင်ရောင်းချခြင်းများမပြုလုပ်ရန်ရည်ရွယ်၍ ကုန်အမာဆိုင်ကြီးများသို့ ၂၀၂၄ခုနှစ်၊ မတ်လ(၂၂)ရက်နေ့၊ နံနက်(၀၉:၀၀)နာရီအချိန်တွင် လုပ်ငန်းရှင်ဆိုင်ရှင်များနှင့်သွားရောက်တွေ့ဆုံပြီး ဈေးကွက်အတွင်း ကွင်းဆင်းစစ်ဆေးခဲ့ကြောင်းသိရှိရပါ သည်။ 

     ထိုသို့ဈေးကွက်အတွင်း ဈေးကွက်စောင့်ကြည့်ကွင်းဆင်းစစ်ဆေးခဲ့ရာတွင် စားသုံးသူရေးရာဦးစီးဌာနမှ ကော့မှူးမြို့နယ်တာဝန်ခံသည် ကော့မှူးမြို့နယ်၊ အမှတ်(၁၀၀)၊ စည်ပင်လမ်း၊ မကျီးကန်ရပ်ကွက်၊ ဓနအောင်ကုန်အမာဆိုင်နှင့် အမှတ်(၁၀၂)၊ စည်ပင်လမ်း၊ မကျီးကန်ရပ်ကွက်အတွင်းရှိ မြင့်မိုရ်ကုန်အမာဆိုင်တို့တွင် ရောင်းချလျက်ရှိသော လုပ်ငန်းရှင်များနှင့်တွေ့ဆုံကာ ဘိလပ်မြေအမျိုးအစားများဖြစ်သော Alpha၊ ကြံ့နှစ်ကောင်၊ (ဘားအံ)မြိုင်ကလေးထုတ်နာရီအမှတ်တံဆိပ် စသည့်ဘိလပ်မြေများကို ဈေးကွက်အတွင်း ရောင်းချနေခြင်းမျိုးရှိ/မရှိ မေးမြန်း စုံစမ်းခဲ့ရာ ကော့မှူးမြို့နယ်အနေဖြင့် Alpha ဘိလပ်မြေတစ်မျိုးကိုသာ လှိုင်လှိုင်သုံးစွဲကြသဖြင့် မိမိတို့၏ဆိုင်တွင် Alpha အမျိုးအစားဘိလပ်မြေတစ်မျိုးတည်းကိုသာ ဝယ်ယူဖြန့်ဖြူး ရောင်းချပေးလျက်ရှိကြောင်း အခြားဘိလပ်မြေအမျိုးအစားများအား ကော့မှူးဈေးကွက်အတွင်း ဝယ်ယူဖြန့်ဖြူးရောင်းချခြင်းများမရှိကြောင်း၊ Alpha ဘိလပ်မြေကိုလည်း ဈေးနှုန်းအဆမတန်မြှင့်တင်ရောင်းချနေခြင်းများများမရှိကြောင်း ပြန်လည်ပြောကြားခဲ့ပြီး ဆက်လက်၍ တာဝန်ရှိသူများက ကော့မှူးမြို့နယ်သည် အကြီးစားစက်မှုလက်မှုလုပ်ငန်းအကောင်အထည်ဖော်တည်ဆောက်နေသော စက်ရုံ၊ အလုပ်ရုံများမရှိသောကြောင့် မိမိတို့မြို့နယ်အနေဖြင့် ပစ္စည်းပြတ်လပ်မှုများမရှိနိုင်ဘဲ လုံလောက်မှုရှိနိုင်သောကြောင့် ဘိလပ်မြေများကို မိမိတို့၏ဆိုင်များတွင် ဈေးကစားရန်ရည်ရွယ်ချက်ဖြင့် တရားမဝင်သိုလှောင်ထားခြင်းများမပြုလုပ်ကြရန်နှင့် ဈေးနှုန်းများအဆမတန်မြှင့်တင်ရောင်းချခြင်းများမပြုလုပ်ကြရန် ဘိလပ်မြေမြေပြင်လက်ကျန်များအား စစ်ဆေးရေတွက်ခဲ့ပြီး ဈေးကွက်အတွင်း အသိပညာပေးဈေးကွက်စောင့်ကြည့်ကွင်းဆင်းစစ်ဆေးခဲ့ကြောင်းသိရှိရပါသည်။

DOCA(ရန်ကုန်)