သတင်းနှင့် လှုပ်ရှားမှုများ

     စားသုံးသူရေးရာဦးစီးဌာန၊ တောင်ငူခရိုင်ဦးစီးမှူးရုံးမှ စားသုံး/ထုတ်လုံဌာနခွဲတာဝန်ခံ ဦးစီးမှူး ဦးမင်းဇော်၊ တောင်ငူမြို့နယ်တာဝန်ခံ ဦးစီးမှူး ဦးမြင့်သူနှင့် စီမံရေးရာဌာနခွဲတာဝန်ခံ ဒုတိယဦးစီးမှူး ဒေါ်သဲစုလွင်တို့ပါဝင်‌သောအဖွဲ့သည် ဖေဖော်ဝါရီလ ၆ ရက်နေ့ နံနက်ပိုင်းက တောင်ငူမြို့နယ် ကျေးတောကျေးရွာ အခြေခံပညာမူလတန်းလွန်ကျောင်းတွင် လည်းကောင်း၊ မွန်းလွဲပိုင်းတွင် ကျောင်းကုန်းကျေးရွာ အခြေခံပညာမူလတန်းလွန်ကျောင်းတွင်လည်းကောင်း ကျောင်းသားကျောင်းသူများအား စားသုံးသူကာကွယ်ရေးဆိုင်ရာများကို အသိပညာပေးဟောပြောခဲ့ပါသည်။

   ဟောပြောပွဲများတွင် မြို့နယ်တာဝန်ခံ ဦးမြင့်သူက စားသုံးသူရေးရာဦးစီးဌာန ပေါ်ပေါက်လာပုံနှင့် စားသုံးသူကာကွယ်ရေးအတွက် ဦးစီးဌာန၏ ဆောင်ရွက်ချက်များကိုလည်းကောင်း၊ ဌာနခွဲတာဝန်ခံ ဒုတိယဦးစီးမှူး ဒေါ်သဲစုလွင်က စားသုံးသူကာကွယ်ရေးဥပဒေတွင်ပြဋ္ဌာန်းထားသည့် စားသုံးသူ၏အခွင့်အရေးနှင့်တာဝန်များကိုလည်းကောင်း၊ ဌာနခွဲတာဝန်ခံ ဦးစီးမှူး ဦးမင်းဇော်က ကုန်အညွှန်းအမှတ်အသားနှင့် ပတ်သက်၍ ဈေးကွက်စောင့်ကြည့်စစ်ဆေး တွေ့ရှိချက်များနှင့် စားသုံးသူများ ဆောင်ရန်ရှောင်ရန် အချက်များကိုလည်းကောင်း ဟောပြောခဲ့ကြပါသည်။

   ဟောပြောပွဲသို့ ကျေးတောကျေးရွာ အခြေခံပညာမူလတန်းလွန်ကျောင်းမှ ဆရာ/ဆရာမ ၈ ဦး၊ ကျောင်းသား/ကျောင်းသူ ၅၃ ဦးတက်ရောက်ခဲ့ပြီး၊ ကျောင်းကုန်းကျေးရွာ အခြေခံပညာမူလတန်းလွန်ကျောင်းမှ ဆရာဆရာမ ၈ ဦး၊ ကျောင်းသားကျောင်းသူ ၉၈ ဦး အသီးသီး တက်ရောက်ခဲ့ကြောင်း သိရှိရပါသည်။

DOCA(ပဲခူး)

        ပဲခူးတိုင်းဒေသကြီး၊ တောင်ငူခရိုင်၊ တောင်ငူမြို့နယ် ကျေးလက်ဒေသများတွင် နွေစပါး စိုက်ပျိုးရန် တောင်သူဦးကြီးများသည် ကြိုတင်ပြင်ဆင်မှုများ လုပ်ဆောင်နေကြပါသည်။ မိုးစပါး စိုက်ပျိုးရိတ်သိမ်းပြီး လယ်များကိုထွန်စက်များဖြင့် ထယ်ထိုး၍မြေပြင်ခြင်း၊ သဘာဝမြေဩဇာ ဖြစ်သည့် နွားချေးထည့်ခြင်းများ ဆောင်ရွက်ကြပါသည်။

           ဇန်နဝါရီလ ၂၇ ရက်နေ့တွင် ဆည်များမှ ရေများစတင်လွှတ်ပေးပြီး ဖေဖော်ဝါရီလ ၁ ရက် နေ့တွင် စစ်တောင်းမြစ်ရေတင်စီမံကိန်းများမှ ရေများ စတင်လွှတ်ပေးသဖြင့် ယခုအခါ မြေပြုပြင် ထားသော လယ်ကွက်များထဲသို့ ရေသွင်း၍ ထွန်မွှေခြင်းများကို ဆောင်ရွက်ကြပါသည်။

         တောင်ငူမြို့နယ်တွင် ၂၀၂၂-၂၀၂၃ ခုဘဏ္ဍာနှစ်အတွင်း နွေစပါး ၁၇၈၅၃ ဧက စိုက်ပျိုးရန် လျာ ထားပါသည်။ နိုင်ငံ့စီးပွားရေးမြှင့်တင်ရေးရန်ပုံငွေဖြင့် နွေစပါးစိုက်ပျိုးမည့် တောင်သူကြီးများအား လယ်တစ်ဧက စိုက်ပျိုးလျှင် ငွေကျပ် နှစ်သိန်းနှင့်ညီမျှသော သွင်းအားစုများကိုလည်း ထုတ်ပေးနေ ပါသည်။ မြို့နယ် စိုက်ပျိုးရေးဦးစီးဌာန၏ ကြီးကြပ်မှုဖြင့် လယ်ဧက ၇၃၂၈ဧက အား သွင်းအားစုများ ပံ့ပိုးသွားမည်ဟုလည်း သိရှိရပါသည်။

       နွေစပါး စိုက်ပျိုးရေးအတွက် ဆည်ကြီးများတွင် မိုးရေလုံလောက်စွာ ရရှိနေပါသည်။ တောင်ငူမြို့နယ်တွင် တစ်နှစ်ပတ်လုံး မိုးရေချိန် ၇၆.၆၈ ရွာသွန်းသော်လည်း ယခုနှစ် ၂၀၂၂ ခုနှစ် တွင် ပုံမှန်အားဖြင့် မိုးရေချိန် ၆၈.၆၈ လက်မသာရှိသည်ဟု မိုးလေဝသနှင့် ဇလဗေဒညွှန်ကြားမှုဦးစီး ဌာန၏ စာရင်းဇယားများအရ သိရှိရပါသည်။ မိုးရေချိန် ၁၀ လက်မခန့်လျော့နည်းသော်လည်း နွေစပါး စိုက်ပျိုးမှုအတွက် စိုက်ပျိုးရေလုံလောက်ကြောင်း စိုက်ပျိုးရေးဦးစီးဌာနမှ သိရှိရပါသည်။

       ဆည်များတွင် မိုးရေစုဆောင်းမှု လုံလောက်စွာရှိသောကြောင့် ခပေါင်းဆည်ရေသောက် ၁၁၉၇၂ ဧက၊ ကရင်ချောင်းဆည်ရေသောက် ၆၁၆ ဧက၊ ကမ်းနီဆည်ရေသောက် ၁၂၂၀ ဧက၊ ပသိ ဆည်ရေသောက် ၁၅၁၁ ဧက၊ ရွာတန်းရှည်လျှပ်စစ်မြစ်ရေတင်စီမံကိန်း ၆၀၀ ဧက၊ သဖန်းပင် ဆိုလာမြစ်ရေတင်စီမံကိန်း ၂၀၀ ဧက၊ ချောင်းပိတ်တမံပိတ် ၅၁၃ ဧက၊ အင်းအိုင် ၁၂၂၁ ဧက စုစုပေါင်း နွေစပါး ၁၇၈၅၃ ဧက စိုက်ပျိုးနိုင်ကြောင်း သိရှိရပါသည်။

        နွေစပါး စိုက်ပျိုးရာတွင် ရက် ၉၀ မျိုး၊ နှံကောက် ၁၀၅ ရက်မျိုး၊ နှံကောက် ၁၁၀ မျိုးနှင့် နယူးဧရာစပါးများ အများဆုံးစိုက်ပျိုးကြပါသည်။ နှံကောက်စပါးသည် ရာသီဥတုဒဏ်ခံနိုင်ခြင်း၊ ရာသီနှင့်ကိုက်ညီခြင်း၊ ဈေးကွက်ဝယ်လိုအားရှိခြင်းတို့ကြောင့် အများဆုံးစိုက်ပျိုးကြောင်း သိရှိရပါ သည်။

        ယခင်နှစ်များတွင် နွေစပါးတစ်ဧကလျှင် ၇၃.၂၁ တင်းမှ ၈၀ တင်းအထိ ထွက်ရှိကြောင်း သိရှိရပါသည်။ ၂၀၂၂-၂၀၂၃ဘဏ္ဍာနှစ်တွင်လျာထားချက်အတိုင်း ၁၇၈၅၃ ဧက စိုက်ပျိုးနိုင်ပြီး ယခင်နှစ် များကဲ့သို့ အနည်းဆုံး ၇၃.၂၁ တင်း ထွက်ရှိပါက စပါးတင်းအ‌ရေအတွက်မှာ တစ်ဆယ့်သုံးသိန်းခန့် ထွက်ရှိမည် ဖြစ်ပါသည်။

        “နိုင်ငံ့စီးပွားမြှင့်တင်ဖို့ ဆန်စပါးဖြင့်ကြိုးပမ်းစို့” ဟူသောဆောင်ပုဒ်နှင့်အညီ နိုင်ငံ့စီးပွား မြှင့်တင်နိုင်ရန် နွေစပါးများကိုစိုက်ပျိုးနေကြပြီး စပါးနှင့်ဆန်သည် နိုင်ငံတော်၏ ဝမ်းစာအဖြစ် စားသုံးခြင်း၊ မဟာဗျူဟာကျသောသီးနှံဖြစ်ခြင်းကြောင့်  တောင်သူဦးကြီးများ အားထားစိုက်ပျိုးနိုင် ကြောင်း သိရှိရပါသည်။

DOCA(Bago)

      စားသုံးသူရေးရာဦးစီးဌာနနှင့် ပြန်ကြားရေးနှင့်ပြည်သူ့ဆက်ဆံရေးဦးစီးဌာနတို့ ပူးပေါင်း ၍ အုတ်တွင်းမြို့နယ် ဗောဓိကုန်းကျေးရွာ အခြေခံပညာအထက်တန်းကျောင်းမှ ကျောင်းသား ကျောင်းသူများ သိသင့်သိထိုက်သည့် အသိပညာဗဟုသုတများ ရရှိစေရန် ရည်ရွယ်၍ အသိပညာပေး ဟောပြောပွဲကို ဖေဖော်ဝါရီလ ၇ ရက်နေ့ နံနက်ပိုင်းက ယင်းကျောင်းခန်းမ၌ ကျင်းပပြုလုပ်ခဲ့ပါ သည်။

          ဟောပြောပွဲတွင် စားသုံးသူရေးရာဦးစီးဌာန အုတ်တွင်းမြို့နယ်တာဝန်ခံရုံးမှ ဌာနခွဲ စာရေး ဦးအောင်ဝင်းက စားသုံးသူ၏ အခွင့်အရေးနှင့်တာဝန်များ၊ ကုန်စည်များဝယ်ယူရာတွင် ကုန်အညွှန်းအမှတ်အသားများကို ဦးစားပေးဖတ်ရှုသင့်သည့်အကြောင်းများ၊စားသုံးသူနစ်နာဆုံးရှုံးမှုများရှိပါက တိုင်ကြားနိုင်သည့်အကြောင်းများကိုလည်းကောင်း၊ ပြန်ကြားရေးနှင့်ပြည်သူ့ဆက်ဆံရေးဦးစီးဌာနမှ ဒုတိယမြို့နယ်ဦးစီးမှူး ဒေါ်ခင်ခင်မာက စာဖတ်ခြင်း၏ အကျိုးကျေးဇူးများကိုလည်း ကောင်း ဟောပြောဆွေးနွေးကြပါသည်။

           ဟောပြောပွဲသို့ ကျောင်းသားကျောင်းသူ ၁၂၉ ဦး တက်ရောက်ခဲ့ကြောင်းနှင့် ဟောပြောပွဲအပြီးတွင် ကျောင်းမုန့်ဈေးတန်း၌ ရောင်းချနေသောမုန့်များအား မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက်အမှတ် ၂/၂၀၁၉ နှင့်အညီ ကုန်အညွှန်းအမှတ်အသားများ ဖော်ပြထားခြင်း ရှိ/မရှိကို စောင့်ကြည့်စစ်ဆေးခဲ့ကြောင်း သိရှိရပါသည်။

DOCA(Bago)

       ရှမ်းပြည်နယ် (အရှေ့ပိုင်း)၊ စားသုံးသူရေးရာဦးစီးဌာန၊ ဒုတိယပြည်နယ်ဦးစီးမှူးရုံးမှ စစ်ဆေးရေးမှူးများနှင့် ဝန်ထမ်းများသည် အစားအသောက်နှင့်ဆေးဝါးကွပ်ကဲရေးဦးစီးဌာန၊ မြို့နယ်ကျန်းမာရေးနှင့် မြို့နယ်စည်ပင်သာယာရေးဦးစီးဌာနတို့နှင့် ပူးပေါင်း၍ ၂၀၂၃ ခုနှစ်၊ ဖေဖော်ဝါရီလ (၁၀)ရက်နေ့၊ နံနက်(၁၀:၀၀) နာရီအချိန်တွင် ကျိုင်းတုံမြို့၊ မြို့မဈေးအတွင်းရှိ ဆေးနှင့်ဆေးဝါးပစ္စည်းအရောင်းဆိုင်(၇)ဆိုင်အား ကျန်းမာရေးဝန်ကြီးဌာန၊ အစားအသောက်နှင့်ဆေးကွပ်ကဲရေးဦးစီးဌာနတို့မှ ထုတ်ပြန်ထားသည့် စံမညီဆေးဝါးများ ဖြန့်ဖြူးရောင်းချခြင်းရှိမရှိ ဈေးကွက်စောင့်ကြည့် ကွင်းဆင်းစစ်ဆေးခြင်း ဆောင်ရွက်ခဲ့ပါသည်။

         ထိုသို့ ဈေးကွက်စောင့်ကြည့်စစ်ဆေးရာတွင် ကျန်းမာရေးဝန်ကြီးဌာန၊ အစားအသောက်နှင့် ဆေးဝါးကွပ်ကဲရေးဦးစီးဌာနတို့မှ ထုတ်ပြန်ထားသည့် စံမညီဆေးဝါးများအား အဆိုပါဆေးနှင့်ဆေးပစ္စည်းအရောင်းဆိုင်(၇)ဆိုင်တွင် ရောင်းချခြင်းမရှိကြောင်း စစ်ဆေးတွေ့ရှိရပါသည်။

     ဆက်လက်၍ စစ်ဆေးရေးမှူးများနှင့် တာဝန်ရှိသူများသည် ဆေးနှင့်ဆေးပစ္စည်းအရောင်းဆိုင်များအား ကျန်းမာရေးဝန်ကြီးဌာန၊ အစားအသောက်နှင့်ဆေးဝါး ကွပ်ကဲရေးဦးစီးဌာနတို့မှ ထုတ်ပြန်ထားသည့် စံမညီဆေးဝါးများအား ရောင်းချခြင်းမပြုရန်၊ ထုတ်လုပ်/တင်သွင်းသည့် ကုမ္ပဏီဆေးဝါးမှတ်ပုံတင်အမှတ်၊ Import Resgistration No.(IR) များ ဖော်ပြထားသော ဆေးနှင့် ဆေးပစ္စည်းများကိုသာရောင်းချရန်၊ ဆေးဝါးရောင်းချခွင့်လိုင်စင်များ ပုံမှတ်သက်တမ်းတိုးရန်၊ စားသုံးသူကာကွယ်ရေးဥပဒေအခန်း(၁၀)ပါ “စီးပွားရေးလုပ်ငန်းရှင်၏တာဝန်များ”ကို သိရှိလိုက် နာဆောင်ရွက်စေရန် အသိပညာပေးဆွေးနွေးခြင်းများ ဆောင်ရွက်ခဲ့ပါသည်။

DOCA(ရှမ်း)

      ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ ပုသိမ်ခရိုင်၊ ကျောင်းကုန်းမြို့နယ် တာဝန်ခံသည် စားသုံးသူကာကွယ်ရေးလုပ်ငန်းများ ခိုင်မာတိုးတက်စေရေးအတွက် စားသုံးသူကာကွယ်ရေးဥပဒေများအား စားသုံးသူပြည်သူများသိရှိနိုင်စေရန် ရည်ရွယ်၍ ဖေဖော်ဝါရီလ (၉)ရက် နံနက်(၁၀:၀၀) နာရီတွင် ပုသိမ်ခရိုင်၊ သာပေါင်းမြို့နယ် ဂုံမင်းကျေးရွာရှိ မိဘပြည်သူများအား အသိပညာပေးဆွေးနွေးဟောပြောခဲ့ပါသည်။

    ထိုသို့ဟောပြောဆွေးနွေးရာတွင် စားသုံးသူရေးရာဦးစီးဌာန၏ မျှော်မှန်းချက်၊ ရည်ရွယ်ချက်အပါအဝင် ဈေးကွက်အတွင်း၌ ရောင်းချနေသော ကုန်ပစ္စည်းများတွင် ကုန်စည်အမျိုးအစားအပေါ်မူတည်၍ ကုန်အညွှန်းအမှတ်အသားပြည့်စုံစွာပါရှိရေး၊ စားသုံးသူကာကွယ်ရေးဥပဒေပါ စားသုံးသူများ၏ အခွင့်အရေး(၈)ချက်နှင့် တာဝန်များအား နားလည်သိရှိစေရေးအစရှိသည့် စားသုံးသူအခွင့်အရေးနှင့်ပတ်သက်၍ ဆွေးနွေးခဲ့ပြီး ကုန်အညွှန်းအမှတ်အသား ဖော်ပြထားသည့် အသိပညာပေးလက်ကမ်းစာစောင်များကို ဖြန့်ဝေပေးခဲ့ကြောင်း သိရှိရပါသည်။

DOCA(ဧရာဝတီ)