သတင်းနှင့် လှုပ်ရှားမှုများ

    ပဲခူးတိုင်းဒေသကြီး၊ စားသုံးသူရေးရာကော်မတီအစည်းအဝေး (၁/၂၀၂၃)ကို စားသုံးသူရေးရာဦးစီးဌာန၊ ပဲခူးတိုင်းဒေသကြီးဦးစီးမှူးရုံး၊ အစည်းအဝေးခန်းမ၌ ၃၁-၁-၂၀၂၃ ရက်နေ့၊ နေ့လယ် (၁၃ : ၀၀) နာရီအချိန်တွင် ကျင်းပပြုလုပ်ခဲ့ပြီး တိုင်းဒေသကြီး၊ စားသုံးသူရေးရာကော်မတီ၊ ဒုတိယဥက္ကဋ္ဌဦးဆောင်သော အဖွဲ့ဝင် (၄) ဦးနှင့် ပဲခူးတိုင်းဒေသကြီးဦးစီးမှူးရုံးမှ ဝန်ထမ်း (၅) ဦးတက်ရောက်ခဲ့ကြပါသည်။

     အဆိုပါ အစည်းအဝေးတွင် ပဲခူးတိုင်းဒေသကြီး၊ စားသုံးသူရေးရာကော်မတီဥက္ကဋ္ဌကိုယ်စား အတွင်းရေးမှူးက အွန်လိုင်းမှရောင်းချနေမှုများတွင် စားသုံးသူများနစ်နာမှုမရှိစေရေး အလုပ်ရုံ ဆွေးနွေးပွဲမှ ဆွေးနွေးချက်များကို ပြန်လည်မျှဝေပေးခဲ့ပြီး ၂၀၂၃ ခုနှစ်၊ မတ်လ ၁၅ ရက်နေ့တွင်ကျရောက်မည့် ကမ္ဘာ့စားသုံးသူအခွင့်အရေးများနေ့အခမ်းအနားတွင် ဆောင်ရွက်မည့် လုပ်ငန်းစဉ်များအား ကော်မတီအဖွဲ့ဝင်များက ဆွေးနွေးပေးပါရန် အဖွင့်အမှာစကားပြောကြားခဲ့ကာ စားသုံးသူရေးရာဦးစီးဌာန၊ ပဲခူးတိုင်းဒေသကြီးဦးစီးမှူးရုံး၊ စားသုံးသူရေးရာဌာနခွဲတာဝန်ခံက အမှာစာ(၄)စောင်အပေါ် စားသုံးသူရေးရာကော်မတီက မှတ်တမ်းတင်အတည်ပြုပေးပါရန် တင်ပြဆွေးနွေးခဲ့ပြီး ကော်မတီအဖွဲ့ဝင်များက အမှာစာများအပေါ် ပြန်လည်ဆွေးနွေးခဲ့ပြီး  အစည်းအဝေးကို (၁၄ : ၃၀)နာရီအချိန်တွင် ရုပ်သိမ်းခဲ့ပါသည်။

DOCA(ပဲခူး)

       စားသုံးသူရေးရာဦးစီးဌာန ရခိုင်ပြည်နယ် တောင်ကုတ်ခရိုင်ဦးစီးမှူးနှင့် မာန်အောင်မြို့ နယ်တာဝန်ခံတို့သည် ၂၀၂၃ ခုနှစ် ဖေဖော်ဝါရီလ ၁၀ ရက်နေ့ နံနက် ( ၁၀:၀၀ )နာရီအချိန်တွင်  မာန်အောင်မြို့နယ်၊ ဘုန်းစိုးကြီးကျေးရွာသို့ သွားရောက်ပြီး “ရွှေတိုး” ဆီစက် မြေပဲဆီထုတ်လုပ် ရောင်းချသည့် လုပ်ငန်းရှင် ဦးညီဝင်းစိန်နှင့် တွေ့ဆုံဆွေးနွေးခဲ့ပါသည်။

     ထိုသို့ တွေ့ဆုံဆွေးနွေးရာတွင် ခရိုင်ဦးစီးမှူး ဦးမောင်ကျော်မြင့် (ဦးစီးအရာရှိ)က ထုတ်လုပ်ရောင်းချသည့် မြေပဲဆီများအား သတ်မှတ်အရည်အသွေးပြည့်မီရေး၊ ကျန်းမာရေးနှင့် ညီညွတ်ပြီး ဘေးအန္တရာယ်ကင်းရှင်းသည့် စားသုံးဆီများကို သုံးစွဲနိုင်ရေး၊ ဈေးကွက်အတွင်း ဖြစ်သင့်ဖြစ်ထိုက်သည့် ဈေးနှုန်းများဖြစ်ပေါ်စေရေးတို့အတွက် ဌာနမှ ကြီးကြပ်ဆောင်ရွက်လျက်ရှိသည့်အပြင် စီးပွားရေးလုပ်ငန်းရှင်များအား အထက်ဌာနမှ ထုတ်ပြန်ထားရှိသည့် အမိန့်နှင့်ညွှန်ကြားချက်များ သိရှိလိုက်နာဆောင်ရွက်နိုင်ရန် စီးပွားရေးလုပ်ငန်းရှင်များနှင့် တွေ့ဆုံဆွေးနွေးခြင်းများ ဆောင်ရွက်လျက်ရှိကြောင်း မိမိဆီစက်မှ ထုတ်လုပ်သည့် မြေပဲဆီများအား ဈေးကွက်အတွင်း ဖြန့်ဖြူးရောင်းချရာတွင် ကုန်စည်၏ ကုန်အညွှန်းအမှတ်အသားများအား စားသုံးသူကာကွယ်ရေးဥပဒေပြဌာန်းချက်များ၊ အမိန့်ညွှန်ကြားချက်များနှင့် ကိုက်ညီမှု ရှိ/မရှိ မိမိတို့ ဌာန၏ အတည်ပြုချက်ရယူနိုင်ရေး လာရောက်လျှောက်ထား ရန်လိုအပ်ကြောင်းနှင့် စားသုံးသူကာကွယ် ရေးဥပဒေပါ စီးပွားရေးလုပ်ငန်းရှင်များ၏ တာဝန်များအကြောင်း ဒေသတွင်း စီးပွားရေးလုပ်ငန်းရှင်များအား ထောက်ပံ့အားပေးနေမှု၊ ပြည်တွင်းကုန်သွယ်မှုဖွံ့ဖြိုးတိုးတက်ရေးနှင့် စားသုံးသူ ကာကွယ်ရေးလုပ်ငန်းများဖြင့်လည်း နိုင်ငံစီးပွားရေးတိုးမြှင့်ရေးဖော်ဆောင်အားပေးကူညီ ဆောင်ရွက်နေမှုအခြေအနေတို့အား ရှင်းလင်းဆွေးနွေးခဲ့ကြောင်း သတင်းရရှိပါသည်။

DOCA(ရခိုင်)

     စားသုံးသူရေးရာဦးစီးဌာန၊ မြစ်ကြီးနားခရိုင်ဦးစီးမှူးရုံးမှ ဦးဘောမ်ဇုန်း(ရုံးအုပ်)သည် ၁၃.၂.၂၀၂၃ ရက်နေ့၊ (၁၃:၀၀)နာရီအချိန်တွင် ဝိုင်းမော်မြို့၊အောင်မြေ(၁)ကျေးရွာအုပ်စုရှိ ကုန်မျိုးစုံလက်လီ လက်ကား ရောင်းချသူ စီးပွားရေးလုပ်ငန်းရှင်(၄)ဦးနှင့် တွေ့ဆုံဆွေးနွေးခဲ့ပါသည်။

 ထိုသို့ဆွေးနွေးရာတွင် ဦးဘောမ်ဇုန်း(ရုံးအုပ်)က စားသုံးသူကာကွယ်ရေးဥပဒေရည်ရွယ်ချက်များဖြစ်သည့် စားသုံးသူအခွင့်အရေးများ အပြည့်အဝရရှိစေရန်၊ စားသုံးသူကာကွယ်ရေးနှင်စပ်လျဉ်း၍ စီးပွားရေးလုပ်ငန်းရှင်များဘက်မှလည်း ဥပဒေနှင့်အညီဆောင်ရွက်စေရန်၊ စားသုံးသူတို့ကိုဘေးအန္တရာယ်ကင်းရှင်းမှုမရှိသော ကုန်စည် သို့မဟုတ် ဝန်ဆောင်မှုများနှင့် ယင်းတို့ကိုသုံးစွဲခြင်းကြောင့် ဖြစ်ပေါ်လာသော နစ်နာဆုံးရှုံးမှုများကိုကာကွယ်ပေးရန် စသည့်အချက်များ၊ ၂၀၁၉ စားသုံးသူကာကွယ်ရေးဥပဒေပါ စီးပွားရေးလုပ်ငန်းရှင်များ၏တာဝန်များ၊ ကုန်စည်နှင့်စပ်လျဉ်း၍ အာမခံပေးရမည့်အချက်များ၊ အာမခံပေးထားမှုအပေါ် စားသုံးသူက တောင်းဆိုနိုင်သည့်အခွင့်အရေးများ၊ ကုန်စည်နှင့်ဝန်ဆောင်မှုအပေါ် တာဝန်ရှိမှုအနေဖြင့် တဆင့်ပြန်လည်‌ရောင်းချ ဖြန့်ဖြူးသူများအပေါ်တွင်လည်း တာဝန်ရှိကြောင်း၊ ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ ကုန်စည်အမျိုးအစားအလိုက် သတ်မှတ်ချက်များနှင့်အညီ သိသာထင်ရှားစွာဖော်ပြထားသည့် ကုန်စည်များကိုသာ ရောင်းချဖြန့်ဖြူးရမည်ဖြစ်ကြောင်း ရှင်းလင်းဆွေးနွေးခဲ့ပြီး စားသုံးသူကာကွယ်‌ရေးဆိုင်ရာ အသိပညာပေး လက်ကမ်းစာစောင်နှင့် ကုန်အညွှန်းအမှတ်အသားဖော်ပြခြင်းဆိုင်ရာ လက်ကမ်းစာစောင်များ ဖြန့်ဝေခဲ့ပါသည်။

DOCA(ကချင်)

      စားသုံးသူရေးရာဦးစီးဌာန၊ ကရင်ပြည်နယ်ဦးစီးမှူး ဦးသန်းဦးသည်   (၁၄-၂-၂၀၂၃) ရက်နေ့၊ နံနက် (၁၀:၀၀) နာရီအချိန်တွင် အစည်းအဝေးခန်းမ၌ ဘားအံမြို့ရှိ စီးပွားရေးလုပ်ငန်းရှင်များနှင့် တွေ့ဆုံပြီး ထုတ်ကုန်လုံခြုံစိတ်ချရမှုရှိစေရန်အတွက် ကုန်အညွှန်းအမှတ်အသားဆိုင်ရာ အသိပညာပေး ဆွေးနွေး ပွဲ ကျင်းပပြုလုပ်ခဲ့ကြောင်း သိရှိရသည်။

    အဆိုပါဆွေးနွေးပွဲတွင် ပြည်နယ်ဦးစီးမှူး၊ ဦးသန်းဦးက ကုန်စည်နှင့် ဝန်ဆောင်မှုများ ထုတ်ကုန်လုံခြုံစိတ်ချရမှုရှိစေရန်အတွက် ကုန်စည်များ ထုတ်လုပ်ရောင်းချရာတွင် စီးပွားရေးလုပ်ငန်းရှင်များဘက်မှ လိုက်နာရမည့်အချက်များအကြောင်း၊ ကုန်အညွှန်းအမှတ်အသား ဖော်ပြခြင်းနှင့်စပ်လျဉ်း၍ ကုန်စည်များတွင် မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု သို့မဟုတ် တစ်ခုထက်ပို၍ တွဲလျက်ဖြစ်စေ ဖော်ပြရာ၍ သတ်မှတ်ချက်များနှင့်အညီ ဆောင်ရွက်နိုင်ရန် ကုန်စည်အမျိုးအစားအလိုက် အသေးစိတ်ညွှန်ကြားချက်များကို ရှင်းလင်းပြောကြားပြီး ကုန်စည်များ ပေါ်တွင် ကုန်အညွှန်းအမှတ်အသား ပြည့်စုံမှုရှိစေရေးအတွက် လာရောက်လျှောက်ထားနိုင်ကြောင်းကို အသေးစိတ်ရှင်းလင်းပြောကြားခဲ့ကြောင်း သိရှိရသည်။

DOCA(ကရင်)

      အုတ်တွင်းမြို့နယ်၊ ဥယျာဉ်တော်ကျေးရွာ အခြေခံပညာအထက်တန်းကျောင်းခွဲမှ ကျောင်းသား၊ကျောင်းသူများ သိသင့်သိထိုက်သည့် အသိပညာဗဟုသုတများရရှိစေရန် ရည်ရွယ်၍ အသိပညာပေးဟောပြောပွဲကို ဖေဖော်ဝါရီလ ၈ ရက်နေ့ နံနက်ပိုင်းက ၎င်းကျောင်းအနီးရှိ ဘုန်းတော်ကြီးကျောင်းဓမ္မာရုံတွင် ကျင်းပပြုလုပ်ခဲ့ပါသည်။

       ဟောပြောပွဲတွင် အားကစားနှင့်ကာယပညာဦးစီးဌာန၊ မြို့နယ်အားကစားမှူး ဒေါ်သပြေ က အားကစားနှင့်ကာယပညာသိပ္ပံအကြောင်း သိကောင်းစရာများကိုလည်းကောင်း၊ စားသုံးသူရေးရာဦးစီးဌာန တောင်ငူခရိုင်ဦးစီးမှူးရုံးမှ ဦးစီးမှူး ဦးစောသန်းထိုက်ကျော်က စားသုံးသူကာကွယ်ရေးဆိုင်ရာ သိကောင်းစရာများကိုလည်းကောင်း၊ ပြန်ကြားရေးနှင့်ပြည်သူ့ဆက်ဆံရေးဦးစီးဌာန မြို့နယ်ဦးစီးမှူး ဒေါ်ခင်မူမူဝင်းက စာဖတ်ခြင်း၏အကျိုးကျေးဇူးများကိုလည်းကောင်း ဟောပြောခဲ့ကြပါသည်။

        စားသုံးသူကာကွယ်ရေးဆိုင်ရာ သိကောင်းစရာများနှင့် ပတ်သက်၍ စားသုံးသူရေးရာဦးစီးဌာန ပေါ်ပေါက်လာပုံ၊ စားသုံးသူ၏ အခွင့်အရေးနှင့်တာဝန်များ၊ ထုတ်ကုန်များ လုံခြုံစိတ်ချရမှုရှိစေရေးအတွက် ဈေးကွက်စောင့်ကြည့်စစ်ဆေးဆောင်ရွက်ခြင်းများ၊ ကုန်စည်များဝယ်ယူရာတွင် ကုန်အညွှန်းအမှတ်အသားများကို ဦးစားပေးဖတ်ရှုသင့်သည့်အကြောင်းများ၊ စားသုံးသူနစ်နာ ဆုံးရှုံးမှုများဖြစ်ပေါ်ပါက တိုင်ကြားနိုင်ခြင်းများကို ဟောပြောဆွေးနွေးခဲ့ပါသည်။

           ဟောပြောပွဲသို့ ကျောင်းသား၊ကျောင်းသူ ၁၃၂ ဦး တက်ရောက်ကြောင်း သိရှိရပါသည်။

DOCA(ပဲခူး)