သတင်းနှင့် လှုပ်ရှားမှုများ

     ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ မအူပင်ခရိုင်သည် မိတ်ဖက်ဌာနများနှင့် ပူးပေါင်း၍ မအူပင်မြို့ အခြေခံပညာအထက်တန်းကျောင်း (အ.ထ.က-၂)၌ အသိပညာပေးဟောပြောပွဲကို (၁၄.၇.၂၀၂၃) ရက်နေ့၊ နံနက် (၁၀:၀၀)နာရီအချိန်တွင် ကျင်းပပြုလုပ်ခဲ့သည်။

     ဟောပြောပွဲတွင် အထက်တန်းကျောင်းအုပ် ဆရာမကြီးက အဖွင့်အမှာစကားပြောကြားခဲ့ပြီးနောက်၊ ပြန်ကြားရေးနှင့် ပြည်သူ့ဆက်ဆံရေးဦးစီးဌာနမှ လူငယ်များစာဖတ်ခြင်းအကျိုး၊ မူးယစ်ဆေးဝါးအန္တရာယ်နှင့် လူကုန်ကူးမှုအန္တရာယ်အကြောင်းကို အသိပညာပေးခြင်း၊ အားကစားနှင့် ကာယပညာဦးစီးဌာနမှ အားကစားအဓိပ္ပာယ်နှင့် အားကစားအမျိုးအစားများ၊ အားကစားပြုလုပ်ရခြင်း၏ အကျိုးကျေးဇူးများအကြောင်း အသိပညာပေးခြင်း၊ စားသုံးသူရေးရာ ဦးစီးဌာနမှ မြို့နယ်ဦးစီးအရာရှိ ဦးအောင်ဇော်ဦးက စားသုံးသူများအနေဖြင့် သတိပြုလိုက်နာရမည့်အချက်များ၊  ဘေးအန္တရာယ်ရှိသော ကုန်စည် (သို့မဟုတ်) ဝန်ဆောင် ဆိုသည်မှာ သက်ဆိုင်ရာ အစိုးရဌာန၊ အစိုးရအဖွဲ့အစည်းများက စားသုံးရန် သို့မဟုတ် အသုံးပြုရန်မသင့်ဟု သတ်မှတ်ထုတ်ပြန်ထားသော ကုန်စည် သို့မဟုတ် ဝန်ဆောင်မှုကို ဆိုလိုကြောင်း၊ ထို့ကြောင့် ကုန်အညွှန်းအမှတ်အသားပြည်စုံစွာဖော်ပြပါဝင်သော ကုန်စည်များကို ဦးစားပေးဝယ်ယူ သုံးစွဲကြရန် စားသုံးသူပြည်သူများအနေဖြင့် ကုန်စည်နှင့် ဝန်ဆောင်မှုများ ဝယ်ယူသုံးစွဲရာတွင် နစ်နာဆုံးရှံးမှုများရှိပါက ဆက်သွယ်ဆောင်ရွက်နိုင်သည့် လိပ်စာနှင့် ဖုန်းနံပါတ်များကို ဆက်သွယ်တိုင်ကြားနိုင်ကြောင်း အသိပညာပေး ဟောပြောခဲ့ပြီး ကျောင်းသား/ကျောင်းသူ၊ ဆရာ/ဆရာမ (၁၅၀)ဦး တက်ရောက်ခဲ့ကြောင်း သိရသည်။

DOCA(ဧရာဝတီ)

    ဖျာပုံမြို့နယ်အတွင်းရှိ တစ်ပိုင်တစ်နိုင်လုပ်ကိုင်သော မုန့်မျိုးစုံလုပ်ငန်းဖွံ့ဖြိုးတိုးတက်စေရေး၊   ဈေးကွက်ကျယ်ကျယ်ပြန့်ပြန့်ဖြစ်လာစေရေးနှင့် ထုတ်ကုန်လုံခြုံစိတ်ချရမှုရှိစေရေး စားသုံးသူများ  ဘေးဥပဒ်အန္တရာယ်ကင်းရှင်းစေရေး၊ ထုတ်လုပ်သူများ ပိုမိုအကျိုးစီးပွားဖြစ်ထွန်းလာစေရေး ရည်ရွယ်၍ ၂၀၂၃ခုနှစ်၊ ဇူလိုင်လ(၁၇)ရက်နေ့တွင်  အသေးစားစက်မှုလက်မှုလုပ်ငန်းဦးစီးဌာနနှင့်  စားသုံးသူရေးရာဦးစီး   ဌာနတို့ပူပေါင်း၍ မုန့်မျိုးစုံထုတ်လုပ်လျက်ရှိသော ရွှေဒေါင်းမင်းအလုပ်ရုံသို့ ကွင်းဆင်းခဲ့ပါသည်။

    အဆိုပါအလုပ်ရုံတွင် ထုတ်လုပ်နေသောကိတ်မုန့်အမျိုးမျိုး၊ ပေါင်မုန့်၊ ကွတ်ကီးမုန့်များ၏     ဈေးနှုန်းဈေးကွက်နှင့် ဖြန့်ဖြူးမှုအခြေအနေများ၊ တစ်ရက်ထုတ်လုပ်နိုင်မှုနှင့် အကျိုးအမြတ်ရရှိမှု      အခြေအနေများ၊ မုန့်မွှေစက်၊ မုန့်ဖုတ်စက်၊ ထုပ်ပိုးမှုစက်များ၏ ရင်းနှီးမြုပ်နှံမှုနှင့် သယ်ယူပို့ဆောင်ခ၊   အလုပ်သမားစရိတ်များနှင့် တွက်ခြေကိုက်မှု ရှိ/မရှိမေးမြန်းရာ ကွက်ကီးမုန့်တစ်မျိုးကို တစ်‌ရက်တာထုတ်လုပ်နိုင်မှုအနေဖြင့် (၅၀)ထုပ်လုပ်နိုင်ပြီး တစ်လ(၁၅၀၀)ထုပ်၊ ထုတ်လုပ်နိုင်ကာ ကွတ်ကီးမုန့်တစ်ထုပ်  အသားတင်ကုန်ကျစရိတ်မှာ (၁၅၀၀)ကျပ်၊ တစ်ထုပ်ပြန်ရောင်းဈေး(၂၃၀၀)ကျပ် ဖြစ်သည်။ သယ်ယူခ တံဆိပ်ရိုက်ပြီး စက္ကူအိတ်ခ၊မီးခ၊ စုစုပေါင်းကုန်ကျစရိတ်(၁၅၀)ကျပ် ဖြစ်သည်။ အလုပ်သမားခအနေဖြင့် မိသားစုများဝိုင်းဝန်းလုပ်ကိုင်သဖြင့် ကုန်ကျစရိတ်မရှိ၍ ထုတ်လုပ်သူ၏အကျိုးအမြတ်အနေဖြင့်  တစ်နေ့တာထုတ်လုပ်မှုအတွက် လုပ်ငန်းရှင်အနေဖြင့် အကျိုးအမြတ် (၃၅၀၀၀)ကျပ်ခန့် ရရှိ၍    တစ်လ(၁၅၀၀)ထုပ်ပုံမှန် ထုတ်လုပ်နိုင်ကာ တစ်လအမြတ်မှာ(၁၀၅၀၀၀၀)ကျပ်ရရှိကြောင်း     လုပ်ငန်းရှင်ဦးစည်သူစိုးက တွက်ချက်ပြပါသည်။

    စီးပွားရေးဈေးကွက်သဘောအရ ဈေးကွက်ဝယ်လိုအားအနေဖြင့် လစဉ်ပုံမှန်ထုတ်လုပ်လျက်ရှိပြီး ဖျာပုံခရိုင်အတွင်းရှိ မြို့နယ်များသို့ ဈေးကွက်ချဲ့ထွင် ဖြန့်ဖြူးရောင်းချလျက်ရှိရာ ထုတ်လုပ်သောမုန့်များတွင် ကုန်အညွှန်းအမှတ်အသားဖော်ပြချက်များ  ပြည့်စုံစွာဖော်ပြသွားရန်နှင့် စားသုံးသူများ ဘေးဥပဒ်အန္တရာယ်ကင်းစေရေးဆောင်ရွက်သွားကြရန် အသိပညာ‌ပေးကာ၊ ထုတ်လုပ်မှုဖြစ်စဉ်အား  ဈေးကွက်မရောက်မီနှင့်   ဈေးကွက်ရောက်ပြီး အခြေအနေများကို ဌာနဆိုင်ရာများက ကွင်းဆင်းစစ်ဆေးလျက်ရှိပြီး စားသုံးသူများ လက်ခံလာနိုင်အောင်  အသိပညာပေး  ဆောင်ရွက်လျက်ရှိကြောင်း  တာဝန်ရှိသူများက ဆွေးနွေးခဲ့သည်ဟု သိရသည်။

DOCA(ဧရာဝတီ)

    ဧရာဝတီတိုင်းဒေသကြီး  စားသုံးသူရေးရာဦးစီးဌာန တိုင်းဦးစီးမှူး ဦးစိုးအောင်သည် ၂၀၂၃ခုနှစ်၊ဇူလိုင်လ ၁၈ ရက်နေ့ ၊နံနက် (၁၀:၀၀) နာရီအချိန်တွင် စားသုံးသူရေးရာဦးစီးဌာန ရုံးအမှတ် (၅၂)  နေပြည်တော်၌ Virtual ဖြင့် ကျင်းပပြုလုပ်သော ကွမ်းသီးတိုးချဲ့တင်ပို့နိုင်ရေးနှင့် စပ်လျဉ်းသည့် ညှိနှိုင်းအစည်းအဝေးသို့ ပုသိမ်မြို့မှ ကွမ်းသီးအရောင်းအဝယ်ပြုလုပ်နေသော လုပ်ငန်းရှင် (၂) ဦးနှင့်အတူ တက်ရောက်ခဲ့ပါသည်၊၊

   အစည်းအဝေးတွင် တိုင်းဦးစီးမှူး ဦးစိုးအောင်က တိုင်းအတွင်း ကွမ်းသီးအများဆုံး စိုက်ပျိုးလျက်ရှိသော ခရိုင်၊ မြို့နယ်များနှင့် ကွမ်းသီးစိုက်ဧက၊ တွက်ခြေကိုက်မှု ၊ စိုက်ဧကတိုး၊လျော့ ကုန်ချောထုတ်လုပ်မှုနှင့် ဈေးကွက်ရောင်းချမှုတို့ကို ဆွေးနွေး၍ တက်ရောက်လာသော လုပ်ငန်းရှင်များမှ ဒေသတွင်းစားသုံးမှု၊ ရန်ကုန်ဈေးကွက်သို့ အဓိကတင်ပို့ရောင်းချမှု ၊ဈေးကွက်အခြေအနေ အကျိုးအမြတ်ရရှိမှုနှင့်  ပြည်ပဈေးကွက်သို့ တင်ပို့ရောင်းချမှု အခြေအနေများကို ဆွေးနွေးတင်ပြခဲ့ပါသည်။

DOCA(ဧရာဝတီ)

  အသေးစားကုန်ထုတ်လုပ်ငန်းများဖန်တီးပေးနိုင်ရေးနှင့် ကျေးလက်နေမိသားစုဝင်ငွေတိုးတက်လာစေရေးတို့အတွက် သမဝါယမနှင့်ကျေးလက်ဖွံဖြိုးရေးဝန်ကြီးဌာန၊ ကရင်ပြည်နယ်၊ အသေးစားစက်မှုလက်မှုလုပ်ငန်းဦးစီးဌာနက ကရင်ပြည်နယ်၊ ဘားအံမြို့၊ တောင်ကလေးကျေးရွာတွင် တောင်ကလေးဂျပ်ခုတ်လုပ်ငန်းစီမံကိန်းကို ဆောင်ရွက်မည်ဖြစ်ကြောင်းသိရသည်။

      ယခုစီမံကိန်းအား အသေးစားကုန်ထုတ်လုပ်ငန်းများဖန်တီးပေးနိုင်ရေးနှင့် ကျေးလက်နေမိသားစုဝင်ငွေတိုးရေးစီမံကိန်း (သို့မဟုတ်) သိန်း၁၀၀စီမံကိန်းဟုခေါ်ဆိုပြီး စီမံကိန်းဆောင်ရွက်ရာတွင် ဒေသနှင့်ကိုက်ညီသော အသေးစားကုန်ထုတ်လုပ်ငန်းတစ်ခုရွေးချယ်ကာ စိတ်ပါဝင်စားသော ဒေသခံ၁၀ဦးအား စီမံကိန်းကာလအတွင်း သင်ကြားပို့ချပေးသွားမည်ဖြစ်ပြီး ၎င်းသင်တန်းသား၁၀ဦးအနက် အမှန်တကယ်ဆောင်ရွက်နိုင်မည့် ၅ဦးကို ထပ်မံစိစစ်ရွေးချယ်ကာ စီမံကိန်းကာလအတွင်း နောက်ပိုင်းလုပ်ငန်းလုပ်ကိုင်ဆောင်ရွက်နိုင်ရန်အတွက် အစိုးရ၏မတည်ပေးသော ကျပ်သိန်း၁၀၀မှ စက်ကိရိယာများရင်းနှီးထောက်ပံ့ပေးခြင်းဖြင့် လုပ်ငန်းရှင်များပေါ်ထွန်းလာစေရေး ရည်ရွယ်ကြောင်းသိရသည်။

   အသေးစားကုန်ထုတ်လုပ်ငန်းများဖန်တီးပေးနိုင်ရေးနှင့် ကျေးလက်နေမိသားစုဝင်ငွေတိုးရေးစီမံကိန်းနှင့်ပတ်သက်၍ ကရင်ပြည်နယ်တွင် စီမံကိန်းဆောင်ရွက်မည့် ဒေသ၆ခုကိုရွေးချယ်ထားပြီး ယခုဆောင်ရွက်မည့် ဘားအံမြို့၊ တောင်ကလေးဂျပ်ခုတ်စီမံကိန်းမှာ ပထဦးဆုံးအကောင်အထည်ဖော်မည့်စီမံကိန်းဖြစ်ကြောင်းနှင့် စီမံကိန်းကြီးကြပ်သူများအဖြစ် အသေးစားစက်မှုလက်မှုလုပ်ငန်းဦးစီးဌာန၊ အထွေထွေအုပ်ချုပ်ရေးဦးစီးဌာန၊ စီမံကိန်းရေးဆွဲရေးဦးစီးဌာနနှင့် စားသုံးသူရေးရာဦးစီးဌာနတို့က  ကြီးကြပ်ဆောင်ရွက်သွားမည်ဖြစ်ကြောင်းသတင်းရရှိသည်။

DOCA(ကရင်)

    ၂၀၂၃ ခုနှစ်၊ ဇူလိုင်လ၊ ၂၁ ရက်နေ့ ၊ နံနက် ၀၉:၃၀ နာရီအချိန်တွင် စားသုံးသူရေးရာဦးစီးဌာန၊ တနင်္သာရီတိုင်းဒေသကြီး၊ ထားဝယ်မြို့မှ စစ်ဆေးရေးအရာရှိနှင့် ဝန်ထမ်းများသည် မြန်မာနိုင်ငံရဲတပ်ဖွဲ့၊ အစားအသောက်နှင့်ဆေးဝါးကွပ်ကဲရေးဦးစီးဌာန၊ ပြည်သူ့ကျန်းမာရေးဦးစီးဌာန၊ စည်ပင်သာယာရေးအဖွဲ့တို့နှင့်အတူ ထားဝယ်မြို့မစျေးအတွင်းရှိ စားသောက်ကုန်ပစ္စည်းအမျိုမျိုး အရောင်း ဆိုင်များကို စျေးကွက်စောင့်ကြည့်စစ်ဆေးခဲ့ပါသည်။

  အဆိုပါ စျေးကွက်စောင့်ကြည့်စစ်ဆေးရာတွင် စားသုံးသူပြည်သူများ‌ ဘေးအန္တရာယ်ကင်းရှင်းစွာ ဝယ်ယူသုံးစွဲနိုင်စေရေးအတွက် စျေးကွက်အတွင်း မြန်မာဘာသာနှင့် အခြားဘာသာတစ်ခုခုနှင့်ဖြစ်စေ တွဲလျက်ဖော်ပြထားသော ကုန်အညွှန်းအမှတ်အသားများ ပြည့်စုံမှန်ကန်စွာပါရှိသည့် စားသောက်ကုန်ပစ္စည်းများကိုသာ ရောင်းချနေမှု ရှိ/မရှိနှင့် သက်တမ်းလွန် စားသောက်ကုန်ပစ္စည်းများ ရောင်းချနေမှု ရှိ/မရှိ စစ်ဆေးခြင်းနှင့် အသိပညာပေးလက်ကမ်းစာစောင်များ ဖြန့်ဝေခဲ့ကြောင်း သိရှိရပါသည်။

DOCA(တနင်္သာရီ)