သတင်းနှင့် လှုပ်ရှားမှုများ

    မကွေးတိုင်းဒေသကြီး၊ ချောက်ခရိုင်၊ ချောက်မြို့မစျေး၌ ပလတ်စတစ်လျှော့ချရေးနှင့် စားသုံးသူဘေးအန္တရာယ်ကင်းရှင်းစေရေးအတွက် (၁၇.၇.၂၀၂၃)ရက်နေ့ နံနက်(၀၉:၀၀)နာရီအချိန်တွင် ကွင်းဆင်း စစ်ဆေးခဲ့ပါသည်။

  ထိုသို့ စစ်ဆေးရာတွင် မြို့နယ်အထွေထွေအုပ်ချုပ်ရေးဦးစီးဌာန ဒု-ဦးစီးမှူး ဦးဇော်မျိူးဆွေ၊ မြို့နယ်စည်ပင်သာယာရေးအဖွဲ့ ဦးစီးအရာရှိ ဒေါ်လတ်လတ်ဌေးနှင့် ဝန်ထမ်းများ၊ မြို့နယ်စားသုံးသူရေးရာဦးစီးဌာန မြို့နယ်တာဝန်ခံ ဒေါ်မြတ်မြတ်မိုးနှင့် ဒု-ဦးစီးမှူး ဒေါ်ချိုဝေလွင်တို့ ပူးပေါင်း၍ ချောက် မြို့မစျေးတွင် တနင်္လာနေ့တိုင်း မြို့မစျေးအတွင်းနှင့် အပြင်တွင် ပလတ်စတစ်အိတ် မသုံးစွဲရဟု သတ်မှတ်ထားရှိပြီး ပလတ်စတစ်အိတ်အစား အင်ဖတ်၊ ငှက်ပျောဖတ်၊ သတင်းစာစက္ကူတို့ဖြင့် အစားထိုးထုပ်ပိုးသုံးစွဲစေရေးအတွက် လိုက်လံကွင်းဆင်းစစ်ဆေးပြီး စားသုံးဆီအမျိုးမျိုးရောင်းချသော စျေးသည်များနှင့် တွေ့ဆုံကာ စားသုံးသူကာကွယ်ရေးဥပဒေ (၂၀၁၉)အခန်း(၁၈)၊ ပုဒ်မ(၄၁)၊ ပုဒ်မခွဲ (ခ)၊ (ဆ)ပါ ကုန်စည်များတွင် ကုန်အညွှန်းအမှတ်အသားပြည့်စုံစွာ ပါဝင်ဖော်ပြရန်၊ မြန်မာဘာသာဖြင့်မဖြစ်မနေ  ပါဝင်ဖော်ပြထားသည့် ကုန်စည်များကိုသာ ရောင်းချရန်၊ စားသုံးဆီအမျိုးမျိုးထုတ်လုပ်ရောင်းချဖြန့်ဖြူးသော စီးပွားရေးလုပ်ငန်းရှင်များအနေဖြင့် ထုတ်ပြန်ထားသော ညွှန်ကြားချက်များအတိုင်း လိုက်နာ ဆောင်ရွက်ရန် စားသုံးသူကာကွယ်ရေးဥပဒေ (၂၀၁၉)ပါ စီးပွားရေးလုပ်ငန်းရှင်၏တာဝန်များ၊ တားမြစ်ချက်များ၊ ပြစ်မှုပြစ်ဒဏ်များစသည်တို့ကို အသိပညာပေးရှင်းလင်းခဲ့ပါသည်။

    ထို့နောက် မြို့မစျေးကြီးရှိ အများသုံးသန့်စင်ခန်းရှိ ရေလှောင်ကန်များ၌ အဘိတ်ဆေးခတ်ခြင်း၊ စျေးမီးဘေးအန္တရာယ် ကြိုတင်ကာကွယ်ရေးအတွက် စျေးအတွင်းရှိ မီးလောင်လွယ်ကူသော ဂျပ်ဖာ၊ ကတ်ထူစက္ကူ၊ မိုးကာအစုတ်အပြဲများ၊ ဆိုင်အမိုးပေါ်ရှိ သစ်ရွက်ခြောက် အမှိုက်များရှင်းလင်းဆောင်ရွက်ခြင်းတို့အပြင် မြို့မစျေးကြီး၏ မီးငြိမ်းသတ်စက်များဖြင့် စက်အသင့်၊ လူအသင့်၊ ရေအသင့်၊ စက်သုံးဆီ အသင့်ထားရှိဆောင်ရွက်မှုများကိုပါ ကွင်းဆင်းစစ်ဆေးခဲ့ကြောင်း သိရှိရပါသည်။

DOCA(မကွေး)

     မြင်းခြံမြို့၊ အခြေခံပညာအထက်တန်းကျောင်း အ-ထ-က (၁) ၌ ၂၀၂၃ခုနှစ်၊ ဇူလိုင်လ (၇) ရက်နေ့၊ နံနက် (၁၀:၀၀) နာရီအချိန်တွင် မြင်းခြံခရိုင်၊ စားသုံးသုံးသူရေးရာဦးစီးဌာန၊ ခရိုင်ပြန်ကြားရေးနှင့်ပြည်သူ့ဆက်ဆံရေးဦးစီးဌာနတို့ပူးပေါင်း၍ အသိပညာပေး ဟောပြောဆွေးနွေးမှုများဆောင်ရွက်ခဲ့ပါသည်။

    ရှေးဦးစွာ မြင်းခြံခရိုင်စားသုံးသူရေးရာဦးစီးဌာန၊ ခရိုင်ဦးစီးမှူး ဦးမောင်ထူးက အဖွင့်အမှာစကားပြောကြားခဲ့ပြီးနောက် စားသုံးသူရေးရာဦးစီးဌာန၊ မြင်းခြံမြို့နယ်တာဝန်ခံ ဦးတင်ဇော်ထွေး (ဦးစီးမှူး) က စားသုံးသူကာကွယ်ရေးနှင့်ပတ်သက်၍ စားသုံးသူများ၏အခွင့်အရေးများ၊ စားသုံးသူများလိုက်နာရမည့်တာဝန်များအကြောင်း၊ စီးပွားရေးလုပ်ငန်းရှင်များ၏တာဝန်များအကြောင်း၊ တားမြစ်ချက်များအကြောင်းနှင့် စားသုံးသူများအနေဖြင့် ကုန်စည်များဝယ်ယူသုံးစွဲရာတွင် ကုန်အညွှန်းအမှတ်အသားများပြည့်စုံစွာ မြန်မာဘာသာဖြင့်ထည့်သွင်းဖော်ပြထားသော ကုန်ပစ္စည်းများကိုသာ ရွေးချယ်ဝယ်ယူသုံးစွဲကြရန်ဖြစ်ပါကြောင်း၊ ကုန်အညွှန်းအမှတ်အသားများကို မြန်မာဘာသာဖြင့်ဖော်ပြထားခြင်းမရှိသောကုန်ပစ္စည်းများမှာ တရားမဝင်သော၊ လုံခြုံစိတ်ချရမှုမရှိသော ကုန်ပစ္စည်းများဖြစ်သည့်အတွက် သတိပြုရှောင်ရှားကြရန်လိုအပ်ပါကြောင်း၊ စားသုံးသူများနစ်နာဆုံးရှုံးမှုများရှိလာပါက တိုင်းဒေသကြီး/ပြည်နယ်နှင့် ခရိုင်ရုံးများတွင်ဖွင့်လှစ်ထားသော စားသုံးသူသတင်းပြန်ကြားရေးနှင့်တိုင်ကြားမှုလက်ခံဆောင်ရွက်ရေးစင်တာ (CICC) ရုံးများတွင် တိုင်ကြားနိုင်ပါကြောင်း၊ Online မှလည်းတိုင်ကြားနိုင်ပါကြောင်း၊ Consumer Call Center နံပါတ် (၁၅၃၅) သို့လည်း ရုံးချိန်အတွင်း ဆက်သွယ်မေးမြန်းဆောင်ရွက်နိုင်ပါကြောင်း၊ မိမိတို့စားသုံးသူရေးရာဦးစီးဌာန၏ Website မှလည်းတိုင်ကြားနိုင်ပါကြောင်းနှင့် ဦးစီးဌာနအကြောင်း၊ ဌာန၏လုပ်ငန်းဆောင်ရွက်ချက်များအကြောင်း၊ ကုန်သွယ်မှုသတင်းများအကြောင်း၊ ကွင်းဆင်းဆောင်ရွက်မှုသတင်းများနှင့် ဥပဒေအကြောင်းအရာများကိုလည်းဝင်ရောက်ကြည့်ရှုလေ့လာနိုင်ပါကြောင်း၊ ဌာန၏ Website မှာ www. doca. gov. mm ဖြစ်ပါကြောင်း၊ စားသုံးသူကာကွယ်ရေးလုပ်ငန်းများဆောင်ရွက်ရာတွင်  သက်ဆိုင်ရာဌာနများ၊ အသင်းအဖွဲ့များအပြင် စားသုံးသူများကိုယ်တိုင်ပါဝင်မှသာ ပို၍ထိရောက်အောင်မြင်နိုင်မည်ဖြစ်ပါကြောင်း၊ သို့ဖြစ်ပါ၍ စားသုံးသူများအနေဖြင့် အားလုံးအကျိုးအတွက် ပူးပေါင်းပါဝင်ပေးကြပါရန် ဆန္ဒပြုပါကြောင်း စသည်ဖြင့် အကျယ်တဝင့်ဟောပြောဆွေးနွေးခဲ့ပါသည်။ ဆက်လက်၍  ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ ဒေါ်အေးအေးနွဲ့ (လက်ထောက်ညွှန်ကြားရေးမှူး) က စာဖတ်ခြင်း၏အကျိုးကျေးဇူးများအကြောင်းကို ဟောပြောဆွေးနွေးခဲ့ပြီး အခြေခံပညာအထက်တန်းကျောင်း အ-ထ-က (၁) ၏ ကျောင်းအုပ်ဆရာမကြီး ဒေါ်တင်တင်ဝင်းက ယခုကဲ့သို့အသိပညာများလာရောက်ဟောပြောပေးပါသော သက်ဆိုင်ရာဌာနများမှ တာဝန်ရှိသူများအား ကျေးဇူးတင်ရှိပါကြောင်း ပြောကြားခဲ့ပါသည်။ အဆိုပါဟောပြောပွဲသို့ ကျောင်းအုပ်ဆရာမကြီးနှင့် ဆရာ/ဆရာမများ၊ ကျောင်းသား/ကျောင်းသူ (၂၁၀) ဦး၊ ဌာနဆိုင်ရာ (၅) ဦး၊ စုစုပေါင်း (၂၁၅) ဦးတက်ရောက်ခဲ့ကြကြောင်း သိရှိရပါသည်။

DOCA(မန္တလေး)

    မန္တလေးတိုင်းဒေသကြီး၊ စားသုံးသူရေးရာဦးစီးဌာန၏ အစည်းအဝေးခန်းမတွင် ၂၀၂၃ခုနှစ်၊ ဇူလိုင်လ (၁၈) ရက်နေ့၊  နံနက် (၁၀:၀၀) နာရီအချိန်တွင် တရုတ်ပြည်သူ့သမ္မတနိုင်ငံသို့  ဆန်နှင့်ဆန်ကွဲတင်ပို့ရန် GACC မှတ်ပုံတင်ခွင့်ရရှိရေးအတွက် မန္တလေးတိုင်းဒေသကြီးအတွင်းရှိ ကုမ္မဏီ (၁၃) ခုမှ လုပ်ငန်းရှင်များနှင့်တွေ့ဆုံ၍ ဆွေးနွေးပွဲကျင်းပပြုလုပ်ခဲ့ပါသည်။

   အဆိုပါဆွေးနွေးပွဲသို့ စားသုံးသူရေးရာဦးစီးဌာန၊ ဒုတိယတိုင်းဒေသကြီးဦးစီးမှူး၊ ကျောက်ဆည်ခရိုင်ဦးစီးမှူး၊ မြန်မာကုန်ပစ္စည်းစစ်ဆေးရေးနှင့် စမ်းသပ်မှုလုပ်ငန်းလိမိတက်မှ စစ်ဆေးရေးမှူးနှင့် မန္တလေးတိုင်းဒေသကြီး၊ စားသုံးသူရေးရာဦးစီးဌာနမှ အရာထမ်း၊ အမှုထမ်းများနှင့် ဖိတ်ကြားထားသည့် လုပ်ငန်းရှင်များတက်ရောက်ခဲ့ပါသည်။ မြန်မာနိုင်ငံနှင့် တရုတ်ပြည်သူ့သမ္မတနိုင်ငံ GACC တို့အကြား လက်မှတ်ရေးထိုးထားသည့် SPS Protocol အရ ဆန်နှင့်ဆန်ကွဲတင်ပို့ရန် မှတ်ပုံတင်ခွင့်ရရှိရေးအတွက် ကုမ္ပဏီများအနေဖြင့် သတ်မှတ်ချက်များနှင့်အညီ ဆောင်ရွက်နိုင်ရေးအတွက် ယခုကဲ့သို့ ဆွေးနွေးပွဲကျင်းပရခြင်းဖြစ်ကြောင်း၊ ဆွေးနွေးပွဲသို့တက်ရောက်လာသည့် လုပ်ငန်းရှင်များအနေဖြင့် မိမိတို့စက်ရုံများ၊ သိုလှောင်ရုံများ၊ SPS Protocol ပါ သတ်မှတ်ချက်များနှင့်အညီသိရှိပြီး လိုက်နာဆောင်ရွက်နိုင်စေရန်နှင့် GACC မှတ်ပုံတင်ခွင့်ရရှိရေးအတွက်  သတ်မှတ်ချက်များနှင့်အညီ ကိုက်ညီမှုရှိစေရေး၊ လုပ်ငန်းများဆောင်ရွက်ရာတွင် အခက်အခဲမရှိစေရန်နှင့် အရည်အသွေးပြည့်ဝသော ဆန်နှင့်ဆန်ကွဲများတင်ပို့နိုင်ရေး၊   ကုန်သွယ်မှုလုပ်ငန်းများတိုးမြှင့်လာစေရန်အတွက်ရည်ရွယ်၍ SPS Protocol ပါ သတ်မှတ်ချက်များနှင့်ကိုက်ညီမှုရှိ/မရှိ စစ်ဆေးမည့်အချက်များကို လုပ်ငန်းရှင်များအား သိရှိစေရန်ရည်ရွယ်၍ ဆွေးနွေးခြင်းဖြစ်ကြောင်း သိရပါသည်။

     ကွင်းဆင်းစစ်ဆေးခြင်းဆောင်ရွက်သည့်အခါ လုပ်ငန်းရှင်များအနေဖြင့် ဝိုင်းဝန်းကူညီဆောင်ရွက်ပေးကြရန်နှင့် ဆန်နှင့်ဆန်ကွဲများကို SPS Protocol ပါ သတ်မှတ်ချက်များနှင့်အညီ လိုက်နာကျင့်သုံးခြင်းအားဖြင့် ဒေသတွင်းရှိ လုပ်ငန်းရှင်များအနေဖြင့် ကုန်ထုတ်လုပ်ရာတွင် အလေ့အကျင့်ရရှိလာပြီး သက်ဆိုင်ရာများက ကုန်ပစ္စည်းများကို Food Safety နှင့်အညီ ထုတ်လုပ်လာနိုင်ပြီး မြန်မာ့ထုတ်ကုန်များသည် တရုတ်နိုင်ငံသို့သာမက အခြားနိုင်ငံများသို့ပါ တင်ပို့နိုင်မည်ဖြစ်ပါကြောင်း ဆွေးနွေးခဲ့မှုများအရ သိရှိရပါသည်။

DOCA(မန္တလေး)

    စားသုံးသူရေးရာဦးစီးဌာန၊ မကွေးတိုင်းဒေသကြီး၊ ဂန့်ဂေါခရိုင်ဦးစီးမှူးရုံးမှ ဒု-ဦးစီးမှူး ဒေါ်ဇာဇာချိုဦးနှင့် အဖွဲ့သည် တိုင်းဒေသကြီးဦးစီးမှူး၏လမ်းညွှန်မှုနှင့် ပခုက္ကူခရိုင်ဦးစီးမှူး၏ကြီးကြပ်ကွပ်ကဲမှုတို့ဖြင့် စားသုံးသူပြည်သူများဘေးအန္တရာယ်ကင်းရှင်းစေရေးနှင့် ထုတ်ကုန်များလုံခြုံစိတ်ချရမှုရှိစေရေးတို့အတွက် (၁၂-၇-၂၀၂၃) ရက်နေ့၊ နံနက် (၁၀:၀၀) နာရီအချိန်တွင် ဂန့်ဂေါမြို့၊ မြို့မဈေးအတွင်းရှိ ကုန်စုံဆိုင် (၄) ဆိုင်တွင် သက်တမ်းလွန်ကုန်ပစ္စည်းများရောင်းချနေမှုရှိ/မရှိ၊ ကုန်အညွှန်းအမှတ်အသားနှင့်စပ်လျဉ်း၍ မြန်မာဘာသာဖြင့်ဖော်ပြထားခြင်းရှိ/မရှိနှင့် ကုန်အညွှန်းအမှတ်အသားများပြည့်စုံစွာဖော်ပြထားခြင်းရှိ/မရှိတို့ကို ဈေးကွက်စောင့်ကြည့်စစ်ဆေးခဲ့ပါသည်။        

      ဒေါ်ဇာဇာချိုဦးနှင့် အဖွဲ့သည် ဈေးကော်မတီ၊ စည်ပင်သာယာရေးအဖွဲ့များနှင့်ပူးပေါင်း၍ ဈေးကွက်စောင့်ကြည့်စစ်ဆေးခဲ့ကြရာ ကုန်မျိုးစုံရောင်းချနေသောဆိုင်ရှင်များအား ထိုင်းဘာသာဖြင့် ကုန်အညွှန်းအမှတ်အသားဖော်ပြထားသောအချိုရည်များကို ဈေးကွက်အတွင်း ရောင်းချခြင်းရှိ/မရှိနှင့်  စားသုံးသူကာကွယ်ရေးဥပဒေ ၂၀၁၉ အခန်း (၁၈)၊ ပုဒ်မ (၄၁) အရ ကုန်စည်များတွင် ကုန်အညွှန်းအမှတ်အသားပြည့်စုံစွာဖော်ပြထားသည့် ကုန်စည်များကိုသာရောင်းချရန်၊ မြန်မာနိုင်ငံစားသုံးသူကာကွယ်ရေးကော်မရှင်ကထုတ်ပြန်ထားသည့် ညွှန်ကြားချက်အမှတ် (၂/၂၀၁၉) နှင့်အညီ ပြည့်စုံစွာဖော်ပြလာစေရေးနှင့် မြန်မာဘာသာဖြင့်ဖော်ပြရမည့် ကုန်ပစ္စည်းအမျိုးအမည်၊ အရွယ်အစား၊ အရေအတွက် (သို့မဟုတ်) အသားတင်ပမာဏ၊ ထားသိုသိမ်းဆည်းမှုအညွှန်း၊ ဓာတ်မတည့်ကြောင်းဖော်ပြချက်တို့ကို မဖြစ်မနေထည့်သွင်းဖော်ပြရမည်ဖြစ်ပြီး ထုတ်လုပ်သည့်ရက်စွဲနှင့် သက်တမ်းကုန်ဆုံးသည့်ရက်စွဲများကိုလည်း ထည့်သွင်းဖော်ပြရမည်ဖြစ်ကြောင်း၊ ကုန်အညွှန်းအမှတ်အသားပြည့်စုံစွာဖော်ပြထားခြင်းမရှိသော ကုန်စည်များရောင်းချသည်ကိုစစ်ဆေးတွေ့ရှိ ရပါက စားသုံးသူကာကွယ်ရေးဥပဒေအရ အရေးယူဆောင်ရွက်သွားမည်ဖြစ်ကြောင်းနှင့် စားသုံးသူကာကွယ်ရေးဥပဒေအခန်း (၁၀) ပါ စီးပွားရေးလုပ်ငန်းရှင်၏တာဝန်များနှင့်  တားမြစ်ချက်များ၊ ပြစ်မှုပြစ်ဒဏ်များအကြောင်းတို့ကို အသိပေးပြောကြားခဲ့ပြီး စားသုံးသူအသိပညာပေးလက်ကမ်းစာစောင်များဖြန့်ဝေခဲ့ကြောင်း သတင်းရရှိပါသည်။

DOCA(မကွေး)

   စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူး၏လမ်းညွှန်မှုနှင့် ပခုက္ကူခရိုင်ဦးစီးမှူး၏ကြီးကြပ်မှုတို့ဖြင့် ဒုတိယခရိုင်ဦးစီးမှူး ဦးဇော်ထွန်းဦးနှင့်ဝန်ထမ်းများအဖွဲ့သည် စားသုံးသူအခွင့်အရေးနှင့် စားသုံးသူအကျိုးစီးပွားကိုကာကွယ်ရန်အတွက် (၁၂-၇-၂၀၂၃) ရက်နေ့၊ နံနက် (၀၉:၀၀) နာရီအချိန်တွင် ပခုက္ကူမြို့၊ အမှတ် (၁) ရပ်ကွက်၊ အ-ထ-က (၅) ကျောင်း၌ စားသုံးသူကာကွယ်ရေးအသိပညာပေးဟောပြောပွဲကျင်းပပြုလုပ်ခဲ့ပါသည်။

    အဆိုပါအသိပညာပေးဟောပြောပွဲတွင် ကျောင်းအုပ်ဆရာမကြီးက ကြိုဆိုနှုတ်ခွန်းဆက်စကားပြောကြားခဲ့ပြီးနောက် ဒုတိယခရိုင်ဦးစီးမှူးက ဌာန၏သမိုင်းကြောင်းနှင့် လုပ်ငန်းဆောင်ရွက်ချက်များ၊ ဌာန၏မျှော်မှန်းချက်၊ ရည်မှန်းချက်များနှင့် ဟောပြောပွဲကျင်းပပြုလုပ်ခြင်း၏ရည်ရွယ်ချက်မှာ စားသုံးသူများအနေဖြင့် စားသုံးသူအခွင့်အရေးများကိုသိရှိနားလည်ပြီး နစ်နာဆုံးရှုံးမှုများဖြစ်ပေါ်လာပါက တိုင်ကြားဆောင်ရွက်နိုင်ကြောင်း၊ ကုန်စည်များကိုဝယ်ယူသုံးစွဲရာတွင်လည်း လုံခြုံစိတ်ချရမှုရှိစေရေးအတွက် ကုန်အညွှန်းအမှတ်အသားဖော်ပြချက်များမှာလည်းအရေးပါကြောင်း ပြောကြားခဲ့ပါသည်။

    ဆက်လက်၍ ဒု-ဦးစီးမှူး ဦးဇော်မင်းဦးက စားသုံးသူကာကွယ်ရေးဥပဒေပါ အခန်း (၁၈) မှ ကုန်အညွှန်းအမှတ်အသားများနှင့်ပတ်သက်၍ ကုန်စည်များတွင်ပါဝင်ရမည့်အချက်များကို ရှင်းလင်းဆွေးနွေးခဲ့ပြီး ဒု-ဦးစီးမှူး ဒေါ်မျိုးသန္တာဝင်းက စားသုံးသူများသည် စားသုံးသူ၏အခွင့်အရေးများသိရှိရန်လိုအပ်ကြောင်း၊ အခွင့်အရေးများသိရှိပြီး ရယူနိုင်မှသာလျှင် ဘေးအန္တရာယ်ကင်းရှင်းစွာသုံးစွဲခွင့်နှင့် နစ်နာမှုများအတွက် တိုင်ကြားနိုင်ခွင့်နှင့် ပြန်လည်ကုစားနိုင်ခွင့်များရှိပြီး နောင်အနာဂတ်တွင် ပတ်ဝန်းကျင်ကောင်းများ၌ နေထိုင် နိုင်မည်ဖြစ်ကြောင်း၊ ထို့နောက် စားသုံးသူများလိုက်နာရမည့်တာဝန် (၄) ချက်ကိုလည်း အကျယ်တဝင့်ရှင်းလင်းဆွေးနွေးခဲ့ပါသည်။ အဆိုပါဟောပြောပွဲသို့ ဆရာ/ဆရာမ (၆) ဦး၊ ကျောင်းသား/ကျောင်းသူ (၁၃၂) ဦး၊ စုစုပေါင်း (၁၃၈) ဦးတက်ရောက်ခဲ့ကြကြောင်းသိရှိရပါသည်။

DOCA(မကွေး)