သတင်းနှင့် လှုပ်ရှားမှုများ

           ကချင်ပြည်နယ်စားသုံးသူရေးရာကော်မတီ (၁/၂၀၂၀) ကြိမ်မြောက် လုပ်ငန်းညှိနှိုင်း အစည်းအဝေးကို ကချင်ပြည်နယ်အစိုးရအဖွဲ့ရုံး၊ မြစ်ကြီးနားစီးပွားဖွံ့ဖြိုးရေးစက်မှုဇုန် ကော်မတီ အစည်းအဝေးခန်းမ၌ ၂၇-၁-၂၀၂၀ ရက်နေ့၊ နံနက် ၁၀:၀၀ အချိန်တွင် ကျင်းပဆောင်ရွက်ခဲ့ရာ ကချင်ပြည်နယ် စားသုံးသူရေးရာကော်မတီဝင်များနှင့် ကချင်ပြည်နယ်၊ စားသုံးသူရေးရာဦးစီးဌာနမှ ဝန်ထမ်းများ တက်ရောက်ခဲ့ကြသည်။

          အစည်းအဝေးတွင် ကချင်ပြည်နယ်စားသုံးသူရေးရာကော်မတီ ဉက္ကဌ၊ ကချင်ပြည်နယ် ဘဏ္ဍာ၊ အခွန်၊ စီမံကိန်းနှင့် စီးပွားရေးဝန်ကြီး ဦးဝေလင်းက အဖွင့်အမှာစကားပြောကြားခဲ့ရာတွင် မြန်မာနိုင်ငံစားသုံးသူကာကွယ်ရေးကော်မရှင်က အမိန့်ကြော်ငြာစာအမှတ် ၂/၂၀၁၉ အရ ကချင်ပြည်နယ်စားသုံးသူရေးရာကော်မတီကို အဖွဲ့ဝင်(၉)ဦးဖြင့် ဖွဲ့စည်းထားပြီးဖြစ်သည့်အတွက် ပထမဆုံးအကြိမ်ကော်မတီဝင်အချင်းချင်း တွေ့ဆုံသည့်အခမ်းအနားဖြစ်ကြောင်း၊ ကော်မတီဝင်များ အနေဖြင့် ၂၀၁၉ခုနှစ် စားသုံးသူကာကွယ်ရေးဉပဒေပါကော်မတီ၏ လုပ်ပိုင်ခွင့်နှင့် လုပ်ငန်းတာဝန်များ ကို ကျေကျေညက်ညက်သိရှိအောင်လေ့လာကြရန် လိုအပ်ပါကြောင်း၊ ကချင်ပြည်နယ်စားသုံးသူရေးရာ ကော်မတီ၏ လုပ်ငန်းတာဝန်များသည် ကြီးမားပြီး စားသုံးသူကာကွယ်ရေးလုပ်ငန်းများကို ထိထိရောက်ရောက် ကာကွယ်ဆောင်ရွက်နိုင်ရန်အတွက် ကော်မတီ၏ ရှေ့ဆက်လက် ဆောင်ရွက် မည့်နည်းလမ်း၊ အစီအမံများကို ဝိုင်းဝန်းစဉ်းစားပြီး ဖြေရှင်းရမည့်ကိစ္စများကိုလည်း ကော်မတီဝင် အချင်းချင်း ပေါင်းစပ်ညှိနိုင်းဆောင်ရွက်သွားရန် လိုအပ်ပါကြောင်း ဆွေးနွေးပြောကြားခဲ့ပါသည်။

         ဆက်လက်၍ ကချင်ပြည်နယ် စားသုံးသူရေးရာကော်မတီ အတွင်းရေးမှူး ၊ ကချင်ပြည်နယ် စားသုံးသူရေးရာဦးစီးဌာန ၊ ပြည်နယ်ဦးစီးမှူး ဦးဖေသန်းဝင်းက  ၂၀၁၉ ခုနှစ် စားသုံးသူကာကွယ်ရေး ဥပဒေပါ စားသုံးသူရေးရာကော်မတီဖွဲ့စည်းခြင်း၊ စားသုံးသူရေးရာကော်မတီ၏ လုပ်ပိုင်ခွင့်နှင့် လုပ်ငန်းတာဝန်များ၊ စားသုံးသူရေးရာကော်မတီ၏ စီမံခန့်ခွဲရေး နည်းလမ်းအရ အရေးယူခြင်း ၊  ပုဒ်မ ၆၂ ပါ တားမြစ်ချက်နှင့်ပြစ်မှုပြစ်ဒဏ်များ၊ ကြော်ငြာနှင့် စပ်လျဉ်း၍ တားမြစ်ချက်နှင့် ပြစ်မှုပြစ်ဒဏ်များ ၊ အရောင်းမြှင့်တင်ခြင်းနှင့်စပ်လျဉ်း၍ တားမြစ်ချက်နှင့်ပြစ်မှုပြစ်ဒဏ်များ၊ ထင်ယောင်ထင်မှားဖြစ်စေခြင်းနှင့်ပြစ်မှုပြစ်ဒဏ်များ၊ လိမ်လည်လှည့်ဖြားခြင်းနှင့်ပြစ်မှုပြစ်ဒဏ်များ၊  ပုဒ်မ ၆၇ ပါ  တားမြစ်ချက်နှင့်ပြစ်မှုပြစ်ဒဏ်များ၊ ပုဒ်မ ၆၈ ပါ တားမြစ်ချက်နှင့် ပြစ်မှုပြစ်ဒဏ်များ၊ အယူခံဝင်ခြင်း နှင့် အထွေထွေအပိုင်းများကို ရှင်းလင်းတင်ပြခဲ့ပါသည်။

        ထို့နောက် တက်ရောက်လာသူများက စားသုံးသူကာကွယ်ရေးဉပဒေပြဌာန်းချက်ပါ စားသုံးသူရေးရာကော်မတီ၏ လုပ်ငန်းတာဝန်များ၊ ပြစ်မှုပြစ်ဒဏ်များ၊ စားသုံးသူကာကွယ်ရေးလုပ်ငန်း များကို ထိထိရောက်ရောက်ဆောင်ရွက်ရန်အတွက် ကချင်ပြည်နယ်စားသုံးသူရေးရာကော်မတီ အနေဖြင့် ရှေ့ဆက်လက်ဆောင်ရွက်ရမည့်လုပ်ငန်းစဉ်များနှင့်ပတ်သက်၍ အပြန်အလှန်ဆွေးနွေးခဲ့ကြပါသည်။

ကချင်ပြည်နယ်
စားသုံးသူရေးရာဦးစီးဌာန

      ၂၀၂၀ ပြည့်နှစ် ဇန်နဝါရီ ၂၄ ရက်နေ့တွင် တနင်္သာရီတိုင်းဒေသကြီး၊ စားသုံးသူရေးရာဦးစီးဌာန၊ တိုင်း ဒေသကြီးဦးစီးမှူးရုံးမှ ဝန်ထမ်းများသည် ရေဖြူမြို့နယ်ရှိ အ.မ.က(ပုလဲကူ)နှင့် အ.မ.က(ကညင်ကောက်) ကျောင်းများတွင် စားသုံးသူကာကွယ်ရေး အသိညာပေးဟောပြောပွဲများ ကျင်းပပြုလုပ်ခဲ့ပါသည်။

  အဆိုပါဟောပြောပွဲများတွင် စားသုံးသူရေးရာဦးစီးဌာန၊တနင်္သာရီတိုင်းဒေသကြီးဦးစီးမှူးရုံးမှ တာဝန်ရှိသူများက စားသုံးသူများ၏ အခွင့်အရေးနှင့်တာဝန်များ၊ စားသုံးသူများ နစ်နာဆုံးရှုံးမှုရှိလျှင် တိုင်ကြားနိုင်ကြောင်းနှင့်ဖြေရှင်းဆောင်ရွက်ပေးခဲ့မှုများကိုလည်းကောင်း၊ စားသုံးသူကာကွယ်ရေးဥပဒေ အခန်း(၁၈)ပါ ကုန်အညွှန်းအမှတ်အသားဖော်ပြခြင်း နှင့်စပ်လျဉ်း၍ သတ်မှတ်ချက်များအား လည်းကောင်း၊ ကုန်စည်နှင့် ဝန်ဆောင်မှုများအား ဝယ်ယူသုံးစွဲရာတွင် ထုတ်လုပ်သည့်ရက်စွဲ၊ ကုန်ဆုံးသည့်ရက်စွဲ၊ ထောက်ခံချက်၊ နေရပ်လိပ်စာ အပြည့်အစုံကိုကြည့်ပြီး ဝယ်ယူစားသုံးတတ်စေရေး၊ ပိုးသတ်ဆေးများ/တာရှည်ခံဆေးများ/ဓာတု ဆိုးဆေးများ အသုံးပြုထားသော အစားအသောက်များအား စားသုံးခြင်းကြောင့်ဖြစ်ပေါ်နိုင်သော ဘေးထွက်ဆိုးကျိုးများအကြောင်းကိုလည်းကောင်း အသိပညာပေးဆွေးနွေးပြောကြားခဲ့ပါသည်။ အဆိုပါဟောပြောပွဲသို့ ဆရာ/ဆရာမ၊ ကျောင်းသား/သူ၊ ကျောင်းသားမိဘများ စုစုပေါင်း(၁၄၈)ဦး တက်ရောက်ခဲ့ကြပါသည်။

တနင်္သာရီတိုင်းဒေသကြီး
စားသုံးသူရေးရာဦးစီးဌာန

    စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ပြည်ထောင်စုဝန်ကြီးသည် (၂၅-၁-၂၀၂၀) ရက်နေ့တွင် ရှမ်းပြည်နယ်(အရှေ့ပိုင်း)တာချီလိတ်မြို့နယ်သို့ရောက်ရှိလာခဲ့ရာ ပြည်ထောင်စုဝန်ကြီး နှင့်အတူ ကုန်သွယ်ရေးဦးစီးဌာန ညွှန်ကြားရေးမှူးချုပ်၊ ဒုတိယညွှန်ကြားရေးမှူးချုပ်နှင့် ဌာန တာဝန်ရှိသူများ၊ မြန်မာနိုင်ငံသားများဘဏ် ဒါရိုက်တာအဖွဲ့ ဥက္ကဌနှင့်အဖွဲ့ဝင်များ လိုက်ပါလာကြပြီး နေလည် (၁၂:၄၅)နာရီအချိန်တွင် တာချီလိတ်မြို့သို့ ရောက်ရှိခဲ့ကြပါသည်။ တဆက်တည်းမှာပင် ပြည်ထောင်စုဝန်ကြီးနှင့် အဖွဲ့သည် တာချီလိတ်မြို့ ဖန်မင်ကျေးရွာအုပ်စု၊ဟာကြားမနူးကျေးရွာရှိ ဦးကျဟေး၏ ဘက်စုံစိုက်ပျိုးမွေးမြူရေးခြံသို့ သွားရောက်ကြည့်ရှု့စစ်ဆေးပြီး ပျားလိမ္မော်စိုက်ပျိုးထုတ်လုပ်မှုနှင့် စျေးကွက် တင်ပို့မှုအခြေအနေများ၊ မွေးမြူရေးလုပ်ငန်း ဆောင်ရွက်မှုနှင့်ဆက်စပ်၍ ဒေသနေပြည်သူများ အလုပ်အကိုင်ဖန်တီးပေးနိုင်မှုများကို ကြည့်ရှု့စစ်ဆေးပြီး လုပ်ငန်းရှင်၏ ကုန်သွယ်မှုဖြေလျော့ပေးရေး တင်ပြချက်များအပေါ် လိုအပ်ချက်များကို လမ်းညွှန်မှာကြားခဲ့ပါသည်။ ဆက်လက်၍ ပြည်ထောင်စုဝန်ကြီးနှင့်အဖွဲ့သည် တာချီလိတ်မြို့ရွှေတြိဂံဒေသနှင့် မဲခေါင်မြစ်ကြောင်းရှိ ဝမ်ပုံဆိပ်ကမ်းသို့သွားရောက်ခဲ့ရာ ကုန်သွယ်ရေးဦးစီးဌာနနှင့် ဒေသဆိုင်ရာအဖွဲ့အစည်းများမှ တာဝန်ရှိ သူများကနယ်မြေအခြေအနေများ၊ ကုန်သွယ်မှုပြုနိုင်မည့်အချက်များ၊ နယ်စပ်ဖြတ်ကျော် စီးပွားရေး အရကူးလူးဆက်ဆံမှုအခြေအနေများကို ပြည်ထောင်စုဝန်ကြီး၏ မေးမြန်းချက်များအပေါ် ရှင်းလင်း တင်ပြကြပါသည်။

          (၂၆-၁-၂၀၂၀)ရက်နေ့ နံနက်ပိုင်းတွင် ကျိုင်းလပ်ကုန်သွယ်ရေးစခန်းနှင့် မြန်မာ-လာအို ချစ် ကြည်ရေးတံတားသို့ သွားရောက်ကြည့်ရှု့စစ်ဆေးခဲ့ပြီး ကုန်သွယ်မှုအခြေအနေများကို တာဝန်ရှိသူ များမှ ရှင်းလင်းတင်ပြချက်များကို လုပ်ငန်းလမ်းညွှန်မှုများပြုခဲ့ပါသည်။ ထိုနောက် ပြည်ထောင်စု ဝန်ကြီးနှင့်အဖွဲ့သည် ကျိုင်းလပ်မြို့ ဝမ်ကျင်းဘုန်းတော်ကြီးကျောင်း ဓမ္မာရုံ၌ စီးပွားရေးအခက်အခဲ များ ဖြေရှင်းပေးနိုင်ရေး ဒေသခံပြည်သူလူထုနှင့် တွေ့ဆုံပွဲပြုလုပ်ခဲ့ရာ၌လည်း ဒေသထွက်ကုန်များ အခွန်လျော့ပေါ့ပေးရေး၊ ကြက်၊ ဘဲ တင်ပို့ခွင့်ပြုရေးနှင့် စိုက်ပျိုးမြေများ ငှားရမ်းစိုက်ပျိုးခွင့်ပြုရန် ဒေသခံပြည်သူများမှတင်ပြကြသည့်အတွက် သက်ဆိုင်ရာဌာန တာဝန်ရှိသူများမှပြန်လည်ရှင်းလင်း ဖြေကြားခြင်းနှင့် ပြည်ထောင်စုဝန်ကြီးမှ ဖြည့်စွက်ရှင်းလင်းမှာကြားခဲ့ပါသည်။ နေ့လည်ပိုင်းတွင် ပြည်ထောင်စုဝန်ကြီးနှင့်အဖွဲ့သည် တာချီလိတ်မြို့သို့ ပြန်လည်ထွက်ခွာလာခဲ့ပြီး မယ်ယန်း ကုန်သွယ်ရေးစခန်း၌ ဌာနဆိုင်ရာ (OSS) အဖွဲ့ဝင်များ၊ ကုန်သည်အသင်းအဖွဲ့များဖြင့်တွေ့ဆုံခဲ့ရာ စခန်းတာဝန်ခံမှ ကုန်သွယ်မှုအခြေအနေများကိုတင်ပြပြီး ကုန်သည်အသင်းအဖွဲ့များ၏ တင်ပြချက် များအပေါ် ညွှန်ကြားရေးမှုချုပ်နှင့် ဌာနတာဝန်ရှိသူများမှ ပြန်လည်ရှင်လင်းဖြေကြားပေးခဲ့ကြကာ ပြည်ထောင်စုဝန်ကြီးမှ ဒေသထွက်ကုန်များတိုးမြှင့်တင်ပို့နိုင်ရေး ရော်ဘာနှင့်အခြားသီးနှံများ စျေးကွက်ဝင်  စိုက်ပျိုးထုတ်လုပ်ရေးနှင့်  ရော်ဘာကဏ္ဍ ဖွံ့ဖြိုးတိုးတက်ရေး    နည်းပညာအကူအညီရယူ ဆောင်ရွက်သွားရမည့်ကိစ္စရပ်များ၊ နယ်စပ်ဒေသတွင်ဖြစ်ပေါ်နေသည့် ကုန်သွယ်မှုအခြေအနေများ ကိုရှင်းလင်း၍ နယ်စပ်စခန်းများ ဖွင့်လှစ်ရခြင်းအကြောင်းရင်း၊ တရားမဝင်မှောင်ခိုလုပ်ငန်းများ ဖြစ်ပေါ်ရခြင်းအကြောင်းအရင်းနှင့် လျော့နည်းပပျောက်အောင် ဆောင်ရွက်ရမည့်နည်းလမ်းများကို အသေးစိတ်ရှင်းလင်းပြောကြားကာ ဌာနဆိုင်ရာများ၊ (OSS) အဖွဲ့ဝင်များမှ ညှိနှိုင်းပူးပေါင်း ဆောင်ရွက်ပေးရန် လမ်းညွှန်မှာကြားခဲ့ပါသည်။

      ထိုနောက် တာချီလိတ်မြို့ရှိ တင်မြင့်ရီ သစ်အချောထည်ထုတ်လုပ်သည့်စက်ရုံ၏ လုပ်ငန်းဆောင်ရွက်မှုများကိုသွားရောက်ကြည့်ရှု့စစ်ဆေး၍ ကုန်သွယ်မှုအခက်အခဲများကို ဌာနများမှ ညှိနှိုင်းပေါင်းစပ်ပေးရန်လမ်းညွှန်မှာကြားခဲ့ပြီး (၂၇-၁-၂၀၂၀)ရက်နေ့ နံနက်ပိုင်းတွင် ပြည်ထောင်စုဝန်ကြီး နှင့်အဖွဲ့သည် တာချီလိတ်မြို့၊ဆန်ဆိုင်း(ခ)ရပ်ကွက်၊ဗိုလ်ချုပ်လမ်းပေါ်ရှိ မြန်မာနိုင်ငံသားများဘဏ်လိမီတက်မှ (၄၆)ခုမြောက်(MCB)ဘဏ်ခွဲအား တက်ရောက်ဖွင့်လှစ်ပေးခဲ့ပြီး တာချီလိတ်မြို့ မြန်မာ-ထိုင်း ချစ်ကြည်ရေးတံတားအမှတ်(၁)၊(၂)တို့ကို လှည့်လည်ကြည့်ရှု့စစ်ဆေးရာ ကုန်စည်စီးဆင်းမှု အခြေအနေများ၊ လူဝင်/လူထွက်ကိစ္စရပ်များကို ဌာနဆိုင်ရာတာဝန်ရှိသူများမှ ရှင်းလင်းတင်ပြခဲ့ကြပါသည်။

ရှမ်းပြည်နယ်(ကျိုင်းတုံ)
စားသုံးသူရေးရာဦးစီးဌာန

       ၂၁.၁.၂၀၂၀ ရက်နေ့ နံနက် ၀၉:၃၀ အချိန်တွင် မွန်ပြည်နယ်၊ မော်လမြိုင်မြို့ ကုန်စည်ဒိုင်ခန်းမ၌ မော်လမြိုင်ကုန်စည်ဒိုင်ဖွင့်ပွဲအခမ်းအနားကို ကျင်းပပြုလုပ်ခဲ့ပါသည်။ အဆိုပါအခမ်းအနားသို့ မွန်ပြည်နယ်၊ ဝန်ကြီးချုပ်နှင့် ပြည်နယ်အစိုးရအဖွဲ့ဝင်ဝန်ကြီးများ၊ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန ညွှန်ကြားရေးမှူးချုပ်နှင့် ပြည်နယ်အဆင့်ဌာနဆိုင်ရာ ဝန်ထမ်းများ၊ မော်လမြိုင်ကုန်စည်ဒိုင် အလုပ်အမှုဆောင်ကော်မတီများ၊ National Enlightenment Institute မှတာဝန်ရှိသူများ၊ ဖိတ်ကြားထားသော ဧည့်သည်တော်များ တက်ရောက်ခဲ့ကြပါသည်။ မော်လမြိုင်ကုန်စည်ဒိုင်ဖွင့်ပွဲတွင် ဒေသထွက်ကုန် ပြခန်းများ  ဖွင့်လှစ်ပြသခဲ့ရာ ပြခန်းကြည့်ရှုသူများအား ဒေသထွက်ကုန်ပစ္စည်းများ လက်ဆောင်ပေးခြင်း၊ ဗလာမပါကံစမ်းမဲဖောက်ပေးခြင်းများဖြင့် စည်ကားသိုက်မြိုက်စွာကျင်းပခဲ့ကြောင်း သိရှိရပါသည်။

       ၂၀.၁.၂၀၂၀ရက်နေ့တွင် ပဲခူးတိုင်းဒေသကြီးစားသုံးသူရေးရာဦးစီးဌာနမှဒုခရိုင်ဦးစီးမှူး၊ မြို့နယ်တာဝန်ခံနှင့်ဝန်ထမ်းများသည် ပဲခူးမြို့နယ် တောင်ပို့တရာကျေးရွာ အမက လွန်ကျောင်းနှင့် ဘူးလယ်အင်းကျေးရွာ အမက လွန်ကျောင်းသို့ သွားရောက်၍ ဆရာ/မ (၁၇) ဉီး၊ ကျောင်းသား/သူ (၃၅၈) ဦး၊ ကျောင်းသားမိဘ (၁၁၅) ဦးကိုစားသုံးသူကာကွယ်ပေးရေးဆိုင်ရာ အသိပညာပေး ဟောပြောခဲ့ပါသည်။

          အဆိုပါဟောပြောပွဲတွင် ဒုခရိုင်ဦးစီးမှူး က စားသုံးသူကာကွယ်ပေးရေးဆိုင်ရာ ဥပဒေနှင့် သိကောင်းစရာများကိုဟောပြောခဲ့ပြီး၊ မြို့နယ်တာဝန်ခံ က ကုန်စည်ဝန်ဆောင်နှင့် ပတ်သက်၍ ထုတ်ကုန်လုံခြုံစိတ်ချရမှုရှိစေရေး၊ အစားအသောက်ဘေးအန္တရယ် ကင်းရှင်းရေးနှင့် နစ်နာဆုံးရှုံးမှုများ မဖြစ်ပေါ်ရေးအတွက်အသိပညာပေး ဟောပြောခဲ့ပြီးလက်ကမ်းစာစောင်များ ဖြန့်ဝေခဲ့ကြောင်း သတင်းရ ရှိပါသည်။

ရဲဘုန်း(စ.သ.သ)
ပဲခူးတိုင်းရုံး၊စားသုံးသူရေးရာဦးစီးဌာန